“Bililhon Ba ang Gasto Niini?,” Liahona, Ago. 2023.
Mga Tingog sa mga Santos sa Ulahing mga Adlaw
Bililhon Ba ang Gasto Niini?
Nailhan nako ang tingog sa Espiritu Santo ug gidawat ang presyo sa drayber sa taksi aron sa pagdala kanamo ngadto sa simbahan.
Litrato sa pamilya sa maayong kabubut-on sa tagsulat
Tungod sa mga rason nga may kalabotan sa trabaho, gipadala nako ang akong tulo ka anak nga babaye aron mogahin og 15 ka adlaw uban ang akong inahan sa gamay nga lungsod sa Itarema, sa Brazilian nga estado sa Ceará. Ang kinadul-an nga yunit sa Ang Simbahan ni Jesukristo sa mga Santos sa Ulahing mga Adlaw mga 55 ka milya (60 km) ang gilay-on—usa ka branch sa Itapipoca.
Nabalaka ko nga ang akong mga anak nga babaye dili makaambit sa sakramento sulod sa duha ka Dominggo. Ang akong inahan usa ka matinud-anon nga miyembro, apan dili siya makabiyahe paingon sa simbahan uban sa akong tulo ka anak nga babaye ug sa tulo ka anak nga babaye sa akong igsoon nga babaye, kinsa mibisita usab.
Human sa duha ka semana, mibiyahe ko sa usa ka Sabado paingon sa Itarema aron sa pagkuha sa akong mga anak nga babaye. Human sa akong pag-abot, nangutana ko sa usa ka drayber sa taksi, “Pila man ang imong pangayo aron dad-on ang akong inahan, unom ka bata, ug ako padulong ug pauli sa Itapipoca ugma?”
Ang iyang tubag nakapaguol kanako. Kini hapit mokantidad sa tanang kwarta nga akong gidala. Samtang namalandong ko sa pletehan, usa ka pangutana ang misantop sa akong hunahuna: “Unsa ang bili kanimo sa pag-ambit sa sakramento?” Nailhan nako ang tingog sa Espiritu Santo ug gidawat ang presyo sa drayber sa taksi.
Gitudloan nako ang akong mga anak nga babaye nga ang pan ug tubig sa sakramento nga gitabonan og puti nga mantil motabang kanato sa paghunahuna sa lawas ug dugo sa Manluluwas, unsa ang Iyang nabuhat alang kanato, ug ang importansiya sa paghinumdom Kaniya. Ang sakramento nagpahindumdom kanako nga Siya anaa diha alang kanako ug nga ako gusto nga maanaa diha uban Kaniya.
Pagkasunod adlaw sa dihang misulod kami sa lawak sa Primary sa Itapipoca Branch uban sa unom ka bata, ang presidente sa Primary ingon og mapasalamaton kaayo. Pipila ka minuto ang milabay, ang mga higala gikan sa akong kaugalingong ward diha sa Fortaleza miabot uban sa ilang upat ka anak.
Human sa Primary, natagamtam namo ang mga panalangin sa pag-ambit sa sakramento ug pagbag-o sa among mga pakigsaad ngadto sa Ginoo. Pagkahuman sa sakramento, nahibaloan namo kon nganong ang presidente sa Primary malipayon kaayo nga nakakita kanamo. Niana nga Dominggo ang Primary mopasundayag sa programa sa panagtigom alang sa sakramento, apan ang Primary adunay pipila lang ka bata.
“Ang Dios mitubag sa akong mga pag-ampo,” miingon ang presidente sa Primary, nga nagpaila sa programa. “Siya mipadala og 10 ka dugang nga mga bata nga andam nga mokanta ug moapil sa programa.”
Nagmaya ko nga ako mipatalinghog sa mga paghunghong sa Espiritu sa miaging gabii. Ang pag-ambit sa sakramento ug ang pagbaton nianang dili mapalit nga espirituhanon nga kasinatian bililhon sa sakripisyo sa kwarta.