Digital Lamang
Lima ka Pahinumdom alang sa Pagpakigbahin sa Ebanghelyo
Kining lima ka ideya makatabang nato sa pagpakigbahin sa ebanghelyo sa normal ug natural nga mga paagi ug sa pagdapit sa uban nga moduol ngadto ni Kristo.
Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita adunay responsibilidad ug panalangin sa pagpakigbahin sa ebanghelyo ngadto sa tanang anak sa Langitnong Amahan. Ang Langitnong Amahan hingpit nga nahigugma sa matag usa sa Iyang mga anak ug gusto nga ang matag usa nila makadawat sa Iyang tanang panalangin. Ang usa ka paagi nga kita makapakita sa atong gugma alang Kaniya mao ang “pagdapit sa tanan sa pagdawat sa ebanghelyo, [nga] naglakip sa:
-
Pag-apil sa misyonaryo nga buhat ug pagserbisyo isip mga misyonaryo.
-
Pagtabang sa bag-o ug mibalik nga mga miyembro sa Simbahan nga mouswag subay sa dalan sa pakigsaad.”1
Samtang kita nahigugma ug nagserbisyo sa atong kaigsoonan, mapuno kita sa tinguha sa pagtabang nila nga masinati ang “hilabihan nga kalipay” nga moabot gikan sa pagsunod sa ebanghelyo ni Jesukristo (Alma 36:24). Ang pagpakigbahin sa ebanghelyo morag hilabihan ka bug-at usahay, apan “ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7). Makasalig kita nga Siya motabang nato kon kita mopatalinghog sa iyang panawagan nga “pakan-a ang akong mga karnero” (Juan 21:16–17).
Samtang naningkamot kita sa pagdapit sa uban nga moduol ngadto ni Kristo, mahimo natong ikonsiderar ang mosunod nga mga baroganan.
Mopakigbahin sa Ebanghelyo isip Kabahin sa Atong mga Pakigsaad
Sama sa gitudlo ni Presidente Russell M. Nelson: “Ang matag tawo nga mihimo og mga pakigsaad sa Dios misaad sa pag-amuma sa uban ug pagserbisyo niadtong nanginahanglan. Kita makapakita sa hugot nga pagtuo diha sa Dios ug kanunay nga andam nga motubag niadtong mangutana bahin sa ‘paglaom nga anaa [kanato]’ [1 Pedro 3:15]. Ang matag usa kanato adunay papel sa pagpundok sa Israel.”2
Hinumdomi nga dili kinahanglan nga kita full-time nga mga misyonaryo aron mopakigbahin sa ebanghelyo. Si Presidente M. Russell Ballard, Akting nga Presidente sa Korum sa Napulog Duha, mipahinumdom nato nga “ang pagtuon sa ebanghelyo ug ang pagpakigbahin niini sa matag adlaw mahimo ni bisan kinsa nga aduna o walay opisyal nga tawag. Palihog hinumdomi nga dili kinahanglan nga magsul-ob og name tag aron sa paghimo sa misyonaryo nga buhat!”3 Ug si Elder Neil L. Andersen sa Napulog Duha ka Apostoles nagtudlo sa susamang paagi, “Kon dili kamo full-time nga misyonaryo nga dunay name tag, karon ang panahon sa pagbutang og usa niini sa inyong kasingkasing—ibutang sama sa giingon ni Pablo, ‘dili sa tinta, apan sa Espiritu sa Dios nga buhi’ [2 Mga Taga-Corinto 3:3].”4
Samtang nagtinguha kita sa pagpakigbahin sa ebanghelyo, kita nagtabang nga matuman ang atong pakigsaad sa bunyag, nga naglakip sa “[pag]barog ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga kamo mahimo nga maanaa” (Mosiah 18:9).
Modapit sa Tanan nga Moduol ngadto ni Kristo
Si Jesukristo “walay pinalabi sa mga tawo” (Mga Buhat 10:34). Ingon nga Siya midapit sa dato nga batan-ong magmamando kaniadto sa dugay nang panahon, Siya nagdapit sa tanan nga “sunod kanako” (Lucas 18:22). Makahimo usab kita niini—sa pagdapit ni bisan kinsa ug sa tanan nga mosunod ni Kristo nga walay pagpanghukom kon kinsay modawat ug dili modawat sa pagdapit. Siya mao ang tubag nga gipangita sa daghan kaayo nga mga tawo.
Sama sa gitudlo ni Presidente Russell M. Nelson: “Ang Iyang ebanghelyo mao lamang ang tubag sa dihang daghan sa kalibotan ang panguyapan sa kalisang. Naghatag kini og gibug-aton sa dinalian nga panginahanglan alang kanato sa pagsunod sa instruksiyon sa Ginoo ngadto sa Iyang mga disipulo nga ‘panglakaw … sa tibuok kalibotan, ug isangyaw kining maayong balita ngadto sa tanang mga tawo’ [Marcos 16:15]. Kita adunay sagrado nga responsibilidad sa pagpakigbahin sa gahom ug kalinaw ni Jesukristo ngadto sa tanan kinsa mopatalinghog ug kinsa mopatigbabaw sa Dios diha sa ilang mga kinabuhi.”5
Kadtong atong pakigbahinan sa ebanghelyo tingali modawat o dili modawat sa atong mga pagdapit o mga pagpamatuod. Apan dili kana mao ang motino sa atong kalamposan. Kita naghimo sa buhat sa Dios diha sa pagpakigbahin.
Mosalig sa Espiritu Santo nga maoy Mopamatuod
Ang pagpakigbahin sa atong labing bililhon ug sagrado nga mga gituohan makahahadlok usahay. Apan ang Ginoo nagsaad nga Siya mogiya nato ug motabang nato sa pagpakigsulti sa paagi nga magdala sa Espiritu. Makasalig kita sa Espiritu Santo nga maoy mogiya sa atong mga pulong kon kita moabli sa atong mga baba aron mopakigbahin. Ang atong tahas mao ang pagpakigbahin, ug ang tahas sa Espiritu mao ang pagpamatuod kang Jesukristo.
Sama sa gitudlo diha sa Doktrina ug mga Pakigsaad 100:5–8: “Busa, sa pagkatinuod Ako moingon nganha kaninyo, ipataas ang inyong mga tingog ngadto niini nga mga katawhan; ipamulong ang mga hunahuna diin Ako mobutang sa inyong mga kasingkasing, ug kamo dili pagalibogon sa atubangan sa mga tawo;
“Kay ihatag kini kaninyo sa takna gayod, oo, sa diha gayod nga higayon, unsa ang inyong isulti.
“Apan usa ka sugo Ako mohatag nganha kaninyo, nga kamo mopahayag sa bisan unsa nga butang nga inyong ipahayag sa akong ngalan, diha sa kaligdong sa kasingkasing, diha sa espiritu sa kaaghop, sa tanan nga mga butang.
“Ug Ako mohatag nganha kaninyo niini nga saad, nga kon mohimo kamo niini ang Espiritu Santo mosangyaw sa pagpamatuod ngadto sa tanan nga mga butang bisan unsa ang inyong isulti.”
Hinumdomi unsay gitudlo ni Elder Dieter F. Uchtdorf sa Korum sa Napulog Duha ka Apostoles:
“Salig sa Ginoo nga mahitabo ang Iyang mga milagro. Sabta nga dili inyong trabaho ang pagkabig sa mga tawo. Mao kana ang tahas sa Espiritu Santo. Inyong tahas ang pagpakigbahin kon unsa ang anaa sa inyong kasingkasing ug ang pagpuyo sumala sa inyong gituohan.
“Busa, ayaw pagpakawala sa kadasig kon ang tawo dili dayon modawat sa mensahe sa ebanghelyo. Dili kini usa ka personal nga kapakyasan.
“Tali ra kana sa indibidwal ug sa Langitnong Amahan.
“Ang inyo mao ang paghigugma sa Dios ug sa inyong silingan, nga Iyang mga anak.
“Tuohi, higugmaa, buhata.”6
Mohisgot sa Ebanghelyo sa Natural nga Paagi
Ang pagpakigbahin sa ebanghelyo dili kinahanglan nga komplikado. Makahimo kita, sama sa giawhag ni Elder Uchtdorf, “sa pagdapit og mga tawo—sa normal og natural nga mga paagi—sa pagduol ug pagtan-aw, pagduol ug pagtabang, ug pagduol ug pagpasakop.”7 Makapangita kita og mga paagi sa paglambigit sa ebanghelyo samtang maghisgot kita bahin sa atong mga ganahan, atong mga kalingawan, atong mga pakigbisog, ug mga panalangin nga atong nasinati pinaagi sa tahas nga gihimo ni Jesukristo sa atong kaugalingong kinabuhi.
Si Presidente Ballard mitambag: “Ayaw kahadlok sa pagpaambit sa inyong mga kasinatian ngadto sa uban isip usa ka sumusunod ni Ginoong Jesukristo. Tanan kita adunay makapaikag nga mga istorya nga naka-impluwensya sa atong pagkatawo. Ang pagpaambit niadtong mga istorya usa ka dili makahulga nga paagi sa pagpakigsulti ngadto sa uban. Makatabang usab kamo sa pagbuntog sa daghang sayop nga mga hunahuna kabahin sa Simbahan pinaagi sa inyong impluwensya.”8
Kon wala kamo mobati og pagsalig sa inyong mga abilidad sa pagpakigbahin sa ebanghelyo, hinumdomi kini nga tambag gikan ni Elder Uchtdorf:
“Ang Ginoo wala gayod nanginahanglan og hanas, perpekto nga mga paningkamot sa misyonaryo nga buhat. Hinuon, ‘ang Ginoo nagkinahanglan sa kasingkasing ug sa usa ka andam nga hunahuna’ [Doktrina ug mga Pakigsaad 64:34]. …
“Ang importante nga dili kamo moundang; padayon lang sa pagpaningkamot hangtod mainsakto kini. Sa kataposan mahimo kamong mas maayo, mas malipayon, ug mas matinud-anon. Ang pagpakig-istorya sa uban bahin sa inyong pagtuo mahimong normal ug natural. Gani, ang ebanghelyo mahimong usa ka mahinungdanon, bililhong bahin sa inyong mga kinabuhi nga morag dili na natural ang dili paghisgot niini ngadto sa uban. Dili kana mahitabo dayon—tibuok kinabuhi kana nga paningkamot. Apan mahitabo kana.”9
Sunda ang Ebanghelyo aron Magpakigbahin sa Ebanghelyo
Nakadungog na ba kamo sa hugpong sa mga pulong nga “ang mga lihok mas lanog pa kaysa mga pulong”? Si Elder Gary E. Stevenson sa Korum sa Napulog Duha mitudlo nga “sa matag higayon nga atong gipakita ang Kristohanon nga gugma ngadto sa atong mga silingan, atong gisangyaw ang ebanghelyo—bisan kon wala kitay bisan usa ka pulong nga gisulti.”10
Si Elder Stevenson mihatag usab og yanong sumbanan sa pagpakigbahin sa ebanghelyo: “Ang dakong mando sa Manluluwas matuman pinaagi sa yano, sayon sabton nga mga baroganan nga gitudlo sa matag usa kanato gikan pa sa pagkabata: paghigugma, pagpaambit, ug pagdapit.”11
Mahimo usab natong sundon ang tambag ni Presidente Nelson sa “pag-ako sa responsibilidad sa [atong] pagpamatuod.”12 Ug sama sa gitudlo ni Elder Quentin L. Cook sa Korum sa Napulog Duha ka Apostoles, ang pagkakabig usa ka importante usab nga bahin sa pagsunod sa ebanghelyo pinaagi sa ehemplo: “Aron ang mando sa Manluluwas sa pagpaambit sa ebanghelyo mahimong kabahin sa atong pagkatawo, kinahanglan kita nga mahimong makabig ngadto sa kabubut-on sa Dios; kinahanglan kita nga mohigugma sa atong mga silingan, mopaambit sa gipahiuli nga ebanghelyo ni Jesukristo, ug modapit sa tanan aron moduol ug mosusi.”13
Samtang magtinguha kita nga “[mag]hisgot mahitungod kang Kristo, … [mag]lipay diha kang Kristo, … [mag]sangyaw mahitungod kang Kristo, [ug] [ma]nagna mahitungod kang Kristo” (2 Nephi 25:26), kita makasalig Kaniya sa pagtabang nato. Kita makakaplag usab og kalig-on niini nga saad gikan ni Elder Stevenson: “Dapiton ko kamo sa pagkonsiderar og mga paagi nga kamo makahigugma, makapaambit, ug makadapit. Samtang inyo kining buhaton, mobati kamo og sukod sa kalipay kay nasayod nga nagpatalinghog kamo sa mga pulong sa atong minahal nga Manluluwas.”14