Ko e Ngāue Fakaetauhi ʻi he Faʻa Kātakí

Te tau lava ʻo fakatupulaki ʻa e malava ko ia ke faʻa kātaki angé, ʻi he moʻuí pea mo hono tokoniʻi ʻo e niʻihi kehé.

kau fafine ʻe toko tolu ʻoku nau luelue fakataha

ʻI he 2 Kolinitō 12:7–8, ʻoku fakamatala ai ʻa Paula ki heʻene lotu tuʻo tolu ke toʻo ha “tolounua ʻi he kakanó.” Ka naʻe ʻikai tali ʻene lotú ʻi hono toʻo atu ʻa e faingataʻá. Ka naʻe folofola ange ʻa e ʻEikí kiate ia, “Ko ʻeku tokoní ʻe lahi maʻau.” Naʻe fakahaaʻi ʻe Paula ʻene faʻa kātakí mo e tuí ʻi he anga ʻene talí: “Ko ia te u fiefia lahi mo polepole ai muʻa ʻi heʻeku ngaahi vaivaí, koeʻuhí ke nofoʻia au ʻe he mālohi ʻo Kalaisí” (veesi 9).

Naʻe akoʻi foki ʻe he ʻEikí ʻa Molonai ʻoku fakafou ʻi he ʻaloʻofa ʻa Sīsū Kalaisí, ʻetau lava ʻo ako mo tupulaki ʻi he mālohí: “Pea kapau ʻe haʻu kiate au ʻa e tangatá te u fakahā kiate kinautolu ʻa honau vaivaí. ʻOku ou foaki ki he tangatá ʻa e vaivaí koeʻuhí ke nau loto-fakatōkilalo; pea ʻoku feʻunga ʻa ʻeku ʻofa ki he tangata kotoa pē ʻoku nau fakavaivaiʻi ʻa kinautolu ʻi hoku ʻaó, he kapau te nau fakavaivaiʻi ʻa kinautolu ʻi hoku ʻaó, pea tui kiate au, te u liliu ʻa e ngaahi meʻa vaivaí ko e mālohi kiate kinautolu” (ʻEta 12:27

Ko e Ngāue Fakaetauhi ʻi he Faʻa Kātakí

Hangē ko Paulá, kuo toutou lotua ʻe hotau tokolahi tahá ha fakafiemālie ʻi heʻetau moʻuí—taimi ʻe niʻihi ʻoku laka hake ʻi he tuʻo tolú. ʻOku ʻi ai ha taimi ʻe niʻihi ko e taimi totonu ia ke foaki ai ʻa e tāpuaki ko iá, pea taimi ʻe niʻihi ʻoku akoʻi mo fakamālohia kitautolu, ʻo hangē ko Paulá. ʻI he ngaahi taimi ko ʻení, te tau lava ʻo ako ʻa e faʻa kātakí mo ako ke tatali ki he taimi ʻa e ʻEikí.

ʻOku tau fiemaʻu ʻa e ʻulungaanga faka-Kalaisi ʻo e faʻa kātakí ʻi heʻetau ngāue fakaetauhí. Te tau lava ʻo ngāue fakaetauhi ki he kakai ʻoku lahi honau ngaahi faingataʻaʻiá mo e ngaahi tuʻunga ʻo ʻenau mahino ki he ongoongoleleí, pea ʻoku fiemaʻu ʻa e faʻa kātakí mo e ʻofá ke ngāue fakaetauhi ki he kakai ʻoku ʻikai ke nau tali iá.

Tā mei he Getty Images

Ko Hono Fakatupulaki ʻo e Faʻa Kātakí

ʻI he fakaʻau ke tau ʻiloʻi ʻa e Fakamoʻuí, te tau ʻiloʻi lelei ange ʻa e meʻa naʻá Ne mei fai ke ngāue fakaetauhi ʻi hotau tuʻungá. Te tau lava fēfē ʻo fakatupulaki ʻa e ʻulungaanga faka-Kalaisi ʻo e faʻa kātakí?

ʻIloʻi ʻoku fonu ʻa e moʻui fakamatelié ʻi he ngaahi tūkunga ʻokú ne ʻahiʻahiʻi ʻetau kātakí pea ʻoku angamaheni pē ke tau ongoʻi loto-foʻi ʻi he taimi ʻe niʻihi. Manatuʻi te tau lava ʻi heʻetau toutou fakahoko mo tui ki he ʻEikí, ʻo fakaleleiʻi ʻetau founga tali ki he ngaahi tūkunga fakamafasiá. Faʻa kātaki ʻi hoʻo ngaahi feinga ke kātaki lahi angé!
Kole tokoni ki he ʻOtuá ʻi he taimi ʻokú ke ongoʻi ai ʻoku faingataʻa ke ke faʻa kātakí. ʻE lava ke tokoni haʻo mihiʻi lahi hoʻo mānavá mo e lotú ki hono ʻomi ha nonga mo ha fiemālié.
ʻE lava ke tokoniʻi koe ʻe he fakafanongo ki he mūsika ʻoku langaki moʻui fakalaumālié ʻa ia ʻokú ne ʻomi ha ongo fakanonga ke ke ikunaʻi ʻa e ngaahi ongo ʻo e siʻi ʻa e kātakí.
Fakatokangaʻi ʻa e taimi ʻa e ʻEikí ʻi hoʻo moʻuí. ʻOku totonu ke liliu hotau lotó mo e ngaahi holí ki Heʻene taimi-tēpilé.
Ko e faʻa kātakí ko ha tuʻunga fakakaukau ia. Manatuʻi ʻoku tātaaitaha ke fakalakalaka ʻetau moʻuí ʻi he ongoʻi loto-foʻí pe ʻi ha tuʻunga fakavavevave maʻu peé.

Ngaahi Fakakaukau ki he Ngāue Fakaetauhi ʻi he Faʻa Kātakí

Taimi ʻe niʻihi ko hotau fatongia fakaetauhí ke tokoniʻi ʻa e niʻihi kehé ke nau faʻa kātaki ʻi he ngaahi faingataʻá. Ko ha ngaahi founga ʻeni te tau lava ai ʻo tokoni:

Fakahaaʻi ki he tokotahá pe fāmilí ʻoku tau ʻofa mo tokanga kiate kinautolu neongo ha faʻahinga faingataʻa ʻoku nau fehangahangai mo ia, neongo kapau ʻoku nau fakakaukau, ʻi ha faʻahinga ʻuhinga, ʻoku ʻikai ke ʻofaʻi kinautolu.
Vahevahe ha ngaahi aʻusia mo kinautolu ʻo ha taimi naʻe pau ai ke ke ako ʻa e faʻa kātakí pea ʻoku mahino kiate koe ʻa e faingataʻa ʻoku malava ke hokó. Tokoniʻi kinautolu ke nau ongoʻi ʻoku ʻikai ke nau tuenoa kapau ʻoku nau ongoʻi ʻoku siʻi ʻenau kātakí pe loto-foʻi.
Lotua kinautolu ke nau lava ʻo faʻa kātaki ʻi he ngaahi ʻahiʻahi faingataʻá pea ʻai ke nau ʻiloʻi ʻe fanongo ʻa e Tamai Hēvaní ki heʻenau ngaahi lotú koeʻuhí ke nau lava ʻo ongoʻi ʻa e mālohi ko iá.
Hoko ko ha telinga fie fakafanongo ʻi he taimi ʻoku nau fiemaʻu ai ha taha ke talanoá. Ko e taha ʻo e ngaahi founga lelei taha ke kātekina ai ha ʻahiʻahi pe tūkunga faingataʻa ko hono maʻu ha kaungāmeʻa mahino.