“Ko Hono Vahevahe ha Tatau ʻe 72 ʻo e Tohi ʻa Molomoná,” Liahona, Sepitema 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Ko Hono Vahevahe ha Tatau ʻe 72 ʻo e Tohi ʻa Molomoná
Ko e taimi kotoa pē naʻá ku fakaava ai hoku ngutú ke lea fekauʻaki mo e Tohi ʻa Molomoná, naʻe ʻiate au ʻa e Laumālie Māʻoniʻoní.
Tā fakatātā ʻa Allen Garns
Lolotonga ʻa e mahaki fakaʻauha COVID-19, naʻá ma monūʻia ke tokangaʻi makehe hoku husepāniti ko Kolotí ʻi homau ʻapí. Naʻá ku tokoni ai mo ʻema fānaú ʻi he ʻofa ʻi hono tauhí kae ʻoua kuó ne mavahe atu ki hotau ʻapi fakalangí.
Naʻá ku lotua kimuʻa ange mo Koloti pe ʻe liliu nai homau fakafaletolo sioʻata takaí ki ha loki tauhi mahaki, ʻa ia te mau lava ʻo faʻo ki ai ʻa e meʻa kotoa pē te ne fiemaʻú ke ne ongoʻi fiemālie aí. Naʻá ma maʻu ha tali ke fakahoko ia.
Ke fakaleleiʻi e fakafaletoló, naʻe fiemaʻu ke haʻu ha kau ngāue tokolahi ki homau ʻapí. Ko e meʻa mālié, he naʻe ʻi ai ha matapā ʻi mui ʻi he fakafaletoló, ke lava ʻa e kau ngāué ʻo hū ai ki loto mo tuʻa ʻo ʻikai fou mai ʻi he ngaahi feituʻu mahuʻinga ʻo homau ʻapí. Ko ha tāpuaki maʻongoʻonga ia lolotonga ʻa e ngaahi fakataputapui ʻo e COVID-19.
Hili ʻa e ʻosi ʻa e loki ʻo Kolotí, naʻe haʻu fakaʻaho ha kau neesi. Naʻa nau anglelei, ʻofa, mo ʻilo lahi ki he meʻa naʻe fiemaʻu ke mau fai ke maʻu ai ʻe Koloti ha fiemālié.
ʻI heʻeku kau ki he Siasí, naʻe akoʻi au, ko ha faifekau ʻa e mēmipa kotoa pē ʻo e Siasí.1 Koeʻuhí ʻoku ou saiʻia hono vahevahe ʻo e ongoongoleleí, naʻá ku ʻota ai ha puha ʻe tolu ʻo e Tohi ʻa Molomoná, ʻa ia ko ha tohi ʻe 24 ʻi he puha takitaha. Naʻá ku fakapapau te u ʻoange ha tohi ki he tokotaha kotoa pē te ne hūfia homau ʻapí.
Naʻá ku fakaʻilongaʻi ʻa e ngaahi konga mahuʻinga ʻo e tohi takitaha ʻaki ha kaati pisinisi naʻá ku faʻu ʻo fakaʻasi ai ha laʻitā naʻá ku faitaaʻi ʻo e Temipale Sōlekí. Naʻá ku fakapipiki foki ʻeku fakamoʻoní ʻi he peesi ʻoku ʻikai tohi ai ha meʻa ʻi muʻa ʻi he tohi takitaha. Kimuʻa peá u ʻoange ha tohi ki ha taha ngāue pe neesi, naʻá ku fakamatalaʻi ange kiate kinautolu ʻa e Tohi ʻa Molomoná.
Naʻá ku ʻohovale lahi ʻi heʻenau ngaahi fakafōtungá. Ko e toko taha pē naʻe fakafisi ke tali ha tohí. Naʻe fie fanongo ʻa e tokotaha kotoa pē fekauʻaki mo ia. Naʻe fakamālō mai ha niʻihi kiate au mo pehē naʻa nau ʻilo fekauʻaki mo e Tohi ʻa Molomoná pea naʻa nau fiemaʻu hano tatau. Naʻe fiefia ʻaupito ha kakai tokolahi pea aʻu ʻo nau fāʻofua kiate au.
ʻOku ou tui naʻe hoko ʻeni koeʻuhí ko e taimi kotoa pē naʻá ku fakaava ai hoku ngutú ke lea fekauʻaki mo e Tohi ʻa Molomoná, naʻe ʻiate au ʻa e Laumālie Māʻoniʻoní. ʻOku ou ʻilo fakapapau naʻe lava ke ongoʻi ʻe he kau ngāué mo e kau nēsí ʻa e Laumālié. Naʻá ku foaki ha ngaahi tohi kotoa ʻe 72, pea naʻá ku toki ʻota kimuí ni ha toe tohi kehe ʻe 24.