“Te Tau Lava Fēfē ʻo ʻAi Hotau Ngaahi Haʻofangá ke Toe Uouangataha Angé?” Liahona, Sepitema 2023, 44.
Haʻu, ʻo Muimui ʻIate Au
Te Tau Lava Fēfē ʻo ʻAi Hotau Ngaahi Haʻofangá ke Toe Uouangataha Angé?
Tā fakatātaaʻi ʻe Vicky Scott
Naʻe fanongo ʻa Paula naʻe ʻi ai ha ngaahi māvahevahe ʻi he lotolotonga ʻo e kāingalotu ʻo e Siasí ʻi he kolo ko Kolinitoó (vakai, 1 Kolinitō 11:18). ʻI heʻene talí, naʻá ne tautapa kiate kinautolu ʻi ha tohi “koeʻuhí ke ʻoua naʻa ai ha māvahevahe ʻi he sino [ʻo e Siasí]; ka koeʻuhí ke maʻu ʻa e fetokangaʻakí pē ʻe he ngaahi kupu kotoa pē” (1 Kolinitō 12:25).
Te tau lava ʻo fakahaaʻi ʻeni ʻi he “fetauhiʻaki tatau” ʻi he ngaahi ngāue taʻesiokita ʻo e ʻofá mo e ʻofa faka-Kalaisí. Naʻe fakamatala ʻa Paula ki ha ngaahi founga lahi te tau lava ai ʻo fai ʻeni ke uouangataha ange ai hotau ngaahi vā fetuʻutakí.
Fiefia mo tangi fakataha mo e niʻihi kehé.
“Pea kapau ʻe mamahi ʻa e kupu ʻe taha, ʻoku mamahi mo ia ʻa e ngaahi kupu kotoa pē; pea ka fakahīkihiki ʻa e kupu ʻe taha, ʻoku fiefia mo ia ʻa e kupu kotoa pē” (1 Kolinitō 12:26).
Fakahoko ha ngaahi ngāue tokoni taʻesiokita.
“Ke ʻoua naʻa kumi taki taha hono lelei pē ʻoʻona, ka ki he lelei ʻa e niʻihi kehé” (1 Kolinitō 10:24 ).
ʻAi ke faaitaha ʻetau fakamoʻoni ki he Fakamoʻuí.
“Pea koeʻuhí ʻoku taha pē ʻa e foʻi maá, ko kitautolu ko e toko lahi ko e sino pē taha: he ʻoku tau ʻinasi fakataha ʻi he foʻi mā pē taha [ʻa Kalaisí]” (1 Kolinitō 10:17).
ʻOfa ʻi he tokotaha kotoa pē.
“ʻOua naʻa fai fakaʻita, pe ki he kakai Siú, pe ki he kakai Senitailé, pe ki he siasi ʻo e ʻOtuá” (1 Kolinitō 10:32).