“Papitaiso Pō Falaité,” Liahona, Sepitema 2023.
Ngaahi Leʻo ʻo e Kau Māʻoniʻoni ʻi he Ngaahi ʻAho Kimui Ní
Papitaiso Pō Falaité
Naʻe tokoniʻi au ʻe heʻeku holi ke fakatomalá ke u ʻilo ʻa e Fakamoʻuí mo Hono Siasí.
Tā fakatātaaʻi ʻe Katy Dockrill
Hili ʻeku aʻusia ʻa e fiefia ʻo ʻeku haʻu ki he ʻIunaiteti Siteití mei Siaina ke maʻu hoku Mataʻitohi PhD, naʻá ku ongoʻi lōmekina ʻi he lahi ʻo e ngaahi pepa fakaako naʻe fiemaʻu ke u lau mo tohí. Naʻá ku toe taʻepauʻia foki ʻi he founga ke u feohi ai mo ʻeku ʻetivaisa fakaakó, ʻo fakalahi ia ki heʻeku loto-mafasiá. Naʻá ku ongoʻi hē mo taʻelata, pea naʻe ʻikai ke u ʻilo ʻa e meʻa ke faí.
Naʻá ku pehē kuo fakatupu ʻe heʻeku ngaahi fehalaaki ʻi he kuohilí ʻeku faingataʻaʻiá pea naʻe fiemaʻu ke u fakatomala. ʻI he efiafi ko iá naʻá ku kumi ʻa e “siasí” ʻi he ʻinitanetí. Naʻá ku ʻilo ai ko e falelotu pē ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní naʻe ava ʻo aʻu ki he 9:00 efiafí. ʻI heʻeku fakapapauʻi ke u fakatomala ʻi he fale lotú, naʻá ku fononga lalo atu leva ʻi ha houa ʻe taha.
ʻI heʻeku aʻu atu ki he fale lotú ʻi he taimi 6 efiafí, naʻá ku sio ki ha ngaahi maama mo fanongo ki ha kakata mo ha hiva mei loto. Naʻá ku kumi takai holo ʻi he falé ka naʻe ʻikai ke u maʻu ʻa e matapaá. Naʻá ku sio atu ʻi ha matapā sioʻata ki ha tamai ʻoku vaʻinga mo hono fohá ʻi he taha ʻo e ngaahi lokí. Naʻá ku tukituki ʻi he matapā sioʻatá ke maʻu ʻene tokangá. Naʻá ne fakahinohino au ki he matapaá, talitali lelei au, mo talamai ʻoku lolotonga papitaiso ha tokotaha.
Naʻá ku muimui atu ai peá u hū atu ki ha loki naʻe tāpuakiʻi ai ʻe ha tangata ha kiʻi tamasiʻi naʻe toki papitaiso. ʻI heʻeku tuʻu ʻo ofi ki he matapaá, ʻo fakafanongo ki he tāpuakí, naʻá ku ongoʻi naʻe fanafana mai foki ʻe he ʻOtuá ha ngaahi tāpuaki kiate au. Naʻe māfana hoku lotó, pea naʻá ku ongoʻi ʻa e meʻa naʻá ku toki ʻilo ki mui ko e Laumālie Māʻoniʻoní. Naʻá ku toe fanongo foki ki ha leʻo naʻe pehē kuo fakamolemoleʻi au.
Hili ʻa e papitaisó, naʻá ku fakataha mo ha niʻihi kehe mo fetaulaki mo ha kakai lelei tokolahi. Naʻe ʻikai ke u toe taʻelata. Naʻe loto fiemālie ha tangata naʻá ne pehē ko e “palesiteni fakakolo” mālōloó ke ne ʻave au ki ʻapi. Hili ha ngaahi māhina mei ai, hili ʻeku fanongo ki he ngaahi lēsoni fakafaifekaú, naʻe papitaiso au.
ʻI he ʻaho naʻe papitaiso ai au ʻi he 2018 ʻi Kemipilisi, Masasūsetí, naʻe lea ai ha tangata fekauʻaki mo e founga naʻe fokotuʻutuʻu ai ʻe heʻetau Tamai Hēvani ʻofeiná ʻa e papitaiso ʻi he Falaite ko iá. Naʻá ne fakamatalaʻi naʻe totonu ke fakahoko ʻa e papitaisó ʻi he Sāpate hono hokó, ka koeʻuhí ko ha fepakipaki fakataimi, naʻe pau ke toe fakataimi-tēpileʻi ia ki he pō Falaité. Ka naʻe taʻeʻoua ʻa e liliu ko iá, mahalo naʻe ʻikai ke u mei ʻiloʻi ʻa e Siasí, ʻa hotau Fakamoʻuí mo ʻetau Tamai Hēvaní, pea mo hoku ngaahi tokoua mo e tuofāfine ʻi he ongoongoleleí.