“Kau Fie Fanongo ʻi he Fale Fakapōpulá,” Liahona, Sepitema 2023.
Ngaahi ʻAta ʻo e Tuí
Kau Fie Fanongo ʻi he Fale Fakapōpulá
Naʻe ʻikai teitei ngalo ʻia Sisitā Lanosi ʻi heʻene ʻi he ʻapi pōpulá, ʻene taumuʻa ko e fakafofonga ʻo Sīsū Kalaisí, ʻo ne akoʻi hono kaungā-nofó fekauʻaki mo honau tuʻunga fakalangí mo e founga ke lotu aí.
Faitaaʻi ʻe Amelia Lyon
Naʻe hoko ʻa Sisitā ʻAketiseli Lanosi ko ha faifekau faʻifaʻitakiʻanga lelei mo ha fakamoʻoni mālohi. Naʻe ʻuluaki vahe ia ki he Misiona Kosita Lika Seni Hōsē Hahaké, ka naʻá ne ngāue mo hoku uaifi ko Sēiní ʻi he Misiona Mekisikou ʻAkuasakelií ʻi ha taʻu ʻe taha kimuʻa peá ne maʻu ha visa ki Kosita Liká.
ʻI ʻEpeleli 2022, naʻa mau taʻataʻalo fakamāvae ai kae heka vakapuna ʻa Sisitā Lananosi ki Mekisikou Siti, ʻa ia ʻe folau ai ki Kosita Lika. Ka naʻe ʻikai aʻu ʻo houa ʻe 24 mei heʻemau fakamāvaé, kuo fetuʻutaki mai ʻa e kau polisi ʻi Mekisikou Sití.
Naʻa nau pehē, “Kuo mau puke ʻa ʻAketiseli Lanosi ʻi he malaʻe vakapuná ko hono maʻu mo ha foʻi mahafu fakakautau.” “Ko ha hia fakapuleʻanga ʻeni, pea ʻe fakaʻilo ia.”
Naʻá ku fetuʻutaki leva ʻi he taimi pē ko iá ki he ʻōfisi fakalao fakaʻēlia ʻo e Siasí, pea naʻa nau totongi ha loea ke feinga ke tukuange ʻa Sisitā Lanosi. Ko e loeá ni naʻe ʻikai ko ha mēmipa ia ʻo e Siasí. Naʻá ne tukupā ke tokoniʻi kimautolu ka naʻá ne fakahaaʻi haʻane fakatuʻatamaki. Naʻá ne fakamatalaʻi ko ha hia mamafa ʻa hono maʻu ha mahafu fakakautau mo ha taha ʻoku ʻikai ngāue fakakautau, neongo pe ko e hā ʻene taumuʻá.
Naʻe talamai ʻe Sisitā Lanosi kimui ange naʻá ne maʻu e foʻi mahafú he veʻe halá ʻi hono ʻēlia fakaʻosí. Naʻá ne pehē ko ha suvenia ia. Ko hono moʻoní, naʻe fōtunga tatau ʻa e foʻi mahafú mo e ngaahi seini tautauʻanga kī naʻe fakatau ʻi tuʻa ʻi ha keliʻanga siliva motuʻa, ʻi ha taha ʻo e ngaahi feituʻu naʻá ne ngāue ai kimuʻá. Ka neongo ia, naʻe ngaohi ia ʻe he kau fakatotolo fakapuleʻangá ʻo hangē ha tokotaha fakatautoitoí. Hili ha ngaahi ʻaho siʻi mei ai, naʻe fakahiki ʻa Sisitā Lanosi mei he ʻapi pōpula ʻo e malaʻevakapuná ki ha ʻapi pōpula malu ʻa ia naʻe tauhi ai ʻa e kau faihia kovi tahá.
Ngaahi Lotu ʻi he Tuí
Naʻe kamata ʻi he taimi pē ko iá hono lotua ʻo Sisitā Lanosi ke vave hono tukuangé. Naʻá ku fakaafeʻi mo Sēini ʻa e kau faifekau ʻe toko 115 ʻi homau misioná ke ngāue ʻaki ʻenau tuí ke mau lava ʻo mamata ki ha mana, kapau ko e finangalo ia ʻo e ʻEikí. Naʻá ku fetuʻutaki ki he kau palesiteni fakamisiona ʻi Mekisikou Sití, Misiona Kositā Lika Seni Hōsē Hahaké, mo e Senitā Akoʻanga Fakafaifekau ʻi Mekisikoú, pea naʻa nau fakaafeʻi ʻenau kau faifekaú ke kaungā kau mo kimautolu ʻi he lotú.
Naʻe ʻikai teitei ngalo ʻia Sisitā ʻAketiseli Lanosi ʻi loto ʻi he ngaahi holisi ʻo e ʻapi pōpulá, ʻa ʻene taumuʻa ko ha fakafofonga ʻo Sīsū Kalaisí.
Naʻe ʻikai teitei ngalo ʻia Sisitā Lanosi ʻi loto ʻi he ngaahi holisi ʻo e ʻapi pōpulá, ʻa ʻene taumuʻa ko ha fakafofonga ʻo Sīsū Kalaisí. Naʻá ne akoʻi hono kaungā-nofo ʻe toko hivá ke nau lotu ʻaki ʻene fakahoko fakakulupu ʻa e lotu pongipongí mo e efiafí ʻi he ʻaho takitaha. Naʻá ne akoʻi foki kinautolu fekauʻaki mo honau tuʻunga fakalangí.
Naʻe pehē ʻe ha taha ʻo hono kaungā-nofó, “Ko ha tokotaha kovi ʻaupito au ʻi he meʻa naʻá ku fai ke u ʻi heni aí, pea ʻoku fehiʻa ʻa e ʻOtuá ʻiate au.” Naʻe vakai atu ʻa Sisitā Lanosi ki hono fofongá mo pehē ange, “ʻIkai. ʻOku ʻikai ko ha tokotaha kovi koe. Ko ha tokotaha koe naʻá ke fakahoko ha ngāue kovi. Ka ko ha ʻofefine koe ʻo e ʻOtuá pea ʻokú Ne ʻofa ʻiate koe!”
Naʻe fakamatala ha taha ʻo hono kaungā-nofo fale pōpulá ki ha misi naʻá ne maʻu ʻi he ngaahi uike siʻi kimuʻa pea puke pōpula ʻa Sisitā Lanosí. Naʻe misi ʻa e tokotahá ni naʻe puna mai ha foʻi manupuna kuatisolo ki he ʻapi pōpulá ke tokoniʻi ia. Kimuʻa pea kau ʻa Sisitā Lanosi ki he Siasí, naʻe ʻi ai ha fakatātā ʻo e manupuna kuatisoló naʻe tā tatauʻi ʻi hono tuʻá. ʻI he sio hono kaungā-nofó ki he tā tataú, naʻá ne ʻiloʻi ʻoku totonu ke ne fanongo ki he pōpoaki fakafaifekau ʻa Sisitā Lanosí.
Naʻe akoʻi ia ʻe Sisitā Lanosi fekauʻaki mo hono Fakafoki Mai ʻo e ongoongolelei ʻo Sīsū Kalaisí pea ʻoange kiate ia ʻa e tatau ʻo e Tohi ʻa Molomoná naʻá ne ʻalu mo ia ki he fale fakapōpulá—ko e Tohi ʻa Molomona tatau ia naʻe foaki ʻe he ongo faifekau sisitaá kia Sisitā Lanosi ʻi he taʻu ʻe nima kimuʻá ʻi he taimi naʻá ne fie ʻilo ai ki he Siasí.
Naʻe fakataimi-tēpileʻi vave ha hopo ʻi Mekisikou Siti. Naʻá ku ʻalu mo Sēini ke fakamoʻoni tonu. ʻI heʻemau fetaulaki mo e timi fakalaó ʻi tuʻa ʻi he fale fakamaauʻangá, naʻe fotu manavasiʻi ʻa e loeá, naʻá ne lue fefokifokiʻaki pē ʻi he lueʻangá.
Naʻá ku taki ia ki he tafaʻakí peá u pehē ange: “Te ke ongoʻi nonga mo fiemālie ange ʻi he ʻahó ni ʻi ha toe taimi ʻi ha fale hopo. Tuku ke u talaatu hono ʻuhingá. ʻOku ʻi ai ha kau faifekau ʻoku laka hake ʻi he toko 500 mo honau ngaahi fāmilí ʻoku nau lotua koe mo hoʻo lavameʻa ʻi he ʻaho ní. ʻOku nau lotua foki ʻe fakavaivai ʻa e loto ʻo e fakamāú pea ke ne tukuange ʻa Sisitā Lanosi mei he ʻapi pōpulá.
Naʻe tangi ʻa e loeá peá ne fakahaaʻi mai ʻene houngaʻia ʻi he tui mo e ngaahi lotu ʻa ha kakai tokolahi koeʻuhí ko ia.
Naʻe kamata ʻa e hopó ʻi he 10:00 a.m., ka naʻe fiemaʻu ke u tatali ʻi tuʻa kae ʻoua kuo hokosia hoku taimi ke fakamoʻoni aí. Naʻe ʻosi atu ha houa lōloa ʻe ua. Naʻe hū mai leva ʻa e tangata leʻo ʻo e loki hopó ʻo talamai naʻe ʻikai fiemaʻu ke fanongo ʻa e fakamāú ki heʻeku fakamoʻoní—kuó ne ʻosi fakapapauʻi ʻe ia ʻene tuʻutuʻuní.
Naʻá ku hū loto vēkeveke atu ki he loto fale hopó, pea kamata ke lea ʻa e fakamāú. Naʻá ne fakamatala fekauʻaki mo e lao naʻe maumauʻi ʻe Sisitā Lanosí pea mo e ngaahi moʻua mamafa naʻá ne fehangahangai mo iá.
Naʻá ne hoko atu ʻo pehē, “Makehe mei he ngaahi meʻa kotoa ko iá, ʻoku ou tui ki he fakamoʻoni kuo ʻomi fekauʻaki mo e ʻulungaanga lelei ʻo Sisitā Lanosí.” Naʻá ne lau leva ha konga fakapulipuli ʻo e laó naʻe lava ai ke ne foaki ha meesi, pea naʻá ne fakaʻatā leva ʻa Sisitā Lanosi.
Sisitā Lanosi mo Sisitā Sēini Leti, ʻa ia naʻe fāʻofua ai ʻa Sisitā Lanosi ʻi heʻene ʻatā mei he fale fakapōpulá.
“ʻOtuá ʻi Hoku Tafaʻakí”
Ko e mana ʻeni naʻá ma fekumi ki aí! Naʻe ʻikai tuʻutuʻuni ʻa Sisitā Lanosi ke ngāue pōpula ʻi he taʻu ʻe fā pe lahi ange ai, ka naʻe tukuange ia. Hili ʻa e hopó, naʻe pehē ʻe heʻene loeá ko ha ʻaho mātuʻaki mahuʻinga ia ʻi heʻene ngāue maʻuʻanga moʻui fakapalōfesinalé.
Naʻá ne pehē, “Naʻá ku ongoʻi moʻoni ʻa e ʻOtuá ʻi hoku tafaʻakí. ʻOku ou fie ako lahi ange fekauʻaki mo hoʻomou tuí.”
Naʻá ku fakaafeʻi ia ki he Senitā Takimamata ʻo e Temipale Mekisikou Sití. Naʻá ku talaange ki ai, “Te ke sio ai ki ha kau faifekau kehe ʻoku nau lelei tatau pē mo Sisitā Lanosí. Te ke sio ki he malama honau fofongá, pea te ke fehuʻi pē kiate koe pe ko e hā hono ʻuhingá.”
Hili ha houa ʻe hongofulu mā ua mei ai, naʻe tukuange ʻa Sisitā Lanosi, naʻá ne kei tui pē hono vala pilīsoné. Naʻá ne fāʻofua kia Sēini. ʻI he ʻosi pē ʻemau tangí, naʻe pehē ʻe Sisitā Lanosi, “Palesiteni, ʻoku ʻi ai haʻaku kau fie fanongo ʻi he ʻapi pōpulá!”
Naʻe fakapapauʻi mai ʻe he aʻusia kotoa ko ʻení “kuo teʻeki ai ke tuku ʻe he ʻOtuá ʻa ʻene hoko ko e ʻOtua ʻo e ngaahi maná” (Molomona 9:15). ʻOku ʻikai haʻaku toe veiveiua naʻe tokoni e tui mo e lotu ʻa ha kakai lelei tokolahi ki hono taukapoʻi ʻe he loeá ʻene tafaʻakí mo fakavaivai e loto ʻo e fakamāú.
Koeʻuhí naʻe puke pōpula ʻa Sisitā Lanosi, naʻe maʻu ai ʻe ha kau fafine nofo pōpula tokolahi ha ʻamanaki lelei ʻo fakafou ʻi he ongoongolelei ʻo Sīsū Kalaisí, naʻe tupulaki ʻi ha loea ha tenga ʻo e tuí, pea naʻe fakamālohia kimautolu ʻi heʻemau tui pau ʻe lava ke fakaʻaongaʻi kitautolu ʻe he ʻOtuá ke paotoloaki ʻEne ngāué ʻo tatau ai pē pe ko e fē feituʻu ʻoku tau ʻi aí.
Sisitā Lanosi ʻi he Temipale Mekisikou Tiuaná