“Hanga ki he ʻOtuá ki ha Taumuʻa mo ha Fakahinohino,” Liahona, Sepitema 2023.
Maʻá e Mātuʻá
Hanga ki he ʻOtuá ki ha Taumuʻa mo ha Fakahinohino
Siʻi Ngaahi Mātuʻa,
Naʻe ʻikai tuku mai kitautolu ʻe heʻetau Tamai Hēvaní ki he māmaní pea ʻikai ʻi ai ha fakahinohino. Te tau lava ʻo hanga ki he ʻOtuá ʻi he ngaahi meʻafoaki fakalangi ʻo e folofolá, lotú, kau palōfita moʻuí, mo e niʻihi kehé, ki ha taumuʻa mo ha fakahinohino. ʻI hoʻo lau ʻa e makasini ko ʻeni ʻo e Liahoná, fakalaulauloto ki he ngaahi maʻuʻanga tokoni kuó Ne foaki mai ke tokoniʻi kitautolu ke tau maʻu ha ʻuhinga ʻi he moʻuí ni pea foki hake kiate Ia ʻi he moʻui ka hokó.
Ngaahi Fealēleaʻaki ʻi he Ongoongoleleí
Ko Hotau Fatongia Faaitaha ʻi he Palani ʻa e ʻOtuá
Te mou lava ʻo lau fakafāmili ʻa e 1 Kolinitō 11:11 pea aleaʻi hono ʻuhingá. Vahevahe ha ngaahi konga mei he fakamatala ʻa ʻEletā Kēleti W. Kongó (peesi 4), ʻokú ne fakamatalaʻi ʻa e fatongia ʻo e houʻeiki tangatá mo fafiné ʻi he palani ʻo e fakamoʻuí. ʻE lava fēfē ke fakatahaʻi kitautolu ʻe heʻetau ngaahi faikehekehé kae ʻikai fakamavahevaheʻi kitautolu?
Ko e Mālohi Faifakamoʻui ʻo e Tuí
Lau fakataha ʻa e Mātiu 15:21–28 , ʻa ia ʻoku talanoa fekauʻaki mo e fefine Kēnaní. ʻOkú ke pehē ko e hā naʻe fakaiku ai ʻene tuí ki hono fakamoʻui hono ʻofefiné? Lau ʻa e ngaahi potufolofola mei he lea ʻa Palesiteni Kamila N. Sionisoni ʻi he peesi 8 ke mahino lelei ange ʻa e fatongia ʻo e angamaluú mo e tuí ʻi hono maʻu ʻa e mālohi ʻo e ʻEikí.
Ngaahi Fakamanatu Fakaʻaho ʻo Sīsū Kalaisí
Fehuʻi ki ho fāmilí, ʻOkú ke manatuʻi fēfē ʻa e Fakamoʻuí ʻi hoʻo moʻuí? Lau ʻa e ngaahi konga mahuʻinga mei he fakamatala ʻi he peesi 38 fekauʻaki mo e mahuʻinga ʻo e manatuʻí. Fakakaukau ke fakaʻaliʻali ʻi homou ʻapí ha fakatātā pe kupuʻi lea ʻokú ne fakamanatu atu ʻa Kalaisi.
Fiefia Fakafāmili ʻi heHaʻu, ʻo Muimui ʻIate Au
Manatuʻi ʻa e Ngaahi Tāpuaki ʻa Kalaisí ʻi he ʻAho Takitaha
Naʻe akoʻi ʻe Paula ʻa e Kāingalotu ʻi Kolinitoó: “Ko e pekia ʻa Kalaisí ʻi heʻetau ngaahi angahalá … pea naʻe fai ia, pea naʻe toe tuʻu ia ʻi hono tolu ʻo e ʻahó” (1 Kolinitō 15:3–4). Naʻá ne poupouʻi kinautolu ke nau “manatuʻi” (1 Kolinitō15:2) ʻa e ongoongolelei kuó ne malanga ʻaki kiate kinautolú. Fakaafeʻi ho fāmilí ke nau fakahoko ʻa e vaʻinga siviʻi ʻo e manatú ko ʻení:
-
ʻOange ha taimi ki he tokotaha kotoa pē ke hiki ha tali nounou ki he fehuʻi ko ʻení: Ko e hā ha tāpuaki ʻo e ongoongoleleí ʻokú ke fiefia ai koeʻuhí ko e Fakalelei ʻa e Fakamoʻuí? (Ke maʻu ha ngaahi fakakaukaú, vakai, 1 Kolinitō 15:19–29.)
-
Taufetongi ʻi hono vahevahe ʻo e meʻa naʻá ke tohí mo toutou fakamanatu ʻa e meʻa naʻe tohi ʻe he tokotaha ʻi muʻa ʻiate koé.
Fealēleaʻakí: ʻE anga fēfē haʻatau manatuʻi lelei ange ʻa e ngaahi tāpuaki kuo foaki mai ʻe Kalaisi maʻatautolú? Fakakaukau ke faʻu ha palani fakafāmili ke fakakaukau ki ha founga ʻe taha kuo tāpuekina ai ʻe Kalaisi hoʻo moʻuí ʻi he ʻaho takitaha.