“Te Ke Teuteu Fēfē Nai ki he Konifelenisi Lahí,” Ki Hono Fakamālohia ʻo e Toʻu Tupú, Sepitema 2023.
Ko e Teuteu ki he Konifelenisi Lahí
Te Ke Teuteu Fēfē Nai ki he Konifelenisi Lahí
Naʻe maʻu ʻe he toʻu tupu ko ʻení ha meʻa lahi mei he konifelenisi lahí. Te ke teuteu fēfē nai ke maʻu ha aʻusia mahuʻingamālie?
ʻOku ou Fie Muimui ki he Palōfitá
Naʻá ku teuteu ki he konifelenisi lahi ʻo ʻOkatopa 2022 ʻaki ʻeku lau fekauʻaki mo e Fakalelei ʻa Sīsū Kalaisí ʻi he Tohi ʻa Molomoná pea ʻi he Fuakava Motuʻá.
Lolotonga e konifelenisí, naʻe lea mai ʻa Palesiteni Lāsolo M. Nalesoni kiate kitautolu mo fakamoʻoni ki he mahuʻinga ʻo e temipalé.1 ʻI he temipalé, ʻoku talaʻofa mai ai ha ngaahi tāpuaki taʻengata, pea te ke ongoʻi ha laumālie fakaʻofoʻofa ʻi hoʻo ʻalu ki aí.
ʻOku teʻeki ke ʻi ai ha temipale ʻi Nikalākua, ka kuo ʻosi fanongonongo ha temipale ki ai. ʻOku ou ʻamanaki pē te u lava ʻo fanongo ki he ngaahi lea ʻa Palesiteni Nalesoní pea ʻalu ki he temipalé ʻi heʻene ʻosí.
ʻI heʻeku mamata ʻi he konifelenisí, naʻá ku ongoʻi hono fakamoʻoniʻi mai ʻe he Laumālié ʻoku ou ʻi he feituʻu totonú. Naʻá ku ongoʻi hangē naʻe fonu hoku lotó ʻi he ʻofa ʻa e ʻOtuá.
Kālosi M., Nikalākuá
ʻOku ʻAtā ʻa e FFaifakamoʻuí ki he Taha Kotoa
Kimuʻa ʻi he konifelenisi lahi ʻo ʻOkatopa 2022, naʻá ku fakakaukau ki he ngaahi meʻa naʻe hoko kimuí ni mai ʻi heʻeku moʻuí. Naʻe lahi ha ngaahi meʻa naʻe hohaʻa ki ai ʻeku fakakaukaú kimuʻa ʻi he konifelenisí, pea naʻá ku fiemaʻu ke u ongoʻi ʻa e fiemālie, nonga, mo e mālohi.
Lolotonga ʻa e konifelenisí, naʻe pehē ʻe ʻEletā Kuenitini L. Kuki ʻo e Toko Hongofulu Mā Uá, “Koeʻuhí ko e Fakalelei ʻa e Fakamoʻuí, ʻoku ʻatā ʻa e fakamoʻuí ki he taha kotoa pē.”2
Naʻe ʻomi ʻe he ngaahi lea ko iá ha nonga mo ha ʻamanaki lelei kiate au. Makatuʻunga ʻi he Fakalelei ʻa Sīsū Kalaisí, ʻi he taimi ʻoku ou fai ai ha ngaahi fehālaaki mo ha ngaahi fili halá, ʻe lava ke fakamolemoleʻi au peá u ongoʻi nonga. Pea neongo pe ko e hā ʻa e mamahi te u ongoʻí, ʻe lava ke fakamoʻui au. Te tau lava kotoa ʻo ongoʻi ʻa e nonga mo e ffaiakamoʻui tatau ʻi heʻetau fakatomala mei heʻetau ngaahi angahalá mo feinga ke hoko ʻo lelei ange ʻi he ʻaho takitaha.
Keie D., Filipaini
Ko Hoʻo Teuteu ki he Konifelenisí
Toʻo ha kiʻi miniti ke ke teuteu ai ki he konifelenisí, pea te ke maʻu ha aʻusia lelei ange. Sai, te ke teuteu fēfē nai? Kamata ʻaki hano hiki hoʻo ngaahi fehuʻí! Fakalaulauloto ki hoʻo ngaahi fehuʻí lolotonga hoʻo sió, pea te ke ʻohovale ʻi he hangē ʻoku faʻa lea hangatonu atu ʻa e kau leá kiate koé.