“Ko e hā te u lava ʻo fai kapau ʻoku ou ongoʻi hangē ʻoku ʻikai ke u maʻu ha ngaahi aʻusia fakalaumālié?,” Ki Hono Fakamālohia ʻo e Toʻu Tupú, Sepitema 2023.
Ngaahi Fehuʻí mo e Talí
“Ko e hā te u lava ʻo fai kapau ʻoku ou ongoʻi hangē ʻoku ʻikai ke u maʻu ha ngaahi aʻusia fakalaumālié?”
Fakalaulauloto, Tohi, mo Fakakaukau
“ʻI he fakaʻosinga e ʻahó, ʻoku ou tuku ai ha taimi ke fakalaulauloto mo tohi ʻi heʻeku tohi noá fekauʻaki mo e ngaahi aʻusia fakalaumālie naʻá ku maʻu he ʻaho ko iá pea fakakaukau ki ai. Ko e taimi pē ʻoku ou fai ai ʻeni, ʻoku ou ongoʻi nonga. ʻOkú ne toe fakamanatu mai foki ke u fekumi he ʻaho kotoa ki ha ngaahi aʻusia fakalaumālie.”
Kiana G., 16, Samipoanga te la Note, ʻOtu Filipainí
Kole ki he ʻOtuá
“Ko ha founga lelei hono lau maʻu pē hoʻo folofolá mo e lotu ʻi he ʻaho takitaha ke fakahaaʻi ai ki he ʻOtuá ʻokú ke fie maʻu ke ke aʻusia ha ngaahi meʻa fakalaumālie. Kapau ʻokú ke ongoʻi ʻoku ʻikai ke ke maʻu ha ngaahi aʻusia fakalaumālie, pea kole fakamātoato ki he ʻOtuá ke tokoni atu ke ke fakatokangaʻi kinautolu. ʻOkú Ne ʻofa ʻiate koe pea te Ne tali hoʻo ngaahi lotú ʻi hoʻo feinga ke fai hoʻo tafaʻakí.”
ʻIlaisiā C., 15, ʻIutā, USA
Faʻa Kātaki
“Faʻa kātaki. He ʻikai tatau maʻu pē hoʻo ngaahi aʻusiá mo e niʻihi kehé’.”
ʻIsapela F., 16, Sao Paulo, Palāsila
Moʻui ʻAki ʻa e Ongoongoleleí
“Te tau maʻu ha ngaahi aʻusia fakalaumālie ʻi heʻetau lau ʻa e folofolá, fakafanongo ki he ngaahi lea ʻa e palōfitá, ʻaukaí, lotú, ʻalu ki he temipalé, mo e tokoni ki he niʻihi kehé. ʻOku tokoniʻi kitautolu ʻe he ngaahi meʻá ni ke tau ofi ange kia Kalaisi pea ongoʻingofua ange ʻa e ngaahi ueʻi mei he Laumālie Māʻoniʻoní ʻokú ne ʻomi ʻa e nongá kiate kitautolú.”
Neli R., 16, Hitako, Mekisikou
Tokanga.
“Kuo pau ke tau manatuʻi maʻu pē ke matuʻaki tokanga ki he ngaahi ueʻi ʻa e Laumālie Māʻoniʻoní. Te tau lava ʻo tokoniʻi kinautolu ʻi he fanga kiʻi meʻa iiki tahá. Neongo ʻoku nau iiki, ka ʻe lava pē ke nau iku ki ha ngaahi tāpuaki taʻengata.”
Melisa A., 14, Palaipa, Palāsila