“Mei he Ngaahi ʻIpiselí ki he Fakamafola Hangatonú,” Ki Hono Fakamālohia ʻo e Toʻu Tupú, ʻAokosi 2023.
Ko e Teuteu ki he Konifelenisi Lahí
Mei he Ngaahi ʻIpiselí ki he Fakamafola Hangatonú
Kuo fuoloa taʻu ʻa hono fakahoko ha ngaahi fetuʻutaki mei he kau taki ʻo e Siasí, ka ʻoku kei tatau pē ʻa e ngaahi taumuʻá.
Meimei Taʻu ʻe 2,000 Kuohilí
Naʻe fokotuʻu ʻe Sīsū Kalaisi ʻa Hono Siasí lolotonga ʻEne ʻi he māmaní. Hili ʻa e toetuʻu ʻa e Fakamoʻuí pea hāʻele hake ki he langí, naʻe tataki ʻe Heʻene kau ʻAposetoló ʻa e Siasí ʻaki ʻa e mafai, fakahā, mo e tataki fakalaumālie naʻá Ne foaki kiate kinautolú.
ʻI he ngaahi ʻaho ko iá, naʻe faʻa fetuʻutaki ʻa e kau taki ʻo e Siasí mo e kāingalotu ʻo e Siasí ʻi ha ngaahi feituʻu kehekehe ʻo fakafou ʻi he ngaahi ʻipiselí (ngaahi tohí).
ʻOku ʻi he Fuakava Foʻoú ha ngaahi ʻipiseli naʻe hiki ʻe Paula, Pita, Sione, Sēmisi, mo Sute. Naʻe hiki nima pē ʻa e ngaahi tohí ni, tufa nima, hiki nima, pea lau leʻolahi.
Naʻe faʻa maʻu ʻe he kau taki ko ʻeni ʻo e Siasí ʻa e taumuʻa tatau ʻi hono fai ʻo e ngaahi tohí ni. Naʻa nau feinga ke:
-
Fakamoʻoniʻi mo akoʻi ʻa e ongoongolelei ʻo Sīsū Kalaisí.
-
Poupouʻi, ueʻi fakalaumālie, mo langaki moʻui.
-
Fakamanatu ange ʻa e ngaahi fekaú mo e ngaahi fuakavá.
-
Talanoaʻi ʻa e ngaahi palopalema lolotongá.
-
Fakatokanga ki he ngaahi fakatuʻutāmakí.
-
Fakatonutonu ha faʻahinga fehālaaki naʻe hū mai ki he Siasí.
-
Fakauouangatahaʻi ʻa e Siasí.
Kuongá ni
Fakakaukau ki he tūkunga ʻoku hoko hili ha taʻu eni ʻe 2,000 mei he meʻa ne lave ki ai kimuʻá, pea te ke fakatokangaʻi kuo liliu ha ngaahi meʻa lahi, ka ʻoku kei faitatau pē ha ngaahi meʻa ʻe niʻihi.
Kuo fakafoki mai ʻe Sīsū Kalaisi Hono Siasí ki he māmaní, pea ʻoku toe ʻi ai ha kau palōfita mo ha kau ʻaposetolo ke tataki ia. Kae talu mei he ngaahi ʻaho ʻo e ngaahi ʻipiselí, kuo fakalakalaka ʻa e tekinolosia ʻo e fetuʻutakí—mei he mīsini pākí ki he letioó ki he televīsoné ki he ʻinitanetí.
ʻOku lava ʻe he kau taki ʻo e Siasí ʻi he taimí ni ʻo fai ha ngaahi pōpoaki ʻi ha konifelenisi lahi ki he Siasí kotoa ʻi he taimi pē ʻe taha. ʻOku ʻoatu foki ʻi he satelaité pea fakamafola hangatonu ʻi he ʻinitanetí ʻi ha ngaahi lea fakafonua kehekehe ʻi he taimi pē taha. ʻI ha ngaahi ʻaho siʻi mei ai, ʻoku tuku atu ʻa e fakamatalá ʻi he ʻinitanetí ʻi ha ngaahi lea fakafonua kehekehe, pea ʻoku ʻave fakamāmani lahi ha tatau kuo paaki.
ʻI hoʻo teuteu ki he konifelenisi lahi ka hokó, mahalo te ke fakakaukau ki he ngaahi ʻipiseli ko ia ʻi he Fuakava Foʻoú. Ko ha ngaahi taimi kehekehe ia, pea naʻe kehekehe ʻaupito ʻa e ngaahi tekinolosiá. Ka ʻoku fakahoko ʻe he ngaahi pōpoaki ʻo e konifelenisí ʻa e ngaahi taumuʻa mahuʻinga tatau. ʻI hoʻo aʻusia ʻa e ngaahi pōpoaki ʻo e konifelenisí, mahalo te ke fakakaukau ki he founga ʻoku nau:
-
Fakamoʻoniʻi mo akoʻi ʻa e ongoongolelei ʻo Sīsū Kalaisí.
-
Poupouʻi, takiekina fakalaumālie, mo langaki moʻui.
-
Fakamanatu ange ʻa e ngaahi fekaú mo e ngaahi fuakavá.
-
Talanoaʻi ʻa e ngaahi palopalema lolotongá.
-
Fakatokanga ki he ngaahi fakatuʻutāmakí.
-
Fakatonutonu ha faʻahinga fehalaaki naʻe hū mai ki he Siasí.
-
Fakauouongatahaʻi ʻa e Siasí.