“Ko e Muimui ʻa e Kau Palōfitá ki he Kau Palōfitá,” Ki Hono Fakamālohia ʻo e Toʻu Tupú, Sepitema 2023.
Ko e Teuteu ki he Konifelenisi Lahí
Ko e Muimui ʻa e Kau Palōfitá ki he Kau Palōfitá
ʻE lava ke maʻu ʻe ha taha pē naʻa mo e kau ʻAposetoló— ʻa e ngaahi tāpuakí ʻaki ʻene muimui ʻi he palōfitá.
ʻOku faʻa kole mai ke tau muimui ki he palōfitá. Ka ʻe fifili ha niʻihi pe ko e hā ʻoku fuʻu mahuʻinga ai ke muimui ki he leʻo ʻo e palōfitá.
ʻI he konifelenisi lahi ʻo ʻEpeleli 2017, naʻe kole ai ʻe Palesiteni Tōmasi S. Monisoni, ko e palōfita ʻi he taimi ko iá, ki he kāingalotu ʻo e Siasí ke nau ako fakaʻaho ʻa e Tohi ʻa Molomoná, kae ʻikai ko e lau pē. Naʻe fakatou muimui ʻa Palesiteni Lāsolo M. Nalesoni mo Palesiteni Henelī B. ʻAealingi ki he akonaki ʻa e palōfitá peá na lea fekauʻaki mo e meʻa naʻe hokó.
Ko ha ʻAposetolo Talangofua
Naʻe pehē ʻe Palesiteni Nalesoni: “[Naʻá ku] feinga ke muimui ki [he] faleʻi [ʻa Palesiteni Monisoní]. Naʻá ku lisi e ngaahi meʻa kau ki he Tohi ʻa Molomoná, meʻa ʻoku ʻi aí,meʻa ʻokú ne fakapapauʻí,meʻa ʻokú ne fakahalakí,meʻa ʻokú ne fakakakató,meʻa ʻokú ne fakamaʻalaʻalá,mo e meʻa ʻokú ne fakahāʻí. Ko ha meʻa fakamāfana mo fakafiefia hono vakaiʻi ʻa e Tohi ʻa Molomoná ʻi he founga ko iá!”1
Naʻe hoko atu hono fakamatalaʻi ʻe Palesiteni Nalesoni ʻene fai ha ngaahi fehuʻi tatau ki he niʻihi kehé pea naʻá ne ʻiloʻi kuo lahi fau ʻa e ngaahi moʻui kuo faitāpuekina ʻi heʻenau muimui ki he faleʻi ʻa Palesiteni Monisoní. ʻOku fakahinohinoʻi kitautolu kotoa ʻe he ʻEikí ʻo fakafou ʻi hotau palōfitá, folofolá, mo e fakahā fakataautahá.
Ko ha ʻAposetolo Faivelenga
Naʻe pehē ʻe Palesiteni ʻAealingi: “Nʻaá ku lau ʻa e Tohi ʻa Molomoná ʻi he ʻaho kotoa pē ʻi ha taʻu ʻe 50 tupu. Koeʻuhí kuó u lau ia, naʻá ku fakakaukau mahalo naʻa ko e lea ʻa Palesiteni Monisoní ia ki ha taha kehe. Kae hangē pē ko e tokolahi ʻo kimoutolu, naʻá ku ongoʻi naʻe hanga ʻe he fakalotolahi mo e talaʻofa ʻa e palōfitá ʻo fakaafeʻi au ke fai ha ngāue ʻoku toe lahi angé.
Naʻe hoko atu ʻa Palesiteni ʻAealingi ʻo pehē: “Naʻe hoko ha meʻa ʻe ua kiate au ʻi he talangofua ki he faleʻi ʻa Palesiteni Monisoní: ʻUluakí, kuo hanga ʻe he Laumālie naʻá ne talaʻofa maí ʻo ʻomi kiate au ha ongoʻi fakatuʻamelie ki he kahaʻú, neongo e fakautuutu e moveuveu ʻa e māmaní. Ko hono uá, kuo ʻomi ʻe he ʻEikí kiate au—,mo koe—ke ongoʻi lahi ange ʻEne ʻofa kiate kinautolu ʻoku faingataʻaʻiá.”2
Tokotaha Kotoa
ʻE lava pea ʻoku totonu ke muimui ʻa e tokotaha kotoa pē ki he faleʻi ʻa e palōfitá mei he konifelenisi lahí. Tatau ai pē pe ko e hā e tuʻunga ʻokú ke ʻi ai ʻi hoʻo fononga fakalaumālié, te ke lava maʻu pē ʻo fakalakalaka, neongo pe ko ha ʻAposetolo koe, ko ha papi ului foʻou, pe ʻi ha feituʻu pē. ʻOku ʻikai ke ne holoki ʻetau fiemaʻu ha fakahā fakatāutahá; ko ha founga ia ʻe taha ʻe lava ke tāpuekina ai kitautolu ʻe he ʻOtuá. Kapau ʻe lava ʻe he kau ʻAposetoló ʻo maʻu ha ngaahi tāpuaki lahi ange ʻi he founga ko ʻení, ʻe lava foki ke pehē mo kitautolu.