“ʻI he Taimi ʻOku Faingataʻaʻia Fakaeʻatamai ai ha Taha ʻOkú ke ʻOfa Ai,” Ki Hono Fakamālohia ʻo e Toʻu Tupú, Sepitema 2023.
Tokoniʻo e Moʻuí
ʻI he Taimi ʻOku Faingataʻaʻia Fakaeʻatamai ai ha Taha ʻOkú ke ʻOfa Ai
Ko ha ngaahi fakakaukau ʻeni ʻe nima ke manatuʻi ʻi he taimi ʻokú ke fie tokoni ai ki ha taha ʻoku faingataʻaʻia ʻi he loto-mafasiá, loto-hohaʻá, pe ngaahi faingataʻa fakaeloto kehé.
Tā Fakatātā ʻe Toby Newsome
ʻE lava pē ke faingataʻa ke mamata ki ha kaungāmeʻa pe mēmipa ʻo e fāmilí ʻokú ne aʻusia ʻa e loto-mafasiá, loto-hohaʻá, pe ngaahi faingataʻa fakaeʻatamai kehe. Mahalo te ke fie fai ha meʻa ke tokoni ka ʻoku ʻikai ke ke fakapapauʻi pe ko e hā.
Ko ha ngaahi fakakaukau ʻeni ke manatuʻi ʻi hoʻo fakakaukauʻi e founga ke tokoniʻi ai ha taha ʻoku fefaʻuhi mo ʻenau moʻui lelei fakaeʻatamaí:
1. Fakafetuʻutaki ki ai.
Kapau ʻokú ke fifili pe ʻoku lelei ke fakafetuʻutaki pe fakamamaʻo, ko e talí: fakafetuʻutaki ki ai. ʻOku tokoniʻi moʻoni ʻa e ngaahi vā fetuʻutaki fakasōsiale vāofí ki he kakai ʻoku feʻao mo e faingataʻa fakaeʻatamaí. Fetuʻutaki kiate kinautolu. Feohi mo kinautolu. ʻE lava pē ko ha meʻa faingofua mo angamaheni, ka ke fakafetuʻutaki ki ai.
2. ʻOua te ke fai ha faleʻi tukukehe kapau ʻoku nau kole faleʻi atu.
Kapau kuo teʻeki kole atu ʻe ha taha hoʻo tokoní, ʻoua te ke kamata ʻoange ha faleʻi kiate kinautolu. Tukukehe kapau kuo kole atu, tokanga taha ke anga fakakaumeʻa, ʻofa, mo tokanga moʻoni.
3. Anga vaivai, loto lelei, mo manavaʻofa.
ʻI he taimi ʻoku kole tokoni ai ha taha, muimui ki he sīpinga ʻa e Fakamoʻuí. Lotua ha ueʻi fakalaumālie mei he Tamai Hēvaní. ʻUlungaanga langaki moʻui. Talanoa lelei kiate kinautolu. Lea ʻaki ha ngaahi meʻa lelei. Fakahaaʻi ʻa e mahinó mo e manavaʻofá. ʻAi ke nau ʻiloʻi ʻokú ke poupouʻi kinautolu pea ʻokú ke ʻi ai maʻanautolu. Poupouʻi lelei kinautolu ke nau fekumi ki ha tokoni fakapalofesinale.
4. Faʻa kātaki mo loto vilitaki.
Mahalo ʻi he taimi ʻe niʻihi, he ʻikai faʻa tokanga pe fakahoungaʻi ʻe he kakai ʻoku faingataʻaʻiá. Ka ke kātaki pē. Kei ʻofa pē ʻiate kinautolu. ʻOku ʻikai sai e tuenoá kiate kinautolu. ʻOua te ke holomui kapau ʻoku ʻikai ke nau tali e founga ʻokú ke fiemaʻú.
5. Tokangaʻi lelei mo koe foki.
Fakapapauʻi ʻokú ke fiefia ʻi hoʻo moʻuí. Hokohoko atu hoʻo lotu fakatāutahá mo e ako ʻa e folofolá. ʻAlu ki he temipalé. Fai ha ngaahi meʻa kehe ʻokú ke fiefia ai. ʻOua naʻá ke tuku ʻa e loto-mafasia pe hohaʻa ki he tūkunga ʻa e niʻihi ʻokú ke ʻofa aí ke ne lōmekina hoʻo moʻuí . Fakafetuʻutaki ki he niʻihi kehé ki ha tokoni ʻo kapau te ke fiemaʻu.