“Te u Lava ʻo Nofomaʻu ʻi loto ʻi he Lainé,” Ki Hono Fakamālohia ʻo e Toʻu Tupú, Sepitema 2023.
ʻOku ou Faʻa Fai ʻa e Ngaahi Meʻa Kotoa Pē ʻia Kalaisi
ʻOku vahevahe ʻe he toʻu tupú ʻa e founga kuo fakamālohia ai kinautolu ʻe Kalaisi ke nau fai ʻa e ngaahi meʻa ʻoku faingataʻá (vakai, Filipai 4:13).
Te u Lava ʻo Nofomaʻu ʻi loto ʻi he Lainé
Talu mei heʻeku kamata ʻi he sipoti lelé, mo ʻeku fakaʻānaua ke u lelei ange ʻi he lekooti fakaakó ʻi he lele lau mailé. Pea ʻi he tātāiku ʻo e faʻahitaʻu ko ʻení, naʻá ku leleʻi ʻa e mailé ʻi lalo ʻi he miniti pē ʻe nima, ʻo lelei ange ʻa e lekōtí ʻaki ha sēkoni ʻe tolu.
Ka neongo ia, naʻa mau ʻiloʻi ʻi he ʻaho hono hokó naʻe ʻikai lau ʻeku mailé. Naʻe fakamatalaʻi mai ʻe he kau ʻōfisá, naʻá ku tuʻu tuʻo tolu ʻi he laine ʻi lotó, ʻo fakataʻeʻaongaʻi ai au mei he lová. Naʻe fakakikihiʻi ʻe heʻeku faiako sipotí, ko e ʻuhinga pē naʻá ku manga ai ki tuʻá koeʻuhi naʻe tekeʻi au ʻe ha taha lele kehe. Naʻe pehē ʻe he ʻōfisá, “ʻE malava pē ʻoku ʻikai ko haʻane foʻui hono tekeʻi ia ki tuʻá, ka ko hono foʻui ʻa ʻene fuʻu ofi ki he lainé.” Naʻá ku mavahe mei ai mo e ongoʻi hangē kuo toʻo taʻetotonu ʻeku lavameʻá meiate aú.
ʻI he kalasi ʻo e Kau Finemuí ʻi he Sāpate hono hokó, naʻa mau mamataʻi ha foʻi vitiō naʻe fakafehoanaki ai ʻa e nofo maʻu ʻi he ngaahi lainé ʻi he sipotí, ki hono tauhi ʻo e ngaahi fekaú.1 Lolotonga e lēsoni naʻá ku tangutu aí, naʻá ku ʻita ʻi he fakamanatu mai naʻe ʻikai ke u lava ha meʻá.
ʻI heʻeku lele takai ʻi he malaʻe lelé ʻi he ʻaho hono hokó, naʻá ku sio hifo ʻo fakatokangaʻi ʻoku ou lele tonu ʻi he laine ʻi lotó. Pea ʻi he taimi ʻe niʻihi, ʻoku ou lele ai ʻi loto, ʻo hangē ko ia naʻe lea ʻaki ʻe he ʻōfisá. Naʻe taʻofi ʻeku lelé, mo e loto-fakatōkilalo. Naʻá ku fuʻu ongoʻi fiemālie ʻaupito ʻi he feituʻu naʻá ku lele aí ʻo ʻikai ke u toe sio ai ki hono fakatuʻutāmakí.
Meʻa mālié, he naʻe ʻomi kiate au ha faingamālie hono ua hili ha ngaahi uike siʻi mei ai. Naʻá ku fakamamaʻo mei he laine ʻi lotó peá u maumauʻi ai ʻa e lekooti fakaakó, ʻi heʻeku lele ʻi he laine totonú.
Naʻe hanga ʻe he aʻusia ko iá ʻo ʻai ke u fakakaukau ki ha ngaahi fekau ʻe niʻihi ne u lele ofi ai ki he lainé. Ka koeʻuhí ko Sīsū Kalaisi mo ʻEne Fakaleleí, ʻoku ʻomi maʻu pē kiate au ha toe faingamālie ʻi heʻeku fakatomalá.
Ko e taimi ʻoku fekauʻaki ai mo e ngaahi fekaú, ʻoku totonu ke tau fakamamaʻo mei he lainé pea fai hotau lelei tahá ke nofo maʻu ʻi loto ʻi he ngataʻangá. Ka ʻoku ou houngaʻia ko e taimi ʻoku tau fai ai ha ngaahi fehalākí, ʻoku fakaʻatā ʻe he Fakamoʻuí ke tau fakatomala pea toe feinga.
Leikeni P., ʻIutā, USA