“Fakafehokotaki,” Ki Hono Fakamālohia ʻo e Toʻu Tupú, Sepitema 2023.
Fakafehokotaki
Sisekelo Q.
15, Saute ʻAfilika
Faitaaʻi ʻe Ntebaleng Twala
ʻOku ou lotua maʻu pē ke lavameʻa mo lelei hoku fāmilí. Ka kuo teʻeki ngāue ha ngaahi meʻa ʻe niʻihi ʻo hangē ko ʻeku fakaʻamú. Naʻe kamata ke u fifili pe ʻoku fanongo mai ʻa e ʻOtuá ki heʻeku ngaahi lotú. ʻI he fakaʻau ke kovi ange ʻeku taʻepauʻiá, naʻe siʻisiʻi ange ai ʻeku faʻa lotú. Naʻá ku fakakaukau, “Ko e hā ʻoku totonu ai ke u lotu ʻi he taimi ʻoku ʻikai ke u ongoʻi ai ha meʻá?”
Ka ʻi ha ʻaho ʻe taha, naʻá ku fakatokangaʻi naʻá ku veiveiua ki he ʻOtuá. Kuó Ne hoko maʻu pē ko ʻeku Tamai ʻi Hēvani, ko hoku poupou mo e mālohinga lahi tahá. Naʻe kamata ke u tangi. ʻI heʻeku aʻu ki ʻapi ʻi he ʻaho ko iá, naʻá ku tūʻulutui ʻo lotu he naʻá ku ongoʻi hē fakalaumālie mo fakaeloto.
Hili ʻeku lotú, naʻá ku ongoʻi ʻa e fiemālie, māfana, mo e ʻofa. Naʻá ku ʻiloʻi naʻá Ne nofoʻia au. ʻOku ou ʻiloʻi ʻoku ʻafioʻi ʻe he Tamai Hēvaní hotau ngaahi faingataʻaʻiá mo fanongo ki heʻetau ngaahi tangí. Talu mei he ʻaho ko iá mo e mahino kiate au ʻoku ʻi ai ʻEne ngaahi palani lahi maʻa hoku fāmilí—ko ha ngaahi palani ʻoku fiemaʻu ki ai ʻEne taimí mo ʻeku kātakí.