“Tukuange pea Fakafanongo,” Ki Hono Fakamālohia ʻo e Toʻu Tupú, Sepitema. 2023.
Tukuange, pea Fakafanongo
Naʻe ʻi ai ʻeku palani ke u lavaʻi ʻaki ʻeku ngaahi misí. Ka ʻi he ʻikai ke u toe hohaʻa ki heʻeku ngaahi holí pea fakaʻatā ʻa e ʻEikí ke fakahinohinoʻi hoku halá, naʻe faitāpuekina au ʻi ha ngaahi founga fakaʻofoʻofa.
Tā fakatātaaʻi ʻe Michael Mullan
ʻI he hokosia hoku taʻu 17, naʻá ku hiki ki Felenisisikou, Kalefōnia, USA, ke u hū ki ha ʻapiako ʻaati. Naʻá ku fakaʻānaua ke u hoko ko ha tokotaha tā fakatātā maʻá e Disney.
ʻI he kolisí, naʻá ku ako ʻo lahi ange ʻi he ʻātí. Naʻá ku ako ko hai au ki heʻeku Tamai Hēvaní. Naʻe ʻikai ke u toe ʻi ʻapi. Naʻe ʻikai ke fafangu au ʻe heʻeku ongomātuʻá ke ʻave au ki he lotú ʻi he Sāpate kotoa pē. He ʻikai ʻiloʻi ʻe ha taha pe ʻoku ou moʻui nai ʻaki ʻa e ongoongoleleí pe ʻikai. Ka naʻá ku ʻiloʻi naʻá ku fiemaʻu Ia. Naʻá ku fakasio ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha tohi telefoni. ʻI heʻeku hū atu ki he falelotu ʻo e Siasí ʻo fanongo ki hono tā ʻo e “ʻOku Moʻui Hoku Huhuʻí” (Ngaahi Himi, fika 68), naʻá ku ongoʻi lata. Naʻe kamata ke u fakatokangaʻi ʻa e matuʻaki mahuʻinga ʻa e ongoongoleleí kiate aú pea mo e meʻa naʻá ku fuʻu fiemaʻú.
ʻAi ke Fika ʻUluaki ʻa e ʻEikí ʻi Hoʻo Moʻuí
ʻI he taimi ko iá, naʻá ku loto ke fakakau ʻa ʻeku Tamai Hēvaní ʻi he meʻa kotoa naʻá ku faí. Hangē ko ʻení, naʻe kamata ke u fehuʻi kiate Ia pe ko e hā ʻEne fakakaukau ki heʻeku ngaahi palani ngāue maʻuʻanga moʻuí mo e feituʻu ʻoku totonu ke u ʻi aí. ʻI heʻeku lotu mo fai e ngaahi fehuʻi ko ʻení, naʻe kamata ke u ongoʻi ʻoku fiemaʻu ke u ʻi ha feituʻu kehe.
Naʻá ku kiʻi loto mamahi. Kuó fokotuʻu kotoa ʻeku ngaahi fakaʻānauá mo ʻeku tokangá ki heʻeku palaní. Naʻá ku pehē naʻá ku ʻiloʻi lelei ʻa e feituʻu te u ʻalu ki aí mo e meʻa te u faí. Ka ʻi he taimí ni, naʻá ku ʻiloʻi naʻá ku fiemaʻu ʻa e ʻEikí ke fika ʻuluaki ʻi heʻeku moʻuí, pea ʻoku mahuʻinga ange ia kiate au ʻi ha toe meʻa. Neongo naʻá ku ʻiloʻi ʻe malava ke kehe hoku halá mei he meʻa naʻá ku fakakaukau ki aí, naʻá ku ongoʻi ʻEne ʻofa kiate aú, pea naʻá ku falala ki Hono potó.
Naʻá ku iku ki he ʻUnivēsiti Pilikihami ʻIongí–ʻAitahoó mo e ʻUnivēsiti Pilikihami ʻIongi ʻi Polovo, ʻIutaá, ke fakaʻosi hoku mataʻitohi tā fakatātaá. Kimuʻa ʻi heʻeku fakaʻosi akó, naʻá ku ako ngāue ʻi ha fale keimi fakalotofonua. Hili ha taʻu nai ʻe taha, hili hono fakahū au ke u ngāue taimi kakató, naʻe fakaʻohovale kuo fakatau ʻa e falé ʻe he Disney, ʻa ia naʻá ne ʻomi ha ngaahi faingamālie foʻou mo e tupulaki.
ʻI he taimi ʻokú ke tukuange ai ʻa e meʻa ʻokú ke pehē ʻoku fiemaʻu ke ke maʻú, ʻe faitāpuekina koe ʻe he ʻEikí ʻi he taimi totonu ʻaki ʻa e meʻa te ne ʻai koe ke ke fiefiá. ʻOku ʻikai te ke lave ʻiloʻi ʻa e feituʻu ʻe ʻave koe ki ai ʻe he ʻEikí. Tukuange pea fakafanongo.
ʻAi Ke Muʻomuʻa ʻa e Meʻa ʻOku Muʻomuʻá
Lolotonga ʻa e akó, naʻe faingataʻa ke u maʻu ha taimi ke fai ai e meʻa kotoa pē naʻe fiemaʻu ki heʻeku kalasí mo e ngāue fakaako mei ʻapí mo e ngaahi fakatongia faka-Siasí. Naʻe pau ke u fakapapauʻi ʻa e ngaahi meʻa ke u fakamuʻomuʻá. Te u ʻalu nai ʻo ʻaʻahi ki he kakaí ke ngāue fakaetauhi kiate kinautolu, pe te u ako ki he sivi ko ʻení? Te u lau nai ʻi he taimí ni ʻeku folofolá, pe te u fakaʻosiʻi ʻa e ngāue fakaako ko ʻení?
Ko e taimi kotoa pē ʻoku ou fakamuʻomuʻa ai ʻa e ʻEikí pea fai ʻa e ngāue naʻá Ne ui au ke u fakahokó, naʻe lelei ʻa e meʻa kotoa, pea toe ʻi ai mo ha taimi ʻatā. ʻOkú Ne tauhi maʻu pē ʻEne ngaahi talaʻofá. ʻI he taimi ʻoku tau fakamuʻomuʻa ai ʻa e ʻEikí , ʻoku tō lelei ʻa e meʻa kotoa pē.
Ko e taimi naʻá ku ʻalu ai ki he ʻapiako ʻunivēsití, naʻá ku fehangahangai mo ha ngaahi fili tatau. Naʻá ku hoko ko e palesiteni ʻo e Kau Finemuí ʻi he uōtí ʻi he taimi ko iá. ʻI he ʻaho ʻe taha, naʻe pau ke u fili ʻi he vahaʻa ʻo e ako ki ha sivi pea mo hono tokoniʻi ha kau finemui ke nau palaniʻi ha ʻekitivitī. Naʻá ku fili ʻa e kau finemuí. Ko e taimi ʻatā naʻá ku maʻú, naʻá ku lotu ai mo ako ki he lelei taha naʻá ku lavá. Naʻá ku lava ʻi he siví, ʻaki ha ngaahi maaka lelei lahi ange ʻi he meʻa naʻá ku ʻamanaki atu ki aí.
Tuku ke Ne Tataki Koe
ʻE tataki koe ʻe he Tamai Hēvaní. ʻOkú Ne ʻofa ʻiate koe mo ʻafioʻi tonu ʻa e tuʻunga ʻokú ke ʻi aí. ʻOkú Ne ʻafioʻi tonu ʻa e meʻa te ne faitāpuekina lelei taha ʻaki koé mo e taimí.
ʻI heʻeku moʻuí, kuo liliu mo ngaʻunu ha ngaahi meʻa lahi. Ka kuó Ne ʻi ai ʻi he taimi kotoa pé. ʻI heʻeku muimui ki Heʻene fakahinohino kiate aú, kuo fakaʻofoʻofa e ikuʻanga ha ngaahi meʻa. ʻO ʻikai tatau mo e meʻa ne u ʻamanaki atu ki aí, ka ʻoku ou fiefia ai.
ʻOkú Ne finangalo ke hoko ko ha konga ʻo ʻetau moʻuí. Kapau te tau tuku ke Ne hū mai ki heʻetau moʻuí, ʻoku ʻi ai ha ngaahi meʻa fakaʻofoʻofa ʻoku fakatatali mai maʻatautolu takitaha. Ko e hā mo ha toe meʻa ʻokú Ne teuteuʻi maʻau ka ʻoku ʻikai ke ke lava ʻo mamata ki ai?