Parau poro’i a te feiā fa’atere o te ārea
’Aita ana’e te Buka a Moromona, e’ita vau e ’ite
I te roara’a o tō’u orara’a, ’ua tai’o vau e rave rahi buka : nō te mau ’ā’ai rēhiti rahi, te mau ’ā’ai fa’ahiahia, te parau fa’auru mau nō te tahi mau ta’ata ’e te mau buka ha’amāramaramara’a nō te tōro’a. Noa atu e rave rahi o te reira tei fa’atupu i te maita’i i roto i tō’u orara’a, hō’ē ana’e rā tei fa’ataui roa i te reira. ’Ua tauturu te Buka a Moromona iā’u ’ia ha’afātata atu i te Atua ’e ’ia patu i tō’u niu i ni’a i te papa o tō’u Tāra’ehara, ’o Iesu Mesia (hi’o Helamana 5:12).
’Iteraʼa pāpū
Noa atu e ’ere au i te mea itoito roa i roto i te ’Ēkālesia i te 14ra’a o tō’u matahiti, ’ua ani-manihini-hia vau ’ia haere i te séminaire. Nā roto i te ’ōpuara’a hanahana, ’ua ha’amaita’i te Fatu iā’u ma te hō’ē pāhonora’a ’ōhie, mea hōhonu rā, i te hō’ē pure e piti mahana nā mua a’e, ’e ’ua ineine au i te fāri’i i teie anira’a manihini. I taua matahiti ra, ’ua ha’api’i mātou nō ni’a i te Buka a Moromona. Maoti te pāturura’a a te hō’ē ’orometua here ’e tō’u mau hoa pīahi, ’ua fāri’i au i te anira’a manihini e tai’o i te Buka a Moromona i te roara’a o te matahiti. Hau atu, ’ua fāri’i au i te anira’a manihini a te peropheta Moroni e ani i te Atua, e parau mau ānei te buka (hi’o Moroni 10:3–5).
Tau taime ri’i i muri a’e i te ha’amatara’a te séminaire, ’ua ani fa’ahou vau i tō’u Metua i te ao ra, ma te ’ā’au tae ’e te hia’ai mau, ma te hina’aro ’ia ’ite ’o vau iho e parau mau ānei te Buka a Moromona ’e ’ua ’īriti ānei Iosepha Semita i te reira nā roto i te hōro’a ’e te mana o te Atua, mai tāna i parau. ’Ua putapū fa’ahou vau i taua ā mana’o ra ’o tei fa’a’ī iā’u nā mua atu. I ahu terā mana’o nō te here mau i roto iā’u ’e ’ite ihora vau—’ua ’ite maita’i roa vau—ē te Buka a Moromona ’o te parau ïa a te Atua.
I taua ā taime ra i ’ite au ē, nō te mea e parau mau te Buka a Moromona, ’o Iesu Mesia ïa tō’ū Fa’aora, ’o Iosepha Semita tōna peropheta tei fa’atōro’a-ātea-hia nō te fa’aho’i mai i te ’Ēkālesia mau a te Fatu i ni’a i teie fenua, ’e ’ua hōro’a mai te hō’ē peropheta ora iā’u i te mau parau a’o ’e te arata’ira’a nā’u e pe’e, ’a tāmata ai i te ora i te mau fa’auera’a ’e te mau ture a te ’Ēkālesia. E mau mea hōhonu teie nō te hō’ē tamaiti 14 matahiti.
’Ua taui teie ’itera’a iā’u. ’Ua hina’aro vau ’ia riro ’ei ta’ata maita’i. ’Ua hina’aro vau e rave i te mau ’ohipa maita’i, ’e ’ia rave ana’e au i te hape e māuiui au nō te mea tā’u i rave, e tātarahapa vau ’e e tītau vau i te Fatu ’ia tauturu mai iā’u ’ia rave maita’i a’e. ’Ua tupu rahi tō’u fa’aro’o ia Iesu Mesia i te mahana tāta’itahi maoti tō’u ’itera’a pāpū pūai ’e tō’u hāro’aro’ara’a i te mau ha’api’ira’a o te Buka a Moromona.
’Ua ani te peresideni Russell M. Nelson i te mau melo o te ’Ēkālesia ’ia feruri i nā uira’a e toru : « ’A tahi, e aha te huru tō ’outou orara’a ’āhani ’aita te Buka a Moromona ? Te piti, e aha tā ’outou e ’ore e ’ite ? ’E te toru, e aha tā ’outou e ’ore e fāna’o » ?1
Mai te peu ’aita ā ’outou i nā reira, tē ani atu nei au ia ’outou ’ia feruri hōhonu i ni’a i teie mau uira’a nā roto i te pure ’e ’ia pāhono i te reira ma te ha’avare ’ore. I te pāhonora’a vau i te reira, ’ua rahi roa tō’u here ’e tō’u māuruuru nō te Buka a Moromona ’e nō Iesu Mesia ’o tā te reira e fa’a’ite pāpū nei.
E’ita roa vau e ’ite i te fa’anahora’a rahi nō te tāra’ehara, te tusia tāra’ehara ’e te aroha o Iesu Mesia, ’aita ato’a te mau ha’api’ira’a a te mau peropheta ora. ’O teie ïa tō’u orara’a maoti te Buka a Moromona. E tauturu mai te mau parau tumu i roto ’ia fa’aea noa i ni’a i te ’ē’a nō te fafaura’a, i roto i te hō’ē ao e ’ino noa atu ra.
Mau ha’amaita’ira’a ’utuāfare
’Ua fafau te peresideni Marion G. Romney, tauturu piti tahito i roto i te Peresidenira’a Mātāmua ē :
« ’Ua pāpū iā’u ē mai te peu, i roto i tō tātou ’utuāfare, e tai’o te mau metua ma te pure ’e te tāmau i te tahi tuha’a o te Buka a Moromona, rātou iho ’e e tā rātou mau tamari’i, e haere mai te vārua o tei buka e ha’apuru i tō tātou ’utuāfare ’e i te feiā ato’a e ora ra i roto. E mara’a mai te vārua nō te fa’atura ; e rahi atu ā te fa’atura ’e te mana’o tura i te tahi ’e te tahi. E mo’e roa te vārua nō te mārōra’a. E a’o te mau metua i tā rātou mau tamari’i ma te here rahi ’e te pa’ari. E fa’aro’o rahi a’e te mau tamari’i ’e e auraro i te a’o a tō rātou mau metua. E mara’a rahi te parauti’a. E rahi atu ā te fa’aro’o, te tīa’ira’a ’e te aroha—te here mau o te Mesia—i roto i tō tātou ’utuāfare ’e tō tātou orara’a, ma te ’ume mai i te hau, te ’oa’oa ’e te poupou. »2
I te roa’ara’a tā māua e pae tamari’i ’āpī, e mea fifi roa nō tō māua ’utuāfare ’ia pe’e i teie a’o a te peropheta. ’Ua tītauhia fātata e 18 ’āva’e nō te fa’aoti i te tai’ora’a i te Buka a Moromona. I te rahira’a o te taime, e tai’o mātou i te hō’ē ’api. E tai’o tāta’itahi mātou i te hō’ē ’īrava ’e e tauturu māua i tā māua tamāhine hope’a, e maha matahiti, ’ia parau i te hō’ē ’īrava nā muri i tō te hō’ē o māua. Nō te fa’ahanahana i te reira, ’ua haere mātou e tāmā’a i rāpae, i ni’a i te ’aira’a mā’a ’ua ui atu vau i tō’u ’utuāfare e aha tā rātou ’ā’amu au roa o te Buka a Moromona. Te mau ’ā’amu, ’o Alama ïa i rotopū i te ’āti Zorama, te tere o te ’utuāfare o Lehi i te fenua i parauhia, ’o Helamana ’e te mau ’aito ’āpī, ’o Moromona ’e Moroni, te mau ’ohipa misiōnare a Amona ’e te fa’afāriura’ahia Alama tamaiti. I te hope’a, ’ua tu’u mai tā māua tamāhine e maha matahiti i tōna reo. ’Ua parau ’oia : « ’O Iesu noa ! » I te reira mahana, ’ua ha’api’i mai ’oia i te hō’ē ha’api’ira’a pūai nō te fa’aro’o tamari’i.
’Anira’a manihini ’e parau fafau
’Ua ha’api’i te peresideni Nelson :
« ’Ia feruri au i te Buka a Moromona, tē feruri ra vau i te ta’o mana. Te mau parau mau o te Buka a Moromona e mana tōna nō te fa’aora i te ma’i, te tāmāhanahana, te fa’aho’i mai, te aupuru, te ha’apūai, te fa’anā ’e te fa’a’oa’oa i tō tātou vairua […] Tē parau fafau atu nei au ia ’outou ē, ’ia [’imi] ’outou i te Buka a Moromona nā roto i te pure i te mau mahana ato’a, e rave ïa ’outou i te mau fa’aotira’a maita’i a’e—i te mau mahana ato’a. Tē parau fafau atu nei au ē, ’ia feruri māite ’outou i tā ’outou i ha’api’i, e matara mai ïa te mau ha’amāramarama o te ra’i ’e e fāri’i mai ’outou i te pāhonora’a i tā ’outou iho mau uira’a ’e te arata’ira’a nō tō ’outou iho orara’a. »3
Te parau fafau a Moroni, nō te feiā ato’a ïa e tai’o i te Buka a Moromona, nō te taime mātāmua ānei ’aore rā nō te pae-’ahuru-ra’a o te taime. ’A ha’amana’o i te fa’aro’o ’e te pure, te ’ā’au tae ’e te hina’aro mau ’ia ’apo mai. ’Āmuihia ’e tā ’outou fa’aotira’a pāpū ’ia ha’api’i, ’ia feruri hōhonu ’e ’ia pure, e noa’a ato’a ia ’outou teie ’itera’a pāpū ’e e fāri’i ’outou i te mau ha’amaita’ira’a nehenehe ’o tā te reira e hōpoi mai. E rahi atu ā te reira ’a fa’a’ite ai ’outou i te buka ’e tō ’outou ’itera’a pāpū ia vetahi ’ē.
Tē ani manihini atu nei au ia ’outou ’ia fa’aō i te Buka a Moromona i roto i tō ’outou orara’a i te mau mahana ato’a. ’A ’apo mai i tā te reira mau ha’api’ira’a, ’ia au ’outou i tō te reira mau ’ā’amu ’e ’a pe’e i te hi’ora’a o te mau pipi mau a Iesu Mesia. Tē fafau atu nei au, ’a nā reira ai ’outou, e ha’apūaihia tō ’outou fa’aro’o ia Iesu Mesia, e ’ite ’outou i te tīa’ira’a rahi a’e ’e nā roto i te aroha marū o te Fatu, e putapū ’outou i te here mau o te Atua e fa’a’ī mai i tō ’outou vairua.