Te mau ’api nō pātifita
’Ua tae’ahia i te ’aito nō te pā’ira’a pōpō te fāito teitei ’āpī i te tu’ura’a i te hiti te ha’uti nō te tāvini i te ta’ata
’Ua « here » mau taua ta’ata ha’uti marite ra i te nūna’a nō Niutirani
E tāpa’o teie misiōnare i te mau ’oehā ato’a i matauhia : E ’ahu tāne uouo ’e te ta’amu ’arapo’a, tāna mau pāpa’ira’a mo’a i te rima ’e e fa’aro’o huru mau i te Atua. E mea rā e fa’ata’a ’ē ia Elder Gabin Chambers i te tahi pu’era’a.
E ta’ata ha’uti Chambers nō te pā’ira’a pōpō marite, e 2 metera 06 te roa ! Nō Corona ’oia i Californie, ’ua ’aitaui ’oia i tōna piriaro pā’ira’a pōpō nō te ’ahu misiōnare rave tāmau.
’Ua tāvini Elder Chambers i roto i te vaefenua Papatoetoe nō te misiōni nō Auckland i Niutirani, i reira ’ua ha’amata, ’aita i maoro a’enei, i te ha’api’ipi’i i te hō’ē hoa misiōnare, ’o Elder Bryce Jacobson. « ’Ua fa’ahiahia roa vau ia Elder Chambers », ’ua parau Elder Jacobson, ma te fa’ari’i mau iāna ’ei hoa mātuatua. I terā roa tōna, e ’ohipa mātau nā Chambers ’ia fa’ahiahiahia ’oia.
E ta’ata roa iho ā ’oia. « I te 13ra’a o tō’u matahiti, 1 mētera 82 tō’u roa. Tō’u rā tupura’a mau ’ua ha’amata ïa i te matahiti piti i te fare ha’api’ira’a tuarua ». ’Ua tae’ahia tōna fāito roa mau i roto i tāna matahiti hope’a ’e, mai te rahira’a o te mau tamari’i fāito roa, ’ua mana’ohia e ha’uti ’oia i te ta’orara’a pōpō i roto i te ’ete. ’Aita te reira i tupu.
« ’Aita vau e au roa te ta’orara’a pōpō i roto te ’ete », ’ua parau ’oia. « E fa’a’ō’o’o noa te tahi mau tamari’i ’e te mau ta’ata fa’aineine iā’u, ’aita vau i ’ite i te ’ōu’a. »
’Ua a’o tōna māmā iāna ’ia tāmata i te hō’ē pupu pā’ira’a pōpō fa’a’ārearea nō tō rātou vāhi. « ’Aita roa a’e au i ’ana’anatae rahi i te tū’aro nā mua a’e, ’ua parau Chambers. « ’Ua au roa vau ! Noa atu e ’ere tō’u fāito i te mea maita’i roa, ’ua ho’i atu vau i te fare ’e ’ua parau i tō’u māmā ’o te pā’ira’a pōpō te tū’aro e tano nō’u ! »
’Ua tauturu te feiā fa’aineine o te pupu iāna ’ia ’ite i tōna ti’ara’a i roto i te ha’utira’a ’e, nō tōna roa, ’ua fa’ariro iāna ’ei tāpe’a pōpō i rōpū. I te hope’a, ’ua riro mai te teimaha « nō te roa » ’ei maita’i. I muri a’e i te hō’ē matahiti pā’ira’a pōpō i roto i tōna pupu ha’uti, ’ua hina’aro ’oia ’ia ō i roto i te pupu nō tāna fare ha’api’ira’a tuarua, ’e ’ia tāmata i tōna mau ’aravihi ’āpī. Mea ’ati rā ’oia i tāna ha’utira’a fa’aineinera’a mātāmua.
« ’Ua ’ōu’a vau ’e ’ua toro i tō’u rima nō te tāmata i te tāpe’a i te pōpō, ’e i tō’u topara’a ’ua ta’ahi atu vau i ni’a i te ’āvae o te ta’ata i terā pae mai i te ’ūpe’a ’e ’ua fati tō’u mōmoa ’āvae », tē fa’ati’a ra Chambers. « E puiti atu ra ïa tō’u i muri a’e i te reira, i te mau vāhi ato’a, ’e ’aita roa i ha’uti i tā’u matahiti ha’utira’a mātāmua ».
« E mea hae roa nō’u, ’ua ha’amaita’i au i roto i teie tū’aro ’āpī ’o tā’u i au roa, ’e ’aita e ha’uti i terā matahiti tā’āto’a. »
I roto rā i te rehu o teie fa’ataupupūra’a ’ua fā mai te « manu phoenix » o te hō’ē ’aito rahi. I roto i nā matahiti e toru i muri mai, ’ua riro mai Chambers ’ei mata’ura’a nō te tahi atu pupu i ni’a i te tahua, ’ua tāpapa roa mai te mau pupu pā’ira’a pōpō a te mau fare ha’api’ira’a teitei i Marite nō te hi’o iāna. ’Ua ha’apae ’oia i te pūtē moni ha’api’ira’a a te mau fare ha’api’ira’a maita’i roa—mai ia Stanford ’e UCLA—nō te ha’uti i roto i te pupu tāna i hina’aro mau, te fare ha’api’ira’a teitei nō Brigham Young, i Provo (Utah), tei roto ato’a ho’i i te tāpura o te mau pupu fāito maita’i o te fenua.
’Ua teitei roa te ro’o o Chambers taure’are’a i te tau ve’ave’a nō te matahiti 2022, i te upo’oti’ara’a tāna pū pā’ira’a pōpo nō Orange Coast i te ha’utira’a va’a ’āi’a a te mau pū pā’ira’a pōpō i raro mai te 18 matahiti. ’Ua nōminohia Chambers i roto i te pupu mātāmua nō Marite e te tā’atira’a American Volleyball Coaches Association [Tā’atira’a nō te mau ta’ata fa’aineine]. Terā ïa te taure’are’a ’aita i ’ite i te ’ōu’a, ’ua māmū roa terā nau feiā fa’ao’ō’o.
« I muri a’e i teie ha’utira’a … ’ua rave au i te tahi tau hepetoma ’e e au ra ē ’ua fa’arahi au i te fa’a’āehuehura’a nō teie mau mea ato’a : ’ua tāhei au i tō’u feti’a ’auro… ’e ’ua māuruuru vau ’ia ’itehia mai au », ’ua parau Chambers « I muri iho rā, i ’ite au ē ’ua tae te taime nō te haere i mua i roto i tō’u orara’a ».
Te aura’a o te reira, te fāri’ira’a ïa i tō’u pi’ira’a e tāvini ’ei misiōnare nō Te ’Ēkālesia a Iesu Mesia i te Feiā Mo’a i te mau Mahana Hope’a nei. I teie ro’o tōna, e nehenehe e mana’o ē e mea fifi roa ’ia vaiiho i te pā’ira’a pōpō, ’ua rave a’ena rā Chambers i teie fa’aotira’a i te 12ra’a o tōna matahiti. I hina’aro ’oia e tāvini i te Fatu nā roto i te anira’a i te ta’ata ’ia haere mai i te Mesia ra. Te haerera’a i te misiōni ’o te ’ohipa maita’i roa ïa ’ia rave.
« ’Oia mau, e mea fifi roa ’ia fa’aea i te pā’ira’a pōpō… ’ua pure rā vau nō te reira fa’aotira’a ’e ’ua pāpū iā’u ē, ’o te fa’anahora’a a te Metua i te ao ra nō’u tē ravera’a i te hō’ē misiōni i muri noa mai te ha’api’ira’a tuarua ».
’Ua parau ’oia ē, teie fa’aotira’a tei rave-’oi’oi-hia i roto i tō’u orara’a ’ua fa’a’ōhie rahi ïa i te fa’anahora’a i te tahi atu mau ’ohipa ’o tē nehenehe e riro mai ’ei ārai’ē’a nō tāvinira’a misiōnare. « E ti’a ato’a ’ia ha’apāpū ē ’ua pure ’oe nō teie fa’aotira’a, nō te mea pēnei a’e e mana’o tō ’oe nō ni’a i te mea tā ’oe e hina’aro e rave nō te orara’a, terā rā e nehenehe tā ’oe ’ōpuara’a ’e tera tā te Metua i te ao ra nō ’oe e ta’a ’ē ».
Nō te tahi fifi i te pae o te visa nō Niutīrani, ’ua ha’amata Chambers i tāna tāvinira’a misiōnare i roto i te misiōni nō Charleston i Virginie Tō’o’a o te rā. I reira tōna ’itera’a i te mau ta’ata i roto i te ahoaho rahi i te pae faufa’a, ’ua ’ite mai rā Chambers i tō rātou ha’eha’a, i te ’imi-noa-ra’a i te arata’ira’a pae vārua i roto i tō rātou orara’a.
’O te ’Evanelia a Iesu Mesia te pāhonora’a.
E mea ta’a ’ē roa te vaira’a i Niutirani, tē ’imi ato’a rā te mau ta’ata i’ō nei i te mau pāhonora’a i te mau uira’a o te orara’a. « E fa’atupu mātou i te auhoara’a nā te mau vāhi ato’a e haere mātou, i te paraparaura’a i te ta’ata ’e i te fa’a’itera’a ia rātou i te fa’anahora’a o te ’oa’oa a te Atua », tē nā ’ō ra ’oia. « E mea pa’ari te ’ohipa, ’e e pāto’ihia mai māua… e fa’aro’o rahi rā tō māua e ’itehia mai ia māua te ta’ata ’o tē mā’imi nei i te tauira’a pae vārua i roto i tō rātou orara’a », ’ua parau ’oia. « ’Ia ineine ana’e rātou nō te fa’aro’o, tei reira māua nō te pāhono i tā rātou mau uira’a ’e i te tauturu ia rātou ’ia ’apo mai e aha tē rave ».
« ’Ia hi’o vau i muri, e nehenehe au e ’ite e mea nāhea tō te Fatu pāhonora’a i tā’u mau pure ’e i tōna tauturura’a iā’u ’ia ’ite mai i te taime tano nō te tāvini », ’ua parau Elder Chambers. « Nā roto i te ravera’a i te ’ohipa mai tā te Fatu te huru, ’ua fāri’i au i te hō’ē hōro’ara’a nō te ha’uti nō te hō’ē fare ha’api’ira’a teitei ’o tē fa’ati’a iā’u ’ia rave i te hō’ē misiōni ’e ’ia ora i tō’u moemoeā nō te pā’ira’a pōpō ».