Liaona
Teivaki Tale na Sorenikau ni Vakabauta
Maji 2024

“Teivaki Tale na Sorenikau ni Vakabauta,” Liaona, Maji 2024.

Teivaki Tale na Sorenikau ni Vakabauta

Mai vei Betsy VanDenBerghe

Lesoni mai vei ira era sa lesu tale mai ki na vakabauta.

tolo ni vunikau kei na drauna

Ena dua na vuravura ka dau vakalevutaka na italanoa ni yali-ni-vakabauta, na ilakolako vakanomodi ni lesu tale ki na vakabauta ena so na gauna era sega tu ni kilai. Ia na italanoa ni veisau e vakaraitaka na nodra ulabaleta na nodra vakatitiqa na tacida kei na ganeda ena kosipeli ni oti mada ga na nodra biuta na Lotu. Na nodra italanoa e vakaraitaka na veika e vakavulica o Alama me baleta na teivaki ni sorenikau. E vakamacalataka o Alama e dua na iwalewale ni vakabauta ka sega walega ni vukea na nodra vaqaqacotaki o ira era tovolea tiko me ra tubu na nodra vakabauta ia ena vukei ira talega era vakaleqai tu ena taro kei na kauwai eso.

  • Taumada, e dodonu meda kila ni “vakabauta e sega ni noda kila taucoko vakavinaka” (Alama 32:21).

  • Oti eda qai “ vakatovotovotaka vakalailai na vakabauta ” se dua mada ga na “ gagadre me vakabauta ” (tikina e 27).

  • Eda tea na sorenikau—na vosa ni Kalou—e lomada (raica na tikina e 28).

  • Ena ilakolako oqo, eda na vakabulabulataka na wakada vakayalo ena vosota ka ciqoma na veivuke mai vei ira na itokani ena kosipeli me vakatubura e dua na vunikau vei Karisito me, “tubu cake ki na bula tawavakaiyalayala” (tikina e 41).

“Na vakabauta e sega ni noda kila taucoko vakavinaka na ka; o koya kevaka sa tu vei kemuni na vakabauta ko ni na vakanuinuitaka na veika e sega ni laurai, ia era ka dina” (Alama 32:21

Alba Fonseca

A raica ena onolaini o Alba Lucia Fonseca, e dua na lewe ni Lotu mai Amerika, na veika a vakuwai kina na nona vakabauta vakalotu, ka sa totolo sara na yali ni nona vakabauta. A yaco sara, me ceburaka laivi na sorenikau ni vakabauta ni sa vakatitiqataka, ia a qai tekivu veivosaki kei na dua na lewenilotu dauveikauwaitaki ka kila vakavinaka ka qai kila ni nona tawavakabauta e dau vakatubura talega na lomatarotaro.

“Na noqu kila vinaka na ivakavuvuli vakosipeli kei na itukutuku makawa ni Lotu e sega ni voleka sara me vaka au nanuma rawa,” e vakamacalataka o koya. “A vakayalomalumalumutaki au oya ka vukei au meu kila ni se levu tu na ka meu vulica ni sega ni yaco mai na vakabauta ni saumi tiko na taro kece sara.” A vakila o Alba ni so tale na “veika yaga ena bula oqo—me vaka na matavuvale, vuli, cakacaka tudei—e oka kina na ririko, solibula, veilecayaki, kei na sasaga ni bula taucoko. Au a lesu tale mai ki na Lotu ka rawa ni vakadeitaka ni maroroi ni vakabauta sa yaga sara vakalevu ena mataqali sasaga vakaoqo.”

E vakavulica o Peresitedi Russell M. Nelson, “Na Turaga e sega ni gadreva na vakabauta e uasivi meda rawata kina na Nona kaukauwa e uasivi .” Ia na noda vakabauta, e dusia talega o koya, ena gadrevi me tomani tikoga na sasaga me tubu tikoga.1 Dina ni a tu vakavinaka na yavu ni vale taumada ni Valetabu e Salt Lake e sivia e dua na senijiuri, sa gadrevi kina me vakavinakataki na veika lelevu, e vakamacalataka o Peresitedi Nelson. Sa dodonu talega vei keda ena so na gauna meda vaqaqacotaka na noda dui yavu vakayalo “ meda vorata rawa na veivakararawataki kei na ogaoga sa roro tiko mai. ”2 Me vaka ni da sotava ena so na gauna na veika dredre me vakataki Alba, na noda gadreva na veivakadeitaki e rawa ni muataki keda mai na vakabauta rawarawa ki na tawavakabauta rawarawa, ka levea na sasaga e gadrevi me vakaukauwataka ka vaqaqacotaka na noda yavu vakayalo.

O ira era vulica na italanoa lesu mai ki na vakabauta era sa kunea ni veivuke oqo me raici na vakabauta ni sa dua na ilakolako ena veikalawa yadua ni bula taucoko.3 E rawa ni da tekivu ena vakabauta rawarawa me vaka e dua na gone, ia ena so na gauna na vakabauta vakagone oqo e dau sotava na vakatataro kei na kauwai eso. Me vaka ni a rairai veiqaravi vinaka tu na noda vakabauta sega ni vakatovolei me dua na yavu vakayalo, sa dodonu me da sa toso tiko oqo mai na vakabauta rawarawa ena kena veiveisau me matua na vakabauta ka rawa ni vorata na bolebole ni veisiga ni mataka.4 Na noda biuta laivi na vakabauta ena rawarawa cake beka, me vaka na vakacegu, ia na isau cecere e salavata kei na nodra ilakolako o ira era gole vua na Kalou ka laki tomana na vakabulabulataki ni nodra soreni vakabauta.

Na vakatovolei ni vakabauta a tekivu vei Samuel Hoglund mai Suwiteni ena gauna era a lomatarotaro kina na nona lewe ni vuvale. A lako curuma e dua na kena iwase ena “nona sauma e dua na taro oti ga sa basika ga mai e dua tale,” a vakamacalataka o koya. “Na noqu vakabauta a veilecayaki mai na veimama na auwa ki na kena e tarava, me yacova niu sa qai kila na iwalewale oqo kei na noqu gadreva meu vakadeitaka a sega ni tokoni rawa.” Ni sega ni saga me walia na taro lalai kece sara, a nanuma o Samuel me vulica na veitaro bibi eso—na veika bibi oqori ki na yavu tudei vei Jisu Karisito. Ni tomani tiko ena masu kei na vuli ivolanikalou, na vakasaqaqara nei Samuela, me vakataki Alba, a vakavulica vua na levu ni veika e dodonu me na kila ka kauti koya mai ki na vakabauta matua cake. “Na veika au a sotava a vaqaqacotaka vakalevu sara na noqu vakabauta,” a kaya o koya, “ka vakavulici au talega ni veika o vakasaqara vakaidina o na kunea.”

“Ia raica, kevaka mo ni yadra mada ka vakayadrata na yagomuni, mo ni vakatovotovotaka kina na noqu vosa, ka vakatovolea vakalailai na vakabauta, io, kevaka mada ga ko ni gadreva mo ni vakabauta, mo ni laiva na gagadre oqo me kadre e lomamuni” (Alama 32:27).

“ Na cakacakataki ni vakabauta e rawa ni veivakadrukai ,” e vakadinadinataka o Peresitedi Nelson. “Eso na gauna eda rairai nanuma meda sa daunivakabauta meda ciqoma na kalougata eda gadreva dina tu.”5. Ia na ikalawa lalai sara mada ga ni vakabauta, vakatekivu ena ”vakabauta lalai,” e rawa ni “cakacaka e lomamu” ka tekivu e dua na sucu vou vakayalo.

Ni oti nona veituyaki voli vakayalo ena nona veiyabaki ni vuli torocake, a taura o Amanda Freebairn mai Amerika na ikalawa lailai ni masumasu, ka vakavuna nona muria na veivakauqeti me sikova na lomanibai ni valetabu e kea. “Na noqu vakila na Yalotabu e kea e vakacaudreva tale na noqu vakabauta,” a kaya o koya. Na nona lesu ki lotu ka ciqoma e dua na veikacivi me veivakavulici ena Lalai a vakatitobutaka nona vakabauta, ka taura tikoga na veikalawa ka ciqoma kina vua na taucoko ni kosipeli. Ena ilakolako oqo, a raica kina o Amanda, “Au a kunea na isau ni taro au gadreva sara vakalevu.”

Dan Ellsworth

Ena dua na gauna, o Dan Ellsworth, mai Amerika talega, a sega ni vakadeitaka ni a tu vua e dua na tiki ni vakabauta me laki vakatovotovotaka. Na nona a kila taumada na veika vakavuli kei na itukutuku makawa e mua ki na Veiyalayalati Makawa a vakamalumalumutaka na nona vakabauta na iVola Tabu ka vakaleqa na nona vakabauta na ivolanikalou taucoko. Ia a gole tikoga ki lotu o Dan ka sa lomana me vakadidike me ono na vula ena dua na ituvatuva me masu, lolo, ka veiqaravi ena Lotu. Ena so na gauna, a kerei iratou na luvena yalewa gone me ratou masulaka talega na vakabauta nei tamadratou.

Ni oti vakalailai, a tekivu sotava o Dan na veika vakayalo ka kunea na isau ni taro eso a dau vakaosoosotaki koya tu vakalevu. Ena dua na siga, ni tiko ena dua na valenivola, a vakauqeti na yalona me rai sobu ki na iyatu e ra ni ivola ka tomika mai kina e dua. A raica ni tiko kina, na veisaqasaqa ni veivakasama veilaveti ki na ivola ka a kurea taumada na nona vakabauta na iVola Tabu. Dina ni a yaco oqo a sega ni walia na taro kece sara, a vakavulica vei Dan eso na lesoni bibi: “iMatai, au a gadreva meu yalomalumalumu tiko me baleta na levu ni noqu kila vakai au. Ka kena ikarua, na sala tale eso ni kena kunei na dina, vata kei na kena inaki, era sa tiko: o ya na veivakauqeti vakayalo, na veivakatudonutaki mai na vua ni Yalotabu, kei na vakanananu me na qaqaco kina vakasama qaqa, na veika kece e yaco ki na veivakadeitaki kaukauwa cake kei na vakabauta a sega ni tu vei au e liu.”

Zac Marshall kei na matavuvale

Kivei Zac Marshall mai Igiladi, na ikalawa rawarawa ni saravi ni dua na vidio ni vuli me baleta na iVola i Momani e tadolava na nona vakasama ni sa rawa ni donu na ivola oqo. “Au sa wilika oti ena vuli ivolanikalou vakamatavuvale ka vakakina ena noqu sasaga ga ka sega tu ni lomaqu dina,” a vakamacalataka. “Ia au sa qai sega tale ni laki Lotu niu sa cauravou tiko, ia na ivakadinadina au a raica ena vidio a vakavuna meu wilika na iVola i Momani ena imatai ni gauna ena noqu gagadre dina.” Ni sa vakadikeva tiko o Zac na vosa ni Kalou, sa tekivu me sosomitaka o Zac na vakatitiqa ena vakabauta. Sa kaya kina nikua, “Na Lotu au a raica ena dua na gauna a veivakalatilati au sa raica oqo me veisereki ena sala vata ga a kaya kina o Jisu, ‘Ía na ka dina ena sereki kemudou’ [Joni 8:32].”

“Ia kevaka ko ni sa vakaweleweletaka na vunikau ka sega ni qarava, raica ena sega ni dua na wakana” (Alama 32:38).

Ni da taura na veikalawa lalai me vakabulabulataka na vakabauta, sa dodonu talega meda kila tiko na noda ivakarau ni nanuma ni na vakataotaka ka vakacacana na vakabauta. Ena vulici ni italanoa lesu mai ki na vakabauta me baleti ira na lewe ni Lotu ena veimatanitu eso, rau sa raica na parofesa o Eric kei Sarah d’Evegnée, ena Brigham Young University–Idaho, ni “ivakarau ni sala eda vakasama kina sa ka bibi talega ki na veika eda sa vakasamataka tiko .” Me kena ivakaraitaki, ni da namaka tiko na yalodina vakalotu ena vakabulai keda mai na vakamosiyalo kei na ibolebole ni moici ni yalo ni bula e sega ni dina ka vakavurea na veivakadeitaki tawavakadinati. A yalataka o Jisu Karisito ni na sega vakadua ni biuti keda, ia e vakarota ni “dou na sotava na rarawa e vuravura” (Joni 16:33). Ia, na bolebole ni bula e rawa ni, me vaka e tukuna o Sera, “ena muataki keda meda raica vakatani na kosipeli. Ena so na gauna eda dau viritaka laivi na ka uasivi duadua ni da sotava e dua na ka e lailai sobu mai na kena e uasivi duadua.”

A sotava o dauvolaivola ka dauvolaitukutuku makawa o Don Bradley mai Amerika na taro eso me baleta na itukutuku makawa ni Lotu ena dua na gauna, e vakamacalataka o koya, “Au a sega ni marau ka dau vakatitiqa na ka eso. Na veivakabauti me baleta e dua ena vakacala-ka ki na dua na veiwekani, ka sa yali na noqu vakabauta kei na veimaliwai kei na Kalou. Ena vica na yabaki i muri, sa tekivu me cakacakataka yani o Don na nona vakanuinui kei na vakavinavinaka ena nona bula vakaikoya.

Sa tekivu vakadikeva talega na vuli me baleta na yaga ni tiko bulabula ni vakasama kei na bula vakayago ni lotu. “Au sega ni rawa ni cakitaka na vuli oqori ,” e nanuma lesu o Don. “Vakamalua, au qai kila niu sa vakaisosomitaka tiko na vakatitiqa ena vakasama bibi eso, kei na vakanananu titobu cake baleta na bula, au sa rawata tale na noqu vakabauta na Kalou kei Jisu Karisito.” A lesu tale o Don ki na itukutuku makawa e a sotava ena dua na gauna, ia ena gauna oqo e veimuataki yani ki na dua na veivakadeitaki ni o Josefa Simici sa parofita ni Kalou.

“Kevaka mo ni vakabulabulataka na vosa, io, ka vakabulabulataka na vunikau ni sa tekivu me tubu , … mo ni na tauca vakaidina na vua ni nomuni vakabauta, na nomuni gugumatua kei na nomuni vosota, kei na vosota vakadede” (Alama 32:41, 43).

Ena lomasoli mada ga me da vakatovotovotaka na vosa ni Kalou ka vakanuinui tiko na vakasama, na lesu tale ki na vakabauta kei na tiko ena lotu e rawa ni veivakayalolailaitaki, ka voleka ni veiuabaleti ni cakacakataki. Na sasaga e sega walega ni gadrevi kina na vosota, yaloqaqa, kei na yalomalumalumu ia na loloma talega ni itokani kei na lewe ni matavuvale. Na ciqomi ni nodra veivuke mai na itokani yalodina era na vakabulabulataka na sorenikau ka vakatara me tubu na wakana ka sega ni malai.

Leo Winegar

Ena imatai ni gauna a sotava kina o Leo Winegar mai Amerika na taro me baleta na itukutuku makawa ni Lotu, a vulica kina na bibi ni itokani dauyalololoma. “Sa malai mai na noqu ivakadinadina,” e vakamacalataka o koya, ena nona lako curuma e dua na gauna ni “galili kei na yaluma butobuto niu saga tiko meu masu.” Ena dua na siga a vakauqeti o Leo me veitaratara kei na dua na parofesa ni itukutuku makawa ni Lotu. A sega walega ni vakayaloqaqataki Leo me dikeva tale mada na nona sala ni vakatitiqa ia a yaco talega me dua na itokani voleka. A lesu tale mai vakamalua na ivakadinadina nei Leo ena nona veivuke na daunivakasala nei Leo kei na veiyabaki ni vuli ena nuinui. Ni toso na gauna, a kunea o koya na isau ni taro e vuqa. “Au sa vakavinavinaka tawamudu vua na noqu iVakabula o Jisu Karisito ni sa dusimaki au lesu,” e vakamacalataka o koya, “kei ira na itokani era matataki Koya.”

“Kevaka era kalawa tani na itokani kei na matavuvale … mai na Lotu, tomana tikoga nomu lomani ira,” a vakasalataka o Peresitedi Nelson. “E sega ni nomu itavi mo vakalewa na nona digidigi e dua tale me vaka ni sega ni dodonu me dua e vakacacani iko ni o yalodina tikoga.”6

Letitia Rule

Na nona rerevaka na veivakacacani vakaoqo a tarovi Letitia Rule, e dua na lewenilotu mai Igiladi, mai na kosipeli me 20 na yabaki. E dau vinakata tu o koya me lesu tale mai, ia a “rere me curuma mai na katuba, ka nanuma ni na vakalewai ka me vaka ni sega tu ni bula dodonu.” A dua ga na vakarerei ni bula e solia vua na yaloqaqa me cakava na ikalawa dredre oya. Era a sotavi koya na lewenilotu ena yalovinaka kei na loloma, ka vukei koya me gadreva tale me vakaitavi ena kosipeli.

“Mo ni tea na vosa oqo e lomamuni, ia ni sa tekivu me tubu mai mo ni qai vakabulabulataka ena nomuni vakabauta. Ia raica, ena yaco me dua na vunikau, ka me tubu cake tiko e lomamuni me yaco ki na bula tawavakaiyalayala ” (Alama 33:23).

Ni sa mai tinia na nona vunau o Alama, sa vakamatatataka o koya ni sa ka bibi sara na sasaga me vakabulabulataki na sorenitei, era sa sega ga ni sorenikau vakaikoya. Ia, eda tea na sorenikau dina ena gauna eda “sa tekivu vakabauta na Luve ni Kalou ni na lako mai me sereki ira na nona tamata, ka ni na mai kune ka rarawa ka mate talega me sorovaka kina na nodra ivalavala ca” (Alama 33:22).

A vulica o Michael Auras mai Jamani na veilesoni bibi me baleta na veika me vakaliuci ena kosipeli ni oti nona lako sese ni se itabagone. “E vuqa na veika vinaka kei na veimaliwai era tu ena kosipeli, ia na vakabauti Jisu Karisito ga ena tokona na noda ivakadinadina,” e vakamacalataka o koya. “Keirau a bale ruarua kei tamaqu ena neirau vakabauta ena vica na gauna ena vica na taro ia keirau lesu mai ni keirau vakaliuca na neirau vakabauti Jisu Karisito mai na veika kecega.”

E vakadeitaka vei keda o Peresitedi Nelson, “Na iVakabula e sega ni volekati iko sara ni vakatauvatani ena gauna o na tadrava se kabata kina na ulunivanua ena vakabauta.”7 Sa yalataka o Jisu Vakaikoya, “Au sa tiko vata kei kemudou ena veisiga kecega, ka yacova na ivakataotioti kei vuravura” (Maciu 28:20). Ena lako vata kei keda, lomani keda “ena loloma sa sega ni mudu” (Jeremaia 31:3), ka solia vakalevu vei keda na bula (raica na Joni 10:10). O ira era sa tu vakarau me ra tea na sorenikau oqo era na kunea ni nodra vakabauta lailai sara mada ga, mai vua na iVakabula, sa yaco me “vunikau, ka tubu cake vei kemudou ena bula tawamudu ” (Alama 33:23).

E vakaitikotiko na dauvolaivola e Utah, Amerika.