Dusimaki Vakavinaka Ki na Vanua Eda Gadreva Meda Tiko Kina

Mai vei Elder Benjamin M. Z. Tai

Ena Vitusagavulu

Ena vukei keda tikoga na iVakabula ena noda ilakolako ena sala e veivakurabuitaki.

Niu se qai yabaki 12, a toki na noqu matavuvale mai na vanua tunumaki mai Hong Kong ki na dua na vanua liliwa, draki batabata tawakilai. Sega ni dede, au sa sureti ena imatai ni noqu taubale ni vulaibatabata vata kei ira na cauravou ena noqu tabanalevu.

Ena siga ni neimami taubale, au a vakaisulu katakata sara ena kena au sa kila rawa tu. Ni keimami sa cabeta cake yani na sala cagicagi ni veiulunivanua, au marau niu raica ni sa tauca tiko mai na qele na uca cevata. Au a sega sara ni vakaisulu vakavinaka baleta na buca kei na draki oqo, ia, ka sa dredre mai na noqu toso vata tiko kei ira na noqu ilawalawa. Au tukuna vei ratou me ratou lako tikoga yani ki liu kau na tomani ira au vakabauta ni ra sa muri kedatou tiko mai.

Niu tomana tiko na noqu itosotoso oya, sa suasua mai na noqu ivava kei na isulu ka sa nunu mai na ligaqu, yavaqu, kei na mataqu. Sa qai tekivu me taubi mai na uca cevata kau sa sega tale ni raica rawa na sala. Niu mai veigoleyaki voli ena dua na gauna, au qai kila niu sa yali, tu taudua, ka sega ni vakadeitaka me dua e kila niu sa yali.

Ena so na gauna ena ilakolako ni bula oqo, eda na vakila ni da sega tu ni vakavakarau, yali, se biu tu mai. Ena yali beka na noda vakasama ni veidusimaki kei na noda raica na salatu e matada. Ena vaka beka ni kena kaukauwa cake ga na noda sasaga meda toso ki liu, na kena yawa mai na noda icavacava eda na yacova. Na yalorarawa e rawa ni yaco, kei na veitemaki me da sa soro ga ena vinaka cake sara.

Ena veivakarautaki, sa tu vua na iVakabula o Jisu Karisito na kaukauwa me dusimaka na noda kalawa, laveti keda cake ni da sa bale (raica na Same 37:23–24), ka kauta mai vei keda na vakacegu (raica na Maciu 11:28), veivakabulai (raica na Aisea 53:5; Alama 15:8; Vunau kei na Veiyalayalati 42:48), nuidei (raica na Vunau kei na Veiyalayalati 121:45), kei na vakacegu (raica na Mosaia 4:3; Alama 38:8; Vunau kei na Veiyalayalati 19:23). “Dou toro voleka mai vei au,” a kaya o Koya, “kau na qai toro voleka yani vei kemudou; dou vakasaqarai au vagumatua dou na qai kunei au” (Vunau kei na Veiyalayalati 88:63). Ena sega beka ni matata sara na salatu vakusakusataki, ia e rawa ni da muria na iVakabula ena vakabauta ni noda ilakolako ena totoka ka qaqa baleta ni na tuberi keda yani o Koya ki na vanua eda gadreva meda tiko kina.

E rawa ni da rai tikoga vei Jisu Karisito baleta ni o Jisu Karisito na “sala, na vu ni dina, kei na vu ni bula” (Joni 14:6).

Na Sala Dodonu ni Noda iLakolako

Ena noda vulica na iVola i Momani ena yabaki oqo, eda sa muri Liai kei na nona matavuvale ena nodratou ilakolako ki na vanua yalataki. Vakasamataka na ka eratou a vosota tikoga na matavuvale nei Liai ni ratou lako tiko:

vakalialiai baleta ni vakabauta ka muri ira na parofita
veisau ni logavinaka kilai levu ki na dua na lekutu tawakilai
na lako yani ka sega ni matata tu na kena yawa, icavacava, se balavu ni gauna
via kana, rarawa, tauvimate, kei na mate
na itavi dredre, eso na gauna e sega ni ratou kila na vuna se na sala mera rawata kina
vakatatao, vakadarodaro, vakasewasewani, kei na rarawa
veika dredre e sotavi ena gauna ni susugi na matavuvale gone

Ena loma ni ilakolako oqo, eda raica talega na sala a vukei ira tikoga kina na Turaga. E vakarautaka o Koya

veiliutaki vakaparofita kei na ivakatakila yadua,
na ivolanikalou era tu kina na veivakalougatataki kei na veiyalayalati yalataki,
ivolatukutuku ni kawa kei na tuva kawa,
na iyaya ni cakacaka kei na ivakarau vovou me vakarautaki kina na nodra gagadre,
vakalevutaki na rawati ni vosota na dredre,
na vuku kei na idusidusi me rawati kina na itavi tawamatata,
na Liaona (e dua na iyaya ni cakacaka me vukei ira mera muataka vinaka na nodra ilakolako), kei na
taqomaki kei na maroroi ni nodra matavuvale.

Me vaka ga na matavuvale nei Liai, na noda ilakolako ena sega ni sega kina na bolebole kei na solibula. Na iVakabula ena dau vukei keda tikoga ena sala e veivakurabuitaki. E vakatavulica o Nifai, “Sai koya na sala dodonu mo dou vakabauta na Karisito … ena nomudou igu taucoko, kei na nomudou vakasama taucoko, kei na nomudou kaukauwa taucoko” (2 Nifai 25:29). Kevaka eda digitaka na vakabauti Jisu Karisito, ciqoma ena yalomalumalumu na Nona vosa, ka rawata na yaloqaqa me da cakacakataka, eda na kunea na reki kei na veivakalougatataki ena loma ni dredre eda sotava. Ena ilakolako oqo, sa rawa ni da yalodei ni da rawata na veika e vinakata o Koya meda cakava (raica na 1 Nifai 3:7).

Oqo eso na sala e dau vukei keda tikoga kina na iVakabula.

Na Cadra Mai ni Dua na Siga Vou, mai vei Simon Dewey

E Solia Vei Keda o Koya na Nona iVunau

E kila o Jisu Karisito “na icavacava mai na itekitekivu” (Eparaama 2:8). O Koya talega sa “vakatakilakilataka na sala ka liutaka na ilakolako.”¹ Na Nona ivunau, sa kilai tu ena ivolanikalou ni sa ivunau i Karisito, sai koya na salatu meda muria taucoko meda vueti ka vakabulai kina.

Sa dodonu me da dau cakacakataka tikoga na noda vakabauti Jisu Karisito, veivutuni vakawasoma, papitaiso, ciqoma na isolisoli ni Yalo Tabu, curu ki na veiyalayalati, ka tovolea ena noda vinaka duadua me da vosota tiko yani. Me kena isau, sa yalataki vei keda na veivosoti, inuinui, kei na bula tawamudu. (Raica na 2 Nifai 31:2–20.)

Ena dua na vuravura ni salatu duidui ka veisaqasaqa, na ivunau i Karisito e vakarautaka na veidusimaki matata ka cakacakataki ka rawa ni da muria me da muria tikoga na sala dodonu (raica na 2 Nifai 31:21).

E Kauta Mai Vei Keda O Koya Na Vakacegu.

Mai na Nona isoro ni veisorovaki, sa kila kina na iVakabula na cava dina na tu galili kei na guilecavi. Sa kila vakavinaka talega o Koya na sala me kauta mai kina vei keda na vakacegu. E kaya o koya, “Me kakua ni rarawa na lomamudou” (Joni 14:1) ka “Au na sega ni laivi kemudou mo dou luveniyali: au na lako mai vei kemudou” (Joni 14:18).

A yalataka na iVakabula na isolisoli ni Dauveivakacegui, sai koya na Yalo Tabu, vei ira era sa vakabauti Koya. A kaya ni o koya na Dauveivakacegui, “ena vakavulici kemudou ena ka kecega kau a vosataka vei kemudou” (Joni 14:26).

Sa Vakarautaka Vei Keda o Koya na Vosa ni Kalou

Mai na Vakalesuimai ni kosipeli i Jisu Karisito ena noda gauna oqo, sa solia vei keda na Turaga na ivolanikalou makawa kei na kena ena gauna edaidai, ka sa tu kina na vosa ni Kalou. E vakavulica o Nifai ni “ko ira yadua sa rogoca na vosa ni Kalou, ka tautauri matua sara kina, … ena sega ni rusa ” (1 Nifai 15:24).;

Na kana magiti e veisiga ena vosa ni Kalou e kauta mai na veitaqomaki ka liutaki keda meda vakila vakalevu sara na loloma ni Kalou. Na Nona vosa sa vakararamataka na noda salatu (raica na Same 119:105) ka “tukuna [vei keda] na veika kece [meda] kitaka” (2 Nifai 32:3).

Sa Tuberi Keda o Koya mai vei Ira na Nona iTalai—na Parofita kei na iApositolo

Sa kacivi ira na parofita kei na iapositolo o Jisu Karisito me ra vukei keda. Na nodra ivakasala kei na ivakavuvuli sa baleti keda ka baleta na noda gauna oqo. Kevaka o raica ni o sa yali se tatawasewase ena nomu ilakolako, ena rawa beka ni veivuke mo vakasamataka vakatitobu na tolu na taro oqo:

E sa vakarautaki au vakacava na Turaga mai na nodra vosa na parofita kei na iapositolo me baleta na veivakatovolei au sa sotava?
Na cava era sa sureti au tiko kina na parofita kei na iapositolo meu cakava nikua meu vakavakarau ki na bolebole sa tu mai liu?
Na cava au sa cakava tiko ena gauna oqo meu cakacakataka kina na veisureti vakaparofita?

Ni da vakasamataka vakatitobu na veitaro oqo, eda sa rawa ni raica kina na bibi ni nodra veidusimaki na parofita kei na iapositolo. Sa rawa ni da rogoca vakavinaka cake na domo ni Turaga ka raica na sala e vukei keda tikoga kina o Koya. Kevaka eda sa digitaka, e rawa ni da vakarorogo vei ira na parofita kei na iapositolo ka vakasaqara na veituberi, bula sautu, kei na veitaqomaki ena salatu ka na kauti keda lesu vua na Tamada Vakalomalagi kei na Luvena, o Jisu Karisito.

O Elder Tai ena vanua o Sierra Nevada e California ena 1988. Na italanoa a wasea a yaco ena Ulunivanua o Baden Powell ena Veiulunivanua na San Gabriel mai California ena 1984.

E lolomataka na itaba o koya e volavola

Na Vakabauta ni Toso Ki Liu

Niu sa yali, batabata, ka tu taudua ena ulunivanua cevata oya ena vuqa na yabaki sa oti, au sa lomaleqa sara. Niu sega ni kila se cava tale meu cakava, au a tekiduru ena uca cevata se qai lutu ga mai ka masu vua na Tamaqu Vakalomalagi me vukei au. Au wasea na kequ ituvaki kei na taqaya ki Vua ka kerea meu kunei ka vueti.

Niu sa lamata cake mai na noqu masu, sa siro sobu mai na uca cevata e yasaqu kecega, ka sa curuma na veikau e kea e dua na vakanomodi e totoka ka maravu sara. Na ituvaki vakanomodi o ya a vakataotaki niu sa rogoca na tatavasavasa ni veikau voleka e kea. Erau sa basika tu e rua na gonetagane cauravou. Rau sa laki lesu oti mai na dela ni ulunivanua, ka rau sega ni muria lesu tale na sala, ka rau sa lewa me rau sa vakasisisi sobu ga ma. Era biu tu na veivanua kece oqori, rau sa sisi sobu ga mai vakadodonu vei au!

Ni rau tarogi au se cava au cakava tiko e kea, au a kaya vei rau niu sa yali. Rau a sureti au meu tomani rau, ka keitou sa mani sisi sobu ga yani vakavinaka ki na gaunisala levu ena ulunivanua e ra. Sa yaco me keitou laki duavata tale kei ira na vo ni neitou ilawalawa.

Ni da toso ki liu ena noda ilakolako yadua ena vakabauta, yalodina, kei na gugumatua tikoga, meda na kila tiko ni sa lako vata tiko kei keda na iVakabula ka gumatua ni sa vukei keda voli. Sai Jisu Karisito na sala, na vu ni dina, kei na vu ni bula. Me kauta tikoga mai na vakacegu ki na noda vakasama kei na reki ena noda ilakolako na noda vakabauti Koya.