iYaloyalo ni Vakabauta

Vosa ni Veika Dina

Mai vei Weiling Chen Canfield (Winnie), Taiwan

E a vuqa na noqu taro, ia a vukei au na noqu itau kei na Lotu meu kunea na isaunitaro.

iTaba lolomataki mai vei koya ka volavola

Niu tubu cake tiko ena dua na vanua sega ni Vakarisito e Taiwan, au a sega ni susugi cake meu daulotu. Au a vakabauta na Kalou, ia au a sega ni kila e dua na ka me baleti Jisu Karisito. Na noqu lotu o ya na noqu cakacaka kei na bula osooso ni veimaliwai ka lako vata kaya tu. Oqori a oka kina na levu ni gunu kei na vakatavako. Au a dua talega na daugunuva vakalevu na kofi kei na ti. Oqo e tiki kece ni neimami itovo vakabisinisi.

Au a mai kila sara Na Lotu i Jisu Karisito ni Yalododonu Edaidai mai vei noqu itau kei na nona matavuvale. E kai Amerika o Chase. A susugi cake ena Lotu ka laki kaulotu, ia sa sega tale tu ni laki lotu ena gauna o ya. Na luvena tagane ulumatua, a vakavakarau tiko me laki kaulotu, ka tokona sara o Chase na nona lewa o ya.

Ena gauna ni vakatatabu ni COVID-19, keitou a laki soqoni ni sakaramede ena nodrau vale na itubutubu nei Chase, ka sarava na kakaburaki mai na nodratou valenilotu. Ni sa cava na vosa, erau a vakalougatataka ka veisoliyaka yani na madrai kei na wai na luvei Chase tagane.

A levu toka na noqu taro. A sauma mai vakayadudua vakamalua o noqu itau. O cei mada o Jisu? Na cava beka na nanuma ni yaloqu oqo ena veigauna keitou dau soqoni vata kina ena lotu? Oqo e dua na yalo au se bera vakadua ni bau vakila e liu. Na cava e vakatakilakilataka na madrai kei na wai? Na cava e turu kina na wai ni mataqu niu sa taura na sakaramede? Na vakacegu cava oqo au a vakila tiko?

Ena dua na bogi au a kunea e dua na mataveilawa ena noqu vosa vakaitaukei ka vakamacalataka o cei o Jisu ka tukuna tiko na Nona bula. Ena siga ka tarava, au a tukuna vei tinai noqu itau niu sa kila vinaka o cei o Jisu kau sa vakabauti Koya.

Ena dua na Sigatabu a lako mai ki vale o bisopi baleta me na tabaki tacina gone na ulumatua nei Chase me bete. Ni sa tabaka na buradelai tacina o ulumatua tagane, au a sega ni tarova rawa na tagi. Au vakila e dua na yalo luluvu levu, au sa sega ni tarova rawa na wai ni mataqu. E muri, a qai vakamacalataka o noqu itau niu vakila na Yalo Tabu ka vakila talega o koya.

Au raica rawa na loloma nei noqu itau ki na nona lotu sa lesu tale tiko mai vua. Ia, au kila ni veika kece au vakila e semati ki vua na Kalou kei na dua na ka dina. Au a vakila na loloma me vaka au se bera vakadua ni bau vakila e liu.

“Au sa Kaci Vua na Kalou”

Sa mai cava na noqu visa ni sara vanua ka meu sa lesu tale ki Taiwan. Ena veivula mada ga ka tarava, au sa vakananuma lesu na veika au a vakila. Dua na gauna, au a solegi tu ena yaluma kei na butobuto. Sa veiuabaleti sara na veika au vakila oqori kau sa via soro kina. Au a sega ni kila dina tu na masu, ia au a kaci yani vua na Kalou ka tukuna Vua na veika kece au vakila ka vakasamataka tiko. A yaco mai e yaloqu na vakacegu—na yalo vata ga au a sotava niu a tiko ena neitou lotu vakaitikotiko. Au kila ni oya na Yalo Tabu. A vakacegui au sara.

Ni oti oqo, a talai rau mai na daukaulotu o noqu itau me rau mai vakavulici au. Au a tukuna vei rau niu sa kila oti tu ni dina na kosipeli vakalesui mai ka u kila vakavinaka na vakilai ni Yalo Tabu. Ia au a kauwai ni na dredre vei au meu biuta na vakatavako kei na gunuva na kofi kei na ti.

Ia au sa tekivu meu laki lotu, wilika na iVola i Momani, ka sotavi rau na goneyalewa daukaulotu vakatolu se vakava ena dua na macawa. Kena itinitini, a vukei au na Yalo Tabu meu muduka na vakatavako kei na gunuva na kofi kei na ti.

Sa tekivu raica na veisau vei au ena veimacawa na noqu itokani ni gauna ni gone. Au a sureti koya ki na noqu soqoni kei rau na daukaulotu. Ni sa vakarorogo tiko, a vakila talega o koya na Yalo Tabu ka rawata e dua na ivakadinadina. Ni sa malumu sobu na leqa ni COVID-19, sa gumatua sara o noqu itau ena Lotu ena gauna oqo, sa yaco sara me lako mai ki Taiwan. Keirau a vakamau, ka papitaisotaki au sara o koya. Au sa qai tamata vou.

Oqo o Sisita Weiling Chen Canfield (Winnie) vata kei rau na goneyalewa daukaulotu kei ira na lewe ni tabanalevu era veivakavulici ka vakaitokanitaki koya. “Keirau se veivosaki tikoga e veimacawa ka cakacaka vata ena noqu veikacivi vou ni Lotu ena iSoqosoqo ni Veivukei,” e kaya o koya.

Era kaya na noqu itokani kei na itokani vakabisinisi ena noqu bula taucoko, oka kina eso na cakacaka ena baqe kei na makete ni ivotavota, era kaya ni rawa ni ra raica niu duatani ka marau cake. Au a sureti iratou ki na noqu papitaiso, ka rau a lako mai. Ni oti o ya, eratou tukuna vei au ni ra vakila e dua na ka era se bera vakadua ni vakila e liu.

Au sega ni rere meu tukuna vei ira na tamata na veika au kila ka vakila me baleti Jisu Karisito—ni veika au kila e dina. Au kila ni sa rarama sara na noqu ivakadinadina. O ira tale eso era kilai au ena noqu bula taucoko era sa raica oqo. Na nodra doka na noqu vakabauta e sa tarovi ira sara mada ga mai na vakatavako kei na gunu ena gauna ni sota vakabisinisi kei na vakayakavi. Oqo e dua na ka talei sara ena neimami itovo vakavanua ni bisinisi.

Oqo o Sisita Canfield kei Jin Hua, e dua na itokani ena nona bula taucoko a yaco me taleitaka na Lotu ena nona saumaki mai o Sister Canfield.

Au sega ni rere meu laivi ira na tamata me ra raica, rogoca, ka vakila na noqu ivakadinadina. Au vakabauta ni vuqa na tamata era sega tu ni kila na sala me ra kunea kina na Kalou kei Jisu Karisito era na vakila na veika vata ga au vakila ni ra rogoca na vosa ni veika dina. Au na dau tu vakarau tu ga meu wasea na vosa e veisautaka na noqu bula.