Domodra na Yalododonu Edaidai

Au Kila Niu A Taqomaki

Mai vei Ljubica Blaževic, Herzegovina-Neretva Canton, iSoqosoqo ni Bosnia-Herzegovina

A yaco tiko e tautuba e dua na ivalu kaukauwa, ia niu wilika na iVola i Momani, au vakila na vakacegu ka sega ni rere.

Droini mai vei Alex Nabaum

Ena 1992, a katakata sara tiko na ivalu mai Yugoslavia. E dau gasaukurotaki e veisiga na neitou koro o Mostar. Sa mai tu vakadua na veiqaravi ni matanitu, vakakina na kena vakau na meli ena posi.

Ia ena 1 ni Epereli, sa rogo mai e dua na tukituki ena noqu katuba. Niu dolava, e dua na turaga au se bera vakadua ni raica sa solia mai e dua na pakete mai vei luvequ yalewa, ka vakaitikotiko mai Malaga, Sipeni, na vanua a lewena kina na Lotu i Jisu Karisito ni Yalododonu Edaidai. E loma a tiko kina e dua na iVola i Momani.

Au sa tekivu wilika sara ga ena siga o ya. A toso tiko e tautuba e dua na ivalu, ia niu wilika tiko, au vakila na vakacegu kau a sega ni rere. E muri, au a qai kila ni vakacegu au vakila sai koya na Yalo Tabu. Au kila niu sa taqomaki kau na sega ni mate.

Niu wilika tiko, au vulica na veika e baleti Jisu Karisito ka se bula tikoga o Koya. Au a vulica na veika e baleta na papitaiso kei na Lotu ni iVakabula. Au vakila ni dina na veika kece au a wilika tiko. Ena veigauna eso, ena dau sauma mai na luvequ yalewa na noqu vakatataro.

Ni sa mate o watiqu ena 2019, au sa nanuma meu sa gole ki Amerika, ka sa vakaitikotiko kina na luvequ yalewa ena gauna oqo. Au a vinakata meu raici koya ka vulica eso tale na ka me baleta na Lotu vakalesui mai.

Au a laki tiko e Salt Lake City, Utah, ena loma ni va veimama na vula. Au a dau lako i lotu ena veimacawa kei luvequ yalewa. Au a vakila vei au e dua na yalo au sega ni vakamacalataka rawa. Au a qai taura na nodrau veivakavulici na daukaulotu. Au kila ni ra sa ka dina taucoko. Au a sotava na siga totoka duadua ni noqu bula niu a curuma na wai ni papitaiso ka vakadeitaki meu lewe ni Lotu i Jisu Karisito ni Yalododonu Edaidai ena 27 ni Julai, 2019.

Niu curu yani ki na rumu meu vakadeitaki ni oti na noqu papitaiso, era sa tagi kece tiko. Na noda papitaiso ka ciqoma na isolisoli ni Yalo Tabu sa isolisoli cecere mai vua na Tamada Vakalomalagi. Ni oti na noqu vakadeitaki, au vakila ni sa tadola ko lomalagi ka keitou sa tiko vata kece kina. Ena noqu veivakalougatataki vakapeteriaki e muri, au a ciqoma kina e vuqa na yalayala digitaki ka tawamudu.

Na iVola i Momani e dina. Ni da wilika ka masulaka, eda na rawata kina na noda dui ivakadinadina. Ena ivakadinadina oya, eda na kila kina ni o Josefa Simici sa dua na parofita ka sa mai vua, a vakalesui mai kina ki vuravura na Lotu dina i Jisu Karisito.