“Na iVakabula ni Tamata Kecega, e Dua na Kosipeli Vei Keda Kece” Liaona, Maji 2024.
Na iVakabula ni Tamata Kecega, e Dua na Kosipeli Vei Keda Kece
Na kosipeli, Veisorovaki, kei na Tucaketale i Jisu Karisito e vakalougatataki ira kece na luve ni Kalou.
Na Karisito kei na Tamata Paralase, mai vei J. Kirk Richards, me kakua ni lavetaki
Na kosipeli vakalesui mai i Jisu Karisito e, imatai, taumada, ka tawamudu, na ivurevure ni marau tawayalani, vakacegu dina, kei na reki kivei keda kece ena iotioti ni gauna oqo. Na veivakalougatataki e drodro mai na kosipeli kei na loloma tawayalani nei Karisito a sega ni kena inaki walega me digitaki e vica, ena gauna eliu se ena gauna oqo.
Se vakacava sara na noda malumalumu, se cava ga na ivalavala ca ena yawaki keda mai Vua ena dua na gauna, sa vakadeitaka vei keda na noda iVakabula ni “sa dodoka yani na ligana vei [keda] ena siga taucoko” (Jekope 6:4), ka sureti keda kece meda lako yani Vua ka vakila na Nona loloma.
Na Veivakalougatataki ni Kosipeli me Baleti Vuravura Taucoko
Na kosipeli i Jisu Karisito “sa vakalesui mai ena veigauna e muri oqo me sotava … na gagadre bibi ni veimatanitu, duikaikai, duivosavosa, kei na tamata e vuravura. ”1 Na kosipeli e ulabaleta na vanua taucoko kei na roka ni kosova tiko yani na veiyatu vakavanua taucoko me vakavulica ni “ sa tautauvata na tamata kecega vua na Kalou ” (2 Nifai 26:33).2 Na iVola i Momani e tu me ivakadinadina vakasakiti ni dina oqo.
Na itukutuku cecere oqo e vakadinadinataka ni o Karisito e nanuma tiko na veimatanitu kecega (raica na 2 Nifai 29:7) ka na vakatakilai “koya vei ira kece era sa vakabauti Koya , … [kei na cakacaka] mana lelevu, na ivakatakilakila, kei na veika e veivakurabuitaki, ena kedra maliwa na luve ni tamata” (2 Nifai 26:13). Ena maliwa ni cakacaka mana lelevu oqo, na ivakatakilakila, kei na ka veivakurabuitaki oqo sa vakatetei tiko yani ni kosipeli. O koya gona, eda sa talai ira yani na daukaulotu e vuravura taucoko me ra vakadinadinataka na kena itukutuku vinaka. Eda wasea talega na kosipeli vei ira era tu wavoliti keda. Na vakayagataki ni idola vakalesui mai ni matabete me baleti ira na bula kei ira na mate era na vakadeitaka ni na vakarautaki vakaoti na taucoko ni kosipeli vei ira yadua na luvena tagane kei na yalewa na noda itubutubu vakalomalagi—eliu, ena gauna oqo, se na veisiga ni mataka.
Na uto ni kosipeli oqo—na itakele ni nodra itukutuku na parofita kei na iapositolo yadua era sa kacivi ki na cakacaka—o ya ni o Jisu na Karisito ka sa lako mai o Koya me vakalougatataki ira na tamata kecega. Ni da lewe ni Lotu i Jisu Karisito ni Yalododonu Edaidai, eda kaya ni Nona isoro ni veisorovaki sa baleta na vuravura taucoko.
Na Gadrevi ni Veisorovaki Tawayalani ka Tawamudu
Niu veilakoyaki voli e veiyasai vuravura, au dau vakatarogi ena dua na ivukivuki rabailevu ni lewe ni Lotu. Au sa vakauqeti meu rogoca kina na sala era a vakila kina na veivakalougatataki ni Veisorovaki i Jisu Karisito ena nodra bula, ena gauna mada ga era vakatusa kina eso na ivalavala ca e liu sara. Sa ka totoka dina ni veivakasavasavataki ni Nona Veisorovaki sa dau vakarautaki tu vei keda kece!
“Ni sa kilikili me dua na veisorovaki,” e kaya o Amuleki, “kevaka e sega era na rusa vakaidina na tamata kecega.” Eda na dau “lutu ka … lako sese , … vakavo ga ena ni veisorovaki,” e gadrevi kina “me tawayalani ka isoro tawamudu.” O “koya e sega kina ni rawa me dua na ka e lailai sobu mai na veisorovaki tawayalani me ganita na ivalavala ca ni vuravura” (Alama 34:9, 10, 12).
A vakatavulica talega na parofita cecere o Jekope baleta ni “sa yaco na mate ki na tamata kecega , … sa dodonu kina me dua na kaukauwa ni tucake tale mai na mate” me kauti keda yani ki na iserau ni Kalou (2 Nifai 9:6).
Na ivalavala ca kei na mate e gadrevi me rawai. Sa ikoya oqo na ilesilesi ni iVakabula, ka a vakacavara ena yaloqaqa me baleti ira kece na luve ni Kalou.
Kecisemani, mai vei J. Kirk Richards, e sega ni rawa me lavetaki
Na iSoro ni Noda iVakabula
Ena iotioti ni nona bogi ena bula oqo, a curu ki na Were o Kecisemani o Jisu Karisito. E kea, a tekiduru o Koya ena kedra maliwa na vu ni olive ka tekivu me curuma e dua na yalo ni mosi titobu ka daru na sega vakadua ni kila.
E kea, sa tekivu me taura vei Koya na ivalavala ca ni vuravura. A vakila vakayadua o Koya na mosi, yalo rarawa, kei na yaluma, ka vosota o Koya na veilecayaki kei na vutugu kece e sotava o iko, o au, kei ira kece na tamata era sa bula oti se era na qai mai bula. Na vakararawataki levu ka tawayalani oqo “sa vakavuna [Vua] , … ko koya sa kaukauwa sara, me sautaninini ena vuku ni mosi, sa titiri kina na dra mai na qara kecega ni yagona” (Vunau kei na Veiyalayalati 19:18). O Koya duadua ga a rawa ni cakava oqo.
A sega tale ni dua na ka vinaka me veirauti vata
Me saumi na isau ni ivalavala ca.
O Koya duadua ga ena dolava rawa na matamata
Kei lomalagi ka vakacurumi keda e loma.3
A qai kau o Jisu ki Kalivari, ia ena gauna vakacala-ka levu duadua ena itukutuku kei vuravura oqo, a lauvako ki na kauveilatai. E sega ni rawa vua e dua me kauta tani mai Vua na Nona bula. Ni sa Luvena Duabau ga na Kalou, sa soli Vua na kaukauwa me vakadrukai mate. A rawa beka me masu vei Tamana, ka ra na lako mai e drau na agilosi me ra mai sereka na Nona vakararawataki ka vakaraitaka na Nona lewa ena veika kecega. “Ia ena qai vakayacori vakaevei na ivolatabu,” a taroga ko Jisu ni sa soli yani, “sa tukuna na kena yaco me vakaoqo?” (Maciu 26:54).
Mai na talairawarawa uasivi vei Tamana—kei na loloma uasivi sara ena vukuda—a solia o Jisu na Nona bula ka vakacavara na Nona veisorovaki tawayalani ka tawamudu, ka yacova yani na gauna oqo ka toso ki liu ena veigauna tawamudu.
Na Qaqa ni Noda iVakabula
A vakaroti iratou na Nona iApositolo o Jisu me ratou vakayacora na Nona cakacaka ni oti Nona mate. Me ra cakava beka vakacava? E vica vei ira era gonedau dina sara ga, ka sega ni dua e tuberi ena veivalenilotu me veiqaravi. Ena gauna oya, e vaka me sa yali yani na Lotu i Karisito. Ia era kunea na iApositolo na kaukauwa me ra vaqaqacotaka na nodra kacivi ka bulia na itukutuku kei vuravura.
Na cava e vakavuna me yaco mai na kaukauwa ena gauna malumalumu vakaoqo? E kaya o iliuliu ni lotu ni Anglican ka dauvolaivola o Frederic Farrar: “E tiko e dua, ka sai koya ga na kena isau dodonu—na tucake tale mai na mate. Na veisau levu oqo a vu mai na kaukauwa ni tucaketale i Karisito.”4 Ni ra sa ivakadinadina ni Turaga sa tucaketale, era kila na iApositolo ni sega ni dua na ka e tarova rawa na cakacaka oqo mai na kena toso ki liu. Na nodra ivakadinadina sa ivurevure ni kaukauwa ni veitokoni ni sa yaco ki na Lotu taumada me ulabaleta taucoko na veisaqasaqa.
Ena gauna ni Siganimate oqo, me vaka niu dua vei ira na Nona ivakadinadina tabaki, au vakadinadinataka ni dua na mataka totoka ni Sigatabu, a tucake na Turaga o Jisu Karisito mai na mate me vaqaqacotaki keda ka voroka na ivau ni mate vei keda kece. E bula tiko o Jisu Karisito! Ena Vukuna, sa sega ni keda icavacava na mate. Na Tucaketale sai koya na isolisoli soli wale ka cecere duadua i Karisito ki na tamata kecega.
Na Karisito kei Meri ena iBulubulumai vei Joseph Brickey
Dou lako mai vei Karisito
Na kosipeli kei na Veisorovaki i Jisu Karisito e baleti keda kece—o ya, na tamata yadua. Na sala duadua ga eda sotava kina na taucoko ni veivakalougatataki ni nona isoro ni veisorovaki na iVakabula sai koya na noda ciqoma vakayadua na Nona veisureti: “Dou lako mai vei au” (Maciu 11:28).
Eda lako mai vei Karisito ni da cakacakataka noda vakabauti Koya ka veivutuni. Eda lako mai Vua ni da sa papitaisotaki ena Yacana ka ciqoma na isolisoli ni Yalo Tabu. Eda lako mai Vua ni da muria na ivakaro, ciqoma na cakacaka vakalotu, rokova na veiyalayalati, ciqoma na veika sotavi ena valetabu, ka bulataka na mataqali bula vakatisaipeli i Karisito.
Ena so na gauna, o na sotava na yalolailai kei na yalorarawa. E na rawa ni kavoro na utomu e na vukumu se me baleta e dua o lomana. O ni na vakaogai beka ena nodra ivalavala ca na tani. Na cala o sa cakava—e rairai cala bibi sara—ena rairai vakavuna mo rere ni vakacegu kei na marau sa biuti iko vakadua. Ena veigauna vakaoqori, nanuma tiko ni iVakabula e sega walega ni kauta tani na icolacola ni ivalavala ca ia ena “vakila na mosi kei na veivakararawataki kei na veivakatovolei kecega ” (Alama 7:11), oka kina na nomu! Ena vuku ni veika sa lako curuma ena vukumu, sa kila kina vakai Koya na sala me vukei iko kina ena nomu ciqoma na Nona veisureti baleta na veisau ni bula: “Dou lako mai vei au.”
O Ni Sa Kidavaki Kece Sara
Sa vakamatatataka kina o Jisu Karisito ni o ira kece na luvena na Tamada Vakalomalagi era sa tautauvata ga me nodra na veivakalougatataki ni Nona kosipeli kei na Veisorovaki. E vakananuma vei keda o Koya ni “sa soli vakatautauvata vei ira na tamata kecega na galala, ka sega ni dua me vakatabui kina” (2 Nifai 26:28).
“Ka sa sureti ira kecega me ra lako mai vua ka vakaivotavota ena nona vinaka; ka sa sega ni bureitaka vua e dua sa lako mai vua, na tamata loaloa kei na tamata vulavula, na bobula kei na galala, na tagane kei na yalewa” (2 Nifai 26:33
“Ka sa sureti ira kecega”—o ya o keda taucoko! Me da kakua ni taurivaka na ivakatakilakila lasulasu kei na ivakatautauvata lasulasu eso kivei keda se vei ira tale eso. Meda kakua ni vakalatia na loloma ni iVakabula se vakanananutaka ni sa sega ni vukei keda rawa o Koya se so tale. Me vaka au sa tukuna oti, “E sega ni rawa vua e dua me luluqa sobu mai na rarama tawayalani ni Veisorovaki i Karisito. ”5
Ia, me vaka keirau a vakatavulica kei Sisita Holland ena vica ga na vula ni bera na nona takali, eda sa vakaroti me “tu vei keda na loloma uasivi, sai koya na loloma dina” (2 Nifai 26:30).6 Oqo na loloma e vakaraitaka vei keda na iVakabula, ni “Sa sega ni kitaka ko Koya e dua na ka, ka vakavo kevaka me na vinaka kina ko vuravura; ni sa lomani ira na kai vuravura, o koya ka sa solia kina na nona bula me vakayarayarataki ira kina na tamata kecega ki vua ” (2 Nifai 26:24).
Au vakadinadinataka ni kosipeli kei na Veisorovaki i Jisu Karisito e baleti ira kece na tamata. Sa noqu masu ni ko na ciqoma ena reki na veivakalougatataki e kauta mai o Koya.