“E Dua na Mata ena Katubaleka,” Liaona, Maji 2024.
Domodra na Yalododonu Edaidai
E Dua na Mata ena Katubaleka
Au nanuma ga ni a dau siosio o noqu itokani, ia au qai kila ni gadreva ga e dua na itokani.
iTaba lolomataki mai vei koya e volavola
Au dau raica na mata vata ga e dau wanono tiko mai ena dua na katubaleka ni vale. Au a vakasamataka, “E sega beka ni ka vakaloloma me dua me dau rai tiko mai ena nona katubaleka, ka vakalewa tiko mai na nodra itaviqaravi na tiko e kea?”
Ena dua na siga au a nanuma sara meu na laki taroga kevaka e rawa niu veivuke. Au sa mani nanuma meu kauta tiko eso na madrai se qai vavi oti ga.
Na madrai katakata oqo a vakawaicalataka na aisi ena lomai noqu neiba qase oqo. E tonawanawa na matana ni tukuna vei au na levu ni nona galili. A sega ni dua a bau sikovi koya ka sega ni dua e kacivi koya, sega mada ga o ira na luvena. Ena sautaninini ni ligana, a qusia na wainimatana mai na baluna.
A ceguvuki ka kaya mai, “Sa dua na ka vinaka meda sa biuta yani na vuravura oqo. Au sega ni vakalewa e dua niu rai tiko yani ena noqu katubaleka. Au saravi ira ga na gone ni ra qito tiko kei na veika tale eso e caka tiko ena lomanibai.”
Droini mai vei Alex Nabaum
Ni toso na gauna, keirau a veivosakitaka na kosipeli. Taumada a galu toka vakalailai o koya baleta o watina a veiqaravi ena dua tale na lotu. Ia na levu ga ni neirau veivosaki, na levu ni nona qoroya na dina au wasea baleti Jisu Karisito kei na Nona kosipeli vakalesui mai.
“E totoka dina ni sa tiko kei keda o Jisu vata ga!” a kaya o koya. “Eda na veiraici beka mai lomalagi?”
“Io,” au a sauma, “eda na laki tiko vata e kea—ena veitauri liga.”
Mai na gauna oya, keirau sa laki veitokani vinaka sara ena vuqa na yabaki, me yacova ni sa takali yani mai na vuravura oqo.
Ia oqo au via nanuma ni irairai mai na katubaleka ni nona vale vakalomalagi na wekaqu e liu, ni oti na neirau itaviqaravi ka nuitaka ni sa veirauti na neirau duavata ka veilomani vakai keirau.