“O Sa iTaukei,” Liaona, Maji 2024.
iTabagone Qase Cake
O Sa iTaukei.
Eda rawa ni raica na noda taukeni ni da tara cake e dua na veimaliwai vakaibalebale kei na Tamada Vakalomalagi kei Jisu Karisito.
iVakaraitaki ni Glory in Degrees, mai vei Annie Henrie Nader
O keda yadua eda a sucu vata mai kei na dua na gagadre dina meda taukeni. E gadreva na keda ituvaki dina meda taukeni ena dua na veimaliwai vata kei ira na noda matavuvale, itokani, cakacaka vata, tabanalevu, kei ira na tamata tale eso ena noda bula. Na yaloda e vaka me tu kina na gagadre vakalomalagi oqo me baleta e dua na gagadre titobu ka veivauqeti me da taukena.
O iko kei au daru a tiki—ka se tiki tikoga—ni dua na matavuvale tawamudu vata kei na Tamada Vakalomalagi, ni se bera sara nodaru lako mai ki vuravura. Na ivolanikalou e vakamacalataki keda ni da sa “tiko vulagi ga ka veilakoyaki voli e vakavuravura” (Iperiu 11:13; Vunau kei na Veiyalayalati 45:13). Ena noda sa biuta mai na noda itikotiko vakalomalagi ka lako mai ki na dua na vuravura e vakasinaiti tu ena veilecayaki, galili, kei na mosi ni yalo, e rawa ni da vakila ni da sa dauveilakoyaki tu, ka gadreva dina tu e lomada na noda itikotiko kei na veiwekani tawamudu.
Kevaka o sa bau vakila na vakanananu lesu i vale e lomalagi, e rairai sa baleta tiko ni noda itikotiko dina kei na keda ivakatakilakila e semati tu ga kivua na Tamada Vakalomalagi kei na iVakabula, o Jisu Karisito. Oqori na vuna sa rui bibi kina me tiko e dua na isema titobu kivei Rau. Ni da sa semati vei Rau ena noda veimaliwai ni veiyalayalati, eda na kunea na vakasama dina ni vakataukenitaki ni yaloda sa dau gadreva tu.
Na Noda Veiwekani ena Veiyalayalati kei na Kalou
Na noda ivalavala kei na noda vakanananu sa vakaraitaka tiko na veimaliwai eda sa vakacerecerea tiko. Sa tautauvata na kena dina ena noda veiwekani ni veiyalayalati kei na Tamada Vakalomalagi kei na iVakabula.
Ni da vakacerecerea na noda veiwekani ni veiyalayalati kei na Kalou, sa veisau na ka kecega. Ni da sa sega ni vakayarayarataki mai vei vuravura, eda sa vakayarayarataki mai Vua ka yaco meda vakataki Koya cake vakalevu. Sa tekivu me vakaibalebale vakalevu cake na noda bula kei na tudei vakayalo kei na kaukauwa. Vakasauri ga, na “taukeni” sa uasivia na ituvaki ni bula vakayago oqo eda sa nanuma tiko ni sa ibalebale ni “taukeni”.
Ni sa vakaliuci na veimaliwai ni veiyalayalati kei na Kalou, ena cawadru laivi yali na tola ni veivagolei tani ni vuravura ka da kunea na vakacegu dina ni tamata yadua kei na taukeni. Ena vuravura oqo ka sa sega ni dau solia wale na ka, ena solia na Tamada Vakalomalagi na Nona veivakalougatataki ni veiyalayalati veitalia na keda ituvaki ena vuravura oqo (raica na 2 Nifai 9:50–51).
E vakatavulica vakamatata o Peresitedi Russell M. Nelson ni “gauna eda sa veiyalayalati kina kei na Kalou, eda sa biuta tu vakadua na tiko wele. Ena sega ni vakanadakuya na Kalou na Nona veiwekani kei ira era bulia na ivau vakaoqo kei Koya. Sa ka dina, ni o ira kece era sa veiyalayalati kei na Kalou era na rawata e dua na mataqali loloma kei na loloma veivueti. ”1
Eda sa vakadeitaka ni kevaka sa tiko vei keda e dua na veiwekani voleka kei na Kalou—sa dau tudei tu ga vei keda o Koya, ia sa dodonu meda digitaka meda tudei tiko Vua. Ia na digidigi vakalou oya e veivakaukauwataki ka veivagalalataki talega! Na digidigi oqo e vagalalataki keda mai na noda nanuma lasu o cei o keda kei na sinucodo yalani ni nanamaki vakavuravura.
Ena gauna eda raica kina ni noda sa taukeni mai vei na Tamada Vakalomalagi, eda na qai rawa ni rai ki tautuba ka raici ira na tamata me vakataki Koya. Niu kila vinaka na veika e nanuma me baleti au, au kila vakavinaka cake na Nona nanuma baleti iko, kei na noqu rawata ka gadreva meu dolele yani ka vakasoqoni ira na tamata me ra kaukauwa cake.
Droini ni Valetabu e Nauvoo ena dromunisiga, mai vei Max D. Weaver
Na Veiyalayalati e Dolava na Veivakalougatataki
Erau gadreva na Tamada Vakalomalagi kei Jisu Karisito meda cakava na veiyalayalati vata kei Rau me rawa ni Rau vakalougatataki keda ena sala eda gadreva ka veisautaki keda ena sala ka na vakatarai keda meda lesu tale ki na Nodrau iserau.
Au sa sureti kemuni mo ni lako wasoma ena kena levu ga o rawata ki na vale ni Turaga. Niu yalataka meu dau lako wasoma ka sa lomaqu dina, au sa sereki mai vuravura, ka sa laveti cake na noqu vakanananu kei na noqu itovo.
Ni da maroroya na noda veiyalayalati, eda na ciqoma na kaukauwa ni matabete e dolava na veivakalougatataki ni Veisorovaki ni iVakabula ki na noda bula. Na veivakalougatataki oqori e oka kina na veivakabulai, veituberi, veitaqomaki, veivuke, kaukauwa, vakacegu, raidonu, kei na reki. Na Tamada Vakalomalagi e gadreva me vakalougatataki keda ena veika kece oqo mai na noda veiwekani ni veiyalayalati.
Kevaka o se bera ni ciqoma na veivakalougatataki ni valetabu, au sureti iko mo vulica na veivakalougatataki ni valetabu, kaukauwa ni matabete, veiyalayalati, kei na veika e gadreva vei iko na Kalou. Kakua ni wawa mo ciqoma na Nona veivuke, kaukauwa, kei na veivuke loloma.
A kaya talega o Peresitedi Nelson:
“Au sa vakamasuti kemuni mo ni kakua tale ni waraka mo ni vakamau mo ni qai laki vakaedaumeni ena vale ni Turaga. Tekivu nikua mo vulica ka kila na ibalebale mo vakaiyaragi ena kaukauwa ni matabete.
“Kei kemuni yadua sa veiyalayalati oti e valetabu, au sa kerea mo ni vakasaqara—ena masumasu ka vakawasoma—mo ni kila vinaka na veiyalayalati ni valetabu kei na cakacaka vakalotu. Ena tadola na katuba vakayalo. O na vulica na sala mo curuma na ilati ena tadrua i lomalagi kei vuravura, kei na sala mo kerei ira na agilosi ni Kalou mera qaravi iko, kei na sala vinaka cake mo dusimaki mai lomalagi. Ni ko sasaga vagumatua mo cakava ena qaqacotaka ka vakaukauwataka na nomu yavu vakayalo. ”2
Taukeni ena Veivutuni
Na veivutuni e veigauna sa dua tale na sala totoka ka kaukauwa meda tiko volekata kina na Tamada Vakalomalagi kei Jisu Karisito. Vakavuqa eda dau nanuma cala ni kevaka eda veivutuni vakalevu, eda sa qai rairai yawa sara mai vei Rau. Ia na kena veibasai e ka dina!
Na veivutuni e sega ni tosoi iko vakayawa mai vei Rau—ena kauti iko vakavoleka vei Rau!
E rawa ni o kunea mo taukeni vakacecere ka veimaliwai titobu kei Rau ena nomu sasaga mo gole vei Rau mo vukei ka ciqoma na veivosoti.
Oi keda yadua eda na vakila ni da sa sega ka yawa meda uasivi sara mai na kena eda vinakata, ia au sega ni nanuma ni Tamada Vakalomalagi e kauwaitaka tiko o ya o Koya ia sa baleta ga na noda gagadre kei na sasaga meda tovolea tale. E lomani keda o Koya, e kila o Koya na vanua eda gole tiko kina, ka na liutaki keda tiko ena yalololoma.
Na noda kila na noda malumalumu kei na cakacala e gadrevi kina na yalomalumalumu, ia ena veivutuni, eda sa sureta kina na Tamada Vakalomalagi me volekata sara yani ki na noda yalomalumalumu o ya. Na veivolekati oya e vakatarai Koya me solia na Nona loloma cecere vei keda ka vakarautaka na veivakabulai, veivosoti, kei na veitaqomaki eda gadreva. Ena isema oqo vua na Kalou eda sa tara cake kina na veivakabauti ka kunea na veivakayaloqaqataki kei na vakataukenitaki dina.
Na Veibuli, mai vei Annie Henrie Nader
Vakasaqara e Dua na Rai Cecere Cake
Na noda rai e rawa ni cau ki na noda nanuma ni da sa taukeni ena Lotu ni Turaga. E rawa ni da digitaka na rai me rawa ni vukea na noda tabanalevu, noda iSoqosoqo ni Veivukei, se na noda kuoramu ni talatala qase me vanua ni noda taukeni. Noda segata me da vukei ira na tamata me ra taukeni sa na vakatubura na noda dui nanuma ni da sa taukeni.
Baleta ni o luve ni Kalou, o sa taukeni—veitalia na ivakarau era kilai iko kina na tani se na nomu nanuma baleti iko. Na ituvatuva ni bula marau nei Tamada sa baleti iko, ka sa tiko e dua na nomu itavi bibi mo vakayacora kina. Oi kemuni yadua e tu vei kemuni na kaukauwa mo ni cau ka taukeni ena matanitu ni Kalou, se cava ga na ituvaki ni nomuni bula vakawati, vuli, se nomu itekitekivu.
E dua na vakasama e dau yaco wasoma mai ki na noqu vakasama oya ni vosa “itabagone qase cake,” “itaba qase cake,” kei na “uabula sega ni vakawati” era sa sega ni o iko dina. Oqo na vosa vakaiyaloyalo ka na vukea na kena vakamacalataki na yabaki ni bula kei na bula vakawati, ia era sega ni vakamacalataka rawa na ivakatakilakila dina tawamudu, inaki, kei na rawa ka.
Na ivakatakilakila se veivakatauvatani e rawa ni yalana na ivakarau eda raici keda kina kei na keda yaga kei na keda icavacava ena matanitu ni Kalou. Na ka dina o ya ni ko ni sa lewe ni Lotu i Jisu Karisito ni Yalododonu Edaidai. O sa cakava na veiyalayalati vata kei na Kalou. Sa rawa mo umani ena Nona kaukauwa ni matabete. O iko o lewe ni iSoqosoqo ni Veivukei se kuoramu ni italatala qase. Ko sa luve ni Kalou, me vaka e vakavulica o Peresitedi Nelson, ni ko sa luve ni veiyalayalati, ka tisaipeli i Jisu Karisito. O ya taumada o cei dina o iko ka bibi duadua, ka sai koya oqori na ka ena “tuberi iko ki na bula tawamudu ena matanitu silesitieli ni Kalou.”3
A vakalesui mai na kosipeli mai vua e dua na itabagone qase cake–ka parofita—o Josefa Simici. Oqori e dua na vakasama kaukauwa me da vakanananu kina. Rau a solia na Tamada Vakalomalagi kei Jisu Karisito na ilesilesi vua na Parofita kei ira na nona itokani ena yabaki ni bula oya me vakalesuya mai na Lotu. Sa nuitaki iko talega na Kalou mo tiki ni cakacaka cecere oqo ena veisiga e muri oqo.
Kevaka o vinakata mo kila o cei o iko ka kevaka o lomani ka vakamareqeti, kerea vua na Tamamu mai Lomalagi. Ena dau tukuna tikoga vei iko na ka dina me baleti iko. Ena vukei iko o Koya mo raici iko me vaka e raici iko o Koya—ena gugumatua qaqa kei na loloma. E rawa ni tuberi iko o Koya ki na veimadigi cecere kei na tubu ko na sega ni vakasamataka rawa!
Meda sa qai veiraici vakai keda, sega ena iloilo ni yabaki ni bula se bula vakawati ia ena mata iloilo veivakaduavatataki ni daumaroroya na veiyalayalati, itokani vakatisaipeli i Jisu Karisito, itokani, tacida kei na ganeda, kei na luvena tagane kei na yalewa na Kalou. Ia ena itavi kei na veimaliwai tawamudu oqori, eda na kunea kina na yalo cecere ka dina duadua ni noda sa taukeni.