Era Vakavolivoliti Au na Tamata Ia Au se Galili Tikoga

Mai vei Anne Aketch

Niu toki vakayawa mai vale, a vukei au na noqu isema ki lomalagi meu ulabaleta na galili.

e dua na marama e cilavi wavoliti koya na rarama, ka so na tamata era lako wavoliti koya tiko

O sa kila tiko na yalo oya ena gauna era vakavolivoliti iko kina na tamata ia o se galili tikoga?

Me tekivu mai na noqu biuta na noqu vanua e Uganda ka toki ki Dubai meu laki cakacaka, sa vaka meu vakila tu ga na galili. Ia ena noqu vanua ena noqu itikotiko, era veikidavaki na tamata e gaunisala. Keimami sa veikilai vakai keimami. Keimami sa veitokoni vakai keimami. E vuqa na noqu itokani kei na matavuvale era lewe ni noqu vakabauta.

Ia e sega ni tautauvata eke. Au sa mai tu oqo ena dua na bula e duidui, ena dua na koro levu ka wavoliti mai vei ira na tamata era osooso ena cakacaka. E dina ga niu dau lakova na noqu tabanalevu ka tovolea meu kilai ira eso tale na itabagone qase cake kei na lewe ni tabanalevu, na neimami ituvatuva ni cakacaka osooso e vakavuna me dredre sara me keimami veiraici ena vica ga na auwa ena lotu ena veimacawa.

O Dubai e ka levu ka totoka sara, kau vakavinavinaka niu sa mai tu eke. Ia e rawa ni veivakadrukai sara, vakabibi ni o vakila tiko na galili. E levu sara na ka e tu eke vei ira na tamata ka vaka me ra sa cakacakataka oti tu na nodra bula. Ia, niu sa mai bula tiko ena maliwa ni veika totoka kece oqo kei na veivale lelevu totoka oqo, au dau vakataroga ena so na gauna:

Na cava au sa cakava tiko ena noqu bula? Sai koya beka qo na vanua donu vei au?

Kunei tale na Veitaukeni

€E vakamacalataka o Elder D. Todd Christofferson ena Kuoramu ni iApositolo Le Tinikarua ni “sa ka bibi ki na noda bula vakayago, vakasama, kei na bula vakayalo ni da kila ni da sa taukeni.”¹ Au a sega tu ni kila na kena bibi na noda kila ni da sa taukeni me yacova sara niu sa sega ni vakila tale—sega ena lotu ka sega ena dua na vanua, e dina sara.

Meu na kunea vakacava oqo, ka sa vakayawa sara mai vei ira kece au lomana?

Ni toso na gauna, au sa tekivu meu kila “na usutu i Jisu Karisito baleta na vakaitaukenitaki.”²

Me vaka niu se nanumi ira tikoga na noqu itokani kei na matavuvale, au sa tekivu raica niu a sega ni tawasei au mai vei ira kece ena noqu bula ena gauna au a toki kina—se tiko ga e dua na noqu iVakabula kei na Tamada Vakalomalagi dauloloma sa dau vinakata tu ga me semati Koya tikoga vei au.

Au sa mani tekivu cakava na veika au rawa ni sema vinaka cake kina vei Rau ena veisiga. Au sa tekivu vakarogoca na kakaburaki ni vuli ni Lako Mai Mo Muri Au niu dau cici yani. Au dau daramaka na noqu irogorogo niu cakacaka ka vakarorogo ki na ivolanikalou niu sa vakacavara tiko na cakacaka.

Ka bibi duadua, niu vulica ni sa dua na iloloma vakasakiti me rawa niu masu vakadodonu vua na Tamada Vakalomalagi. Au sa dau vosa vakawasoma ka vakasamataki Koya vakalevu cake mai na kena au se bera vakadua ni bau cakava. Niu dau galili, au dau masu ka vakila na Nona vakacegu. Niu taipataka tiko e dua na imeli ka tovolea meu vosoti ira tiko keimami cakacaka vata, au dau masu ka kere veivuke Vua.

Au taleitaka na veika a kaya o Peresitedi Thomas S. Monson (1927–2018) me baleta na masu: “Kivei ira … ko ira era sotava tiko na bolebole kei na veika dredre lelevu ka lalai, na masumasu sai koya na vakarautaki ni kaukauwa vakayalo; o ya na pasipote ki na bula vakacegu. Na masu sa sala ni noda veivosaki kei na Tamada Vakalomalagi, ni sa dau lomani keda. Mo vosa Vua ena masumasu ka qai mai vakarogoca toka na kena isau. E dau yaco na cakamana ena kaukauwa ni masumasu.”³

Ena noqu solia noqu gauna vei Rau ena noqu bula, vakabibi ena masu yalodina, au sa tekivu raica ni dina ga niu a sega ni wavoliti mai vei ira na noqu tamata kei na noqu itovo vakavanua, e se rawa tikoga niu wavoliti ena Yalotabu ka vakila na loloma ni Kalou.

E Rawa Ni Da Sema Tikoga

E se dredre tikoga na veika eso, ia sa tu na noqu inuinui baleta na veisiga ni mataka. Kau sa mai vakabauta na ka a vakavulica o Baraca Milton Camargo, na iMatai ni Daunivakasala ena Mataveiliutaki Raraba ni Matawilivola ni Sigatabu: “E bula tiko nikua na Turaga o Jisu Karisito. Sa rawa me tiko dei tu o Koya ena noda bula e veisiga. Sai Koya na iwali ni noda leqa, ia meda sa laveta na matada ka vakanamata tu ni raici Koya ”⁴.

Au se galili tu ga ena so na gauna, ia au kila niu na dau masu tikoga vua na Tamaqu Vakalomalagi ka rawata na Veisorovaki i Jisu Karisito.

Au sa rawa ni masu niu tucake tu se tekiduru, vakai au ga se vakailawalawa.

Au sa rawa ni tagi vei na Tamada Vakalomalagi.

Au sa rawa ni vakavinavinaka.

Au sa rawa ni kerea na veidusimaki kei na veitaqomaki.

Ia ena noqu isema ni veiyalayalati, au kila ni o au, e dua na luvena yalewa na Tamada Vakalomalagi dauloloma, au sa taukeni tikoga Vua. Ena Nona veidusimaki, au sa rawa ni vakila na yalodei niu sa tu ena vanua donu, ka cakava na veika e vinakata o Koya meu cakava.