“Vakatotogani ki na Dua na Vakatasuasua Uqeti: Noqu Laiva me Qaqa Ga na Kalou,” Liaona, Maji 2024.
Vakatotogani ki na Dua na Vakatasuasua Uqeti: Noqu Laiva me qaqa Ga na Kalou
Niu sa tarovi au meu sarava na vakatasuasua oqo, au a vakila na veivakayarayarataki ni Yalo Tabu ni vakalevutaki ena noqu bula.
Droini mai vei Benedetta Vialli / Salzman International
Ni da digitaki Jisu Karisito ena kauta mai na kaukauwa cecere, “isa, eda na gadreva vakacava na Nona kaukauwa ena veisiga mai liu.”1 Sa dua na ka na yavavala vakalevu ni noda vuravura. E vaka me levu cake na nona veivakayarayarataki o vunimeca vei ira e vuqa na luve ni Kalou. Sa vakalagilagi na tawasavasava, ka vagolei keda tani na veitemaki ka kauti keda tani mai na veika ena kauti keda vakavoleka vua na Turaga.
Me vorati oqo, sa dodonu me da digitaki Jisu Karisito vagumatua ena noda bula ka biuta laivi na veika e vakacudruya na Yalotabu. A vakasalataki keda o Moronai, “Mo dou vuku ena gauna ni nomudou vakatovotovo oqo; dou biuta tani na nomudou itovo dukadukali kecega” (Momani 9:28) ka sureti keda, “Dou lako mai vei Karisito, ka vakataucokotaki vua, ka vakuwai kemudou mai na veika kecega sa sega ni vakalou ; … ka lomana na Kalou ena nomu igu taucoko, vakasama, kei na nomudou kaukauwa kecega” (Moronai 10:32).
E rawa vakacava ni da biuta tani na veika vakavuravura ka lako mai vei Karisito ena yaloda dina? O keda yadua eda sa tiko ena dua na ivakatagedegede duidui ena iwalewale oqo. O keda kece e rawa ni da biuta e dua na ka e vakalati keda tiko mai na vakilai ni veivakayarayarataki ni Yalo Tabu me taucoko sara. Eda gadreva na kaukauwa ni Veisorovaki ni iVakabula meda cakava rawa, ka tekivu ena noda vakayagataka na noda galala ni digidigi meda digitaki Koya.
Na Gagadre me Veirauti Vinaka
Niu a se gonevuli qase toka ena koronivuli torocake, au a tiko ena timi ni liutaki ni veikailavaki. Ena veisiga ni vakatovotovo, era dau talanoataka na goneyalewa ena noqu timi ni veikailavaki na veika e yaco tiko ena dua na vakatasuasua ena televiseni. Au se bera vakadua ni sarava ia au kila ni dua na iyaloyalo e tiko e ra na kena savasava. Ia, au vakila niu dau guilecavi e veisiga ena noqu vakatovotovo ni ra sa maqusa na goneyalewa na talanoataka na iyaloyalo oqo. A vakasolokakana vei au na Yalotabu meu kakua ni sarava, ia au a vinakata sara ga meu okati ena nodrau veivosaki, kau sa tekivu sarava.
E sega soti ni ca sara vei au. Au vakaiulubaletaka ni na sega ni tarai au. Au kila niu na sega ni cakava na veika ca au raica ni ra cakava na vakaraitaki tiko kina. Au sa qai coriti ka sarava na iyaloyalo oqo e veisiga. Niu sa gole ki Brigham Young Univesity, au a vakarautaka na ituvatuva ni noqu kalasi me rawa niu sarava ena veisiga. Au sega vakadua ni calata e dua na kena wase.
Au a vakamau ka sucu na imatai ni luvequ. Au dau biuti koya tu me moce e veisiga ka meu sarava na iyaloyalo oqo.
Ni sa toso na yabaki, sa dau vakasolokakana vei au na Yalotabu ena vuqa na gauna meu kua ni sarava na iyaloyalo o ya. Ia, au a besetaka. Au sa solegi vakalevu vei ira na vakaraitaki tiko kina kei na nodra bula. Sa noqu sala tiko ni vakacegu, kau sa mani sarava tiko ga. Au a vakadeitaka ni sega ni vakamavoataki au.
Na Veisureti
Ni oti e tinikaciwa na yabaki na vuli torocake, au se sarava tiko ga na iyaloyalo oqo e veisiga. Ena koniferedi raraba, a vosa tiko o Sisita Sheri L. Dew, na iKarua ni Daunivakasala ena Mataveiliutaki Raraba ni iSoqosoqo ni Veivukei, me baleta na lako tani mai na vuravura kei na veika tawasavasava. A qai kaya, “Au sureti keda yadua me da dui raica e dua mada ga na ka e rawa ni da cakava me da lako tani mai kina e vuravura ka lako voleka mai vei Karisito.”2
Na nona veisureti o ya, au a vakila na sovaraki vakaitamera ni Yalotabu, kau rogoca na vosa ena noqu vakasama, “Mo sa na kakua tale ni sarava na iyaloyalo o ya ena gauna oqo!” A kaukauwa sara; e vaka e dua na isabi e mataqu. Au kila ena gauna vata ga oya niu sega ni rawa ni vakawalena tale na veivakauqeti oqo. Au a vakila e dua na yalo maqusa meu kakua tale ni sarava na iyaloyalo o ya. Au a qai kila ni sega ni dua na vakaraitaki tiko kina e cakava tiko e dua na ka e savasava se dokai. Au a sureta tiko na benu ki na noqu bula e veisiga. Au a yalataka vua na Turaga, ena gauna oya kei na vanua oya, niu sa na sega tale ni sarava.
E a sega ni ka rawarawa! Sa dredre sara me voroki na tinikaciwa na yabaki ni itovo veivakatotogani. A yaco mai na Moniti ka sa gauna me tekivu kina na kena vakaraitaki. Au lako yani ki na itabataba ni TV. Au a vinakata sara ga meu sarava tale. Au a qai nanuma na noqu yalayala vua na Turaga niu na sega ni sarava tale vakadua. Au a lako tani.
Au a qai vakasamataki koya noqu isakisaki e vakaraitaki tiko kina ka vakananuma na cava beka sa na yaco vua ka lesu tale ki na itabataba. Au kila niu gadreva na veivuke ni Kalou, kau sa mani tekiduru ka masuta na kaukauwa meu kakua ni sarava. Au vakasamataka na noqu yalayala vua na Tamada Vakalomalagi, kau lako tani mai na rumu. Au a digitaka meu muria na veivakauqeti ni Yalo Tabu ka rokova na noqu yalayala.
Na ituvaki oqo a tokaruataki koya ga ena veisiga ena macawa oya kei na kena e tarava. Ena veisiga, au tekiduru ka masu ka vakamasuta na kaukauwa meu kakua ni sarava, ia ena veisiga au digitaki Jisu Karisito ka lako tani mai na dua na iyaloyalo ena televiseni e tawasavasava. Au a rawata na kaukauwa meu vorata rawa mai na kaukauwa e solia na iVakabula mai na Nona Veisorovaki.
Ni oti e dua na gauna ni kena caka oqo, sa yaco e dua na cakamana. Au sa vakayalia taucoko na gagadre meu sarava na iyaloyalo oqo, ni oti na noqu sarava tiko e veisiga me 19 na yabaki. E vakasakiti dina! Au a vakayalia talega na gagadre meu sarava na veiyaloyalo e lomatarotarotaki tu au a dau sarava voli mai, kau sa mani tagutuva vakadua.
Sa yaco me savasava sara na lomaqu, kau kila rawa na ka ca ena kena ituvaki. Au a vinakata dina meu levea na toso tiko mai ni veika butobuto (raica na 1 Cesalonaika 5:22). Au sa sega tale ni qai vakalolovirataki ki na veika oqo.
Na Veivakalougatataki Veivakurabuitaki Duadua
Ia na ka veivakurabuitaki duadua a yaco oya niu a vakila na veivakayarayarataki ni Yalo Tabu sa vakalevutaki ena noqu bula ka sivia sara na veika au a sotava e liu. Sa vakaitamera na toso ni noqu tubu vakayalo! Ena veiyabaki kece oya au a nanuma niu sa marautaka na veitokani ni Yalo Tabu, ia au sa sotava tiko ga e dua na veitikina lalai ni veika a rairai tu vei au. Au sa qai kila ni noqu sarava tiko na veiyaloyalo oqori a vakatanitaki au ena gauna taucoko oya. Au a calata e vuqa na yabaki meu veitokani kaukauwa cake vata kei na Kalou. Niu vakayagataka na noqu galala ni digidigi meu biuta laivi na veika tawasavasava, na veika vakavuravura, sa galala mai na Yalotabu me lako mai vei au ena kena ivakarau cecere cake, ka sa dua na duidui vakasakiti e yaco ena noqu bula me vaqaqacotaka, vakacegu, ka tuberi au.
Eda dau kukuva matua tu na veika e sega na kena yaga—na veika e dau sogota na katuba ki na veivakalougatataki e vinakata na Kalou me kauta mai ki na noda bula. Na cava na vuna eda volitaka kina na veivakauqeti kaukauwa, veivagumatuataki ni Yalotabu me isosomi ni veika lasa se ira na tamata kilai levu? E rairai ni saravi tiko na iyaloyalo ena televiseni e sega ni dua na ka levu se ivalavala ca bibi, ia e tarovi au me tiko vakalevu na Yalo Tabu ena noqu bula ka vakamalumutaka na noqu toso vakayalo.
Au vakavinavinaka vakalevu ni a sega ni laivi au na Turaga ia a kerei au ena yalovosota meu biuta tani e dua na ka tawasavasava me rawa ni vakasinaita na noqu bula o Koya me vuabale ena Nona veivakayarayarataki.
E vakaitikotiko o dauvolaivola e Utah, Amerika.