“Ena Vukei Au Vakacava niu Dautataro meu Vakasoqoni Isireli?,” Liaona, Maji 2024.
Lako Mai, Mo Muri Au
Ena Vukei Au Vakacava niu Dautataro Meu Vakasoqoni Isireli?
Sa raica oti tu mai o Nifai ni o ira na tamata ena iotioti ni gauna era na veiqati vakataki ira (raica na 2 Nifai 28:3–4, 20), ia na veileti e sega ni nona sala na Turaga. Na ka dina, ni gadrevi me vakasoqoni o Isireli sa gadrevi me tiko vei keda e dua na “ivakarau cecere ka savasava cake”1 ni veimaliwai kei ira na tani.
E vakavulica o Peresitedi Russell M. Nelson: “Ke sa yalomu dina mo veivuke me vakasoqoni vata o Isireli kei na tarai cake ni veimaliwai e dei ki na tawamudu, oqo na gauna me biu vakatikitiki kina na yaloca. Oqo na gauna me muduki kina nomu vinakata me yaco ga na lomamu. Oqo na gauna me tarovi kina na vakayacori ni veika eso ka vakavuna vei ira na tani me ra dau qaqarauni de ra qai vakacudrui iko. Oqo na gauna me buluti kina na iyaragi ni valu. Kevaka e sinai na nomu iyaragi-vakavosa ena veibeci kei na veibeitaki, oqo na gauna mo biuti ira tani kina vakatikitiki. O na duri cake me vaka edua na tagane se yalewa qaqa i Karisito.”2
Na Tamada Vakalomalagi kei Jisu Karisito e lomani ira kece na luve ni Kalou se cava ga na kedra duidui. E saga o Setani me vakayagataka na noda duidui me wasei keda kina, ia ena noda digitaka na tiko vakacegu ka sega ni veileti, eda sa bulia e dua na draki ni veikidavaki ka na kauti ira mai na tamata ki na kosipeli vakalesui mai ni Turaga.
Vakasamataka na ituvaki eso oqo ka vakasamataka vakatitobu na sala eso o rawa ni sauma kina ena loloma:
Kevaka o taleitaka sara e dua na rai vakapolitiki, e rawa vakacava ni levu cake nomu kila vakamatata cake ena nomu veivosaki vata kei ira e veisaqasaqa na nomu rai?
Kevaka e yaco tiko ena nomu matavuvale na veileti, ena rawa vakacava mo kauta mai e dua na draki ni loloma kei na veiciqomi vei ira?
Kevaka o vakila ni o lomabibi ena dua na ka o wilika ena tabana vakaitukutuku raraba, na cava o rawa ni cakava mo levea kina e dua na veiba?