Yalovinaka Vakabulai Na

Mai vei Christi Gerlach, Utah, Amerika

Au a rere ni sa gadrevi vei tinaqu me sele na nona uto, ia a vakavulici au e dua na qasenivuli yalodina ni Lalai meu masu.

e vakani luvena yalewa e dua na tina ena dari — O Christi Gerlach kei tinana

Niu se qai yabaki 10, a tauvi tinaqu e dua mate ni uto kaukauwa. A laki curu tu e valenibula me vica vata na macawa me sasaga bula.

Ena gauna oqo, a lako tiko mai vale vakadua e veimacawa o noqu qasenivuli ni Lalai, o Sisita Ellen Johnson, me mai raici au. Au se qai tekivu lako ga ki na Lalai ka lailai sara na noqu kila vakavinaka na kosipeli. Ena veimacawa e dau cavuta vei au o Sisita Johnson na nona ivakadinadina ka tukuna tiko na veika e baleta na masu. A vakavulica vei au ni kevaka au na masu, ena sauma mai na Tamada Vakalomalagi.

Ni oti e vica na macawa, sa lutu sobu sara na ivakarau ni bula nei tinaqu. Sa vakacacani na nona uto ka sa gadrevi me vakavinakataki na sala ni dra ni utona. A kaya o nona vuniwai ni na mate ka sega ni sele na utona. Na madigi ni nona na bula mai kina, ena rawa me bula se mate talega.

Na sele ni uto e loma e ka vou ka ririkotaki ena yabaki 1960 vakacaca. Era sa lewa na dauveisele me sele tadola na serei tinaqu me yaco ki na nona suitu ka sele na ilati ni sarisarina me yaco rawa ki na nona uto. E vuqa na tauvimate vakaoqo era a sega ni bula mai na veisele. Au a rarawa sara ka rere ni na mate o tinaqu.

A dau cakacaka tikoga o Ta se tiko e valenibula vata kei Na. O taciqu qase, o Pam, a qaravi taciqu vata kei au. Ena bogi, au vakila niu galili ka rere, ia au vakasamataka na veika a vakavulica vei au o Sisita Johnson me baleta na masu. Au dau tekiduru ena noqu idavodavo ka tagi, ka vakatakekere vua na Tamada Vakalomalagi me vakabulai Na.

Ena gauna ni dua na masu kau a tagi tiko kina, a sobuti au e dua na vakacegu levu kau sa cegu sara ena tagi. Au vakila ni sa na vinaka na veika kece. Au vakila na veivakadeitaki tale ni na bula tiko o tinaqu me raici au niu sa tubu cake ka sega ni dodonu meu lomaleqa. Au a sega ni rogoca e dua na domo se raica e dua na raivotu, ia a yaco vei au na yalo vakanomodi, ka veivakacegui. Au a sega ni vakatitiqataka. A sauma mai na noqu masu na Tamada Vakalomalagi, niu sa kila.

A bula mai o Na mai na sele. A malumalumu voli ka tautauvimate vakalevu ena nona bula, ia a sauma mai na Tamada Vakalomalagi na noqu masu ka vakabulai koya. A bula voli o koya ka raica na noqu sa tubu cake, au vakawati, ka vakaluveni.

Ena vica na yabaki e tarava, ena gauna sa yaco kina o Peresitedi Russell M. Nelson me dua na iApositolo, a tukuna vei au o Na ni o koya na dauniveisele ka a vakabulai koya. Au a vola vua e dua na ivola ka vakavinavinakataki koya. Ni sa volavola lesu mai, a vakavinavinakataki au ena noqu ivola ka vakacerecerea na veivuke ni Kalou ena nona cakacaka.