O Le Savali a le Faaola mo A’u

Saunia e Rose Hopper

Sa ou tauivi ma le atuatuvale mo le fitu tausaga ma sa lagonaina le faatasi mai o lo’u Faaola ia te au i laasaga uma o le ala. Sa Ia patipatia a’u i lo’u toe manuia mai, ma o loo lagolagoina pea a’u i o’u aso leaga. Na te le tuulafoaiina lava a’u, ma e tele ni aafiaga e mafai ona ou faasoa atu i le ala ua ou latalata atili ai ia te Ia.

Sa tulai mai se aafiaga maoae i le taimi o lo’u tausaga muamua i le seminare. Sa matou suesueina le Tusi a Mamona ma sa ese le faigata o le tausaga mo au i la’u malaga faalemafaufau maloloina. Ae sa ou taumafai pea lava e tulimata’i le sini na faatonu mai e lo’u faiaoga ma faitau le Tusi a Mamona mai le faavaa i le isi faavaa (mo le uluai taimi). O le faitauina sa pei o se sulu i le lotolotoi o le pogisa lēmataofia, ma i se tasi po na ou tau atu ai i le 3 Nifae 13:31–34. O loo fetalai Iesu ia sa Nifae, ma faapea atu:

“O lea, aua tou te manatu faapea ane, O a mea o le a tatou aai ai? po o le, O a mea o le a tatou feinu ai? po o le, Po o a mea o le a tatou oofu ai?

“Ona ua silafia e lo outou Tama Faalelagi ua outou manaomia nei mea uma.

“Ae ia outou muai saili le malo o le Atua ma lana amiotonu, ma o le a faaopoopo atu ia te outou nei mea uma.

“O lea aua tou te manatu mo le aso a taeao, ona o le a manatu le aso a taeao mo mea mo ia lava.”

Na oo mai le Agaga ia te au ina ua ou faitauina na fuaiupu, ma faamalamalama mai le anotala i la’u telefoni—faamataola mai, vase, ma ta’u mai ia te au, o le mea lea e tatau ona e faalogo i ai—ma sa ou lagonaina le mafanafana, e pei ua tuu mai ia te a’u se palanikeke, a o faalogo atu i upu e faapei o loo fetalai sa’o mai le Faaola ia te au. E maniti lava lo’u tino i taimi uma ou te faitauina ai na fuaiupu ona e ese le mamana e faalogo i ai.

Ona o na mau, ua ou iloa ai e silafia e le Tama Faalelagi o’u atuatuvalega uma. Sa Ia silafia i le taimi sa ou tauivi ai i aso uma, ma sa Ia silafia tonu le mea sa ou manaomia e faalogo i ai ia lagonaina ai le mafanafana. Sa faapei o le fasimea mulimuli o se paso ua faafesoota’i ai, ma mai lava i lena taimi, sa ou filifili ai e saili le malo o le lagi ma le faamaoni a’ia’i, e pei ona faamatala mai e Iesu Keriso, e faatumu mea o totoe o le ata. Sa ou faia le mea sa mafai ona ou faia e manatua ai pea o Ia, ma sa tuputupu a’e la’u molimau i sia mea itiiti ma sia mea itiiti talu mai lena taimi.

Ina ia manino, e le’i mou ese atu lo’u atuatuvale. E le’i faamaloloina faavavega ai loa lava a’u—ua faigofie atu lo’u toe manuia i le taimi nei, ae o loo fai pea lava. Ae o le amoina atu o a’u lava ia i le Faaola, na Ia tuumāmāina ai Ie avega sa ou tauaveina. Sa faasaoina au. Ou te nofo aitalafu i mea uma ia Iesu Keriso, ma e faaauau pea ona ou taumafai ma tauivi mo le malo o le Atua. O le faitauina o na fuaiupu na liliu ai lo’u olaga—sa ou liliu atu a’u lava ia te Ia ma saili ia te Ia, ma le iloa o mea uma sa ou popole ai, o le a i ai lava se aso e taugamalie ai.