“Jān Būrom̧ōj n̄an Mōņōņō,” Liaona, Juļae 2024.
Āinikien Armej ro Rekwojarjar ilo Raan Ko Āliktata
Jān Būrom̧ōj n̄an Mōņōņō
Ilo aō āliji naan in kain̄i ko an tampeļ ilo bōklōkōt eo aō, juon men em̧m̧an eaar waļo̧k.
Ilo 1988, iaar etal ippān rūkaki in British ro jet n̄an katakin ilo juōn jikuuļ ilo Sudan. Ajri ro raar lukuun m̧ōņōņō, im kōm kar mōkaj in kōm̧m̧an oktak n̄an jikin jokwe eo ilo juon aelōn̄. Ijoke, rii rikōjerbal armej eo ammim, ekar juon eo jijiped rijerbal ilo an kōnanaik er ilo elōn̄ wāween. Eaar dike eō jān raan eo iaar jutak n̄an jipan̄ juon eo ekar kakkure.
Juon raan eaar kūrļo̧k eō n̄an opiij eo an. Ium̧win jimettan awa, eaar kōnono n̄an eō kōn elōn̄ naan in kōnana ko im kamijak ko. Iaar diwōj jān ruum̧ eo ilo juon mejatoto in bwilōn̄. Ejjeļo̧k aō keememej elmen aō kar kam̧ōj jikuuļ ilo aolepen raan eo. Aolepen joteen eo in aō jab maron̄ joļo̧k aolep naan ko an renana jān ļōmņak eo aō.
Ilo iien kiki, ij jijjet ioon beet eo aō im riiti jeje ko rekwojarjar. Innām iaar jubukwe im jar kōn aenōm̧m̧an im kakkije, ijoke ejeļo̧k men en iaar en̄jaake. Iaar kajjieon̄ kiki ak iaar jab maron̄. Ruo kattōn aō jerkak, riit, jubukwe, im jar, ak eaar jab tōprak.
“O, ekwe,” Ij lōmņak, “Jemedwōj Ilan̄ ejjab iien otemjej uwaake jar ko ad ilo ewi wāween im n̄āāt eo jej kōnaan.” Iaar kakkijeik eō make, ak iaar jab kiki bon̄on eo.
Bōtaab ke iaar bar babu, ikkar lōmņak, “ewōr juon men imaron̄ kōm̧m̧ane.” Ikar jino aō āliji naan in kain̄i ko an tampeļ ilo kōmālij eo aō. Ilo aō kar kōm̧m̧ane menin, juon kabwilōn̄ļōn̄ ekar waļo̧k. Aolep būrom̧ōj im maroklep raar jako jān eō, im aenōm̧m̧an im m̧ōņōņō eo eaiboojoj eaar kobrak aolepen aō.
Iaar jerkak im kar jar, jan̄ im leļo̧k kam̧m̧oolol n̄an Jemedwōj Ilan̄. Innām iaar ro̧o̧l n̄an beet eo aō im kar kiki. Raan eo juon, eo me en kar kamijak im kabūrom̧ōjm̧ōj, ekar raan eo ekam̧ōņōņō iaar joļo̧ke ippān ajri in kūlaaj eo.
Ij kab kile ke Irooj eaar kōnaan bwe in lōmņak kōn kain̄i ko ilo tampeļ. N̄an ro Rekwojarjar me raar kijoone meļaaj ko ālkin aer bōk kōjeraam̧m̧an ko aer ilo Nauvoo Temple, Būreejtōn Brigham Young (1801–1877) eaar ba, “Kōtļo̧k bwe kajoor ko ilo bujen in me kwaar kōm̧m̧ane ilo M̧weeo im̧ōn Irooj, en urur ilo būruwōmi, āinwōt kijeek eo eban kun.” Ilo an urur bujen tampeļ ko ad ilo būruwōd im kōļmenļo̧kjeņ ko ad, jej barāinwōt lo kajoor, aenōm̧m̧an, im innem̧m̧an.