““Jouj im jipan̄ E,” Liaona, Juļae 2024.
Ainikien Armej ro Rekwojarjar ilo Raan Ko Āliktata
“Jouj im jipan̄ E”
Bwebwenatoon baam̧le im jerbal in tampeļ raar jipan̄ eō anjo̧ jen en̄jake in likjab im ajimakeke.
Pija in Manila Philippines Tampeļ jān Russell Sun De La Cruz.
Juon raan ilo jikin jerbal, iaar en̄jake būrom̧ōj im ajimakeke. Ikar tōmak ke iaar likjab jen rūtto ro aō kōn wōt bōd ko relōn̄ iaar kōm̧m̧ani. Ikar akweļap n̄an Jemedwōj Ilan̄ kōn kajoor.
Juon ak ruo wiik tokālik, juon sister eaar itok n̄an ippa ke eaar m̧ōj jar im kajjitōk n̄e n̄a eo Jenny Casama. Ear kwaļo̧k kajjien make n̄an n̄a im ba etan in Michelle (Mich) Baustista, juon iaan rijipan̄ an ward tampeļ im menmenbwij an baam̧le ilo ward eo. Liin ekar kōmeļeļe tok ke eaar wōr juon an ettōņak im ilo ettōņak in eaar wōr jilu kōrā ro rej nuknuk mouj im āt in Casama eaar itok bwe ej aikuj jipan̄ eo an. Raar kajjitōk im akwelap ippān Sister Bautista, “Jouj jipan̄ e.”
Sister Mich ekkar meļeļe ke kōrā rein raar kajjitōk e bwe en jipan̄ armej rein nukwier—n̄a—n̄an ekkatak kōn jerbal in tampeļ im bwebwenatoon baam̧le.
Sister Mich eaar ba n̄an n̄a, “Jen lale n̄e jemaron̄ pukōt kōrā rein ilo menmenbwij eo am.”
Ilo kar FamilySearch website eo, kemro ar lo rekoot in lellap eo jibū Damasa Casama; kōrā eo jatin Emiliana Casama; im lellap eo jibūn jibū Eugenia Casama. Ilo ejeļo̧k pere, kem ekar jelā ke kōrā ro rein ilo kar etōņak eo. Juon en̄jake em̧m̧an eaar itok ioō, im iaar en̄jake iakwe eo an rūtto ro kar m̧ōņōņō ilo iien eo. Kōmro eaar jan̄ kōn wōt m̧ōņōņō eo kōm kar en̄jake ilo būruwōm̧. Iaar en̄jake aer lukkiun kea kake eō, im n̄an kōro̧o̧ltok, iaar en̄jake juon iakwe eļap n̄an er.
Innām iaar kile eddo eo aō n̄an jipan̄ er im rūtto ro n̄an bōk kain̄i ko an tampeļ eo. Ro jibūd im jim̧m̧ad rej kōttar—eto aer kōttarr—kōj ro ioon laļin n̄an kōm̧mani kain̄i kein rekwojarjar n̄an er.
Iiō eo tokālik, iaar peptaij ilo tampeļ eo kōn rūtto rein. Ij kam̧ool kōņ em̧m̧an eo an jerbal in menmenbwij im kōn kajoor eo ej bōktok n̄an mour ko ad.
Āinwōt an Būreejtōn Russell M. Nelson kar ba: “Ilo an jerbal an tampeļ im menmenbwij an baam̧le ewōr an kajoor n̄an kōjeraamman ro itulik in rōn̄ōl eo, jokkun wōt juōn n̄an kōjeram̧m̧an ro remour. Ewōr juon an kajoor in kōkāāl ioon ro me rej bōk kuņaer ie. Rej lukkuun jipan̄ n̄an aer mour ijo ilōn̄tata ippān baam̧le ko aer.”
Ijeļā ke Kabun̄ in ej m̧ool im bwe jeban wānōk n̄e ejjab ro jibūd im jim̧m̧ad.