“Elmen Aō Lōke Jema Ilan̄ N̄e ij En̄jaake ke Imakke Iaaō?,” Liaona, Juļae 2024.
Rūm̧m̧an Ded ro
Elmen Aō Lōke Jema Ilan̄ N̄e ij En̄jake ke Imakke Iaaō?
Iaar kajjieon̄ bwe en wōr aō tōmak ijoke ij jelmae bwijin menin apan̄ ko. Elmen aō maron̄ lukkuun lōke Irooj?
Kōmeļeļe ko jān Kathleen Petersen
Juōn rilikkō ear kwaļo̧k kajjiō n̄an mijenede ro ke ear ruatimjuōn aō iiō. Iaar kobatok ilo Kabun̄ eo an Jisōs Kraist im Armej ro Rekwojarjar ilo Raan ko Āliktata ijoke n̄a wōt juon jān bamle eo aō eaar kōm̧m̧ane. Jān ien ne, iar etal im lukun iakwe gospel in an Jisōs Kraist rlapļo̧k im laplok wōt. Mekarta, ilo kar juōn ien, lōke Jemed Ilan̄ im mool ko An ar tal im lukkun ben n̄an n̄a, im ar bwe en ben aō wōnmanļo̧k kōn tōmak in.
Mour oktak jān laļ in āinwōt juōn rikaļoor an Jisōs Kraist emaron̄ in pen jabdewōt jikin, ak rūttoļo̧k lo Hong Kong āinwōt juōn eo uwaan kabun̄ in eļapļo̧k pen ļo̧k jān an ro jet kōtmāne.
Kein kajuōn, elōn̄ armej ilo bukwōn in rejjab kōnan Kabun̄ in im rej ba ej koba ippān men ko renana. Mokta ļo̧k raar kōjerbale juōn naan in China n̄an “Mormon,” ilo aer na etan Kabun̄ in, kobaļo̧k juon ainikien me ekkeijel tok ippen menin naan in China eo rej nae etan “devil.” N̄an jet, ar ejaake juon menin jerata eriab kōn aorōk ko an Kabuñ in.
Barāinwōt, kōnke elukkuun bar lōn̄ kabun̄ ko jet emōj aer jutak ilo Hong Kong im elukkuun eiōt wōt ro rej uwaan Kabuñ in, emaron̄ in pidodo en̄jaake aer ajimakeke ak jenoļok. Elōn̄ armej rar kajitūkin Kabun̄ in, ilo aer jab meļeļe kōn katak ko an im jab kōnaan m̧ool in ron̄jake ta ko membōr ro rej kōnaan kwaļo̧k.
Iaar en̄jake an jelete tok kōn eddo ko reļļap ke Iar juōn jodikdik, ijoke kōn ta ko rar walok, iar lukuun ekatak eļap kōn ta melelein n̄an lōke Jema Ilan̄ im Jisōs Kraist.
Eaōrōk ke Mour kōn Gospel eo kajojo raan?
Ilo high school, jinō im jema rar mōttā ippān juōn ian rūkaki ro aō. Rūkaki in ear juon bar riKūrijin in bar juōn mōn jar. Ilo Iien eo, kar n̄a wōt membōr in Kabun̄ in ilo kilaaj eo aō, im elōn̄ ian rijikuul ro im rikaki ro eaar lōn̄ inaer ļōmņak kōn Kabun̄ an Jisōs Kraist im membōr ro ie.
Rūkaki in ba kake ear lukkuun kanooj bōd ļōmņak eo an kōn tōmak in aō, im ar kōm̧m̧an an men ko pen kōnke liin eaar juon eo ej mōttan baamle.
Juōn men eaar waļo̧k, ekkā aō kijon̄ mejki ilo kilaaj en an kōnke kōn aō ruj in jibon̄ tata in etal n̄an kilaaj in jemenere, ekkar kōm̧m̧an menin an inepata bwe ej ba inaj ļe lik ilo menin ekatak ko aō ilo jikuuļ. Liin ej bareinwōt kajjeon̄ kajook e eō im kajitokin eō kōn kajitōk ko reppen ilo baibōļ me ijjab jeļā uwaki. Liin ej bar letok aō katak ko ilo jikuuļ me rej katak ko me rej jumae-Kabun̄ in! Liin ear lukun kate kajjeon̄ kōm̧m̧an bwe in maron̄ etal jān tōmak e aō.
Menin ar juōn ien mālijon̄ tōmak in aō. Etke, kōnke n̄e ij kajjieon̄ kepaak e lok Jema Ilan̄ im Jisōs Kraist, tiljek eaar kōm̧m̧an meninmālijjon̄ im men ko reppen ilo mour in aō ke? In kar ke kar jeram̧m̧an kōn aō kōjeparok kien ko im kaarmijete ien aō kiki bwe in etal n̄an jemenere?
Ijjelo̧kwin, grade ko aō raar wōtlok, tōmak eo aō ar riklok, im kōttaan ko aō ippān rūkaki ro aō, baamle eo aō, im Jema Ilan̄ raar jorrāān.
Lo̧kkin jet iien ko, iar jino ļōmnak ewōr ke tokjen mour kake gospel in. Innām iar jino joļo̧k jemenere im jab to jān ien eo tōmak eo aō ar jako. Āinwōt ar pidodoļo̧k roñjake ta eo laļin ad jepooļe n̄a n̄an kōm̧m̧ane.
Kālet n̄an Lōke
Iar wōnmanļo̧k im jar im kajjitōk ippān Jemedwōj Ilan̄ kōn tōl im māletlet. Jekdoon m̧wilaļ in tarpok im inepata kōn ta eo iaar en̄jake kōn jekjek eo aō, juōn men em̧ool lo buruō ej ba in wōnmanļo̧k wōt n̄an dāpij tōmak eo. Iaaar kennaan ippān ro mōttā rej tōmak im ro me jān ro rej pād ilo kabuñ eo kōn ta eo iaar en̄jaake, im kar rōjan̄ eō bwe in kōnnan ippān rūkaki in jemenere eo kōn apan̄ ko aō.
Liin ekar uak ilo tūriamokake im rōjan̄ eō bwe in wōnmanļo̧k wōt im etal n̄an jemenere kōn juōn būruwōn in kōjātdikdik. Liin ekar kallim̧ur eō ke imaron̄ loe kōjeramman ko renaj walok tok elan̄n̄e inaj wōnmaanļo̧k wōt tōmak im lōke bwe Irooj ear maron̄ kakkuni n̄an n̄a im maron̄ kejenolok en̄taan ko aō (see 2 Nipai 2:1–2).
Kōn menin, kōjekdoon kaen̄tanaan ko ij jelm̧aeik, ikkar kālet n̄an lōke.
Ālkin jet iien, Iaar en̄jaake an oktak mūttō. Ijelo̧kin mije kaen̄tanaan ko reppenn ij iooni, iar mije wōt kam̧m̧oolol ei ikar en̄jaake kōn gospel in. Iar jino in mije kōjeraamman ko an baamle eo aō, kōn kwojarjar in aōrōk in wōn n̄a, im kōn m̧ool ko indeeo an ko̧jpeļ in. Innām tokālik, iar jelā ke Jema Ilan̄ im Jisōs Kraist rejeļā kōn ta ko ij iooni im raar jutak wōt ippa ilo iien ko n̄e ij en̄jaake aō jutak make iiaō.
Menin ekkar ukōt aolep men.
Ilo aō wōnmanlok im likit lōke eo aō ilo Jemed Ilan̄ im Jisōs Kraist, kejparok kien ko, ukwelok kajojo raan, im kōm̧m̧an men dikdik ko n̄an aō ekkeijel Ippāer, Iaar en̄jaake an pedped in tōmak eo aō mūlaļ ļo̧k im kajoor ļo̧k.
Būreejtōn Russell M. Nelson ear ba: “Bōk eddoin naan in kam̧ool eo am make kōn Jisōs Kraist im gospel in An. Jerbale. Kajiririki bwe en eddōkļo̧k. Naajdiki m̧ool. Jab kattoone kōn katak ko rebōd an em̧m̧aan ro im kōrā ro ejjeļo̧k aer tōmak. Ilo am̧ kōm̧m̧an bwe en kajoor wōt naan in kam̧ool eo am̧ ilo Jisōs Kraist en kallimjek am im̧aantata, lale kabwilōn̄lōn̄ ko renaaj waļo̧k ilo mour eo am.
Im ilo aō kar kōmmane, juōn kabwilōn̄lōn̄ ear waļo̧k.
Ta Meļeļein n̄an Lōke ilo Jeova
Ālkin aō kar kajjieon̄ jab kenono kōn tōmak ippān rūkaki eo aō, juōn raan ke liin ear jipadektok eō kōn jet kajitōk ko, Iar en̄jaake ke iar pojak in uwaki kōn tōmak eo aō ekāāl. Iar kōm̧anm̧an aō kajitūkin e elan̄n̄e liin ekar itok n̄an mōn jar ko ad ak riiti Bok in Mormon eo. Ke liin ear ba jab, iaar en̄jake imwe n̄an kwaļo̧k aō naan in kamool kin mool ko repidodo.
Iar jiron̄ ļo̧k e ke kobban jelā n̄e juōn men ej mool elan̄n̄e kwojan̄in kar iooni ak make pukōt uwak eo n̄an kwe make. Iar ba ļo̧k ke ijelā bwe gospel in emool kōnke iaar jerbal n̄an pukōt uwak ko im iaar en̄jaake ilo buruō ke raar lukkuun mool. Iar kajitōk bwe en bar kōmman āindein, im jān ien maan ļo̧k, jemjerā eo kōttam ro ear aenōmman ļo̧k.
Apan̄ in kōn tōmak iar iooni ke iar juōn jodikdik ar lukun kepooj eō n̄an ilju im jekļaj eo aō āinwōt juōn rikaļoor an Kraist. Emōj aō lo bwijin kain kejeramman im kallim̧ur ko me rar walok ilo aō wōnmanļo̧k wōt im lōke Irooj eļap ļo̧k jān lōmnak ko an aolep. Āinwōt an Nipai kar ba, “O Irooj, iaar likūt aō lōke ilo Kwe, im inaaj lōke Kwe indeeo. Ij jamin likūt aō lōke ioon pein kanniōk” (2 Nipai 4:34).
N̄e men ko rejjab kōm̧m̧an ekkar n̄an kar karōk ak jej iooni men ko reppen jar jab kōtmene, menin emaron̄ epidodo ar en̄jaake bwe Jemed Ilan̄ ebōd an kapilōke kōj, kar jojoļāāre kōj, ak ejjab kea.
Bōtaab menin ejjab m̧ool.
Lukun mool eo, ej kijon̄ waļo̧k ilo iien tarpok im apan̄ ko rekabūrom̧ōj bwe ej kakkememej eō kōn ta meļeļein n̄an likūt aō lōke ilo Irooj. Ij aikuj in kōtļo̧k aō āinwōt juōn rikaļooran im aō tōmak ren wōr meļeļeir im ukōt-mour ijjelo̧kwin robat im imenene ko. Būreejtōn Nelson ar bar katakin, “Ami tōmak enaaj ebbōl im jipan̄ ukōt apan̄ ko n̄an eddōklok ko rejjab ettōr jelmen doon im iien ko remman.”
Ij maron̄ lo wāween kālet tōmak ilo Jisōs Kraist ekar lukun kejerramman n̄a ilo elōn̄ wāwein ko me iaar jab bar ļōmņak e maron̄. Menin ejjab meļeļein Ij iienotemjej rōļo̧k ilo būrom̧ōj, en̄taan, ak tarpok, ak ej meļeļein ke ijelā ia eo in reilok n̄an e kōn aenōmman eo im jab m̧ōm̧akūt.
Būreejtōn Nelson ar kakkememej ilo an iakwe kōj, “Jouj im jelā menin: elan̄n̄e men otemjej im aolep ro jet ilo iaļ in ro kwoj lōke rej wōtlo̧k ak likjab, Jisōs Kraist im Kabun̄ eo An re jāmin likjab jān eok.”
Jekdoon ta ko kwoj iooni ilo mour ne am, emaron̄ men ko kojan̄n̄in kar kōtmāne, en̄taan ko kōn aewān̄ān̄ ko an laļ in, jorrāān ko an baam̧le, en̄taan ko an kōmālij, jabwe jāān, būromōj, kaljekļo̧k ko, ak jabdewōt eddo ko jet, ij kōrwainene iki eok n̄an wōnmanlok wōt im likūt am lōke ilo Irooj. E eļap an jeļā kōn jekjek ko am rej waļo̧k. E ejeļā kajjeem̧. Ewōr ippān kōjeram̧m̧an ko reļļap em̧ōj an kōpooje n̄an eok. Enaaj lōn̄ raan ko kwoj jab kōnan lōke E, im kālet bwe kwon lōke wōt. Kallim̧ur ko An rej m̧ool. E enaaj tōl eok n̄an lan̄lōn̄, kōjātdikdik, im kabwilōn̄lōn̄ ko juōn ien eo ejjejet.
Ej kōmmane tok n̄an eō ilo aō wōnmanļo̧k im lōke E.