“Jerbal eo Eļap an Irooj im Iien eo Em̧m̧an Ad Eļap,” Liaona, July 2024.
Jerbal eo Eļap an Irooj im Iien eo Em̧m̧an Ad Eļap
N̄e jej iakwe, kwaļo̧k, im karuwainene, jej jerbal ippān Irooj n̄an jipan̄ kajjojo jetōb aorōk n̄an itok n̄an E.
Aolep rikanaan ro āliktata, ilo epepen eo eļap, kar katakin membōr ro an Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ilo aolepān mour eo aō, jejjo waanjon̄ak ko rej jiktok ilo ļōmņak;
Būreejtōn David O. McKay (1873–1970), rikanaan eo ke ikar jodikdik, “Aolep membōr ej juon mijenede.”
Būreejtōn Spencer W. Kimball (1895–1985) ekar katakin, “Raan eo n̄an bōkļo̧k gospel eo n̄an elōn̄ļo̧k jikin ko im armej ro ej pād ijin im kiiō,” im “jej aikuj kōm̧ōkajļo̧k ad jerbal” ilo kwaļo̧k gospel eo ippān ro jet.
Būreejtōn Gordon B. Hinckley (1910–2008) ekar ba: “Jerbal eo ad em̧m̧an, eddo eo ad ekanooj ļap ilo jipan̄ pukōt ro n̄an katakin. Irooj ekar door iood juon kappe n̄an katakin gospel eo n̄an aolep mennin mour. Menin enaaj bōk kijejeto eo [ad] eļap.”
Im Būreejtōn Russell M. Nelson ekar katakin: “Jerbal in mijenede ej juon m̧ōttan aorōk an aintok eo eļap an Israel. Aiintok jab in ej jerbal eo aorōk tata ej bōk jikin ioon laļ rainin. Ebar ejjeļo̧k men n̄an keidi jon̄an ļap in. Ebar ejjeļo̧k men n̄an keidi jon̄an aorōk in. Mijenede ro an Irooj—rikaļoor ro An—rej bōk koņaer ilo idajon̄jon̄ in eļap, em̧m̧akūt eo eļap, jerbal eo eļap tata ioon laļ in rainin.”
Ikar itok n̄an jeļā menin kōn n̄a make āinwōt juon mijenede em̧m̧an ded ilo British Mijen. Eļapļo̧k aō jeļā kake rainin. Āinwōt Rijjilōk an Irooj Jisōs Kraist, ij kam̧ool bwe iien rem̧m̧an rej aolep jikin n̄an jipan̄ ro jet itok n̄an Kraist kōn kwaļo̧k ad iakwe, kwaļo̧k tōmak ko ad, im karuwaineneik er n̄an kobatok ippād n̄an en̄jake lan̄lōn̄ eo an gospel eo an Jisōs Kraist.
Jerbal Eo Ej Wōnm̧aanļo̧k
Ikar jeraam̧m̧an n̄an pād ilo juon kappe ilo Ra eo an Mijenede eo an Kabun̄ in ke bok eo im̧aan tata an Kwaļo̧k Gospel eo Aō kar kwaļo̧k kadkad in ilo 2004 eo, im bar juon alen ke bok eo kein karuo ekar diwōj ilo 2023 eo. Ij tōmak bwe Kwaļo̧k Gospel eo Aō em̧ōj an kōjeraam̧m̧an jerbal in mijenede ilo juon wāween em̧wilaļ.
Kwaļo̧k Gospel eo Aō eo ekāāl ej kitbuuj aolep men ko em̧ōj ad katak jān 2004 eo, tōl eo eim̧we jān aolep ro uwaan Būreejtōnji eo Kein Kajuon im Doulul eo an Jon̄oulruo Rijjilōk ro, im oktak ko kar kōm̧m̧an n̄an kwaļo̧k gospel eo ilo juon tōre an digital. Jet iaan oktak kein kar kwaļo̧k tōprak eļap.
Jaar lo bwe kwaļo̧k gospel eo ilo wāween ko reļam waan, ejjeļo̧k oktak, im rej make waļo̧k kōn pedped in katak ko an “iakwe, kwaļo̧k, im karuwainene” eļap aer kōjeraam̧m̧an aelōn̄ in kiin̄ eo. Jisōs Kraist ekar kwaļo̧k gospel eo ilo wāween in ke E ekar mour ioon laļ in: E ekar ajeļo̧k mour eo An im An iakwe im kar karuwaineneik aolep n̄an itok n̄an E (lale Matu 11:28). N̄an iakwe, kwaļo̧k, im karuwainene āinwōt An kar ej juon kōjeraam̧m̧an ainjuon im eddo n̄an aolep membōr in Kabun̄ in.
Jino kōn Iakwe
Ilo Jikin Kallib Gethsemane im ioon debwāāl eo, Jisōs Kraist ekar bōk ioon E make jerawiwi ko an laļ in im kar en̄taan kōn aolep būrom̧ōj ko im “en̄taan kōn metak ko im kaen̄tanaan ko im kapo ko otemjeļo̧k” (Alma 7:11). Menin “ekar kōm̧m̧an bwe [E], … eo eļaptata jān aolep, n̄an wūdiddid kōnke metak eo, im n̄an bōtōktōk ilo aolepān ānbwinn” (Katak im Bujen Ko 19:18). Kōn Pinmuur im Jerkakpeje eo An, Jisōs Kraist ekar kōm̧m̧an bwe lo̧mo̧o̧r im mour ijo eutiej tata ren pidodo n̄an aolep.
Oktakļo̧k n̄an Rilo̧mo̧o̧r eo im kejekļo̧kjeņ kōn aolepen ta ko E ekar kōm̧m̧ani n̄an kōj ej ejaki ilo juon bōro eobrak kōn iakwe n̄an E. Innām E ej ukōt būruōd n̄an ro jet im ej kakien kōj n̄an iakwe er (lale Jon 13:34–35) im n̄an kwaļo̧k gospel eo An ippāer (lale Matu 28:19; Mark 16:15). Eļan̄n̄e ro ipeļaakid remaron̄ en̄jake bwe jej m̧ool in iakwe im kea kōn er, enaaj bōlen peļļo̧kļo̧k būuruier n̄an ennaan ko ad, ejja āinwōt Kiin̄ Limonai ekar kōpeļļo̧k būruōn n̄an bōk gospel eo kōnke iakwe eo im jerbal in jipan̄ eo an Ammōn (lale Alma 17–19).
N̄e jej kwalo̧k gospel eo, jen jino kōn iakwe. Ilo ad pukotļo̧k ro jet ilo iakwe—keememej bwe rej ro jeid im jatid im ajri ro rejitōnbōro nejin Jemādwōj Ilan̄—iien ko rem̧m̧an renaaj peļļo̧k n̄an kōj n̄an kwaļo̧k ta eo jejeļā bwe em̧ool.
Kijooror in Bōk Koņaam im Kwaļo̧k
Ejjeļo̧k bar juon ekar ļapļo̧k an kar kijejeto n̄an kwaļo̧k gospel eo jān Būreejtōn M. Russell Ballard (1928–2023). Ilo ennaan eo an āliktata ilo kweilo̧k eo eļap, ekar kam̧ool, “juon iaan men ko rekabwilōn̄lōn̄ im aiboojoj tata jabdewōt ion laļin remaron̄ jeļā [ej] bwe Jemedwōj Ilan̄ im Irooj Jisos Kraist raar kwalok er make ilo raan kein āliktata im bwe Josep [Smith] eaar ruttoļo̧k n̄an an kōjeplaaktok tarlepen gospel eo an Jisos Kraist.”
Ilo aolepān mour eo an, im ilo enan̄in aolepān laļ in, Būreejtōn Ballard ekar kanooj m̧ōņōņō ilo kwaļo̧k enaan in aorōk ippān jabdewōt. E ekar kōketak kōj n̄an kōm̧m̧ane ejja wōt. Ekar katakin bwe jen kwaļo̧k gospel eo “kōn erom riturin ro rem̧m̧an im kōn kea im kwaļo̧k iakwe.” Ilo kōm̧m̧ane āindein, jej “kererakļo̧k gospel eo ilo mour ko ad make, im … kererakļo̧k n̄an [ro jet] kōjeraam̧m̧an ko gospel eo ej litok.” Jej barāinwōt “kwaļo̧k naan in kam̧ool eo kōn ta eo [jej] jeļā im tōmak im ta [jej] en̄jake.” Būreejtōn Ballard ekar katakin, “Juon naan in kam̧ool eo erreeo … maron̄ bōk kajoor eo an Jetōb Kwojarjar ilo būruwōn ro jet me rej pojak in bōke.”
Kwaļo̧k gospel eo an Jisōs Kraist kar kōjepļaaktok ekar ikdeelel eo eļap tata an būruōn Būreejtōn Ballard. Jemaron̄ in kanooj m̧ōņōņō—āinwōt an kar—ilo kwaļo̧k gospel eo ilo naan im jerbal jim̧or. Jeban jeļā wōn ibwilijid emaron̄ in kappukot meram eo an gospel eo bōtaab ejjab jeļā ia eo n̄an pukot e ie (lale Katak im Bujen Ko 123:12).
Leļo̧k Kūr in Bōro ko
Ilo jipan̄ ro jet itok n̄an Kraist, jej karuwaineneik er n̄an en̄jake lan̄lōn̄ eo me Rilo̧mo̧o̧r im An gospel rej bōktok. Jemaron̄ kōm̧m̧ane menin kōn karuwaineneik er n̄an itok n̄an juon m̧akūtkūt, n̄an riiti Bok in Mormon, ak n̄an iioon mijenede ro. Jej maron̄ barāinwōt leļo̧k juon kūr in bōro n̄an er n̄an pād ilo kweilo̧k in kwojkwoj eo ippād.
Jej pād ilo kweilo̧k in kwojkwoj eo kajjojo wiik n̄an “kabun̄ n̄an Anij im bōk m̧ōttan kwojkwoj eo n̄an keememej Jisōs Kraist im Pinmuur eo An.” Menin ej juon iien em̧m̧an n̄an an armej ro en̄jake Jetōb eo, epaakeļo̧k Rilo̧mo̧o̧r, im kōkajoorļo̧k tōmak eo aer ilo E.
Ilo ad pukot wāween ko n̄an iakwe, kwaļo̧k, im karuwainene, karōk eo im kijejeto ko ad rej aikuj kitbuuj jipan̄ armej ro pād ilo kweilo̧k in kwojkwoj eo. Eļan̄n̄e renaaj bōk kūr eo ad im pād ilo kweilo̧k in kwojkwoj eo, enaaj ļapļo̧k aer āinwōt wōnm̧aanļo̧k wōt ioon iaļ eo n̄an peptaij im oktaļo̧k. Ij tōmak kōn aolepān būruō bwe wejepedik eo eļap enaaj itok ilo ad karuwaineneik ro jet im jipan̄ er kile kōjeraam̧m̧an ko rej maron̄ būki jān kōm̧m̧ane.
Irooj Enaaj Tōl Kōj
Jejjamin jeļā ta wejepedik ko im apan̄ ko enaaj wōr ippād ilo ad iakwe, kwaļo̧k, im karuwainene. Ļōm̧aro nejin Mosaia “raar ilo̧k jān jikin kwelo̧k n̄an jikin kwelo̧k, im jān juon im̧ōn kabun̄-jar n̄an eo juon, … ilubwiljin riLeman ro, n̄an kwaļo̧k naan im n̄an katakin naan in Anij ilubwiljier; im āindein raar jino wōr aer tōprak eļap.” Jān kijejeto ko aer, “to̧ujin ko kar bōktok er n̄an jeļā kōn Irooj” im elōn̄ “raar oktak tok … [im] raar jamin raar bun̄” (Alma 23:4–6).
Ilo an menin jamin naaj aolep iien ad en̄jake, Irooj ekar kallim̧ur bwe E enaaj jerbal itūrid kōnke aolep jetōb ej aorōk n̄an E. Ilo ad likūt ad lōke ilo Irooj im bōk kuņaad ilo jerbal in jipan̄ eo An, E enaaj tōlļo̧k kōj ekōjkan kwaļo̧k gospel eo An ippān ro jet kōn iakwe er, ajeļo̧k mour ko ad im naan in kam̧ool eo ippāer, im karuwaineneik er n̄an kobatok ippād ilo ļoor E.
“Ļap naaj [ad] m̧ōņōņō” (Katak im Bujen Ko 18:15) n̄e jej bōk iien ko rem̧m̧an rej pād ipeļaakid n̄an jipan̄ Irooj Jisōs Kraist ilo jerbal eo eļap An n̄an bōktok jetōb ko n̄an E.