“Ennaan eo Aō jān Anij,” Liaona, Juļae 2024.
Ainikien Armej ro Rekwojarjar ilo Raan Ko Āliktata
Ennaan eo Aō jān Anij
Iaab jab bōk juon aō naan in kam̧ool kōn Bok in Mormon m̧ae iien eo Irooj eaar kōnono n̄an eō kōn Bok in Mormon.
Pija ko litok jān rijeje eo
Ke ļeo juōn mōtta ear karuwainene tok n̄a n̄an kobatok ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata ilo kar 2020 im iaar makoko in uaak. Ilo jinoin, iaar jab en̄jake bwe en̄in ej jikin eo, ak iaar kobaļo̧k wōt ilo kweilo̧k in kwojkwoj eo. Āliktata, ikar peptaij.
Ikar jab meļeļe, bōtaab, lōmņak ko n̄an bōk juon naan in kam̧ool me ro jet uwaan Kabun̄ in rej kōnono kake. Sister mijenede ro im n̄a kar riiti jet eoon ippān doon, ak ijjan̄in kar make kōpeļļo̧k Bok in Mormon eo aō. Men̄e membōr ro rej lukkuun kate er karuwaineneiki tok n̄a im kajjieon̄ bwe in niknik, iaar jino rum̧wij n̄an iien jar, jab pād ilo iien kweilo̧k ko, im bar ro̧o̧l n̄an men ko an laļ in.
Baj juon raan iaar en̄jake an nana aō mour. Iaar en̄jake an jab jejjet, mour ko an laļ in, im rikōjdāt nae men ko an Anij. Iaar kile ke ejjab jim̧we iaļ eo ij pād ie. Ke iaar en̄jake rot in, iaar kalimjōkļo̧k jeje ko rekwojarjar rej pād ilōn̄in beet eo aō.
Iaar kūr n̄an Anij bwe en ba tok jidik men n̄an n̄a. Ikar jar innām kōttar jidik n̄an lale n̄e inaaj ron̄ jabdewōt men. Iaar aikuj jidik aenōm̧m̧an im alikkar.
Innām ikar ron̄ juon men. Ijaje n̄e ainikien eo ej itok jen ļōmļak e aō ke jen lo̧jiln̄ū, bōtaab iaar ron̄ naan kein “Hilamōn 3:27.” Ijelā ke bok in Hilamōn ej pād ilo Bok in Mormon, kōn menin iaar bōk jeje ko rekwojarjar im etal n̄an kōmeļeļe ko n̄an kapukot bok in.
Ta eo iaar riiti tokālik ej juon ennaan tok jān Anij n̄an n̄a kōn ta eo ej waļo̧k n̄an n̄a ilo mour e aō: “Āindein jej lo bwe Irooj ej tūriam̧o n̄an aolep ro renaaj, ilo m̧ool in burueer, kūr ioon etan ekwōjarjar.”
Eoon in eaar ukōt kōtmāne eo aō kōn m̧akūtkūt ko aō make im kōn Bok in Mormon. Ikar kile ke m̧akūtkūt ko aō im kōm̧m̧an ko ad rebōd n̄an Anij im bwe ij aikuj kūr jan E n̄an ukweļo̧k. Ijelā ke Anij ebban kaarmejjete eō jen tiriamo ko im kōjeraam̧m̧an ko An toon wōt aō m̧ool ilo aō kūr n̄an E im ļoor E.
En̄in ej wāween an kar itok naan in kam̧ool eo aō kōn Bok in Mormon eo—juōn bok eo iaar jab itok limoō ilo riiti. Ijeļā ke Anij ej mour, bwe E ej kōnono n̄an kōj rainin, im bwe Bok in Mormon ej m̧ool.