Ngaahi peesi fakalotofonuá
Ko e Halafononga ki ha Moʻui ʻoku Lelei Ange mo ha ʻAmanaki Lelei ki he Kahaʻú
ʻOku pehē ʻe ha ongo hoa mali ʻe ua naʻá na hiki ki Nuʻu Sila mei Palāsila mo Tonga, naʻe tokoniʻi kinaua ʻe he polokalama BYU-Pathway Worldwide ke lelei ange ʻena leá, ʻiló, mo e ngaahi taukei fakangāué, ʻo fakaava ha ngaahi matapā ki ha moʻui ʻoku lelei angé mo ha ʻamanaki lelei foʻou ki he kahaʻu hona fāmilí.
ʻOku hoko ʻa ʻEnitulesa Tīvelisi mo hono husepāniti ko ʻOnitulei ʻo Pēkenihetí, mo Mōsese mo Lalueli ʻUnga ʻo Tōtala Valé, ko ha sīpinga ʻe ua ʻo e founga ʻoku ʻaonga ai ʻa e BYU-Pathway ki he ngāue fakafoʻituituí pea mo e hoa malí. ʻOku nau pehē ko e malava ko ia ke fakafenāpasi ʻa e aʻusia fakaakó ki he ngaahi fiemaʻu ʻa e tokotaha akó ko ha faingamālie mahuʻinga ia ʻo e polokalama ako ko ʻeni ʻi he ʻinitanetí.
Naʻe hiki ʻa e ongo Tīvelisí mei Palāsila ki Nuʻu Sila ʻi he 2018, hili ia ha taʻu ʻe taha mei heʻena malí. Naʻe fakangatangata pē ʻa e lea faka-Pilitānia ʻa ʻEnitulesá ki ha ngaahi kupuʻi lea hangē ko e “mālō ʻetau maʻu ki he pongipongí ni” pē “mālō.” Ko e meʻamālié, he naʻe lahi ange ʻa e ʻilo ʻa ʻOnitulei ki he lea faka-Pilitāniá koeʻuhí ko ʻene ngāue fakafaifekau maʻá e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻo tokoniʻi ai kinautolu ke nau nofo ʻi honau ʻātakai foʻoú.
Ko e fakamatala ʻeni ʻa ʻEnitulesá, “Naʻe ohi hake au ʻe heʻeku ongo kuí ʻi ha kiʻi kolo ʻi Palāsila, pea naʻa mau fuʻu masiva ʻaupito. ʻOku tuku fakatatali ʻa e ngaahi ʻunivēsiti fakapuleʻangá ki he fānau ako lelei tahá, pea ko e tokotaha ako ʻavalisi pē au, ko ia naʻe ʻikai ke u maʻu ʻa e faingamālie ko iá.”
Naʻá ne maʻu ha kalasi neesi totongi maʻamaʻa ka naʻe ʻikai ke ne tokanga ki ai—naʻá ne fiemaʻu pē ke hoko atu ʻene akó. Hili ʻena ʻosi mei he akó, naʻe fakakaukau ʻa ʻEnitulesa mo ʻOnitulei ke hiki ki Nuʻu Sila ke maʻu ha ngaahi faingamālie lahi ange.
ʻI heʻena aʻu atú, naʻe kumi ʻe ʻEnitulesa ha ngaahi founga ke fakaleleiʻi ʻaki ʻene lea faka-Pilitāniá. Naʻá ne ʻalu ki he ngaahi kalasi lea fakafonuá pea ngāue ki ha ngaahi fāmili lahi ʻo tokangaʻi ʻenau fānaú, ʻa ia naʻe tokoni lahi ki he fakalakalaka ʻene lea faka-Pilitāniá. ʻOku ne pehē, “Ko e kií ʻa e fakaʻutumauku hono ako ʻo e lea fakafonuá!”
ʻI he fakaʻamu ʻa ʻEnitulesa ki ha tupulaki fakapalōfesinale lahi angé, naʻe tali ia ki he polokalama BYU-Pathway ʻi he 2020, ʻa ia naʻá ne fakakakato ai ʻene poto mo e taukei ʻi he lea faka-Pilitāniá mo e Fiká kimuʻa peá ne toki maʻu ha tohi fakamoʻoni ako ʻo ha Faiako ki he Lea Faka-Pilitāniá ko ha Lea Muli ʻi he mataʻitohi Ako Fakapalōfesinalé, ʻa ia naʻe fakaava ai ha ngaahi faingamālie lahi maʻana.
ʻOkú ne pehē, “Ko e meʻa ia ʻoku ou saiʻia ai ʻi he BYU-Pathway. Ko ha hala fononga ia ki he pōtoʻi ngāué. Ko ha hala faingofua ia ki ha mataʻitohi BA, pea te ke lava ʻo ngāue mo maʻu ha ngaahi tohi fakamoʻoni ako ai ʻi he fonongá.”
Hili hono fakakakato ʻene tohi fakamoʻoni ako TEFL, naʻe toʻo ʻe ʻEnitulesa ʻa e ngaahi kalasi ʻi he ʻinitanetí ki he ngaahi fetuʻutakí ʻo fakafou ʻi he Ensign College pea naʻá ne fakakakato ha tohi fakamoʻoni ako ʻi he Social Media Marketing. Naʻá ne ʻiloʻi naʻá ne ʻi he hala totonú ʻi he taimi naʻá ne tokoni ai ʻi he ngaahi ngāue ʻi he mītia fakasōsiale ki he Mīsini Foaki “Light the World” ʻo ʻOkalaní ʻi he Tīsema kuo ʻosí.
Naʻá ne fakamatala ʻo pehē, “ʻE lava pē ke hoko ʻa e mītia fakasōsialé ko ha feituʻu faingataʻa, ka ʻoku ou tui ʻe lava ke fakaʻaongaʻi ia ʻi ha ngaahi founga lelei. Naʻe tokoni ʻa e aʻusia ko iá ke u ʻiloʻi ʻa e founga te u lava ai ʻo fakahoko ha lelei ʻi he moʻui ʻa e niʻihi kehé.”
ʻOku pehē ʻe ʻEnitulesa, “Kuo faitāpuekina au ʻe he BYU-Pathway ʻaki ha loto-feinga maʻu pē ke fekumi ki ha ngaahi faingamālie lelei ange. Ko ha lēsoni ia kuó u maʻu ki he toenga ʻo ʻeku moʻuí.”
Lolotonga iá, naʻe hiki ʻa e ongo hoa mali ʻUngá mei Tonga ki Nuʻu Sila mo e ngaahi palani ke hū ki he ʻunivēsití. ʻI he lotú ʻi ha Sāpate ʻe taha, naʻa nau fanongo ki ha fepōtalanoaʻaki fekauʻaki mo BYU-Pathway pea naʻá na mālieʻia ʻi he maʻamaʻa ʻo e totongi akó mo e malava ko ia ke ngāue lolotonga ʻena akó.
Naʻe pehē ʻe Lalueli, “ʻOku manako hoku husepānití ʻi he ngāue fakatufungá mo e ʻenisinia meʻalelé, pea naʻá ku ako ki he fefolauʻakí mo e takimamatá ʻi Nuʻu Silá ni ka naʻá ku fakakaukau ke ʻoua naʻa muimuiʻi pau ia. Naʻá ma vakai ki he BYU-Pathway ko ha faingamālie ke vakaiʻi ai ha ngaahi ako fakapisinisi.”
Naʻe toe pehē ʻe Mōsese ko e taimi naʻá ne fuofua haʻu ai ki Nuʻu Silá, naʻe lahi ha ngaahi kautaha naʻe ʻikai ke nau fakangāueʻi ia ʻi ha ngāue lelei ange koeʻuhí ko e ʻikai ke ne maʻu ʻa e ngaahi tohi fakamoʻoni ako ʻoku fiemaʻú.
Naʻá ne pehē, “Naʻá ku maʻu ha ngāue ʻi he pisinisi langa tuʻungá (scaffold) koeʻuhí he naʻe ʻikai ha toe taha te ne fakangāueʻi au. Naʻá ku fie ako, ka naʻe fuʻu mamafa ʻa e akó koeʻuhi ko e tuʻunga ʻo ʻeku visá.”
Naʻá ne pehē, “Koeʻuhí naʻe ʻosi lesisita hoku uaifí ʻi he BYU-Pathway, naʻá ku fakakaukau ke u kau foki mo au.”
Naʻe kamata fakataha ʻa e ongo ʻUngá ʻi heʻena ʻuluaki semesitaá ʻi he 2020 pea vave ʻena fakalakalaka ʻi heʻena ngaahi polokalamá. Naʻe fakakakato ʻe Mōsese ʻene tohi fakamoʻoni ako BYU-Pathway ʻi Siulai 2021 pea hokohoko atu ʻi he ʻinitanetí mo e Brigham Young University-Idaho.
ʻOkú ne pehē, “ʻOku ou feinga ke maʻu hoku mataʻitohi BA ʻi he ako fakapalōfesinalé, ʻa ia ʻoku kau ai ha tohi fakamoʻoni ako ʻe tolu: ko e Auto Service Technology, Computer Support, mo e Computer-Aided Design and Drafting,”
Lolotonga iá, naʻe pehē ʻe Lalueli naʻe tokoni ʻa e BYU-Pathway ki heʻene feinga ha founga ke lava ke iku ai ʻo ngāue fakataha ʻa e ongomeʻa malí. “Neongo ko ʻeku ʻuluaki hala fononga ki he ngāué ko e fefolauʻakí mo e takimamatá, naʻe fakaʻatā ʻe he BYU-Pathway ke u fakataumuʻa ki ha kahaʻu kehe—ko ha feituʻu ʻe ala lava ke ma fakalele ai haʻama pisinisi pē ʻamaua.”
ʻOkú ne pehē, “ʻOku ʻi ai hoku fakaʻilonga ako (associate) ʻi he Applied Business Management, pea ʻoku ou lolotonga ʻi he ngaahi semesitā fakaʻosi ke fakakakato ʻa e BA ʻo e Applied Business Management ʻi he Brigham Young University-Idaho ʻi Tīsema.”
ʻOkú na lolotonga maʻu ha ngāue taimi kakato—ko Lalueli ʻi ha pangikē mo Mōsese ʻoku ngāue ki ha kautaha fakaleleiʻi ʻo e falé (home improvement retailer). Fakataha mo ʻena ngaahi kalasi lolotonga ʻi BYU-Idaho, ʻokú na toe hoko foki ko ha ongo faifekau ngāue tokoni ʻo fakalele ha kalasi BYU-Pathway mo kau atu ki ha ngaahi fakatahaʻanga ʻoku akoʻi ai ʻa e ngaahi kalasi lēsoni fakalotú tuʻo taha ʻi he uike mo tokoniʻi ha fānau ako kehe ʻi he BYU-Pathway ʻi heʻenau fononga fakaakó.
Naʻe pehē ʻe Mōsese, “ʻOku faʻa ʻeke mai pe ʻokú ma lavaʻi fēfē ia, pea ʻoku faingofua ʻema talí: ʻoku tataki kimaua ʻe he lotu mo e tui ʻi he foʻi laka kotoa pē. Ko ha fononga faingataʻa, pea kuó ma ako ke puleʻi lelei ange homa taimí.
ʻOkú ke lotua ha tokoni pea ʻi he founga pē ʻa e ʻEikí, ʻokú Ne fakafaingamālieʻi ʻa e taimi ko ía.” Naʻá ne pehē, “Neongo ko e houa pē ʻe 24 ʻokú ke maʻú, ka ʻoku hangē ʻoku toe lahi ange ʻa e taimí. ʻOku ʻikai ke u ʻilo pe ʻoku hoko fēfē ia, ka ʻokú Ne tokoniʻi ʻa e meʻa kotoa pē ke malava.”