Ngaahi peesi fakalotofonuá
ʻOku ʻIkai Lava Ke Toe Puna Vakapuna ʻa e Pailaté ka ʻoku Hokohoko Atu ʻene Ngāue Fakaetauhi ki he Niʻihi Kehé ʻi he Funga ʻo e Fonuá
Mahalo he ʻikai toe puna vakapuna ha pailate taukei puna vakapuna, ka heʻikai taʻofi ai ia mei heʻene ngāue fakaetauhi ki he niʻihi kehé ʻi he funga ʻo e fonua.
ʻI he ʻaho 1 ʻo ʻEpeleli ʻo e 2024, naʻe fakahoko ai ʻe he kautaha vakapuna Air Marshall Islands (AMI) ha fakafiefia fakaʻohovale maʻá e Kapiteni ko ʻAliponi “ʻAli” Selokī ʻi he malaʻe vakapuna Amata Kabua International Airport ʻi Masulo ke fakamanatu ʻene puna fakaʻosi ko e pailate pule ki he kautaha vakapuna fakafonuá.
Naʻe hoko ʻa Kapiteni Selokī, ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko e pailate fuoloa taha ia ʻi he hisitōlia ʻo e AMI, ʻa ia naʻe laka hake ʻi he taʻu ʻe 43 ʻene ngāue pailaté. Neongo ʻoku hanga ʻe he ngaahi tuʻutuʻuni lolotonga ʻo e fefolauʻakí, US Federal Aviation Administration (FAA), ʻo taʻofi ʻa e kau pailate ʻoku taʻu motuʻa ange ʻi he taʻu 65 mei he puna fakakōmesialé, ka ʻe kei nofo pe ʻa Selokī ʻi he AMI ko e Pule Lahi, ko ha ngāue kuó ne fakahoko ʻo lahi hake ʻi he taʻu ʻe uá.
Naʻe pehē ʻe Mēlani Loueki ko e ʻofefine ʻo Kapiteni Selokī naʻe taʻu 65 ʻi ʻEpelelí, “kapau naʻe ʻikai ʻa e tuʻutuʻuni ki he taʻu motuʻá, ʻe kei hokohoko atu pē ʻa e puna vakapuna ʻemau tamaí.”
Neongo ʻoku ʻiloa ia ʻi heʻene ngaahi lavameʻa ʻi heʻene hoko ko e pailate mo e pulé, ka ʻoku siʻisiʻi ange hono fakatokangaʻi ʻene ngaahi faingamālie lahi ke tokoni ki he niʻihi kehé ʻo fakafou ʻi heʻene ngāue maʻuʻanga moʻuí. Naʻe pehē ʻe Kapiteni Selokī, “ʻOku ou fie fakamālō ki he ʻEikí ʻi heʻeku ngāue maʻuʻanga moʻuí. ʻOku ou fakamālō foki ʻi he taimi naʻá ku tokoni ai ki hoku kakaí, tautautefito kiate kinautolu ʻi he ʻotu motu mamaʻo ʻi heni ʻi he Lēpapulika ʻo e ʻOtu Motu Māsoló.”
Naʻe fakafeʻiloaki ʻa Kapiteni Selokī ki he ongoongoleleí pea papitaiso mo hono fāmilí ʻi he 2014. ʻI he 2016 naʻe kole ange ke ne ngāue ʻi he kau pīsopelikí mo ako ʻa e mahuʻinga ʻo hono tokoniʻi ʻo e mēmipa takitaha. Naʻá ne pehē, “ʻOku totonu ke tau hanga ki hotau Fakamoʻuí ko hotau faʻifaʻitakiʻanga ʻi he meʻa kotoa pē ʻoku tau faí mo e founga ʻoku totonu ke tau tokoniʻi ʻaki ʻa e niʻihi kehé. Ko e hā ha toe founga lelei ange ke teuteu ai ke feʻiloaki mo hotau Fakamoʻuí ka ko e feinga ke hoko ʻo hangē ko Iá ʻi he tokoni ki he niʻihi kehé!”
Naʻá ne fakamatala ki ha meʻa naʻá ne aʻusia ʻo ne fakaʻaongaʻi ai ʻene taukei ʻi he puna vakapuná ke tokoniʻi ha mēmipa naʻe mamahi, ke ʻalu ki he putu ʻo ha mēmipa ʻo e fāmilí ʻi ha taha ʻo e ʻotu motú, ʻaki haʻane liliu ʻa e halanga ʻo e vakapuná ke lava ai ʻene ʻalú. “Naʻe ongoʻi fiemālie mo fiefia moʻoni hono fāmilí ke sio ki heʻene hifo mei he vakapuná.”
Naʻe fakamatalaʻi ʻe Kapiteni Selokī ʻi he loto-fakatōkilalo, naʻá ne pailate foki maʻá e kau taki ʻo e siasí ki he ʻotu motu ʻi tuʻa ʻo e ʻOtu Motu Māsoló ke tokangaekina ha ngaahi tūkunga fakatuʻutāmaki. Ko e tokoni ki he niʻihi kehé ko ha meʻa ia naʻá ne ako mei heʻene ongo kuí. Naʻá ne fakamatala ʻo pehē, “Naʻe ohi hake au ʻe heʻeku ongo kuí mei ha ngaahi tūkunga fakatōkilalo pea mahino kiate au ʻa e taimi ʻoku ongoʻi faingataʻaʻia lahi ai ha tahá.”
Naʻe tuku ʻe heʻeku ongomātuʻá au mo ʻeku ongo kuí ʻi hoku māhina pē ʻe tahá, pea naʻe fai mai ʻe heʻeku kui fefiné ha ngaahi talanoa fekauʻaki mo hono ʻomi ʻe he kaungāʻapí ʻa e huʻakau mo e ngaahi meʻa kehe maʻaku. Naʻá ne fakamamafaʻi kiate au kapau te u lavameʻa ʻi he moʻuí, ʻoku fiemaʻu ke u manatuʻi ʻa e ngaahi ngāue ʻofa kuo fai ʻe he kakaí maʻakú.”
ʻOkú ne hoko atu ʻo pehē, “ʻOku ou fakafetaʻi ki he ʻOtuá ʻi he tāpuaki kotoa pē kuó Ne foaki mai ki hoku fāmilí mo aú. Ko e meʻa mahuʻinga tahá ʻoku ou fakamālō kiate Ia ʻi he faingamālie ke u lava ai ʻo tokoni ki he niʻihi kehe ʻoku faingataʻaʻiá.”
Naʻe hā mai ha ngaahi ongo mālohi mei hono kaungā ngāué ʻi he kātoanga ʻi he ʻaho 1 ʻo ʻEpelelí, kau ki ai ʻa Palesiteni Hilitā Hainā ʻo e ʻOtu Motu Masoló, ʻa ia naʻá ne fakaʻapaʻapaʻi ʻa Kapiteni Selokī ʻi heʻene faivelengá mo ʻene ngāue tokoní. ʻOku fakamoʻoniʻi ʻe he fakalāngilangi naʻe fakahaaʻi ʻe he kau ngāue AMI mo e kakai ʻi he mītia fakasōsialé ʻa e natula anga fakakaumeʻa mo e māteaki ʻa Kapiteni Selokií.
Naʻe pehē ʻe Kapiteni Selokī, “Kuó u maʻu vāhenga mālōlō mei he puna vakapuná ka ʻi heʻeku hoko ko e CEO/Pule Lahi ʻo e Air Marshall Islands, ʻoku ou kei lava pē ʻo folau ko ha pāsese mo tokoni ki hoku kakaí. Ko e meʻá pē he ʻikai ke faʻa hoko ia ʻo hangē ko e taimi naʻá ku hoko ai ko ha pailaté.”
Naʻe kamata ngāue ʻa ʻAliponi Selokī ʻi he AMI ʻi he 1981 ko ha sētuata vakapuna. Naʻá ne ako ko ha pailate, hoko ko ha ʻOfisa ʻUluaki (First Officer) ʻi he 1983, pea naʻe tuʻo lahi hono fakahiki hake ia [ki ha lakanga māʻolunga kimuʻa peá ne toki hoko ko e Talēkita ʻo e Ngaahi Ngāue ki he Fepunaʻakí [Director of Flight Operations] mo Pailate Pule ʻi he 1997 ʻi he AMI.