Kakoroa Nanon Tibwangam ae Onoti
Reiakinna bwa a kanga otenanti n te nakoanibonga ao kakabwaia n te berita ni kariaia mwaakan te Atua ni bwaro nako nanon maium.
N te tai ae nako kainnabau, ae Greg, mai mwiin ana tutuo ao e nooraki bwa e riai ni karaoaki te korokoro nakoina ma kabonganaan te chemotherapy n namwakaina aika a mwaiti. N aron angiina mai buakomi ake a tia ni kaitara ma te aekaki ni kangaanga aei. ti waekoa ni waakina ara tataro ibukin buoka mai karawa ao mwaakan te Atua. Te Tabati i mwiin ana korokoro Greg, e a nikiraki te toa nakoira n ara ruu n te onaoraki.
I nanon te tai aei, bon tii Ngai ae I butimwaea te toa. Teuana te mwakoro ni kariki. Teuana te mwangko n ran. N te umwantabu, e aki toki au iango ni boboto iaon waakin mwakuri te toa—katauraoana, kakabwaiaana, ao kabutana. Man te bwakantaai anne, I iangoa Ana bwaintangira te Atua ae mwaakana ae tauraoi ibukiu rinanon te otenanti ae tabu n ti ngaia, ao te berita n te otenanti are I karaoia ngkai I anaa te kariki ao te mwangko n ran. Aei raoi te tai are I kainanoa te mwaakan mai karawa. Ribuakon te uruaki n nano ae korakora, te kua, te nanououa, I iangoa aron te bwaintangira aei are e na konaa ni karikai bwa na karekea te mwaaka mai Irouna are I rangi ni kainnanoia. Butimwaean te toa e na karikirakea au reitaki ma Tamnein te Uea, ni konaa ni karekea ana bwaintangira te Atua ni mwaakana, n ikotaki ma aia mwakuri n ibuobuoki anera ao korakoran ana kakorakora te Tia Kamaiu ni tokanikai.
I taku bwa I tuai n ataia ao ni mataata raoi i mwaaina bwa e aki tii kakawaki bwa antai ae karaoa te otenanti anne—tera ae reke man otenanti ao ara kakabwaia n te berita ti bon riai naba ni kabanei nanora nako iai. Otenanti n te nakoanibonga ao kakabwaia n te berita e karika ae e kona te Atua ni katabuira ao imwina ni karaoi bwaai aika a kamiimi inanon maiura. Ma e na kanga n riki aei?
Te moan, n te aro bwa e aonga ni kaotaki mwaakan te Atua inanon maiura, e riai ni karaoaki man ana kariaia Natin te Atua. E rangi ni kakawaki katauraoan ao nikiran te otenanti aei. Te Tama e onimakina Iesu Kristo ma kiing ao te kariaiakaki ibukin tararuaan ma karokoan ao nikiran Ana otenanti ibukin te nakoanibonga. Iaan Ana kaetieti, ma aron bairean Ana nakoanibonga, a tia ni katabuaki natin te Atua mwaane n tei n onea mwiin Natin te Atua.
Te kauoua, tiaki tii karaoi berita aika tabu—ti riai ni kawakin. Inanon angiin otenanti n te euangkerio, ti karaoi berita aika tabu ma te Atua, E berita bwa e na kakabwaiaira ngkana ti kawakin berita akana a tabu akanne. Ti ataia ae ikotakin te otenanti n te nakonibonga n raonaki ma kawakinan kakabwaia n te berita are ti na kona iai ni karekea mwaakan te Atua?
N te bwakantaai anne I iangoia bwa ngkana ngai, natin te Atua te aine inanon te berita, I mataata raoi bwa N a kanga ni karekea Ana bwaintangira te Atua ae mwaakana rinanon otenanti n te nakoanibonga ao ngkana I bon kinaa raoi bwa e kanga mwaakan te Atua ni mwamwakuri inanou.
N 2019 aia kakao burabeti are anganaki aine n te Ekaretia ti reireinaki aron ni karekea mwaakan te Tia Kamaiu nako nanon maiura. E kaoira Beretitnti Russell M. Nelson bwa ti na kamatebwaia Reirei ao Berita aika Tabu 25, te kaotioti are e anganaki Emma Smith i Harmony, Pennsylvania. Butimwaean te kakao anne e bita maiu.
N te namwakaina ae nako I karekea tibwangau ae akea kantaningaakina bwa N na nako Harmony. Ikanne, iaan te aroka n te buakonikai, e kaokaki te nakoanibonga nakon Iotebwa Timiti ao Oliver Cowdery. Ni uakaan ma aroka akanne bon moan mataroan aia auti Iotebwa ao Emma. Ni kaitara ma te tabo ni kauraai n te mweenga anne ao bon iai te wintoo. I tei i matan te wintoo ao n iangoia bwa tera ae a iangoia Emma ngke e taratarai aroka akanne man te wintoo.
N Turai 1830 ao bon 26 ana ririki ni maiu Emma, e bon rang ataei. Ai teniua ma te iterana te ririki maniia n iein. E bwaka natina te mwaane—are ana moan nati. E mena ruanimatena ae uarereke irarikin te kawai man mweengana. Ngke I teitei irarikin te wintoo anne, e aki rangi ni kangaanga irou iangoana bwa tera ae e a bon katabeaki iai ana iango. Ni koauana e raraoma ibukin aia kataumwane, ibukin rikiraken te bwainikirinaki are e a roota aron manoia, ao ibukin maiua n taai aika a na roko. Ma ana mwakuri te Atua e mena n taabo nako i rarikin neienne. E iangoia naba bwa e na bwaka ia n te babaire ni kamaiu, tera manenana n Abanueana, ao ana konabwai i matan te Atua?
I taku bwa e bon ataia.
A riki bwaai aikai, ana bwaintangira te Atua ibukin te nakoanibonga ao taian kiing a tia ni kaokaki nako aon te aba. Aei raoi te tai are e kainanoa mwaakan karawa Emma. Ribuakon te uruaki n nano ae korakora, te kua, te nanououa, I tabe n iangoa Emma ibukin te bwaintangira aei ae ana nakoanibonga te Atua are e kona ni karokoa te mwaaka mai Irouna are e rangi ni kainnanoia.
Ma e aki tii teitei Emma irarikin te wintoo ao n iango.
Inanon reiakinan te Burabeti ae Iotebwa ibukin kiing, nakoa, otenanti, ao aron buokan te mwakuri ni ibuobuoki n te nakoanibonga, bon te Uea, rinanon Ana burabeti, ae e anga te kaotioti nakon Emma. Tiaki te Beretitenti n te Bootaki n Aine i Nauvoo ae Emma—te kaotioti aio e kaokaki nakon Emma ae 26 ana ririki i Harmony. Rinanon kaotioti, e na reiakinna Emma bwa te kaitiakaki ao te reitaki n te berita e nako mai nanom ni kakorakoraa te konabwai n otenanti n te nakoanibonga akanne ni mwakuri inanon maiuna.
Te Moan, e kauringa Emma te Uea ibukin ana tabo inanon Ana babaire, n ikotaki bwa antai ngaia ao aekakira ngaia—te nati te aine n abanueana. E kaoaki bwa e na “nakonako n te kawai ae tamaroa,” te kawai are e raonaki ma otenanti are a na kauka mwaakan te Atua ngkana e teimatoa ni kakaonimaki Emma n ana berita aika tabu.
Te kauoua, inanon ana tai n rawawata, e anganaki te kaantaninga iroun te Uea. E aki riki Emma bwa kanga temanna ae e ti nora aron kaokakin te euangkerio; bon ngaia naba ae kakawaki tabena n te mwakuri are e karaoaki. E katabuaki “ni kabwarabwarai koroboki aika tabu ao ni kaunga te ekaretia.” E kabanea ana tai “ni koroboki ao n reiakina ae mwaiti.” E anganaki tabena Emma ae tabu ni buoka katauraoiia Aika Itiaki n nebonebo; aia anene n nakon te Uea e butimwaeaki bwa bon te tataro ao e na “kaekaaki ma te kakabwaia i aon atuia.”
Te kabanea, e baireia te Uea bwa e na katabui ana mwakuri mai inanona are e na konaa ni katauraoa Emma ibukin te karietataaki. “Ao ngkana ko aki karaoi aei, ” e kabwarabwaraa te Uea nakoina, “ko aki kona n roko ike I mena iai.”
Ngkana ti karaua ni wareka raoi mwakoro 25, ti na kunea te rikirake ae kakawaki ae na riki. E na waaki Emma n riki bwa te nati te aine n abanueana nakon “te aine ae rineaki” nakon te ueanaine. Otenanti n te Nakoanibonga ae te Aaron ao te Merekitereka, n raonaki ma kawakinan ana kakabwaia n te berita, are e na karikirakea ana reitaki ma te Tamnei ae Raoiroi ao ma anera, e anganna te korakora ni kaira maiuna ma te kairiiri mai karawa. Rinanon Mwaakana mai karawa, e kamaoa nanona te Atua, e na kakorakora ana konabwai, ao ni bitia nakon katotongan arona are E ataia bwa e na kona riki nako iai. Ao rinanon otenani n te Nakoanibonga ae te Merekitereka, “[e na] kaotaki mwaakan te aro n Atua” inanon maiuna ao te Uea e na kanakoa te rabuna mairouna bwa e aonga ni karekea te atatai mai Irouna. Aei raoi aron mwaakan te Atua ngkana e mwakuri inanora.
E reirei Beretitenti Russell M. Nelson:
“Ni kabane bwaai ake a riki i [Harmony] bon iai irekereke aika a kakawaki ibukin maium. Kaokan te nakoanibonga, n reitaki ma ana taeka n reirei te Uea nakon Emma, a kona ni kairi ao ni kakabwaiai ngkami ni kabane. …
“… Karekean mwaakan te Atua inanon maium e kainanoa katitaboan bwai are e tuangaki Emma iroun te Uea ao [ngaira] n tatabemaniira ti na karaoia.”
Iai bwaai aika a kakawaki aika a riki n iteran wintoo aika uoua i Harmony, n ikotaki ma te kaotioti are e anganaki te aine are e rineaki are e a tia ni weteia te Uea—te kaotioti are kakorakora, ni kaunga nanon, ao ni kaira Emma Timiti, natin te Atua te aine.
Ngke e anganaki te kakabwaia ibukia ataei tibura ae Isabelle, e kakabwaiaki iroun Tamana ma ana atatai i aon te nakoanibonga, bwa e na reitinako n rikirake ao n reiakina te kakabwaia are e na katauraoaki inanon maiuna; ao bwa ana onimaki e na rikirake ngkana e teimatoa n rikirake inanon te atatai.
Bon tiaki n taainako ae kakabwaiaakin te teeinaine ae uarereke bwa e na ataa te nakoanibonga ao n reiakinna bwa e kanga otenanti n te nakoanibonga ao kakabwaia n te otenanti ni buokia bwa e aonga ni karekea mwaakan te Atua. Ma I uringa Emma ao n iango inanou, E aera bwa N na aki kona? Te nati te aine ae uarereke aei iai ana konabwai n riki bwa te aine ae rineaki n Abanueana ao n riki bwa te ueanaine. Rinanon Ana otenanti n te nakoanibonga ao kawakinan berita aika tabu, mwaakan te Atua ao n riki bwa te aine ae e ataia te Atua bwa e na riki nako iai. Aei te bwai ae I tangiriia ataeinnaine ni kabane n te abanuea bwa a na ataia.
“Kakoroa nanon tibwangam ae onoti,”
Reiakinna bwa a kanga otenanti n te nakoanibonga ni kariaia mwaakan te Atua ni bwaro nako nanon maium n te aro ae korakora, ni mwakuri inanom ao mai iroum, ni kakorakora ma ni katauraoiko ni kakoroa nanon oin bukin maium ma am konabwai ae bwanin.
Karaurau kamatebwai ao iangoia inanom otenanti n te Nakoanibonga ae te Aaron ao te Merekitereka, te kakabwaia n te berita aika ti karaoi i marenara, ao mwaakan te Atua are ti karekea rinanon otenanti akanne.
Uringnga, tiaki ae antai ae karaoa te otenanti anne ae kakawaki; tera ae reke man otenaniti ao am kakabwaia n te berita ae ti riai naba ni kabanei nanora nako iai.
Butimwaean te kariki ao te ran bon te kauring ni katoa wiiki ibukin Mwaakana bwa e na mwakuri inanom ni buokiko n tokanikai. Bwainakin te kaamenti n te nakoanibonga ae tabu bon te kauring ni katoa bong n Ana bwaintangira ibukin Mwaakana bwa e na mwakuri inanom ao ni buokiko n are ko na riki nako iai.
Ti bane n kona ni karekea ana bwaintangira te Atua ibukin mwaakana.
Ti butimwaea te toa ni katoa tai.
Ni katoa tai n rokora n te tembora iai bitakin maiun tamneira.
Aio bon te tai ae tamaroa n au Tabati. Aio bukina ngkai I matenanoa au rekomente nakon te tembora.
“Ai ngaia are, inanon taian otenanti, e kaotaki mwaakan te aro n atua.”
Man te bwaintangira aei I kakoaua n aran Iesu Kristo, amen.