Kabaeaki nakon Iesu Kristo: Te Riki bwa Taoron te Aba
Ngkai ti teimatoa ni kabaeaki nakon te Uea, maiura a na kaota raoi Otana, ao ti na riki bwa taoron te aba.
E reirei te Tia Kamaiu bwa ngkana ti “weteaki nakon [Ana] euangkerio ae akea tokina, ao ni berita ma te berita ae tabu ae akea tokina, [ti] aranaki bwa ai aron taoron te aba.” E karaoaki te taoro man uoua bwaai aika a uaia n renganaki. Ti aki kona n riki bwa taoro ibon iroura; ngkana ti na riki bwa taoron te aba, ti riai ni kabaeaki nakon te Uea, ao aio are I taraia bwa te reitaki ma membwa n te Ekaretia ni kabutaa te aonaaba—membwa n te Ekaretia aika kakaonimaki aika a kabaeaki nakon te Uea, motinanoia n aia kekeiaki ni beku ibukiia tabeman ao n riki bwa taoron te aba.
Katabuan nanom ae aki tiotio bon te banna ni kaototo ae otamwaaka. E butimwaeaki am mwakuri ni ibuobuoki ao n nabeaki.
A tia ara kairake ni kaota te ninikoria ao nano matoaia. A tia ni butimwaia ma nanoia ni kukurei te mwakuri n rongorongon te utu, ao nanakoia nakon Ana auti te Uea bon te kakoaua nakon aia kakaonimaki. Kukurein nanoia ni kabanea aia tai ao korakoraia ni beku n te mition ni kabuta te aonaaba e oti iai nenen ao matoan aia onimaki. A bon aki ti ira buakona ma a kaira te kawai n riki bwa ana reirei aika a kabaeaki nakon Iesu Kristo. Aia mwakuri ni ibuobuoki e kaotaa nako te oota ao te kantaninga, n rotii maiuia aika mwaiti. Nakoimi, ngkami kairake n te Ekaretia, ti kaota ara kakaitau ae nako mai inanora ibukin ami mwakuri ni ibuobuoki ae kaunga te nano. Ngkami bon tiaki ti mwiokon te Ekaretia n taai aika a na roko ma bon ibukin taai naba aikai. Ao ngkami bon taoron te aba!
I tangira te Uea Iesu Kristo ao I namakina kakabwaiakiu n reken te tai ni beku irarikimi n Ana Ekaretia te Uea. Katiteuanakira ao korakorara, a boboto n ara koaua ae ti tibwaia, ni kamatoa nakoira bwa ti aki kona ni maroa n te mwananga aei. Ni bootaki, ti kona n reitinako ni katea abanuean te Atua, ae boboto iaon te mwakuri ni ibuobuoki, te tangira, ao te onimaki ae aki nano tiotio.
Ngke e reirei Iesu Kristo i rarikin te Nama are Kariraia, E aki toki ni kabonganai bwaai aika a mataata iai naake E reireiniia ni kaotaa te koaua ae mai iroun te tamnei. Teuana mai ibuakona bon te taoro. E taekinna Iesu, “[Ngkami] taoron aon te aba,” te mwakoro n taeka ae nano nanona ao ni kakawaki, riki nakoia aomata ake n Ana tai aika a mataata n aron mwaitin bonganan te taoro.
Te kawai rimoa n aron rikoan te taoro n te tabo ae Algarve, te aono are i maiakin oin abau ae Portugal, e nako ngaa te ririki mai moana n tain te Tautaeka n Room. Kamimiina, bwa aron mwakuriana irouia tan riko taoro, e ataaki bwa marnotos, e uarereke bitakina n aron are ngkoa. Taan mwakuri aika a kakaonimaki aikai a kabonganaa arona are rimoa, ni karaoa aia mwakuri bon ti man baia, ni kateimatoaa tein arona are e bon tiku rinanon tienture.
Mwakuriana n te kawai are rimoa e karika te bwai ae atongaki bwa “ueen te taoro.” Ni karekean te nano ni kakaitau n aron kangangan waakin rikoan ueen te taoro, e kakawaki te mataata n atakin aron tein te tabo are e karaoaki mai iai. Mataniwiin Algarve ae aoneinei n taari ae on n te uteute e karika te tabo ae tamaroa ibukin karaoan te taoro. E karaaiaki butin taari nako nanon neei aika a ora, ae aranaki bwa boora n taoro, are e tiku iai ni buanerake iaan te riringa ae korakora. N tain buaneraken taari, e riki ueen te taoro ae e kiraati man maraurau i aon booran te taoro. Kiraati n taoro aikai a rangi ni itiaki ao iai aroia ae onoti, a maekeeke tauakiia. Taan marnotos a karaua n raumeaa te kiraati n taoro mai i aon te ran ni kabonganai bwaai ni mwakuri aika onoti, te mwakuri ae kainanoa te rabakau n rikoana. I Portugal, te taoro ae moan temte aio e aranaki bwa te “kuriim n taoro” ibukina bwa e kona ni karauaki n anaaki n ai aron te kuriim are e riki iaon te miriki. Te taoro ae maraurau aio e tangiraki ibukin itiakina ao kangkangina ae rianako, are e karikia bwa te rengarenga ae bobuaka n te kuuka.
N ai aroia marnotos ae aanga korakoraia ni kakoauaa bwa a rikoa te kabanea n tamaroa n taoro, ngaira naba, ngkai ana aomata ni berita te Uea, ti na aki toki ni karaoa te kabanea n tamaroa bwa ara tangira ao bannara ni katooto, a na konaa, ni kaota itiakin ara Tia Kamaiu, Iesu Kristo.
N te aonaaba rimoa, e raka riki bonganan te taoro nakon ae ti te rengarenga—bon te bwai ae bongana ni kateimatoan te bwai ao te kanikina n te itiaki ao te berita. A ataia aomata bwa te taoro e kakawaki ibukin kateimatoaan te amwarake ao kangkangian te amwarake. A ataa naba te kangaanga ae korakora ni buan taoron te taoro, ke katongan, ae buakaka ke n renganaki.
Ngkai e kona ni bua tamaroan te taoro, ti kona naba ni kabuaa aron bwain te tamnei ngkana ara onimaki iaon Iesu Kristo e aki tabeakinaki. E kona n aki bitaki taraara mai itinanikura, ma n akean te onimaki inanora, ti kabua te konabwai ni karika te kaokoro n te aonaaba ao ni kaotinakoa te tamaroa mai irouia naake irarikira.
Ngaia are, ti na kanga ni kaeta korakorara ao ara konabwai ni karika te kaokoro ao n riki bwa te okoro are e kainanoia te aonaaba n te bong aei? Ti na kanga ni kawakina rikira bwa reirei ao n reitinako bwa te kakairi ae tamaroa?
E okioki ana taeka ara burabeti ae tangiraki n au iango: “E tangiriira te Uea bwa ti na uaia ni mwakuri ao ni buokiira i marenara. Anne bukina ngkai E kanakomaira nako aon te aba inanon utuu ao e baireira inanon uoote ao titeiki. Anne bukina ngkai e tuangiira bwa ti na beku ao n ibuobuoki bon nakoira n tatabemanira. Anne bukina ngkai E tuangiira bwa ti na maeka inanon te aba ma tiaki kaain te aba.”
Ngkana e kaonaki maiura ma te kaantaninga ao te ibuobuoki, ti totokoa te ntaninganinga n te maiu n tamnei; ni iterana teuana, ngkana ti kuribwaiaki n te kaantaninga ae mai ieta, mwakuri ni ibuobuoki aika a nanonaki ibukiia tabeman, ao taai aika tabu ibukin iango ao te ururing rikaaki, ti a rikirake n taonaki nako ni bon oin baike ti karaoi ao ake ti tangiri, ni kabuai taorora. Bwainaorakian aio bon te reitinako ni iriira buakon te mwakuri ni ibuobuoki—ni ingainga ni karaoa te mwakur ae tamaroa ao ni katamaroai arora ao te botaki n aomata are ti maeka iai.
Tariu ao mwaneu aika tangiraki, ti bon rangi ni kakabwaiaaki n te tai aei ni kaaina Ana Ekaretia Iesu Kristo ao n reken te tai ni beku n Ana Ekaretia. A na kakaokoro baika ti rinanona, ma ti bane ni kona ni karaoa te bitaki.
Uringa te marnotos, taan mwakuriia te taoro; a kabonganai bwaai ni mwakuri aika bebete n rikoi buraoki aika kiraati aika tamaroa, taoro aika tamaroa! Ngira naba ti kona ni karaoi bwaai aika bebete, ma te kekeiaki ae teimatoa ni mwakuri aika a uarereke ao n uaana, ti kona ni kamatoaa rikira bwa reirei ao nano matoara nakon Iesu Kristo. Aikai aua kawai aika bebete ma n nano nanoia ni keiaki n riki bwa taoron te aba:
-
Karika Ana auti te Uea bwa boton ara nebonebo. Ngkai a rangi ni kaan tembora nakon are mai imwaina, moanibwaian te nanako n nebonebo n Ana auti te Uea e na buokiira ni kabotoa ara iango iaon bwaai aika a rangi ni bongana ao ni karika maiura n boboto iaon Kristo. Inanon tembora, ti kunea oin ara onimaki iaon Iesu Kristo ao tamnein ara nebonebo Nakoina.
-
Nanona raoi ara kekeiaki ni kakorakoraia tabeman n uaia ni maiuakina te euangkerio. Ti kona ni kakorakoraia ara utu rinanon teimatoan ao ni bon nanona raoi ara kekeiaki ni maiuakinan tuua n te euangkerio inanon maiura ao nakon mweengara.
-
Ni kukurei ni butimwaea te wewete ao ni beku inanon te Ekaretia. Te beku n ara bootaki n taromauri n ara tabo e karikiira bwa ti na boutoka temanna ao n uaia n rikirake. Ngkai te beku e na bae n aki rereke, e bon rangi ni kakukurei.
-
Ao kabaneana, kabonganaan bwaai n reitaki nakon are kaantaningaaki. N taai aikai, te reitaki ni bwaai n rabakau e kariaia bwa ti na reitaki n ae aki ririki mai imwaina. N ai aromi, I kabonganai bwaai ni mwakuri aikai n reitaki ma taari ao mwane n te Ekaretia ao ma au utu ao raoraou. Ngkana I reitaki ma ngaiia, I namakina ae I kaniaki nakoia; ti kona ni buokiira imarenara inanon taai ni kainano ngkana ti aki kona n reitaki n te itaramata. Bwaai ni mwakuri aikai bon kakabwaia, ma a kona naba ni uotira nako man are e nanonaki raoi ibukin te reitaki ao n tokina e kairiira nakon aroaro aika kabanetai ni waaki aika akea maneia. Te kekeiaki n riki bwa taoron te aba e mwaiti ae kaairaki iai nakon riki matakuakinan tamnei ni katoa tai iaon te tikuriin ae onoua te inti (15 cm) buburana.
Ngkai ti karika Ana auti te Uea bwa boton maiura, ni bon nanona raoi kakorakorakiia tabeman man maiuakinan te euangkerio, ni butimwaai wewete ni beku, ao ni kabonganai bwaai ni mwakuri aika a maiu man te iti ni bon bukina raoi, ti kona ni kamatoaa kakamwakurin maiura n tamnei. N aron te taoro n teina ae e itiaki iai korakorana ni kamwaita ao ni kateimatoa, ai bon aron naba ara onimaki iroun Iesu Kristo ae e nabeaki ao ni kamanoaki man nanomatoara ni beku n aron Kristo ao n tangira.
Ngkai ti teimatoa ni kabaeaki nakon te Uea, maiura a na kaota raoi Otana, ao ti na riki bwa taoron te aba. Inanon te kekeiaki aei, ti aki ti katamaroa maiura, ma ti kakorakora naba ara utu ao ara komiunite. Ti na kekeiaki ni kateimatoa te kabaeaki aei ma te Uea, n aki kanakoi taorora, ao n riki bwa taoro aika itiaki, aika a uarereke, are e tangiriira te Uea bwa ti na riki nako iai. N aran Iesu Kristo, amen.