N Raba mai Buki: Barongaan te Tabo n Taetae n te Tienta ni Maungatabu

Ngkana ti katamneia n ara iango aron te maungatabu ni kabuta, ti na bae n iangoa te tabo n taetae ao taan kairiiri aika a tekateka imoan taian bwaibu n aokan. Ma te tabo n taetae n te Tienta ni Maungatabu e bon kaokoro aron teina ni katoa ririki.

N te Tienta ni Maungatabu e kakaraoaki iai angiin bootaki aika a kakawaki are e kainnanoa aron te babaronga ae kakaokoro, ao e kabanea tao iraua te aoa ibukin katauraoan te tabo (ae kinaaki n arana ae te “rostrum”) ibukin te maungatabu ni kabuta. Te tiim ae kaaina 10 aomata a kabanea tao teniua te wiiki ni katauraoa te tabo n taetae, kawai n rinnako ao taabo n tataninga, ao katauraoan kateitei riki tabeua n te Tienta ni Maungatabu ibukiia iruwa bwa aonga n kukurei nanoia n tain te maungatabu ni kabuta.

Aikai tabeua koaua aika a kakaongora:

• 18 mwaitin mwakoron bwain te kateitei aika a rababa are a karaoa burooan aon te tabo n taetae, ma teuana n tatabeua n rawawataia ae 1.5–4 te tan.

• A tinebu bwaai akanne ao a kamwaingaki man uninga are a kanooaki nanoia n te eea man te kaombureetia ni katuruaki ma aontano, n te anga are e aonga ni bebete rabwatan bwaii ni kai kamwaingaki.

• Tao bon 500 mwakorokoro aika uarereke, n aron te kai iaon te oo ao te banoo, a karinaki naba.

• 80 te buuti rietatan (24 miita) te mataroa n uki bwa a aonga bwa kateitei akanne ni mwaing nakon nneia ae onoti.

• Kaain te tiim ni baronga te tabo a katauraoi naba kateitei ibukiia taan tararua te mano ma te mweeraoi, mitinare, ao n ibuobuoki—ma ae riaon 600 bootan te mwakuri ni kabane.

Joel Wright, te tiubwawaitia ibukin te tiim, e a tia n ibuobuoki ma 50 te maungatabu ni kabuta. E nanonna nakoia kaain ana tiim “aika a boto n te mwakuri n aki kinaaki ake a anga aia konabwai ae moan te kamiimii. E taku, “E karako mimitongin baireakin te kaintekateka ke te taibora ke barongaan te kateitei bwa e na tia ni kabane.” Ma ngke akea ngaiia, e taku, e na bon aki kona n ti te arona te maungatabu.

E taekinna te tia kaira aron te baronga ae Brandon Urry bwa e anaiia “aomata aika mwaiti aika a kakaokoro man tein rabakauia ao aroia aika a kakaokoro” ni kabobonga aia mwakuri—“ni katanoata ana tangira te Uea ao ana taeka are E riai n tibwaai ma aomata ni kabane.”

E taku Brandon bwa a kainnanoia aomata nako ma rabakuaia aika a kakaokoro bwa a na “bane n roko ibukin teuana te mwakuri.” Ibukina ngkai e boboto te mwakuri anne iaon Iesu Kristo, kaain te tiim ni baronga te tabo a namakina bwa E mena irarikiia ao a noora Ana kakai.

Robert Simpson, are e kaira aron te babaronga, e taku: “I … namakinna bwa e mena Tamnein te Uea inanon ara bootaki ao e mena ikanne bwa e na buokiira … ni katiaa [te mwakuri]. … N tabetai ti bon miimi bwa ti kanga ni kakoroi bukin bwaai ni kabane. Ma ti tataro ao ni bubuti ana ibuobuoki Tamara are i Karawa.”

Ao n aron are e reitia Joel: “Man te teimatoa, man te botumwaaka, n reitinako ni mwakuri korakora, [te tabo n taetae] e mena n nnena are e taneiai iai, n tauraoi nakon ingabongin te maungatabu ni kabuta.” E aranna Joel bwa e “kaunganano” ibukina bwa a roko kakai rinanon Iesu Kristo.