E tangiriia Natina Ni Kabane te Atua
E aki toki ni kaoira Iesu Kristo, ao E kabonganaira, Ana toro ngaira aika a mangori, ni buokia ni kaokia Natina Nakoina.
Tera ae tangiria Tamara are i Karawa mairoum? Ko ataia bwa ngke ko mena n te aonaaba n tamnei, e katauraoiko Tamara are i Karawa ibukin maium iaon te aba? N taetaena nakoia te roronrikirake, ao e taku Beretitenti Russell M. Nelson “E a tia Tamara are i Karawa ni kawakinia Tamnei aika bati man rine—tao … Ana kabanea ni korakora n tiim—ibukin te kabanea n tetere aei.” Ibukina bwa ti a tia ni kawakinaki ibukin boong aika kaitira, e rangi ni kakawaki iroura n reiakinaki n riki bwa ana reirei Iesu Kristo.
Te Uea ae Iesu Kristo bon te Tia Kawakin Tiibu ae Raoiroi, ao e kinaia Ana nanai n tibu, ao a kina aia tia kawakin tibu ibukina bwa “e weteia Ana tibu n araia nako.” E aki toki ni weweteira, ao E kabonganaira, Ana toro ngaira aika a mangori, ni buokia ni kaokia Natina Nakoina.
Tabeua te tai n nako, Ngai ma te beretitenti n te titeiki ti kawariia kaain te aro n teuana te kaawa ae maekanaki. Imwiin tiara ni kakawari, e a butiiai te beretitenti n te titeiki ngkana ti kona n nako ni kawara riki teuana te utu. E namakina ana kairi te tamnei bwa ti riai n nako ni marooro mangaiia.
Ti a karebwerebwe iaon te mataroa ao e a kaukia te aine. E taraai, ma e aki te roko ni kinaai bwa antai Ngai, ngaia e aki rang bati n taetae. I a kotea te beretitenti n te titeiki, are e a kamaura neienne n arana. N te tai ae waekoa ngke e ongo ao n nooria, e rangi ni kukurei. Inanon teiteira irarikin te mataroa, a uaia n inga ao n tang. Aei te anua n reitaki ae ti kateia inanon ara kakawari. Ti aki te roko n ataia ae te aine aei e a tia n rinanon te chemotherapy ibukin te kaentia, n te bong are mai imwaaina. E rangi ni mamaara ao n aki konamaki n tararua natina te mwaane ae e a ikawai. Ngaia are I a buoka te beretitenti n te titeiki ni karina onean natina te mwaane, ao ni katoka iaon ana kaintekateka are e bubuti. Ti kamwarakea ni kanaia are e nikiraki mai imwaaina iroun temanna te aine ae kaain aia uoote. ao ti ibuobuoki ni karaoi tabeia ake tabeua. Imwaain ae ti kitana mweengaia, ti a anganiia te kakabwaia.
Te bwai are e mena n au iango n ara tai ni kakawari aei bon kamatoaakina bwa e rangi ni korakora ana tangira Iesu Kristo Ibukiia. E oota ao n ataa te maraki n te kangaanga are a mena inanona. Kanga e mabu ara kakawari aei mai moana ni karokoa banena. Inanon te tai aei akea ara kabwarabwara ae ti anga ke tao e na iai ara kibu ae ti anga, ma e kakabwaiaira te Uea n Tamneina ae moan te korakora.
Teuana bukin karokoam iroun Tamara are i Karawa ikai iaon te aba n te tai aei bwa ko aonga n ataa raoi bwaninin am konabwai. Tataekina Au Euangkerio e reireiniira bwa ngkai ngaira ana reirei Kristo, ti riai n aki kakabotaua arora ma tabeman. Am konabwai n tamnei a kakawaki, a onoti, ao bon am bwai, ao e tangiria Tamara are i Karawa bwa e na buokiko ni karikirakea. E na iai temanna n taai nako ae ko na kona ni buokia n namakina ana tangira Tamara are i Karawa. E tabu am konabwai bwa bon mai ieta. Ngkai e koaua bwa e rangi ni kakawaki bwa ko na katauraoiko bwa ko aonga n tokanikai n te aonaaba ae aki kan kokonaaki aona, teuana am mition ae kakawaki i nanon maium ko na riki bwa ana reirei Kristo ao n iriira ana kairiiri te Tamnei. Ngkana ko karaoa aei, E na kakabwaia maium, E na kakabwaia am utu n te tai aei ke am utu aia a na roko, ao E na kakabwaiaia natina ake ko kaitibo mangaiia.
Ti maeka inanon taai aika a mwaiti iai Tibwanga. E ngae ngke ti kaitara ma kangaanga aika a mwaiti, I ataia bwa a riki bwa ti aonga ni kona ni buokiia tabeman n namakina ana tangira Tamara are i Karawa. E taekinna Beretitenti Nelson: “Ni boong aika i mwaira, ti na noora korakoran mwaakan te tia Kamaiu ae e tuai man nonoraki n te aonaaba.” Iai tibwangara n tararuaia aomata ake a kainnanoa baira n ibuobuoki, te inga, te namakin ni karaunano, ke bon tii ibukira bwa ti na mena irarikiia n te aro ae rau. Ngkana ti kona ni buokiia ni kabebetea rawawataia, e ngae ngkana tii ibukin te tai aei, ti na kona n noora korakoran mwaakan ana mwakuri te Tia Kamaiu aika e na kaoti inanon maiuia.
Ngkai ti riki bwa a na reirei Iesu Kristo, a kona Aika Itiaki ni karaoi bitaki aika a raraoi n te aonaaba. Ti kona n anga te namakin ae kakukurei are e oti imoara—te kukurei are ti tibwaia man ara taetae n tangira ao ara mwakuri n akoi. Ti na riki bwa raao aika a raraoi nakoia kaain rarikira, taan kammwakuri aika a raraoi, taan mwakuri aika a raraoi. Ti na nanomatoa n riki bwa Kiritian aika a tamaroa n taai nako.
E a tia te Uea ni kaoka Ana euangkerio ma otenanti aika a kainnanoaki bwa aonga natin Tamara are i Karawa ni karekei berita ni kabane ake e kabaeira iai ma Ngaia. Man buokakiia mwaanera ao tarira inanon kataakia ni katoa tai, ti na uringnga naba ni buokiia ni karaoi ao ni kawakin berita aika tabu aikai ma Tamaia are i Karawa ao bwa are E na kabooa mwiina nakoia ma kakabwaia aika a kakukurei ibukin te maiu aei ao n aki toki. A bon tii kona n reke kakabwaia aikai rinanon Kaokan ana euangkerio Iesu Kristo ao kiing n Ana nakoanibonga.
N taekana teuana, ti kona ni buokiia tabeman n tiku ni kawain te berita. A tia tabeman n tionako man te kawai man te tai teuana nakon teuana, ao ngaia are ti riai n uringa anne ibukin Tamara are i Karawa, n taai nako ti karekea te konaa ni manga okiria. E ngae ngke tao e aki rangi ni kororaoi aron kawaira, e kauringa n taai nako te Tia Kamaiu bwa “Ngkana ti aki toki n [raira nanora] ma n [ukoukora] kabwaraan ara bure, ma nanora ni koaua, [a bon] kabwaraaki ara bure.”
Teuana mai buakon ana kawai teuare e buakaka n te bong aei e karaoa ae ti na iango ao ni kakoaua bwa akea te anga ni bitaki ke bon akea ara kaantaninga. Te iango ae urubwai aei e kabwarai nanoia temwaangina ao a rawa ni kataia. Ao boni inanon te tai aei ngke ara tangira, ara taeka ni kaunganano ao ni boutoka, ara tai, ao ara ibuobuoki e kona n angan temanna te kaantaninga ni kataia teuana riki te tai.
Tao ko bae n iango ,“ENG, ma antai ae buokai?” N nakora ao ni kakabwaian maiuia tarira ma mwaanera, ti na kona ni karekei taian koaua ake a na kaona maiura ma te onimaki iroun te Uea Iesu Kristo. Koaua aikai a na kona ni manga kabooui nanora ni kataia riki i bon ibukira. E na kabooui nanora te Tamnei ae Raoiroi ao ni buokiira ni manga kabooui ara koaua n teimatoa n oin ara kangaanga ao kataakira ae onoti. Ngkana ti ukoria ni kan kakabwaiai maiuia temwaangina, te Uea e na urakina riki te nanoanga ae moan te bati nako aora; E kakorakoraira ao ni buokiira inanon maiura.
Taiaoka uringnga bwa te Uea Iesu Kristo bon am Tia Kamaiu ao e ataiko. E ataia bwa tera ae ko riai ni karekea ibukin kakoroan bukin weteam ao n katikui taekan bwaai ma ko na tii buokiia natin te Atua. Iai mwaakana ni kakabwaiako ni bwaai ni kabane, ngkana ko Onimakinna ao tai nanououa.
Tariu ao mwaaneu aika a tangiraki, n te bong are e namakina iai ana kairi te tamnei te tia kairiiri n te nakoanibonga ibukira ni kawaran te tina ma natina te mwaane are akea taekana iaona ara akenta, I taekinna bwa e ataia te Atua ae a kainnanoira. Ao n tokin te tai, boni Ngai are I buokaki. N te bong aei, I karekea teuana te reirei ae moan te korakora ibukin ana tangira te Tia Kamaiu ibukira.
I kakoaua bwa Iesu Kristo bon te Tia Kamaiu ibukin te aonaaba, bwa E maiu, bwa E maiu ngkoa ao ni mate ibukiim ao ibukiu, ao E a tia ni manga uti ibukim ao ibukiu bwa ti aonga ni uaiakina reken te ikotaki n te tiretio ae onrake n te kukurei ma naake a mena ni iteran te rabuna are te iterana. I ataia bwa E ataiko ao ngai n te aro ae kororaoi. E atai taai ake ti mena iai inanon te kangaanga, ao iai Mwaakana ni buokiira inanon taai akanne ike ti kai rootaki iai. I ataia bwa te Uea Iesu Kristo ao Tamara are i Karawa a kaoti nakon Iotebwa Timiti bwa e na kaoka te euangkerio ni boong aikai. I ataia bwa ara burabeti ae tangiraki, Beretitenti Russell M. Nelson, bon ana burabeti te Uea ao I kakoaua n aei n aran Iesu Kristo, amen.