Boong Aika Aki Kona ni Mwanuokinaki
Taai aika a na roko a na karekea aia tai kaain te Ekaretia n taabo ni kabane ma mwaitin taian tai n tibwaan taian rongorongo aika a raraoi n ana euangkerio Iesu Kristo.
Kabwarabwaraana
Tariu ao mwaneu, rongorongon Ana Ekaretia Iesu Kristo ibukiia aika Itiaki ni Boong aika Kaitira n te tai aei e kaonaki ma taneiai mai ieta ake a kaota aron te Uea ni kaira Ana Ekaretia. Iai te tebwi n ririki n rongorongon te Ekaretia, ma, e onoti riki nakon ake tabeua—ae man 1820 nakon 1830. E moanaki man te bwai are rinanona te Burabeti Iotebwa Timiti n te Buakonikai ae Tabu n te tiburing 1820, ngke e noora te Atua te Tama ao Natina, Iesu Kristo, ao n reitinako ni karokoa Eberi 6, 1830, are ea rawata kanoan ririki akanne aika akea kabotauaia.
Tina karauii n tarai bwaai ake a riki aikai! Ana reitaki te kairake ni burabeti aei ma te anera Moronaai, e rairi bwatua koora, ao e boretia Ana Boki Moomon! Bon rinanona ngaia are a kaokaki nakoina te Aaron ao te Nakoanibonga ae te Merekitereka, ao imwiina e barongaa katean te Ekaretia! E kabwarabwara raoi te tai anne Oliver Cowdery: “Aikai boong aika aki kona ni mwanuokinaki.” Bwaai aika kamimi aikai a reitinako ni karokoa te bong aei.
I ninikoria n taekinna bwa n te ririki aei ti a rinanon te bwi n ririki ae kona ni kakoauaki bwa te tai teuana ae roko i mwiin moan katean bwaai ae kaaninga uoua te tienture n nako.
Ara Bwi n Ririki
N na kabwarabwaraa. I marenan te ririki aei 2024, ao 2034, ti na kona n noori bwaai aika kakawaki ake a riki man tamaroan te beku, ni katiteuanaki ma membwa ao raoraora nako, ao n tibwauaa Ana Ekaretia Iesu Kristo ibukiia Aika Itiaki ni Boong aika Kaitira nakoia aomata aika mwaiti ni kabotauaki ma ake mai i mwaina.
Tia tibwa noora kakoauaan mwaakan n koaua te taiae kakawaki are ti bukamarua iai ana 100 n ririki Beretitenti Russell M Nelson ma tebwi te Mirion aomata.
Te ribooti n ana koronririki Beretitenti Nelson, Newsweek e korea atuun te rongorongo ae kangai, “Te Kabanea n Ikawai n Tia Kairiiri n te Ekaretia n te Aonaaba e a Koro 100.” I mwiina ao a manga karinanii araia 10 taan kairiiri n te aonaaba aika a kabanea ni ikawai—man aran Beretitenti Nelson n te moan n raonaki ma Pope Francis ao DalaiLama.
Te rongorongo man te New York Times e kaota mwaitin kareke rongorongo man te aonaaba: “N te rinerine ibukin te nakoa ni beretitenti n te [United State] are kaota te roro ao te kairiiri, Mr. Nelson are e rinanon te mwaneka aei e kaotia bwa, n ana ekaretia, te koronririki ae teniua warena e aki rang kaota te te kainano. E teimatoa kinaakina ibuakoia raona n ana ekaretia, are aki tii taraaaia beretitenti bwa aia tia babaire ma aia ‘burabeti, aia tia mamata, ao te tia kaotioti.’”
Kakatongara ngaira kai e konaa ana rekenibong Beretitenti Nelson bwa te anga are tina konaa n tibwauaia ma taan ongora nte aonnaba ana burabeti te Atua, te bukamaru ae e aki kona ni mwanuokinaki.
Ni moan te tiburing, te kateitei ae tia te katamaroa iaona n te Tembora Tikuea—are kaotaki iai buraeki man aaba nako ake e kinaaki iai te Ekaretia—e kaukaki. Te tabo n rin n te kateitei anne e mwaakenaki n te kanuringa ma taeka n burabeti aikai: “Ao ni boong aika kaitira ao e na kateimatoaki maungani maneaban Iehova i aon taubukini maunga, ao e na karietataaki riki nakon tabuki; ao a na bane n ranga botanaomata nako nanona.”
Ma te koaua, kauring aika a na riki i nanon te 10 n ririki ae na roko e kaota kororaoin ana taetae ni burabeti Itaia ae kakoroaki nanona.
Karaua iangoa mwaitin tembora ake ana kaukaki ao ni katabuaki i nanon te tebwiina n ririki ae i mwaaira aei, e na nakon 164 tembora ao n reitinako riki. Iangoia te tebwi ni mirion ngkamii ma raraomii n nakonako rinanon ana auti te Uea. Te tabo ae na kanikinaeaki iai waaki aikai bon manga katabuan te Tembora i Salt Lake ma waaki ake a irekereke ma te mwakuri ae tabu aei. Boong aikai ake a na bon aki kona ni mwanuokinaki.
N te ririki 2030, ena uoti tibwanga n te aonnaba ae bwanin ni kauringa koron te kabwii n ririki n katean te Ekaretia. E ngae ngkai e rang moantaai ngkai taekinan aron te Ekaretia n karokoana nte mwaneka anne. E na bon anganiira te konaa n kaoia ara utu, raraora, raora n mwakuri, ao irua aika a karineaki bwa ana “nakomai ao n nooria“ ao n ataa korakoran te Ekaretia n maeuia kaain te Ekaretia.
N 2034, ngaa aomata aika kakannato, iruwa, ao taan takakaro ni kabuta te aonaaba a na kaonrakea kaawan Salt Lake City, te tabo ni mataku ibukin te Winter Olympic Games. Bon te katiteuanaaki n te aonaaba ae na akea n ai arona are e na rabwatanaki irouia ake a ira te Olympic Games. Mataia kain aonaaba a na taraa te Ekaretia ao kaaina, ni karaoi mwakuri aika mwaiti n anganano, ni beku, ao n tibwauai rongorongo aika raraoi rinanon waaki n tangira—te tai ae e na aki kona ni mwanuokinaki.
Taai aika a na roko akanne a na katauraoia kaain te Ekaretia n taabo nako ni karekea aia tai n tibwauai rongorongon ana euangkerio Iesu Kristo aika a raraoi rinanon te taeka ao te mwakuri, te tebwi n ririki ae naaki kona ni mwanuokinaki.
Rongorongo aika Raraoi
N tain te bowi tabeua te wiiki imwain ana bong ni bung, Beretitenti Nelson e tibwa bukina ae kakawaki irouna te kibuntaeka “rongorongo aika raraoi.” E oti ni moana, e koreia, bwa te kibuntaeka anne e tibwaua te kimwarerei ao kukurei. Ma “rongorongo aika raraoi” e kanakoa ae bati riki nakon anne. E kabwarabwara bwa e reke te kibuntaeka aei man te taeka n Erene euangelion, are nanona “rongorongo aika raraoi” ke te “euangkerio.” Te kukurei ao te kimwareirei n te maiu aei ao are imwiina a irekereke n tainako ma ana euangkerio Iesu Kristo. Ngaia ae te kibuntaeka “rongorongo aika raraoi” e karekea nanona aika uoua aikai n te aro ae kakukurei.
“Ao a riki Aomata [ao aine], bwa ana karekea te kimwareirei.” E a tia Tamara are i Karawa ni katauraoa te babaire ni kakukurei are e karekea te kimwareirei rinanon Ana kakabwaia. A raonaki aikai ma te maeka ma Ngaia bwa utu aika akea tokiia. Ana Mwakuri ni Kamaiu Iesu Kristo e kakawaki nakon ana babaire te Atua ni kamaiuira. Karekean te maiu are akea tokina, ti riai n roko nakon Kristo. Ni karaoan aio “ao ni buokiia tabeman bwa a na karaoia naba, ti buoka ana mwakuri te Atua n te kamaiuaki ao te kerietataaki.”
Te rongorongo ae raoiroi aei n ana euangkerio Iesu Kristo bon te kabanea ni kakawaki n rongorongo n te aonaaba. Ao anne are a rin iai kairake ao kairake n ikawai n te Ekaretia.
Ibukin Kakorakoraia Kairake
Ngkai, n te tai ae nang roko aei e na kaonaki ma boong aika aki kona ni mwanuokinaki ibukiia kaain te Ekaretia ni kabane, e kona ni koaua aio ibukimi kaain te roro ae rikirake. Kam mena iaon te aba ngkai bukina bwa kam rineaki bwa kam na mena ikai ngkai. Iai korakorami ao ami kona n riki bwa ana reirei Kristo ni kawai aika akea kabotauaia.
E reirei Beretitenti George Q. Cannon: “E a kaman katauraoi tamnei te Atua ibukin boong aikai ake iai irouia te ninikoria ao te nano ni kaitaraa te aonaaba, ao ni kabane mwaakan teuare e buakaka, [ao ake a] … ana katea Ana Tion Atuara n aki mamaku ni baike a na riki.”
N tokin anne, ao I tangiria n taetae nakoimi kaain te roro ae rikirake, ni kaoi ngkami ni iangoa aron kakukurein bwi n ririki are imwiina, ae aki kona ni mwanuokinaki, e kona n riki bon ibukimi. I anga naba tabeua taeka n reirei ao ni kaunganano are e na kona ni kakorakorako n te ririki ae imwaira aei.
N aroia angiia maibuakomi, iai au smartphone are, n taai tabetai n akea te katauraoi, a kaoti ni kabane tamnei aika kaota te bwai ae I karaoia n te bong anne. E rang kamimi naba noorakin mwaitin bwaai aika a tia ni bitaki ibukiu ao au utu inanon ti tabeua te ririki.
Iangoi tamnein am tareboon are e na kawakinaki iai 10 te ririki ma ngkai! Ko kona n noriko ngke e bane am reirei man te kauarinan n reirei ke te Kuura ae rietata, karekean am entaumente, te nakon n te mition, te iein, ao karekean am moan nati. E na riki aio ibukim, bwa te tai anne ae na aki kona ni mwanuokinaki. Ma e na raka riki ngkana ko keiaki mwaaka n riki bwa te ota nakon te aonaaba bwa a na kanga rongorongon ana euangkerio Iesu Kristo aika raraoi ni kanakoraoa tiaki ti maium ma maiuiia naba kaain am utu, raoraom, ao taan iririiko iaon bwaai n reitaki n te intanete.
Ko na bae ni kakaea aron karaon te bwai aei.
A tia ana burabeti te Atua n reireiniira ae e karaoaki aei rinanon kawai aika bebete aika aua mwaitiia, ao tina ataia bwa tabera aika rineaki mairoun te Atua: te moan, maiuakinan ana euangkerio Iesu Kristo; te kauoua, tabeakiniia kainnano; te kateniua, kaoakiia ni kabane bwa ana karekea te euangkerio; ao te kaua, katiteuanakiia utu ibukin te maiu ae akea tokina. Kamimiina riki, a kona n tatabeua nako ni karaoaki ni kawai aika a bon ririki ao n aron aei.
Taabe Aika Bebete Ake a Rineaki Mairoun te Atua
I berita nakoimi bwa e na bon aki mwanuoakinaki te tebwii n ririki aei iroum ngkana ko butimwaai aua mwioko ake a rineaki mairoun te Atua. Ti a iangoia bwa tera te bwai ae na kona n riki mai iai.
Te moan, maiuakina ana euangkerio Iesu Kristo. Kamatebwai aia taeka burabeti, ao reiakiniko n tangira Tamam are i Karawa. Boota nanom Nakoina ao kekeiaki n toua Kawaina. Ko na tabekaki rake man te “kakoaua n te berita ae tabu”are e a tia ni kabwarabwaraa Unimwaane Ulisses. E roko te onimaki aei man karaoan berita aika tabu n iriira Iesu Kristo, n atakina ae e na kakorakorako ao ni boutokaiko te Tia Kamaiu.
Kariaia raoraom bwa a na noora te kimwareirei ae ko namakinna man maiuakinan te euangkerio, ao ko na riki bwa te kabanea n tamaroa n rongorongon te euangkerio ae a tuai man kareerekea.
Te kauoua, aanga baim n nanoanga nakoia ake a kainano. Kaanga e karako inanon te roro aei ae rangi ni kabanea ana tai ibukiia ake akea aroia. Ngkana iai kaanganga ake a riki man te otabwanin ao ana ienikuri n roko membwa man te Ekaretia ni karaoi mwakuri ni kaitiaki ao ni kabebeteiia ake a taonaki n te rawawata, ma angiia ake ana bwainiia ni kunikai aika mwakoro iai “Baai ni Ibuobuoki” te roro ae tenaan tebwii tabun ma uabwii tabun. Bon kateira ae tina “katoka rawawatan temanna iaora” ao n “karau nanoia ake a kainnanoa te rau.” Man karaoan aei ao ti “kakoroa nanon ana tua Kristo.”
Temanna ataein te moanrinan, ae Evan, e baireia bwa e na kabanea ana motirawa n te reirei n tain te tiamwa ni bobotii bwaai n aron te peanut butter ao jelly sanwitches ao ni bwaintangiraia nakon ana tabo ni kawakin amwarake n aia kaawa. E katea ana karikirake aei man te JustServe website. A kateirakeaki nikabane ataein ana kiraati te ataei ae Evan bwa ana rikoi 700 turumwa n tierii! Kataia bwa e na kinaaki irouia ake ko karaoi mwakuri n ibuobuoki nakoia bwa e boboto am mwakuri n ibuobuoki n am Tangira Ibukin te Atua ao nanom n tangiriia aomata n ai aron tangiram bon iroum.
Te kateniua, kaoia ni kabane bwa a na karekea te euangkerio. Iai 36 taian mition n te aonaaba n te ririki aei ake a kaukaki ibukin karekean nneia koraki ake a kan karaoa aia mwakuri ni mitinare. Inanon te roro are angiina ara roro n rikirake aikoa rangi n iriiri botakin te aro, ao te rongorongo ae kakukurei aei e kaota aron te rianako are oti man ara koaua. Ngkana ko karaoa am mwakuri ni mitinare ae bwanin ngke e aki, taiaoka ma ataa am konabwai n tangiriia, n tibwaia ao ni kaoiia bwa ana reiakina ana euangkerio Iesu Kristo.
Te Kaua, katiteuanaia utu ibukin akea tokina. Inanon rokou n tembora ni katobibiia te aonaaba, ao I mimi irouiia te roro n rikirake ngkai a roroko nakon ruu ni bwabetito ao mwaitia kairake n ikawai n tabe bwa taan mwakurii otenanti. N bon te tai ae nako e raka iaon 600 kairake mai Scotland ao Ireland ake a mwananga nakon te Preston England Tembora, ni karaoi otenanti aika e raka iaon 4,000, ae angiia bon aia bakatibu ake a tia ni mate! I kaumakii ngkami bwa kam na katabei ngkami ma rongorongon rikimi n ami utu, kabanea ami tai n te tembora, ao ni katauraoi ngkami n riki bwa te aeka n mwaane ke n aine ae tauraoi ni mare n te tembora. Karikirakea kateim ni maium ngkai ni karika te tembora bwa mwakoron maium.
Kabaneana
Tariu ao mwaneu aika kam tangiraki, kairake aika kam tangiraki, e na bae n iai kangaanga ibukira n tatabemaniira nako ni boong aika imwaira. E ngae n anne, ngkai ti tabe n rinnako inanon ririki aika aki ataaki kanoaia, ao tera ngke ti kona ni kateimatoa arora n reitaki rinanon waaki ni kakukurei inanon maiura, arora n tabeaianga ibukiia raora, te bubutimwaai, ao te katiteuanaaki. Ngkana ti karaoa aei, e na kakabwaiaira te Uea rinanon taneiai aika a na aki kona ni mwanuokinaki.
I kaotia ma te koaua bwa koraki ake a teimatoa n ukora te Uea ma nanoia ni koaua, ao nakoia koraki ake a uouota aran te Tia Kamaiu n riaia ao te Tamnei ae Raoiroi i nanoia, ao nakoia ake a waaki i nanon te mwakuri ae tamaroa aei, kam na kunea ao n rinanon karekean kakabwaia mai karawa aika a bati ao ni karekea te kakoaua bwa e ongo iroumi te Atua, e kinaingkami, ao e tangiringkami. Ko na mena inanon boong aika a na aki kona ni mwanuokinaki. N aran Iesu Kristo, amen.