“Nooria Ngai te Oota Are Kam Na Taua I Eta”
Ti tabeka rake ootan te Uea ngkana ti baimatoaa ara berita aika tabu ao ngkana ti boutoka ara burabeti ae maiu.
N taian kakoaua aika a mwaiti n te maungatabu aei, I raonna ma au kakoaua n abotoro bwa Iesu Kristo bon Natin te Atua, ara Uea ao te Tia Kamaiu, te Tia Kabooi Maiuia natin te Tama ni kabane. Man Ana Mwakuri ni Kamaiu, e kona Iesu Kristo ni karaoia ibukira, ngkana ti tau, n oki nako matan Tamara are i Karawa ao ni maeka ma ara uti n akea tokina.
E aki tiku te Tia Kamaiu man mwanangara n te maiu ae mamate. Inanon uoua te bong ti a tia n ongo Irouna n taetae rinanoia Ana taan kairiiri aika a rineaki bwa ti aonga ni kaniiaki riki Nakoina. E kaokiokaki, bwa man Ana tangira ao nanoanga ae e itiaki, E kamatoaira ngkai ti kaitaraaki ma kangaanga n te maiu. E kabwarabwara Nibwaai: “Bon Atuau riki te tia buokai; e a tia ni kairirai i nanon au tai ni karawawataki. … E a tia ni kaonai n ana tangira,“
Te tangira anne bon te kakoaua ngkana ti kamatoaira i marenara inanon Ana mwakuri.
Ti kamatoa ara burabeti ae maiu n te maungatabu ni kabuta, ao te Moan Beretitentii, te Kooram n Abotoro n te Tengaun ma Uoman, Mataniwii ni Kabuta, ao Aobitia n te Ekaretia. Ni kamatoaia nanona tabeka rake te aomata temanna, n ongo irouia, ni kakaonimaki nakon onimakinara irouia, ni karaoi baike a taekin. A taetae man kairaia iroun te Uea; a atai bwaai aika a riki n taai aikai, kerikakin te raoiroi irouia te botanaomata, ao keraken ana mwakuri teuare e kakaitara ni katoka ana babaire te Tama. N tabekan ieta baira, ti motinanoaara boutoka, tiaki ti inanon te tai anne ma inanon nako maiura.
Te kamatoa e raona tabekaia ieta ara beretitenti n te titeiki ao bitiobi, taan kairiiri n te kooram ao ni bootaki nako, tia reirei, ao bon tarekita n te kaembwa n ara uoote ao titeiki. Ao ni mweengara, ti tabekiia rake buura aine, ao bumwaane, ataei, kaaro, naan nako ara utu, ao kaain rarikira. Ngkana ti tabekiira rake imarenara ti bon kangai, “I mena ikai irarikim, tiaki n ti tabeka rake baim ao angam ngkana a ‘tine’ ma Nna riki bwa te tia karaunano ao te tia kakorakora irarikim.”
Te iango ae tabekia ieta e boboto inanon booki aika tabu. Irarikin Nein Moomon, membwa n te Ekaretia ake a tibwa bwabetitoaki a motinanoia n “tauraoi ni katoka i aomi rawawataia raomi, bwa aonga ni beebete; … [ni] karau nanoia ake a kainnanoa karauan nanoia, ao n tei bwa taan kakoaua ibukin te Atua n taainako ao ni bwaai nako, n taabo nako.”
E taku Iesu nakoia Nibwaite: “Tauii i eta ami taura bwa e na oota nakon te aonaba. Nooria Ngai te oota are kam na taua i eta.” Ti tabeka rake ootan te Uea ngkana ti baimatoaa ara berita aika tabu ao ngkana ti boutoka ara burabeti ae maiu ngkai e taekina ana taeka te Atua.
E taku Beretitenti Russell M. Nelson, ngke e beku n te Kooram n Abotoro n te Tengaun ma Uoman, “Arora ni kamatoaia burabeti bon te motinano ibon iroura bwa ti na karaoa ara kabanea ni konaa ni kamatoai aia taetae ni burabeti aika moanibwai.”
N tabeka rake te burabeti bon te mwakuri ae tabu. Ti na aki tekateka n akea te bwai ae ti karaoia ma ti na kakammwakuri ni boutokaia, irii ana reirei, reireiia ana taeka, ao n tataro ibukina.
Te uea are Beniamina, n Ana Boki Moomon, e taku nakoia aomata, “Ma bon ti te arona arou ma ngkami, ae N na kabaeaki ni mamaaran te rabwata ma te kaantaninga; bwa I a tia n rineaki … ni kariaiakaki mairoun te Uea …ao I a tia ni kaawakinaki ma ni kateimatoaki ni mwaakana ae akea kabotauana, bwa N na beku ibukimi n au kona, au kaantaninga ma korakorau ni kabane ake e a tia n anganai te Uea.”
Ai aron naba anne, n ana ririki ae 100, e a tia ni kawakinaki ao ni kateimatoaki Beretitenti Nelson iroun te Uea. Beretitenti Harold B. Lee, ngke ngaia ngkoa kaain te Moan Beretitentii, e taekina te katooto iroun Mote ngke e tei i aon tabukin te tabuki ae Rebirim. “Bain te [Beretitenti n te Ekaretia] a na rikirake ni kai,” e taku. “A na bae ni kona ni bwaka n tabetai ibukin rawawatan mwiokoana; ma ngkai ti tabekarake baina, ao ngkai ti kairiiri iaan ana kairiiri, i rarikina, e na aki tokanikai mataroan moone ni kaitarako ao ni kaitara Iteraera. Maurim ma ngaira e boboto iaon ae ti iriira ke ti aki temanna are e a tia te Uea ni katikua bwa e na tararuaa ana ekaretia. E ataia bwa antai ae tangiria bwa e na tararua iaon te Ekaretia, ao e na aki kairua are E karaoia.”
E karekei buokana Beretitenti Nelson man ririki ake e beku iai ibukin te Uea. Mwataina, baike e rinanona aika a bati, wanawanana, ao reitinakon karekean te kaotioti a bon rangi ni bootau ni kaineti nakon ara bong. E taku: “Ana Ekaretia Iesu Kristo Ibukiia Aika Itiaki ni Boong aika Kaitira e katauraoa te aonaaba ibukin te bong ‘ba a na buta aonaba n atakin Iehova’ (Itaia 11:9). … E kakorakoraaki te mwakuri aei man te katanoata mai ieta are e karaoaki 200 te ririki n nako. Iai inanona taeka aika ti itiua: ‘Aio Natiu ae Tangiraki. Ongo Irouna!” [taraa Iotebwa Timiti—Rongorongo 1:17.”
E a tia naba n taekinna Beretitenti Nelson: “Bon akea tetaina n rongorongon te aonaaba ngke ataakin ara Tia Kamaiu e a rangi ni kakawaki nakon temanna ao ni kaineti nakon tamneia aomata nako. Iangoa aron baitiin te urubwai n te kakaiangatoa ni kabutaa te aonaaba—ao naake ti bon kinaia inanon maiura—a na kona ni buokaki ngkana ti bane n rineia n iriira Iesu Kristo ao n ongo Ana reirei.”
Tariu ao mwaneu, ti riai ni kamwaiti riki arora n tabekirakeia aomata ao ni kauarerekea te ngurengure, kabatiaa boutokaa ana taeka te Uea, ana kawai, ao Ana burabeti, are e a tia ni kangai: “Teuana mai ibuakon ara kangaanga n taai aikai bon atakin te kaokoro imarenan Ana koaua te Atua ao ana kamwane Tatan. Aei bukina ngkai e kauringiira te Uea bwa ti na ‘tataro n taai nako, … bwa [ti] aonga n tokanikai i aon Tatan, ao … n aki reke ni baia ana toro Tatan ake a boutoka [te tia kakaitara] n ana mwakuri [Reirei ao Berita aika Tabu 10:5; kaairaki katuruturuana].”
N Eberi ae nako, Ngai ao Titita Rasband ti kakabwaiaaki n ira ara burabeti ae tangiraki ma Titita Nelson ibukin manga katabuan te Manti Utah Tembora.
E kakubanakoia aomata Beretitenti Nelson ngke e rin inanon te ruu. Bon ti ngaira tabeman ae ti ataia bwa e na roko. Ngke ti mena irarikina, I namakinna n te tai ae waekoa te oota ao nakoana ni burabeti are iaona. Taraan moaia aomata ae a kukurei n norakin te burabeti e na tiku irou n aki toki.
Inanon te tataro ni manga katabuan te tembora, e bubuti Beretitenti Nelson nakon te Uea bwa Ana auti ae tabu e na tabekiia rake naake a rin n te tembora “bwa a na karekei kakabwaia aika tabu ao n teimatoa n kororaoi ao n kakaonimaki nakon aia berita … bwa e na riki bwa te auti n rau, te auti ni karaunano, ao te auti ibukin karekean oin aia kaotioti naake a rin inanona ma te kororaoi.”
Ti bane ni kainnanoa tabekakira ma te rau iroun te Uea, ma te mwengaraoi i, ao ae moamoa riki karekean oin ara kaotioti ni kaitara te maaku, te roo, ao te itabaraaraa ae roota te aonaaba.
Imwain te bootaki n taromauri, ti tei i tinaniku iaan taai ma Beretitenti ao Titita Nelson n taraa tamaroan teina. Ana bakatibu Beretitenti Nelson iai irekerekeia ae nano ma te tabo aei. Ana kawaniua n atuu irouia tibutoruna a maeka n te mwarua ae katobibia te tembora, aiaroia naba au bakatibu. Tibutoru ae Andrew Anderson e beku ibuakoia taan kateitei irouia bwaeoniia rimoa ake a mwakuri11 te ririki ni kabobonga te Manti Tembora, te kateniua n te Rocky Mountains.
Ngke ti tei ma Beretitenti Nelson, e reke ara tai n tabeka rake ao ni boutoka ana burabeti te Atua ni bukamaruan manga katabuan ana auti ae tabu te Uea. Bon te bong ae Na aki kona ni mwaninga taekana.
“Ti katei tembora ni karinea te Uea,” e taku Beretitenti Nelson n te bong ae tabu anne. “A kateaki ibukin te nebonebo ao tiaki ibukin tarakin tamaroana. Ti karaoi berita aika tabu aika kakawaki ae akea tokiia inanon oon te tabo ae tabu aio. Ti a ikoikota Iteraera.
Beretitenti Nelson ao burabeti ake mai mwaina a mwanokai tembora aika tabu inanon baia. N te bong aei, ni katobibia te aonaaba, iai 350 ana auti te Uea aika tabu aika a mwakuri, a katanoataki, ke aika a kateaki. Ngkai te burabeti, mai imwin 2018, e a tia ni katanoatai Beretitenti Nelson 168 tembora.
“N ara tai,” e taku, “te reitaki ni kabane, ae bwanin, ao ni kororaoi ni boong aikai, kiing, ao mwaaka a na reitaki ni kabane (taraa Reirei ao Berita Aika Tabu 128:18). Ibukin kantaninga aika tabu aikai, tembora aika tabu a kaona ngkai te aonaaba. I katuruturua riki bwa katean tembora aikai e na aki bita maium, ma karaoan am mwakuri inanon te tembora ni koauana e na kona ni bita maium.”
“Te Tia Kamaiu ao Ana reirei aika tabu bon boton raoi te tembora,” e taku te Beretitenti. “Bwaai ni kabane ake a reiakinaki n te tembora, rinanon kaetieti ao rinanon te Tamnei, e karikirakea ara atatai ibukin Iesu Kristo. Ana otenanti aika a rang kakawaki a kabaeira Nakoina rinanon berita aika tabu n te nakoanibonga. Ngkanne, ngkai ti kawakin ara berita aika tabu, E anganiira te mwaka n Ana kamaiu, ao mwaakana ni kakorakora.
“Ni kabane naake a nebonebo n te tembora,” e taekinna Beretitenti Nelson, “a na karekea mwaakan te Atua ao anera ana ‘tararua i aoia.’ [Reirei ao Berita aika Tabu 109:22]. Mwaitira matoan nanom n ataia bwa, ngkai te aine ao te mwaane ae entaute ke kairake [ ke kairake ake a kakaea te tembora] ake a otangaaki ni mwaakan te Atua, ko na bon aki kaitaraa te maiu aei n ti ngkoe? Tera kaungaan nanom ae reke n ataakina bwa a na bon buokiko anera?”
A kanakoa baia anera n tabekiira rake e kabwarabwaraki n koroboki aika tabu ngke e katorobubua n nanorinano Iesu Kristo n te Onaroka are Keketemwane. Man korakaina E katauraoa te Mwakuri ni Kamaiu ae akea tiana. “Ikekei,” e taekinna Beretitenti Nelson, “e karaoaki iai te kabanea ni korakora ni mwakuri n tangira ae e tauaki mwina n rongorongon te aonaaba. … Ikanne i Keketemwane, te Uea “e korakai ni maraki ibukiia aomata ni kabane, bwa aonga aomata ni kabane … n raira nanoia ao n roko Nakoina’ [Reirei ao Berita aika Tabu 18:11].”
“Uota nako te mwangko aei mai irou” e taku Iesu Kristo, “ma akea au taeka ma e na tauaki am taeka.
“Ao e kaoti te anera mai karawa nakoina, ni kakorakora.”
Iai anera i rarikira n taai aikai. E a tia n taekinna Beretitenti Nelson, [Inanon tembora,] kam na ataia bwa kam na kanga ni kamawaa te rabuna imarenan karawa ao aon te aba, kam na kanga ni butiia ana anera te Atua bwa a na raoningkami.”
A uota te oota anera. Otan te Atua. Nakoia Ana Abotoro aika Nibwaite, e taku Iesu, “Nooria Ngai te oota are kam na taua i eta.” Ngkai ti kamatoaa ara burabeti, ti kakoaua bwa e bon weteaki mairoun ara Tia Kamaiu, are bon “otan … te aonaaba.”
Beretitenti Nelson ae ko tangiraki, n tei ibukiia membwa ao raoraora n Ana Ekaretia te Uea, ti kakabwaiaaki n tabeki rake am reirei, n tabeka rake anuan maiun ni maiuakinan maiun Kristo, ao n tabeka rake am kakoaua ae matoa iaon ara Uea ao ara Tia Kamaiu, te Tia Kabooi Maiura ni kabane.
I kaota au kakoaua n abotoro bwa Iesu Kristo bon “otan … te aonaaba.” Ti a bane ngaira, ngkai Ana reirei, n “taua i eta” Otana. N aran Iesu Kristo, amen.