Ana Taeka Kristo ao te Tamnei ae Raoiroi e na Kairiira Nakon te Koaua
Ataakin te babaire ae rangi n tamaroa aei e na buokira n ataia ngaira natin te Atua ao ti kona n riki n ai arona.
Te Atua bon Tamara are i Karawa. Ngaira bon Natina n tamnei, ao ti karikaki ni Katotongana. Ngaia ae, ngaira ni kabane, aika natin te Atua, iai ara konabwai mai ieta n riki n ai Arona.
Ti maeka ma Ngaia bwa tamnei imwain ae ti roko n te aonaaba aei. Tamara are i Karawa, ngkai ara karo n tamnei, e tangiriira, e tangira te kabanea n tamaroa ibukira, ao e katauraoa te babaire ibukira bwa ti na karekei Ana kakabwaia aika moan te tamaroa, n te maiu aei ao n te maiu are akea tokina. Ni kaineti ma te babaire, ngaira, aika naati n tamnei, ti na anganaki te inaomata n rinea Ana babaire. Man nakomaira nakon te aonaaba, ti na kitana te Atua, mwaninga taekan maiura imwain te maiu aei, karekei rabwatara n iriko ao n rii, karekea oin ara atatai, ao ni karikirakea te onimaki. Ma rabwatara aika iriko ao rii, nte aro n aomata, ti na taenikai nakon te kaririaki, n riki n aki itiaki ao n raroa mairoun te Atua, ao n aki kona n oki nako Matana ae tabu. Ibukin ana tangira Tamara are i Karawa ae akea tiana ibukira, E kanakoa Ana Moan Nati, Iesu Kristo, bwa ara Tia Kamaiu. Rinanon Ana anga karea, te Mwakuri ni Kamaiu, are e karaoira Iesu Kristo bwa ti na kona ni kamaiuaki man ara bure ao ni kautaki ao ni karekea te maiu ae akea tokina.
I rang ni kakaitau ibukin koaua aika mimitong aikai—are ti aranna bwa ana babaire ni kamaiu te Tama, Ana babaire n nanoanga, ke Ana babaire ni kakukurei ae korakora. Reiakinan koaua aika kakawaki aikai e a tia ni buokai n ataa kinakiu ni koaua ao kakabwaia aika korakora ibukin karietataakira ao te maiu ae akea tokina. E reireiniira te burabeti Nibwaai te kawai: “Ngaia ae, … kakukurei ngkami n ana taeka Kristo; bwa taraia, a na tuangko ana taeka Kristo bwaai ni kabane aika ko riai ni karaoi.” E reitia, “Ngkana ko rin n te kawai aio, ma ni karekea te Tamnei ae Raoiroi, ao e na kaoti nakoim bwaai ni kabane aika ko riai ni karaoi.” N te bong aei I tangiria n tibwauaia bwa e kanga ana taeka Kristo ao te Tamnei ae Raoiroi ni buokai ni kunei koaua aika kakawaki aikai n au tai ngke tebwitabun au ririki.
“A na Tuangko ana Taeka Kristo Bwaai ni Kabane Aika ko Riai ni Karaoi.”
N aron are e taekinna Nibwaai n te kibu ni kaukuuki n ana boki 1 Nibwaai, I bungiaki naba “irouia kaaro aika tamaroa.” I kawairake i Nagano, Tiaban, n te mweenga are e rang ni kaungaaki iai maiuakinan te kokoaua, te nanomatoa, ao te nanorinano, a rangi ni kaungaaki ao n bwainaki n katein kawai ake a kamatoaaki bwa a na iraki. Tamau bon te mwaane ae rangi n taua te aro. I nonoria n tataro imatan te Shinto ao ana baonikarean Buta ni katoa moaningabong ao te tairiki. E ngae ngke akea ataakina bwa antai ae tataro nakoina ao tera are e tataro ibukina, I kakoauai tabeua mwaaka aika aki nooraki ke te Atua e na iai “mwaakana ni kamaiu” ke e na buokiira ngkana ti tataro ma nanora ni koaua.
N aroia te roro ake tebwitabun aia ririki, I rinanoi kangaanga aika mwaiti. I kekeiaki, n iangoia ae e aki raoiroi te maiu aei ao a mwaiti bwaai aika raoiroi ao aika buakaka iai. I namakina ae I bua ibukin kairan maiu. E na taraa n aki teimaan te maiu aei bukina bwa e na toki ngkana I mate. E kamangaongao te maiu n akean ataakin te babaire ni kamaiu.
E aki maan imwiin ae I moana au reirei iaon te Ingiriti n te moan rinan n reirei, ataei ni kabane n ara reirei a karekea katotoon te Nu Tetemanti. E ngae ngke ti tuai wakina ara kamatebwai iaon te Ingiriti, e tuangiira ara tia reirei bwa ti riai ni kamatebwaia te Ingiriti man warekana. I kaukia ao I rinanoi kanoana. Taeka inanon te Nu Tetemanti a bon rangi n kangaanga ibukiu. Titebo kangaangana ma taeka n Tiaban. E ngae n anne, I kairaki nakon rongorongo ma titiraki man te nano are e a tia ni karinaki imwain te koroboki n te Gideon Bible aei—titiraki iaon namakinan te maroa, te mangaongao, kaitara ma kataaki n te maiu aei, ao ni bwaai riki tabeua. Aitem n tatabeua nako ake iaon rinanin te titiraki a bane n raonaki ma kiibu ao iteraniba inanon te Nu Tetemanti. I bon kairaki nakon te rongorongo “Ngkana ko a korakai.” E kairai te koroboki bwa N na kauka Mataio 11:28–30, are e taku iai nakoia Ana reirei:
“Bane mai nako Iu, ngkami akana kam kua ao kam rawawata, ao N na motiki rawami.
“Amoa amou i aomi, ao reirei i Rou; ba I nimamanei ao I nanorinano: ao e na reke i roumi iai motikan rawaia tamneimi.
“Bwa e aoraoi amou, ao e bebete uotau”
Aio te moan tai ae I uringnga ngke I wareki ana taeka Iesu Kristo. E ngae ngke I aki ota n taeka ni kabane ake E taekin, Ana taeka e anganai te rau, tabekaarake tamneiu, ao e anganai te kaantaninga. Mwaitin warekan Ana takea irou, anaakin riki nanou bwa I riai riki ni kata tamaroan Ana takea. I bon tuai man namakina te namakin are I namakinna n te bong anne. I namakinna ae I tangiraki. I namakinna bwa Iesu Kristo bon te aomata ae I a kaman kinaa.
Ngkai I reitanako au kamatebwai, I namakinna ae kanga E kainetai n taetae nakoiu ngke E kangai, “A kabwaia akana barua te raoiroi ma ni kanimoi iai: ba a na ngae.”
E kaona nanou Ana taeka e ngae ngke I aki kona ni kabwarabwarai au namakin n te tai anne. E ngae ngke e maiu Iesu Kristo inanon tienture aika mwaiti n nako n te aba ae I aki taneiai mangaia, I taku n au iango bwa I kona n onimakin Ana taeka ma nanou ni kabane. Au kantaninga bwa N na kona n reiakina riki taekan Iesu Kristo.
E Na Tuangko Bwaai ni Kabane te Tamnei ae Raoiroi Aika Ko Riai ni Karaoi
Anne e roko inanon ti tabeua te ririki imwiina. I kaitibo ma kairake, ni mitinare, aika bwanin aia tai n Ana Ekaretia Iesu Kristo ibukiia Aika Itiaki ni Boong aika Kaitira. Ao I waekoa ni kaitibo ma aia kurubu n akoi ao ni kimwareirei ae uarereke Aika Itiaki ni Boong aika Kaitira, aika a kekeiaki n iriira Iesu Kristo. Irarikin are karekean au tai teutana ni kakoauaiia, I nooria n te euangkerio ae kaokaki te bwai ae I karekea ngke I kamatebwaia te Nu Tetemantit—ana taeka Iesu Kristo ao te kantaninga ao te rau are roko mairouia.
Te taneiai ae tabu bon ngke a reireinai mitinare aron te tataro. I reiakinna bwa ti riai ni wetea te Atua n arana. Ngkana ti tataro, ti riai n taetae mai nanora, kaota ara kakaitau, ao n tibwauai ara kaantaninga ao nanora. N te tai are ti a tia n taekina te bwai are ti tangiria n taekinna, ti motika ara tataro man n taekina, “N aran Iesu Kristo, amen.” Ti karaoa aei bukina bwa e tuangiira Iesu bwa ti na tataro n Arana. Au tataro nakon Tamara are i Karawa e buokai n ataia bwa antai Ngaia ao au reitaki ma Ngaia—ae Ngai bon Natina n tamnei ae tangiraki. I reiakinna bwa, bukina ngkai e kinaai ao E tangirai Tamara are i Karawa, E na taetae nakoiu, n ae onoti, ao ni kawai aika I atai rinanon te Tamnei ae Raoiroi.
Iai te tai ngke I a bon aki kona ni kinaa te Tamnei ae Raoiroi. I aki oota n, iangoan bwaai aika N na riai ni karaoi bon irakin kawain te tataro ao e na riki te bwai teuana ae kamiimi. N te bong teuana, n tain te reirei ma mitinare, I otinako man te reirei n rawea motirawau. I teimatoa n nanououa n te bwai ae I riai ni karaoia ni maiu ngkana e bon koaua raoi ana euangkerio Iesu Kristo are e kaokaki.
Ngke n nang oki nakon te ruu are a tataninga iai mitinare, I ongo bwanaan temanna te mitinare. Imwiina ao I ongo arau. Irarikin are kaukan te mataroa, I kakauongo nakon te bwanaa n iteran te matoroa are teuana. I rangi n miimi. A bon tataro nakon Tamara are i Karawa. Te aomata are e taekina te tataro e bubutia te Atua bwa E na ongo au tataro. E ngae ngke ana taetae n Tiaban e aki raoiroi, ongoraau n ana tataro e kamaraua nanou. I miimi bwa bukin tera a rangi n tabeakinai. Imwiina ao I namakinna bwa aia tataro ibukiu bon kaotan ana tangira Tamara are i Karawa ao ana Tia Kamaiu ibukiu. Te tangira anne e anganai te kaantaninga, imwiina I bubutia te Atua ma te onimaki ao ma te nano ae koaua. Ngke I karaoia, I namakina te namakin ae kakimwareirei ao ni karika te rau n ataakina ae ngai bon natin te Atua ao iai irou te konabwai ao tokin kawaira mai ieta. Te babaire ni kamaiu e rinnako inanou.
E taku Beretitenti Russell M. Nelson, “Arom n iangoia bwa antai raoi ngkoe … e roota … am babaire ni kabane ake ko na karaoi.” E bon rangi n eti ibukiu. I baireia bwa N na ira te Tia Kamaiu Iesu Kristo man bwabetitoaki ao ni karekea ana bwaintituaraoi te Tamnei ae Raoiroi maiu ea kakabwaiaki riki nakon are I iangoia. Ngke ti karaoa te berita ae tabu n te bwabetito ma te Atua, ti berita bwa ti kukurei ni katoka i aora aran Iesu Kristo, kawakin ana tua te Atua, ao ni beku Ibukina inanon nikiran ara bong ni maiu. Tamara are i Karawa, e berita nakoira ae ti kona n taainako ni karekea Tamneina ma ngaira—te kairi ae reitinako mairoun te Tamnei ae Raoiroi.
I kaoko bwa ko na karekea am onimaki n te rongorongo are e reireiniira Nibwaai—ae ana taeka Kristo ao te Tamnei ae Raoiroi e na kairiko nakon “bwaai ni kabane aika [ko] riai ni karaoi.” Bwaai ni kabane! Aei bon ana bwaintangira te Atua ae rangi ni kamiimi.
Tariu ao mwaneu, I rangi ni kakaitau ibukin ana babaire ni kamaiu Tamara are i Karawa. Bukina bwa E tangiriira, E katauraoa te kawai n oki Nakoina rinanon Ana Rikitemanna, Iesu Kristo. Ataakin te babaire ae rangi n tamaroa aei e na buokira n ataia ngaira natin te Atua ao ti kona n riki n ai arona. I rangi n kakaitau ibukin te koaua ae kakawaki aei. I kaota au koaua nakoimi bwa e na kairiira ana taeka Iesu Kristo ao te Tamnei ae Raoiroi nakon karekean te maiu ae akea tokina. I ataia bwa a koaua bwaai aikai. N aran Iesu Kristo ae tabu, amen.