Kamatoa Ara Taratara iaon Iesu Kristo ao Ana Euangkerio
Ngkana ti katinanikui katabetaben te aonaaba ao ni kamatoa ara taratara iaon Iesu Kristo ao Ana euangkerio, e na bon reke iroura te tokanikai.
N 1996, ana tiim ni butibooro Nigeria irouia mwaane e karekea ana koora n te Kabo n te Olympic are e karaoaki i Atlanta n te United States. Ngkai e a toki te kabo, a bwaro nako nanon te kawai aomata aika kikirei inanon kaawa nako; n te aba a riaon 200 te mirion aomata iai a bitaki nakon te bukamaru ae korakora n te aoa uoua nte karangaina! E korakora te kimwareirei, te kukurei, ao ai te ingainga inanon aia tai n amwarake, n anene, ao n mwaie. N te tai anne, ao e katiteuanaaki Nigeria, ao te I-Nigeria e rauaki n rikiana n I-Nigeria.
Imwain te Olympics, kain te tiim aei a kaitara ma kakaewenako aika a mwaiti. Ngke e a waaki te kabo, te mwane ni buoka are a karekea e a toki. E ira te bokakano te tiim n aki bobonga aia bwai n takakaro, aia tabo ni kataneiai, aki taun kanaia, ao te ibuobuoki nte uaati.
Jerome Prevost/Getty Images
Iai te taina, ae ai bon ti tabeua te miniti ao a tiku man te kauaaba, ma ana tiim Nigeria e tokanikai iaon kanganga ni kabane. Te tai ae kakawaki aei e bita aron taraakiia ibon irouia. Man Onimakinaia i bon irouia ae boou, ao aia mwakuri korakora n tatabemaniia ao n te tiim ao te nanomatoa ae teimatoa, a botii nanoia n katinanikui kangaanga ao n ti iangoa te moanna. Te iango aei ae ngaia ae e karekea nakoia te metera ae te koora, ao kain Nigeria a katoka araia bwa “te Kanoanimi n Tiim.” Te Kanoanimi n Tiim aio n te Olympis n 1996 e reitinako n atoatongakina n takakaron nako Nigeria.
David Cannon/Allsport//Getty Images
N te tai are a reiakinna kaain te tiim ni butibooro n aki tabe ma taian katabeaianga aika a kaitarai ao n ti kabotoa aia iango n aia kouru, tokanikaia e riaon riki are a taku bwa a konaa ao a rinanon te kimwareirei ae korakora. (Ai arora naba ngaira ake i Nigeria!)
N te aro naba anne, ngkana ti katinanikui katabetabe n te aonaaba ao ni kabotoa ara taratara iaon Kristo ao Ana euangkerio, e na bon reke iroura te tokanikai iaon riki are ti kona n iangoia ao n namakina te kimwareirei ae korakora. E reirei Beretitenti Russell M. Nelson: “Ngkana ti kabotoi maiura i aon … Iesu Kristo ao Ana euangkerio, tina kona n namakina te kimwareirei n aki tabe bwa tera ae riki—ke ae aki riki—inanon maiura.”
I tataro bwa te Tamnei ae Raoiroi e na buokira n tatabemaniira ni butimwaea ana kakao Beretitenti Nelson ni kabotoi maiura iaon “Iesu Kristo ao Ana euangkerio” bwa ti aonga n namakina te kimwareirei inanon Kristo n “aki tabe ma bwaai aika a riki—ke aika aki riki—inanon maiura.”
A mwaiti rongorongo n Ana Boki Moomon ae e taekin aroia naake a bita maiuia nakon ae raoiroi man kabotoan aia taratara iaon Iesu Kristo ao Ana euangkerio.
Iangoa Aramwa te Teei. E kaitara ao ni buakana te Ekaretia. Tamana, ae Aramwa, e tataro ao n aki mamatam. E kaoti te anera ao e wetea Aramwa te Teei bwa e na raira nanona. N te tai anne, e a moanna n rawawata Aramwa “ni marakin te aomata are kabuakakaaki.” Inanon ana aoa aika a rotongitong aikai, e uringa ana reirei tamana ae Kristo are e na roko n tiringaki ibukin ana bure te aonaaba. Ngkai ana iango ea boto raoi iaon te iango aei, e bubutiia te Atua ibukin ana nanoanga. Bon te kimwareirei ae e reke mwina, te kimwareirei ae e kabwarabwaraa bwa akea n ai arona! Te nanoanga ao te kimwareirei e roko nakon Aramwa ibukina bwa ngaia ao tamana a boboto aia iango iaon te Tia Kamaiu.
Ibukimi kaaro ake natimi ae tionako, karekea te onimaki! Nnaki titiraki bwa bukin tera e aki roko te anera ni buoka natim n raira nanona, kona ataia bwa te Uea e katuka te anera ae iai rabwatana ni kawain teuanne ke neienne: te bitiobi ke te tia kairiiri temanna, ke taari ao aiine n ibuobuoki. Ngkana ko teimatoa n aki mamatam ao n tataro, ngkana ko aki kataia ni katea te tai ke tokin te tai ibukin te Atua, ao ngkana ko na onimaki bwa te Atua e katangainai baina ni buoka natim, ngkanne—ngkai ke imwiina—kona kunea bwa e na riinga nanon natim te Atua ngkana e rineia natim bwa e na ongo. E riki aei ibukina bwa Kristo bon te kimwareirei—Kristo bon te kantaninga; Ngaia te berita “bwa aika raraoi aika nangi roko.” Ngaia are, onimakina Iesu Kristo ibukin natim, bwa Ngaia korakoraia ni kabane kaaro ao ataei nako.
N te tai are e rinanon te kimwareirei inanon Kristo, Aramwa te Teei e maeka ma te kimwareirei. Ao e kanga ni kateimatoa te kimwareirei anne rinanon kanganga ma kataaki? E kamatata:
“Man te tai anne nua ngkai, I a tia ni beku n aki motirawa, bwa I aonga [ni] kairiia aomata nakon te rairannano; bwa I aonga ni kairiia bwa a na katoonga te kimwareirei ae rianako are I a tia ni katoonga. …
“… Ao … te Uea e bon anganai te kimwareirei ae rianako n uaan au beku. …
“Ao I a bon tia ni boutokaaki i aan kakatai ma kaangaanga n aekaia nako”
Iroun Aramwa te kimwareirei inanon Kristo e waaki ngke e a tia ni kamwakura ana onimaki Irouna ao n tang ibukin te nanoanga. Imwiina, Aramwa e kamwakura te onimaki iroun Kristo ni buokiia tabeman bwa ana katoonga naba te kimwareirei anne. Mwakuri aikai reitinako aikai a karekea te kimwareirei ae korakora inanon Aramwa riki inanon kataaki ao kangaanga n aekaia nako. Kam nooria, “te Uea e tatangira te mwakuri,” ao te mwakuri ae boboto Iaona e uoti kakabwaia. Riki kanganga aika korakora a kona ni bane “ni kabwautaki n kimwareirein Kristo”
Teuana te kurubu n ana Boki Moomon are a karika Iesu Kristo ao Ana euangkerio bwa boton maiuia ao a kunea te kimwareirei bon naake a kunea kaawan Eram—te tabo are a kona ni kaikawaia iai natiia ao ni kukurei ni kamwakuri oin aia aro. Aomata aika kororaoi aika a maiuakina te maiu ae raoiroi a tautoronaki irouia kurubu aika a kamwamwane ao ni kakaeaki inaomataia n taromauri n aia aro. N tabetai a riki bwai aika buakaka nakoia aomata aika raoiroi:
“E nooria te Uea bwa e riai ni katuaia ana botanaomata; eng, e katai taotaonakin nanoia ma aia onimaki.
“E ngae n anne—ane katuka ana onimaki irouna ao ngaia are e na uotaki rake n te kabanea ni bong. Eng, ao e a koaua naba aio nakoia te botanaomata aio.”
Akanga aomata aikai n teimatoa rinanon katakiia ao korakaiia? Man kabotoan ara iango iaon Kristo ao Ana euangkerio. Aia kanganga e aki kabwarabwaraia bwa aekaki n aomata raa; ma, ngaiia n tatabemaniia a rairaki nakon te Atua, ibukina bwa a kinaia ae ngaiia natin te Atua, nati ni berita, ao ana reirei Iesu Kristo. Ngkai a uringnga bwa antai ngaiia ao a wetea te Atua, a karekea te rau, korakora, ao tokina bon te kimwareirei inanon Kristo:
“Ao Aramwa ma ana botanaomata … a tataro i nanoia nakon [te Atua]; ao e atai aia iango ake a mena i nanoia.
“Ao e koro bukina bwa e roko irouia bwanaan te Uea i nanon aia tai n rawawata, ae kangai: Tabeki atuumi ao kabeebetei nanomi, bwa I ataa te berita ae tabu are kam a tia ni karaoia nakoiu; ao N na berita n ae tabu ma au botanaomata ao N na kamaiuia man te tautoronaki.”
Ni kaekaana, te Uea e “kabebetei uotaia … iaon anga [ia]. … Eng, ao e kakorakoraia te Uea bwa a na kona n uota uotaia ma te beebete, ao a karaoi nanon te Uea ma te kukurei ao te taotaonakinnano.” Nooria bwa Aika Itiaki aikai a anga aia kanganga, korakaia, ao katakiia bwa a na kabwautaki ni kimwareirein Kristo! Imwiina, inanon taina, E kaota te kawai nakon Aramwa are ana birinako iai, ao Aramwa —ana burabeti te Atua—e kairiia ni kamanoia.
Ngkai ti kamatoa ara taratara iaon Kristo ao n iriira Ana burabeti, ngaira naba tina kairaki nakon Kristo ao te kimwareirei n Ana euangkerio. E a tia n reireiniira Beretitenti Nelson: “Te kimwareirei e korakora, ao katuruan ara iango iaon te kimwareirei e uota mwaakan te Atua nako nanon maiura. N aron bwaai ni kabane, Iesu Kristo bon ara banna ni katoto ae tamaroa ae ti riai n iriiria, ‘are ngaia ae karekea te kimwareirei ngke e tokanikai iaon ana kaibangaki’ [Ebera 12:2].”
Tinau e a tibwa tia ni motirawa; E bon aki kantaningaaki. I tangira tinau ao I aki baireia bwa e na bua ngkai e rang ataei. Ma rinanon buana, au utu ao ngai ti rinanon te rawawata ao te kimwareirei. I ataia bwa Ibukina, tinau e aki mate—e maiu! Ao I ata anne ibukina bwa Kristo ao kingin te nakoanibonga a tia ni kaokaki rinanon te burabeti Iotebwa Timiti, N na manga kaitiboaki ma ngaia. Te rawawata ni buan tinau e a tia n ongaki inanon kimwareirein Kristo! I reiakina anne bwa n “iango n tiretio” ao ni “kariaia te Atua bwa e na tautaeka” n reitaki ma te boboto n iango iaon te kimwareirei are e reke inanon Kristo.
E kaoira ma te tangira: “Bane mai nakoiu, ngkami akana kam kua ao kam rawawata, ao N na motiki rawami.” N aran Iesu Kristo, amen.