Ukoukoran Taian Kaeka nakon Titiraki n te Maiu n Tamnei
Ara titiraki ibukin te euangkerio a kona ni katauraoi tibwanga mairoun Tamara are i Karawa ao Iesu Kristo ni buokiira bwa ti aonga n rikirake.
I ataia bwa e na kaoti aei kanga te bwai ae kakuba, ma I a bon ikawai ngke ti reireinaki n te reirei ae iai ruaiwa buraneti n ara tiora titiem ke te aonaaba ae bwanin. Teuana mai buakon buraneti akanne bon, Pluto, ae aranaki iroun Venetia Barney ae 11 ana ririki ni maiu mai Oxford, England, i mwiin kuneana n 1930. Ao n te tai anne ni karokoa 1992, e kakoauaki Pluto bwa bon te kabanea n raroa man ara aonaaba ae bwanin. N te tai aei, i nanon te umwanreirei ao e taneiai n nooraki aia mwakoro ni beeba ataei ma tamnein taian buraneti aika a tei n uakaan, ao taian kaotibwai man te tiaeanti, teuana n tatabeua nako a kaota nnen Pluto i aon te tia are e ataaki. A kakoaua angiina taan rabakau bwa i tinanikun te aonaaba anne ao bon te akea.
Ma, te titiraki ae tuai kaekaaki e teimatoa n tiku irouia taan rabakau ni kaineti ma oin rikin te comet kanga ai aron te itoi are a uaiakina rekena naake a kamatebwaia bwain karawa. Ao e teimatoa te titiraki anne i nanon bwii n ririki imwaain kunean te tabo teuana riki man ara aonaaba ae bwanin. N aki taun rabakauia are a karekea, a kabonganai bwii n ririki akanne taan rabakau ni karaoi rabakau aika a boou aika uaana man rikirake are a kona n reita aron te kamatebwai ao te kukune. Te kukune aei e barongaa ara tabo n ara buraneti are e a riki Pluto bwa te tabo ae boou i nanon ara tiora titiem ike a mena i nanona buraneti aika waniua mwaitina.
Temanna te tia rabakau ae kaira aron kamatebwaian te buraneti ao te tia kakae man te New Horizons space mition are e katabeaki n matakuakinan Pluto ae e a kaan e taekina aei: “Ti taku n ara iango bwa iai ara atatai n aron bwain aonaaba. Ti bon aki Ti taku bwa ti ataia botanaomata man ara ae buraneti n ara aonaaba ae bwanin. Ma ti bon kairua.”
Te bwai ae riinga nanou ibukin maanin te tai n ukoran rongorongona bon tabeua rongorongo ake ti te arona ao iango aika a rianako i marenan waakinakin ma karababan ara atatai n te aro n tiaeanti ao mwanangara are ti karaoia, aika natin te Atua, n ukora kaekaan ara titiraki n te maiu n tamnei. N ae onoti, ti na kanga ni kaeka ma tianakin ara atatai n tamnei ma ti na katauraoira ibukin te mwaneka are i mwiina ibukin rikirakera i bon iroura—ao ike ti kona n rairaki ibukin buokara.
Reirei iaon te Reirei
Te titiraki ao ukoukoran nanoia bon te bwai ae tataneiai te aba iai bwa kanoan maiura n te maiu ae mamate aei. N tabetai, ngkana e aki bwanin raoi ara kaeka e na kona ni kairiira nakon tokin ara atatai, ao kabwaka akanne a kona ni karika te un ke te mweengabuaka. Ma te kamiimi, ana baire ni kakukurei Tamara are i Karawa ibukira e baireaki ibukin buokara bwa ti aonga n rikirake n aki tabe ma tianakin ara atatai ao ni kakoroan bukin te bwai are tiaki kona i bon iroura, e ngae ngke e aki bwanin rabakaura i aon bwaai ni kabane. E rangi n nanoanga ana baire te Atua nakoia botanaomata ake a karako aia atatai, e katauraoira ma ara Tia Kamaiu, Iesu Kristo, n riki bwa ara Tia Kawakin Tiibu, ao ni kaungai nanora bwa ti na kabongana inaomatara n Rineia.
E taku Unimwaane Dieter F. Uchtdorf “te titiraki tiaki kanikinaean te mamaara,” bon te bwai ae roko i mwain te rikirake.” N taetae ni kaineti ma ara konabwai ae onoti n aroia taan ukoukora te koaua, ara burabeti, e taku ara Beretitenti Russell M. Nelson, bwa ti riai ni karekea te “nano ae nano” ao ni “bubuti ma te nano ae koaua [ma] nanora raoi, ao te onimaki iroun [Iesu] Kristo.” Ao e a manga taku riki “‘ma nanora raoi ae koaua’ nanona bwa temanna e baireia raoi bwa e na toumwiin kaetieti aika roko mai karawa.”
Ara kekeiaki n rikirake n te rabakau e na kona ni kairiira bwa ti na tuoi ara titiraki, tabeua aika aki kangaanga, rinanon te taratara i marenan te mwakuri ao mwiina ae na riki, n ukeuke ao ni kinai taian banna ao n rineia ni karakini baike a katamaroa ara atatai ao ni karini rabakau ake ti taku bwa a bua. Ngkana ti iangoa uaiakinan reken te rabakau n tamnei, ma, waakin iango aika raraoi a kona n ibuobuoki n tabetai, ma ngkana bon tii ngaiia a kona n aki bwanin ngkai ti taraia bwa ti atai riki bwaai aika a kaineti ma Tamara are i Karawa ao ara Tia Kamaiu Iesu Kristo, Aia euangkerio, Aia Ekaretia, ao Aia babaire ibukira ni kabane.
Aron te Atua te Tama ao Natina n anga rabakauia nakoira e moanibwai kaoan mwaakan te Tamnei ae Raoiroi n riki bwa ara tia reirei ngkai ti kabotoa ara iango iroun Iesu Kristo n maiura ao n ara kakaonimaki n ukerii Aia kaeka ao kabwarabwaraan nanoia. A kaoira bwa ti na kunea te koaua rigkana ti kabanea ara tai ni kamatebwai booki aika tabu ao n ukeri koaua aika kaokaki ni boong aikai ibukin ara bong ao ara tai, ake anganiira burabeti ao abotoro aika ngkai. A butiira ma nanoia ae koaua bwa ti na kabanea ara tai ni katoa bong, n nebonebo n ana auti te Uea ao ni katorobubua n tataro “bwa ti aonga ni karekea te rongorongo mai karawa.” Ana berita Iesu nakoia ake a mena ikai ni kan ongo Ana kabwarabwara ngke e mena iaon te Maunga e rangi ni koaua n ara bong ae ti maiu iai ngkai n arona naba ngke e mwakuri iaon te aba: “Bubuti, ao ane kam na anganaki; ukeuke, ao ane e na reke iroumi, karebwerebwe ao ane e na kaukaki nakoimi.” E kakoaua nakoira ara Tia Kamaiu bwa “e [anga] baika a raraoi Tamara nakoia akana a bubutia.”
Ana kawai te Uea n angareirei e kangai “teutana i mwin teutana, te reirei teuana i mwin teuana.” Ti na kona n kaantaningaaki ni “kantaninga Iehova” n te marena i marenan ara atatai n te tai aei ao are i aon kawaira ni manga karekea. Te tabo ae tabu aei e kona n riki bwa te tabo are ti na katamaroai anuara n tamnei—te tabo are ti na kona ni “taotaoni nanora” ara ukeuke mwaaka ao ni kabooua korakorara n teimatoa ni kawakin berita ake ti a tia ni karaoi ibukin te Atua rinanon berita aika tabu.
Ara reitaki inanon berita aika tabu ma Tamara are i Karawa ao Iesu Kristo bon te kanikina ae ngaira kaain abanuean te Atua. Ao n rikira bwa kaain te tabo e kainnanoa kabooraoan maiura ma tuan karawa ao karaoan ara kabanea ni kona ni karikirakeira i nanon te maiu n tamnei.
Ongotaeka
Teuana oin te tua are taekinaki n ana boki Moomon ae bwanin ngke a kaota aia ongeaba natin te Atua ao ni kawakin aia berita aika tabu, a reitinako ni karekei kairiiri ao kaetieti n te maiu n tamnei. E tua nakoira te Uea bwa rinanon ara ongeaba ao n nanomwaaka ti kona ni karekea te rabakau ao te atatai. Ana moti ao ana tua te Atua aki baireaki bwa a na riki bwa te kangaanga inanon maiura ma bon te kawai ae mwaakaroiroi ni karekei oin ara kaotioti ao te reirei n te maiu n tamnei. E taku Beretitenti Nelson bwa te koaua ae rangi ni kakawaki bwa “te kaotioti mairoun te Atua e bootau n taainako ma Ana tua ae akea tokina ao ni manga reitia bwa “e aki kauntabaa Ana reirei.” Nanom n ongeaba n ana tua te Atua, e ngae ngke e aki bwanin am atatai ma bukina Irouna, e katukuko rinanon aia reitaki Ana burabeti. Ni Mote 5 e reireiniira taekan te reitaki ae onoti i marenan Atam ao ana anera te Uea.
Imwiina ngke e a tia te Uea n angan Atam ao Ewa “tua, bwa a riai n taromauria te Uea ae Atuaia, ao n anga moan aia nanai, bwa te karea nakon te Uea,” E taekinaki ni booki aika tabu bwa “Atam e ongeaba nakon ana tua nako te Uea.” Ao ti reitinako ni warekia bwa “i mwin boong aika bati e kaoti ana anera te Uea nakon Atam, ao e kangai: E aera ko anga karea nakon te Uea? Ao e taku Atam nakoina: I aki ataia, ma ti ae tuangai te Uea.”
Ana ongeaba Atam e rimoan ana atatai ao ni katauraoia bwa e aonga n reke te rabakau ae tabu are e ibuokanbwai inanon te kanikinaa ae tabu ibukin ana Mwakuri ni Kamaiu Iesu Kristo. Nanora n ongeaba man nanorinano, naba, e katauraoa te kawai ibukin ara namakin ni kinaa ana kawai te Atua ao ana kaantannga ibukira ni kabane. Ni uarokoira ma ni karikirakea ara ongeaba e uotiira ni kaanira nakon ara Tia Kamaiu, Iesu Kristo, bwa te ongeaba nakon Ana moti ma Ana tua bon te karoko nakoina.
N reitaki ma anne, ara kakaonimaki nakon te atatai ao te wanawana are ti karekea e a kaman tia n reke rinanon ara kakaonimaki n nim ma tuan te euangkerio ao berita aika tabu bon te katauraoi ae rangi ni kakawaki ibukin katauraoara ni karekea ao ni mwiokoaki n ara reitaki mairoun te Tamnei ae Raoiroi.
Tamara are i Karawa ao Iesu Kristo bon aan koaua ni kabane ao n tibwaa wanawanaia. Ao riki, ngkana ti ataia bwa ti aki kona ni karekea oin ara atatai ma onimakinan te Atua e kona ni buokiira bwa antai ae ti na kawaria ao ni katuka ara onimaki irouna.
Te Onimaki ae Nano
N Te O Tetemanti n rongorongon Naaman, te mataniwi n te tanganibuaka are e kamarurungaki n aorakina ae te reebera iroun te burabeti ae Eritai, e tatangiria nanou. E kamatataaki n te karaki bwa e kanga ana onimaki ae nene “te ataeinaine ae karako” are e bita kawain maiun temanna te mwaane ao, ibukiia taan kakoaua ni kabane, e kaotaki ana nanoanga te Atua nakoia naake a katuka aia onimaki Irouna ao Ana burabeti. E ngae ngke akea arana, e buokiira te ataeinaine aei bwa ti na waaki nako ni karikirakea ara atatai. Ao ana onimaki Naaman n ana koaua te aine aei e karekea te namakin bwa e na uota ana bubuti aei ibukin kamaiuan ana toro te Atua ae rineaki.
Ana kaeka Naaman nakon ana kaetieti te burabeti ae Eritai bwa e na tebotebo ni kaitiakia n te karaanga are Ioretan e bon kararaoma ao ni kamaraki nano n te moantai. Ma te kakao aei nakoina bwa e na ongeaba nakon ana reirei te burabeti e karekea angan kamarurungana ma rikiraken ana atatai bwa bon iai te Atua ao e koaua.
Ti na bae ni kunea bwa tabeua ara bubuti n tamnei bon iai kaekaaia aika a kona n nooraki n iai bukina ao aki kona ni karekea te mweengabuaka ibukira. Ke, n aron Naaman, ti na kunea bwa kainnano ake tabeua a kakatai riki ao a kona ni karika te kangaanga ao te namakin ae kakaokoro inanora. Ke, n ae ti te arona ma aron kabwarabwaraia taan kamatebwaia bwain karawa n aia moan tabeka ibukin ara aonaaba ae bwanin, inanon ara kakae ibukin koaua n te maiu n tamnei, ti kona ni karekei kabwarabwara aika a aki eti ngkana ti onimakina oin ara atatai, mwiina ae na riki ae kanankoakawaki ao n aki baireaki are e na kairiira nako man kawain te berita. Ao irarikina, tabeua titiraki a reitinako ni karokoa are te Atua, “iai irouna te mwaaka” ao “te wanawana, ma te atatai ni kabane” are “e atai bwaai ni kabane” n Ana nanoanga, e karekea te oota rinanon kakoauaan Arana.
Teuana te bwai ae ti na tarauaira mai iai man rongorongon Naaman ngke e aki ongeaba nakon ana moti ao ana tua te Atua e kona ni maan ke n tuuka aron rikirakera. Ti kakabwaiaaki ngkai e riki Iesu Kristo bwa te Tia Kamarurung ae Mwaatai. Ara ongeaba nakon ana moti ao Ana tua te Atua e na kauka kawain te Tia Kamaiu n anga te atatai ma te kamaiiuaki ae E ataia bwa ti kainnanoia, ni kaineti ma are E a tia ni baireia bwa e na karaoia ibukira.
E reirei Unimwaane Richard G. Scott bwa “te maiu aei bon te taneiai i nanon te onimaki ae nano—onimakinan Iesu Kristo, n onimakina Ana reirei, n onimakina oin ara konabwai n aron kairakikira iroun te Tamnei ae Raoiroi n ongeaba n reirei akanne ibukin kukureira ngkai ao n te maiu are akea tokina ae iai bukina ma ni kakukurei. Nanon te onimaki bon te ongotaeka ma nanom n aki ataa mooa ao te toki (taraa Taeka n Rabakau 3:5–7). Ni karika te uaa, am onimaki iroun te Uea e riai ni korakora ao n teimatoa n uaa te toki nakon ae ko na onimakina oin am namakin ao am taneiai.
E reitia Unimwaane Scott: “Ni kamwakura am onimaki n onimakinna bwa te Uea E ataa te bwai ae karaoia ma ngkoe ao E kona ni kakoroa bukin raoiroim ae akea tokina e ngae ngke ko aki ataia bwa E kanga ni karaoia.”
Kainan te Koaua
Raao aika kam tangiraki, I kakoaua bwa ara titiraki ma nanora ni koaua ibukin te euangkerio a kona ni katauraoi tibwanga mairoun Tamara are i Karawa ao Iesu Kristo ni buokiira bwa ti aonga n rikirake. Au konabwai n ukori kaeka mairoun te Uea nakon oin au titiraki n te maiu n tamnei—ngkoa ao n te tai aei—e anganai te kariaia ni kabongana te marena i marenan oin au atatai ao ana atatai te Atua ni maiuakina te ongotaeka Nakoina ao te kakaonimaki nakon te rabakau n tamnei are I karekea n te tai aei.
I kakoaua bwa katukan ara onimaki iroun Tamara are i Karawa ao irouia Ana burabeti are E a tia ni kanakomaia a na buokiko bwa ko na rikirake n te maiu n tamnei ao ni waaki nako ni karababaa am atatai n ataakin te Atua. E na bitiko man am tabo ibukina bwa ko kona ni bitaki. E ataia te Atua bwa ngkana ko a rikirake riki, ko na kona n noora are iaona riki. E kaoko ara Tia Kamaiu bwa ko na karikirakeko nakon are iaona riki. N aran Iesu Kristo, amen.