E Nakoraoi Waakin te Maiu Aei!
Ma taian kataaki ake ti kaitarai ni kabane, E a tia Tamara are i Karawa ae tatangira, e wanawana, ao n kororaoi ni karaoa te babaire ni kakukurei n te aro are ti naaki kona ni bwaka.
N ririki aika a bati, I mwiokoaki bwa N na kakaraoa te reirei nakon te aine ae aaine n au uoote. E aki rangi ni bebete aron maiuna. Iai rootakin marurungina ao n rinanon te maraki man te kabuanibwai are e reke irouna ngke e uarereke n te tabo n takakaro. E raure ngke 32 ana ririki ma aman natina ae karikirakeia ao n katauraoi aroia, e a manga mareaki ngke 50 ana ririki. E mate ana kauaei ngke 66 ana ririki, ao ni maeka te aine aei 26 riki te ririki bwa te aine ae tiku n akea buuna.
Ma taian kangaanga i nanon maiuna , e bon rangi ni kakaonimaki nakon ana berita aika a tabu ni karokoa matena. E babane nanon te aine aei n karaoan te riki, kakawaran te tembora, ao te ti a bobotii rongorongo ao te tia korei rongorongon te utu. E ngae ngke e bati kataakina aika a korakora, ao akean ana titiraki e namakina te nanokawaki ao te marooa n tabetai, e taraa ni kukurei moana ao anuana ae kaunga man kakukurei.
Ruaiua namwakaina i mwiin matena, e rinanon te bwai ae kamiimi i nanon te tembora natina te mwaane. E reiakinna man mwaakan te Tamnei ae Raoiroi bwa iai ana rongorongo tinana ibukina. E reitaki tinana nakoina, ma tiaki n te kaotioti ke n te marooro. Te rongorongo ae akea kairuana aio e roko n ana iango natina te mwaane mairoun tinana: “I kan tuangko bwa te maiu aei e nakoraoi, ao I tangiria n tuangko bwa ko na ataia bwa I a ota ngkai n bwaai ake a tia n riki [i nanon maiu] ake a riki iai—ao a bon Tamaroa ni kabane.”
E bon rangi n tamaroa riki te rongorongo aei ngkana e iangoa aron neiei temanna ao taian kangaanga are e rinanona man tokanikai iai te aine aei.
Tariu ao mwaneu, e nakoraoi waakin te maiu aei! E baaireaki arona bwa e na mwakuri raoi! Ma taian kataaki, marakin naano, ao kangaanga ake ti kaitarai, E a tia Tamara are i Karawa ae tatangira, e wanawana, ao n kororaoi ni karaoa te babaire ni kakukurei n te aro are ti naaki kona ni bwaka. Ana babaire e katauraoa te kawai ibukira n rierake i aon taian kabwaka n te maiu aei. E taku te Uea, “Aio bon au mwakuri ao mimitongiu, ni karekea te aki mamate ao te maiu are akea tokina ibukin te aomata.“
Ma, ngkana ti kan riki bwa taan karekea mwiiin ana “mwakuri ao … mimitong” n te maiu aei ao te maiu ae akea tokina,” ti riai n reirei ao n reiakinaki, ao rinanon te abuee n ai—n tabetai n atai tiara. N totokoanako taian kangaanga, kataaki, ao karawawatan te maiu aei bon totokoan te waaki aika a riai ibukin te waakin te maiu aei.
Ma ngaia are ti riai n aki kubanako ngkana a roko i roura boong ni kangaanga. Ti na kaitibo ma waaki ake a na kataira ao aomata ake a na buokiira ni mwakuria te tangira ae koaua ae kororaoi ao te taotaonannano. Ma ti na riai ni kamatoaira nakon ara kangaanga ao n ururingnga, n aron ae taekinna te Uea:
“Ao ane e anga maiuna ibukin au mwakuri, ibukin arau, e na manga kunea, n te maiu ae akea tokina.
“Ngaia are, tai makuia ami kairiribai [ke ami kangaanga, ke kataaki n te maiu aei], bwa I a tia ni motikia i nanou …, e taku te Uea, bwa N na kakoauaingkami ni bwaai ni kabane, ngkana kam kakaonimaki nakon au berita ae tabu … bwa kam aonga ni kuneaki n tau.”
Ngkana ti rangi n raraoma ao n nakonnano ibukin ara kangaanga ke n namakinna bwa a na reke riki iroura aika a mwaiti nakon ae na riai n reke n te maiu aei, ti kona n ururingnga are e taekinna te Uea nakoia tibun Iteraera:
“Ao ko na uringa [taian] kawai ni kabanea are E kairiiriko Iehova ae Atuam iai n ririki aika angaun aikai i nanon te rereua bwa E aonga ni karinanoko, ni kataiko, n ata ae mena [iai] i nanom, bwa tao ko [kani] kawakin ana tua nako, ke ko aki.”
N aron Riaai ngke e reireina natina ae Iakoba:
“Ko a tia n rinanon te karawawataki ma te korakai. … E ngae n anne, … ao e na onea karawawatakim te [Atua] nakon taian kakabwaia ibukim. … Ma ngaia ae, I ataia bwa ko a tia ni kabooaki, ibukin raoroin am Tia Kaboko.”
Ibukina bwa te maiu aei bon te tabo n kataaki ao “nangibuaka n toka i aora n kakamaakaku bwa e na urua ara rau,” e ibuobuoki uringakin te reirei ao te berita ae are e kuneaki n Motiaea 23 ae e irekereke ma kangaangan te maiu: “E ngae n anne—ane e katuka ana onimaki iroun [te Uea] ao ngaia are e na uotaki rake n te kabanea ni bong.”
Ngke te kairake ngai, I rinanon te maraki n au namakin ao te mamaa are e reke man ana mwakuri ae buakaka temanna, are i nanon ririki aika a mwaiti e rootai ma au namakin n tau i matan te Uea. Ma ngaia ae, I kaota au kakoaua bwa e kona ni kakorakoraira te Uea ao ni buokiira i nanon nako kangaanga are e roko iroura bwa ti na rinanona n te maiu ae kakorakai aei.
Bon ti te arona arora ma ae rinanona Bauro:
“Bwa I aonga n aki bati ni karietatakii bukini kabatiani bwaai aika a kaotaki [ake I a tia ni karekei], ao I anganaki te bwai ni kateketeke n irikou, are ana anera Tatan bwa e na oreai, bwa I aonga n aki bati ni karietataki.
“I katenua butiian te Uea ibukin te baei bwa e na nako mai rou.
“Ao e kangai nakoiu, E a tau au akoi i roum: bwa e kakoroaki raoi mwakau n te mamara. Mangaia ae moan te kukurei Ngai ni kamoamoai ni mamarau, ba e aonga ni memena m’akani Kristo i aou.”
Ti aki ataia bwa tera “ana kateketeke ni irikon” Bwauro. E aki kabwarabwara bwa tao te mamaara n te rabwata, aorakin te iango ke te nano, ke te kaririaki. Ma tiaki riai n ataa rongorongona anne bwa e korakai ke e bubutia te Uea ana buoka anne, ae kakaawaki, korakoran te Uea ao mwaakana bon ngaai ake e buokia n rinanona.
N ai aron Bwauro, bon rinanon ana buoka te Uea are I kakorakoraaki n nanou ao tamneiu ao ni kabaneana kuneakina i mwiin ririki aika a mwaiti bwa bon ngai te aomata ae I tau ao n tau nakon kakabwaian te euangkerio. E buokai te Uea n tokanikai man au namakin n aki tau ao n angan are e karaoa te kaairua kabwaraan ana bure. I a tibwa oota bwa ana Mwakuri ni Kamaiu te Tia Kamaiu bon te bwain tangira nakoiu ao bwa a tangirai ni koaua Tamara are i Karawa ao Natina. Ibukin ana Mwakuri ni Kamaiu te Tia Kamaiu, e nakoraoi waakin te maiu aei.
Ngke I kakabwaiaaki ni kina ana kamaiu te Tia Kamaiu nakoiu ao n tei i rariku rinanon ake I rinanona, I mataata bwa boong ake a nakobuaka n au bong ni kairake bon au mwananga ao au taneiai, bon kanoan bwaai aika riai n aki karaoaki nakoia ake a tia n rootaki ao n reitinako n rootaki man aroia aika aki raoiroi.
I kunea bwa waakin te maiu—a raraoi ao a bubuaka—a kona n reireiniira reirei aika a kakaawaki. I ataia ngkai ao n kaota au koaua bwa e nakoraoi waakin te maiu aei! Au kaantaninga bwa mwiin nako bwaai ake I rinanona ni maiu—a raoiroi ke a buakaka—I nanoanga nakoia ake a rootaki man aia mwakuri tabeman ao n nanoanga ibukiia ake a rootaki.
I kaantaningaia bwa mwiin nako bwaai ake I rinanona ni maiu—a raoiroi ke a buakaka—N na karaoa riki te akoi nakoia tabeman, karaoa ae raoiroi nakoia n aron te Tia Kamaiu, ao n rikirake otau ibukiia taan bure ao I karekea te raoiroi. Ngkai ti katan i aon ana nanoanga te Tia Kamaiu ao ni kawakin ara berita aika a tabu, ti kona n beku n tei ibukin aron ana mwakuri ni Kamaiu te Tia Kamaiu.
I tibwa te kabanea n katoto bwa e nakoraoi waakin te maiu aei.
Ai tinan Unimwaane Hales, Lois VandenBosch, ao tinana, Klea VandenBosch.
E aki bebete ana borau tinau rinanon te maiu aei. Akea te kaniwana ke te karine n te aonnaba aei ae reke irouna ao ana reirei e aki roko i aon te kauarinan. E reke irouna te tenaaki baina ngke e uarereke, n rootaki n te maraki ao te aki mwengaraoi n waena te maing. Ngke e a ikawai, e rinanon kangaanga ao e kataaki n te rabwata ao n ana karekemwane ma e teimatoa n onimaki nakon ana berita aika a tabu ao e tatangira te Uea.
Ngke 55 ana ririki tinau, e motirawa mwaneu ae ikawai riki, ao n tiku natina te aine ae uarereke ae waniua ana namwakaina, ai natiu te aine, ae akea tinana. N bukina aika a mwaiti, e a kaikawaa ai natiu te aine tinau i nanon 17 te ririki, n taainako ma te kekeiaki n arona. Ma, kangaangan ake e rinanona aikai, e kukurei ao n tatauraoi n beku ibukiia ana utu, kaain rarikina, kaain ana uoote ao ni beku bwa te tia mwakuria te otenanti n te tembora i nanon ririki aika a mwaiti. I nanon ririki ni kanian tokin maiuna, e reke iroun tinau te mwaninga ni iango, e minotaki ana iango n taainako, ao n katukaki n te tabo n tararua. Ma uruakin nanou, e tiku ikanne ni maroaa ni karokoa ae e a motirawa n aki kaantaningaaki.
Tabeua namwakina i mwiin matena, I mii. I aki kona ni mwainga miiu anne. I nanon miiu, I tekateka n au aobiti n Ana Tabo te Ekaretia. E rin tinau n te aobiti. I ataia bwa e roko man te aonaaba n tamnei. N na teimatoa n ururinga te namakin are E reke irou n te tai anne. E aki taetae, ma e kaota tamaraoan tamneina ae I tuai man nooria ao N aki kona ni kabwarabwara.
E rangi n tamaroa moana ao teina! I uringnga ae I kangai nakoina, “Tinau, ko rangi n tamaroa!,” n taekina mwaakan tamneina ao tikiraoina. E ongo are I taekinna —ma e bon aki taetae. I namakina ana tangira nakoiu, ao I ataia bwa e kukurei ao e kamaiuaki man bwaai ao kangaangan te aonaaba ao n kariaria te “mangauti ae mimitong.” I ataia ibukin Tinau. e nakoraoi waakin te maiu aei ibukina—ao e nakoraoi naba ibukira.
Ana mwakuri ao mimitongin te Atua bwae na uota te maiu ae aki mamate ao akea tokina nakon maiuia aomata. Waaki n te maiu aei bon kanoan te mwaninga are e karekea nakoira te rikirake nakon waakin te maiu aei ao te maiu ae akea tokina. Tiaki karuoaki ikai bwa ti na kabwaka ma ti na tokanikai n ana babaire te Atua ibukira.
E reirei te Uea Beniamina: “Ai moaraa riki, I tangiria bwa kam na iangoa te kakabwaia ma te aro ni kukurei irouia ake a kaawakin ana tua te Atua. Bwa taraia, a kakabwaiaki ni bwaai ni kabane, n te maiu n rabwata ao n tamnei; ao ngkana a teimatoa ni kakaonimaki ni karokoa te toki ao a na butimwaeaki mai karawa, ao a na maeka ma te Atua n te aro ni kukurei ae aki totoki.” Tariu ao mwaneu, e nakoraoi waakin te maiu aei!
I kaota au kakoaua ngkai ti karekei otenanti n te euangkerio, ti rin n berita aika a tabu ma te Atua ao ngkanne ti kawakin berita akanne, ti raira nanora, ti beku ibukiia aomata, ao n kakaonamaki ni karokoa te toki, ti kona naba ni karekea te kakoaua ao te onimaki iroun te Uea bwa e nakoraoi waakin te maiu aei! I kakoauaa Iesu Kristo ao maiura ae na roko ae mimitong ma Tamara are i Karawa e na bon reke man ana nanoanga ao Ana Mwakuri ni Kamaiu te Tia Kamaiu. N aran Iesu Kristo, amen.