Baina Aika a Tatauraoi ni Buokiira
Ngkana ti nakon Iesu Kristo n te onimaki, E na aki toki ni mena ikekei.
Ngke te tetei ngai, n ara utu ti nako ni motirawa n te bike i mataniwiin te aba i abau, Chile. I rang kukurei ni kabanei tabeua te bong ni kukurei n te tiamwa ma au utu. I bon kukurei naba ibukina I taku bwa I a kona ngkai n raoniia ao ni karaoi bwaai ake a kakaraoi tariu aika a ikawai aika a kaunga n te ran.
Te bong teuana tariu a nako n takakaro n te tabo are bwaro iai te nao, ao I namakinna bwa I a bon bubura man ikawai ni kona n iriia. Ngke I a waaki nakon te tabo anne, I a ataia bwa te nao a bubura riki nakon taraakiia man te bike. N te tai ae karina, te nao e biri ni kainetai, ni katikai n te aro ae I aki tauraoi iai. I namakina ae kaanga korakoran te aonaaba e a toka iaou, ao I a katikaki nako kabin marawa. Akea te bwai ae I kona n nooria ke n namakinna ngkai I a tiriboaki n aki akaka. Ngke I a taku bwa e a toki au tai aon te aba, I namakina te bai ae katikai ni kawaerakeai nako eta. N tokina, I a konaa n noora taai ao n rawea ikeu.
Tariu are Claudio e a tia n noora au kakatai ni kakan ikawai ao e roko ni kamaiuai. I aki rangi n raroa ma te bike. E ngae ngke e bon ora tari, I bon aki ata te bwai ae N na karaoia ao I aki ataia ngaia I bon kona ni karekea buokau I bon irou. E tuangai Claudio bwa I riai n taratara raoi ao ngkana I tangiria, e na konaa n rereinai. N aki tabe ma mwaitin te ran are I a tia n onga, au kainikatonga ao nanou ni kan roronga e bon korakora, ao I taku, “Ngaia.”
E tuangai Claudio bwa I riai ni kauntabaa te nao. I taku inanou N na bon konaaki ngkana I kataia n kaitaraa rabwatan te ran aei ae tei kanga te oo.ae bubura.
Ngke e a roko te nao ae bubura, e waekoa n taku Claudio: “Taraai; aio arona.” E biri Claudio ni kaineta te nao are e a roko ao e tebo inanona imwain are e bwaro. I rang mataai irouna n tebona n te aro are I aki noora te nao are imwiina are e a roko. Ngaia are I a manga uotaki nako naba nako kabin marawa ao n tiriboaki ni korakoran te nao. Tabeua te teekan imwiina, te bai e a taua baiu, ao I a manga katikaki naba ni kawaerakeaki ni karekea te eea. Korakoran ain au kainikatonga e a mauna nako.
N te tai aei tariu e kaoai bwa N na tebo ma ngaia. N iran ana kakao, I rimwiina, ao ti uaia n airi n tebo. I namakina ae kaanga I a tokanikai iaon te kakaewenako ae moan te kangaanga. E koaua, e bon aki beebete, ma I a konaa, e rabwa te ibuobuoki ao te katooto are e kaotia tariu. Baina e kamaiuai uoua te tai, ana banna ni katooto e tuangai arou ni kaitaraa au kangaanga ao n tokanikai n te bong arei.
Beretitenti Russell M. Nelson e a tia ni kaoira bwa tina iangoa n tiretio, ao I tangiria n ira ana reirei ao ni kamwakuria nakon au karaki n te tiamwa.
Mwaakan te Tia Kamaiu iaon te Kakaitara
Ngkana ti iangoa te tiretio, ti na ota bwa inanon maiura ti na kaitarai kangaanga ake a taraa ni korakora riki nakon ara konaa n tokanikai iaoia. Inanon ara tai n te maiu ae mamate, ti katauraoki bwa tina kaitara te tia kakaitara. N ai aron nao ake iai mwaakaia iaou ni bongin te tiamwa arei, ti kona n namakina memeren korakorara ma te nano ae konaaki n te korakora are riaon ara konaa. Nao aika “korakorakora” akanne a kona ni kauntabaira man teiterana nakon teiterana. Ma tai mwaninga bwa antai ae iai mwaakana iaon nao akanne, ao ni koauana, iaon bwaai ni kabane. Anne ara Tia Kamaiu, Iesu Kristo. Iai mwaakana ni buokiira n aro aika kamweengabuaka ke aro aika kaitara. N aki taraia ngkana ti namakina te kaniiaki Nakoina, E teimatoa ni kona n roko iroura n te tabo are ti mena iai ae ngkai.
Ngkai ti anga ngaira nakoina n te onimaki, E na mena ikekei n tainako, ao n oin Ana tai, E na tauraoi ao n tatauraoi n taui baira ao ni katikiira ni waerake nakon te tabo ae mano.
Te Tia Kamaiu ao Ana Katooto n Ana Mwakuri n Ibuobuoki
Ngkana ti iangoa te abanuea are tiretio, ti na kinaa Iesu Kristo bwa te banna ni katooto n te mwakuri n ibuobuoki ae akea kairuana. Iai te baeten ibukira n koroboki aika a tabu ngkana Ngaia ke Ana reirei a karoko iroun temanna ae kainnanoa te ibuobuoki, te kamaiuaki, ke te kakabwaia ngkai a kawariia ni buokiia. N aron au karaki, I ataia bwa tariu e mena ikekei, ma raonakiu irouna e bon aki tau. Claudio e ataia bwa I a reke n te kangaanga, ao e nako ni buokai n tabekai man te ran.
N tabetai, ti taku bwa tina tii mena ikekei ibukin temanna ae kainnanoa buokana, ao n angiin te tai, e bon mwaiti riki ae tina kona ni karaoia. Karekean te taratara ae akea tokina e kona ni buokiira ni karekei kaotioti n anga ni ibuobuoki iaon taina nakoia aomata ake a kainnanoia. Ti kona ni katan iaon ana kairiiri ao ana wirikiriki te Tamnei ae Raoiroi n atai aekakin ibuobuoki ake a kainnanoaki, ngkana te boutoka n te maiu n rabwata n aron te karaunano, te amwarake, te ibuobuoki n te mwakuri ni katoabong, ke te kairiiri n te maiu n tamnei nakoia aomata ake a kainnanoia iaon kawaia ni katauraoi, karaoi, ao ni karinei berita aika tabu.
E Tauraoi te Tia Kamaiu ni Kamaiuira
Ngke Betero, te Abotoro e, “nakonako iaon te ran, nakon Iesu … e maaku; ao e a tabe n inako,” imwiina “e tang, ni kangai, te Uea kona kamaiuai.” Iesu e ataa ana onimaki Betero bwa e kammwakuria n roko Nakoina iaon te ran. E ataia naba ae maaku Betero. Ni kaineti ma te karaki, Iesu “e waekoa … ni kanakoa baina, ao n raweia, ”taekini taeka aikai: “O ngkoe ae karako am onimaki, ko aera ngkai ko nanokokoraki?” Ana taeka e aki booa Betero ma e kauringnga bwa Ngaia, te Mesia, e mena irarikina ao ana reirei.
Ngkana ti iangoa te abanuea are tiretio, tina karekea te kamatoa inanora bwa Iesu Kristo bon ngaia ni koaua te Tia Kamaiuira, te Tia Tei Ibukira nakona te Tama, ao te Tia Kabooira. Ngkai ti kaota ara onimaki Ibukina, E na kamaiuira man arora ni bwaka, ao riaon ara kakaewenako, kabwakara, ao kainnanora n te maiu ae kai toki, ao n anganiira bwaintangira ni kabane aika korakora, are bon te maiu ae akea tokina.
E Aki Bwara Nanon Te Tia Kamaiu Iroura
Tariu e aki bwarannano irou n te bong arei ma e reitinako bwa I aonga n ataa arou ae N na karaoia i bon irou. E reitinako, e ngae ngke anne e kainnanoa kamaiuau uoua te tai. E reitinako, e ngae ngke I tuai kona ni karekea n te moan tai. E reitinako bwa I aonga ni kona n tokanikai n te kakaewenako anne ao n tokanikai. Ngkana ti iangoa te abanuea are tiretio, ti na ataia bwa ara Tia Kamaiu e na mena ikekei ni mwaitin te tai ae riai ni karekea te ibuobuoki ngkana ti tangiria n reiakinna, bitaki, tokanikai, ni kekeiaki, ke n tokanikai inanon bwaai nako ake e na uota te kukurei ae akea tokina ni koaua inanon maiura.
Bain te Tia Kamaiu
Koroboki aika a tabu a katanoatai kanikina ao kakawakin bain te Tia Kamaiu. N Ana karea ni kamaiu, Baina a ewaraki n te neera ni katokaaki iaon te kaibangaki. Imwiin Manga Utina, E kaoti nakoia Ana reirei n te rabwata ae kororaoi, ma mwaakan Baina a tiku bwa kauringaan ana Anganano ae akea tokina. Baina a na teimatoa ni tauraoi ikekei ibukira, riki ngkana ti aki kona n noori ke n namakini n te moan tai, ibukina E bon rineaki iroun Tamara are i Karawa bwa e na riki bwa ara Tia Kamaiu, te Tia Kabooia aomata ni kabane.
E na Reke Inanon Baira, iroun Jay Bryant Ward
Bain te Atua, iroun Yongsung Kim
Ngkana I iangoa te abanuea are tiretio, I ataia bwa ti aki kona n tiku n ti ngaira n te maiu aei. Ngkai ti riai ni kaitarai kakaewenako ao kataaki, Tamara are i Karawa e atai ara konabwai ao e ataia ti kona ni kaitarai ke n tokanikai iaon ara kangaanga. Ti riai ni karaoi ara itera ao n rairaki Nakoina inanon te onimaki. Natina ae Tangiraki, Iesu Kristo, bon te tia kamaiuira ao e na mena ikekei n taainako. N arana, ae tabu ae Iesu Kristo, amen.