E Bukamarua Ana Ka 100 n Ririki Beretitenti Nelson

Taan kairirii n Ana Ekaretia Iesu Kristo ibukiia Aika Itiaki ni Boong aika Kaitira a raoniia utu ao raao n Tebetembwa 9, 2024, ni karinea te burabeti ao ana Beretitenti te Ekaretia ae Russell M. Nelson ngke e koro raoi ana ka 100 n ririki.

E karaoaki te bukamaru aei i Salt Lake City ao ni katanoataaki n te kanakobwaana ni kabuta te aonaaba. E katauraoi katangitang aika a maiu, tamnei ma taeka ni karaoiroi ao ni karinerine mairouia taan kairiiri man aaro aika a kakaokoro, marooro mai irouia kaain te Ekaretia n tibwaia aron aia mwakuri n ibuobuoki nakon temanna.are e rootaki.

Beretitenti Nelson e karabwaia utu, raao, ao Aika Itiaki ibukin aia akoi ao aia boutoka. E tibwa ana kakaitau ibukin taeka ni katekeraoi ibukin ana koronririki aika aki kona ni warekaki mwaitiia ao te kaeka man te aonaaba nakon ana kakao ae kangai “99+1” ike e kaungai nanoia aomata bwa a na kawara temanna’ inanon maiura are e namakinna bwa e bua ke e maroaa.” (Facebook, Tuun 1, 2024, facebook.com/russell.m.nelson).

E katuruturua kakawakin te onimaki te burabeti, te taratara ae akea tokina iaon te maiu, ao ana anga karea ni kamaiu Iesu Kristo. “Tariu ao mwaaneu, e aki kakawaki bwa ananaura maium ma e kakawaki riki te anua ni maiu ae ko maiunna ngkai,” e taku Beretitenti Nelson. “Ngaira n tatabemaniira nako, n aron naba te mwaane ae e a koro 100 ana ririki, te maiu e rangi baitii. Au tataro bwa kam na kariaia te Uea bwa e na tautaekani maiumi. Karaoi berita aika tabu ma Ngaia. Tiiku ni kawain te berita ae tabu. Katauraoira bwa ti aonga n oki ni manga maeka ma Ngaia.”

Beretitenti Dallin H. Oaks ao Henry B. Eyring, ana kauntira Beretitenti Nelson n te Moan Beretitentii, a tibwa aia nonoori ngkai a kaai n ikarekebai ni mwakuri irarikin te burabeti inanon onoua ma te iterana te ririki. A katerea raoi nanon Beretitenti Nelson ni bubutimwaai, ao ni karinerine ibukiia tabeman, ao n aron ana banna ni katoto Kristo.

“N raonakim inanon te ruu ke n tain te boowi ke ni marooro ma Beretitenti Nelson e anganiko te tai are ko na namakinna bwa titebo ngke ko mena irarikin te Tia Kamaiu,” e taku Beretitenti Oaks. Bon Ngaia ana tia tei te Tia Kamaiu. Boni Ngaia ara banna ni katooto.”