E Na Manga Oki Kaua ara Uea Iesu Kristo

Iroun Beretitenti Russell M. Nelson

Beretitenti n ana Ekaretia Iesu Kristo ibukiia Aika Itiaki ni Boong aika Kaitira

Ngkai ai bon te tai ibukimi, ao ibukiu, ni katauraoi nakon Kauaokin ara Uea ao ara Tia Kamaiu, Iesu Kristo.

Tariu ao mwaaneu aika kam tangiraki, I kakaitau nakon te Uea ngkai e kona ni kakabwaiai bwa nna taetae nakoimi.

N te maungatabu aei, ao e taetae te Uea nakoira rinanoia Ana toro. I kaumaki ngkami bwa kam na kamatebwaia aia rongorongo. Kabonganai ni kunea bwa te raa ae eti ao ae kairua inanon onoua te namwakaina mangkai.

Kamatoaan ao kabouan te Salt Lake Tembora, ao tabeua tabo n te Tembora Tikuea, ae ea waaki n te maan ae nimaua te ririki. E kantaningaaki bwa e na tia te waaki ni karikirakeaei imwaain tokin 2026. Ti karabwaia ni kabane naake a mwakuri iaon te karikirake ae bubura aei.

I nanon onoua te namwakaina n nako, ti a tia ni katabui ke ni manga katabui ruaiua tembora n aba aika nimaua. Ni moa man te bong aei ni karokoa banen te ririki, ao ti na manga katabui riki nimaua tembora.

Ti kukurei n te tai aei ni katanoatai babaire ni katei 17 riki tembora. Taiaoka ni kakauongo raoi ngkana I katanoatai taian tabo.

• Juchitán de Zaragoza, Mexico

• Santa Ana, El Salvador

• Medellín, Colombia

• Santiago, Dominican Republic

• Puerto Montt, Chile

• Dublin, Ireland

• Milan, Italy

• Abuja, Nigeria

• Kampala, Uganda

• Maputo, Mozambique

• Coeur d’Alene, Idaho

• Queen Creek, Arizona

• El Paso, Texas

• Huntsville, Alabama

• Milwaukee, Wisconsin

• Summit, New Jersey

• Price, Utah

Tariu ao mwaneu aika kam tangiraki, kam nooria ni matami bwa tera ae riki? I tataro bwa ti na kabuai kakannaton te tai aei! E na kawaekoa ana mwakuri te Uea.

Bukin tera ngkai ti katei tembora ni kawaekoai nakon are mai imwaina? Bukin tera? Ibukina bwa ti tuangaki iroun te Uea bwa ti na karaoia. Te kakabwaia n te tembora bwa e buoka ikoikotakin Iteraera n iteran te rabuna aika uoua. Kakabwaia aikai a buokiia naba aomata ake a na buoka katauraoan te aonaaba ibukin Kauaokin te Tia Kamaiu!

N aron are taetae ni burabetiia Itaia, ao ni karaoaki n ana boki Hadel ae atunaki n Messiah, ngkana e oki Iesu Kristo, “ao e na kaotaki neboakin Iehova, ao a na bane aomata n uaia n nooria:”

N te bong anne “ao e na mena te tautaeka i aon angana; ao e na atongaki arana bwa te Tia reirei ae kamimi, te Atua ae Maka, te Tama ae e Akea Tokina, Te Uea n Raoi.”

E na tautaeka Iesu Kristo i Ierutarem are ngkoa ao n te Ierutarem ae Boou are “e kateaki i aon te kontenanti ae Amerika.” Man taabo aika uoua aikai, E na kaira waakin Ana Ekaretia.

N te bong anne, ao e na kinaaki te Uea “bwa aia King king ao aia Uea uea.” A na tokanikai naba raona ake a “weteaki, man rineaki, man kakaonimaki.”

Tariu ao mwaneu, aio bon te tai ibukimi, ao ibukiu ni katauraoi nakon Kauaokin ara Uea ao ara Tia Kamaiu, Iesu Kristo. Aio bon te tai ibukira bwa ti na moanibwaia iriiran Kristo. Ti na kanga ni karaoa aei, ngkai ti mena n te aonaba ae korakora iai te kakaitara?

Te nanako n nebonebo n te tembora e na buokiira. Inanon ana auti te Uea, ti bon katurua ara taratara i aon Iesu Kristo. Ti reiakina Taekana. Ti karaoai berita bwa ti na Iriiria. E na rikirake ara atatai Irouna. Ti karekea mwaakan te Uea n ae rangi ni korakora, ngkana ti kawakin ara berita aika tabu n te tembora. I nanon te tembora, ti karekei kamanoara man taian karawawata n te aonaaba. Ti na namakina ana tangira ae korakora ao ni kororaoi Iesu Kristo ao Tamara are i Karawa. Ti namakina te rau ao te mweraoi n tamneira, nakon namakina kangaanga n te aonaba aei.

Aio au berita nakoimi: Taan ukokoura ni koaua Iesu Kristo a na bon Kunea inanon te tembora. Ko na namakina Ana nanoanga. Ko na kunea kaekan am titiraki aika ko raraomaeakin. Ko na rikirake ni kukurei n Ana Euangkerio.

I kunea bwa te kabanea ni kakawaki n titiraki ae ti riai ni kaeka bon aei: Antai ke tera ae n anga maiu nakoina?

Au babaire bwa nna iriira Iesu Kristo bon te kabanea ni kakawaki ni babaire are I a tia ni karaoaia. N au tai n reirei n te kuura n taokita, ao I karekea au koaua i aon aroia n Atua Tamara are i Karawa ma Natina, Iesu Kristo. Ma ngaia are I unika maiu i aon te bwaa are ara Tia Kamaiu. E korakora te bitaki man au rinerine are I karaoia! Man karaoan au babaire anne ao a bebete ni kabane karaoan au babaire ake imwina. E a tia n anganai te kantaninga ao te kairaki au babaire anne. E a tia ni buokai n tokanikai i aon angibuka n te maiu. N na tibwauai uoua katooto:

Te moan, ngke motirawa man te maiu aei kainabau ae Dantzel, ao I bon aki te roko n reitaki ma au koraki n ataei. I tiku ni maroa, ma te rawawata, ma n tang ni kakaea buokau. I kakaitau, bwa man Tamneina, e reireinai te Uea bwa bukin tera raou ae tangiraki Dantzel e anaaki nakon mwengana. E rau nanou, n te kabwarabwara are i tuangaki. Inanon te tai, ao I tabe ni kona n taona rawawatau. Rimwii, ao I a mareaki ma kainabau ae tangiraki Wendy. Bon ngaia mwakoron te banna ni katooto ni maiu.

Ngke ti mena n te aba ae raroanako ibukin karaoan tibwangara, a tauai ma te kati taan ira ao ni kaineta tabon aia kati ni katiia atu. Ma e bon aki nako kanoan te kati. Te bwai are ti rinanona n te tai anne, bon te bwai ae kakamaaku inanon maiura. Ma ti teimatoa n namakina te rau ngai ma Wendy. Bon te rau “are e aki konaki n ataki teutana.”

Tariu ao Mwaneu, e na karau naba nanomi te Uea! E na kakorakorako. E na kakabwaiako ma te rau, inanon tain te mangaongao.

Taiaoka n kakauongo n ana berita Iesu Kristo nakoim: “N na mena i angataimi ao n angamaingimi, ao Tamneiu e na mena i nanomi, ao au anera a mena ibuakomi, n tabekiko rake.”

Bon akea tian ao tokin ana buoka te Tia Kamaiu nakoim. E korakai Iesu i Ketetemwane ao i Korokota ibukim! Ana Mwakuri ni Kamaiu bon ibukim!

I kaumakiko bwa ko na anga am tai ni katoa wiki, ni karokoa tokin maium, bwa ko na karikirakea am atatai i aon ana Mwakuri ni Kamaiu Iesu kristo. E rawawata nanou irouia naake a teimatoa inanon te bure ao n aki ata aroia n otinako mai iai. I tang irarikia naake a korakai n te maiu n tamnei ke naake a uouoti rawawataia i bon irouia ibukina bwa a tuai ni mataata n te bwai are e karaoia Iesu Kristo ibukia.

Iesu Kristo e katoka Iaona kairuami marakim, rawawatami, ao mamaramii. Ko aki uota te rawawata n tii ngkoe! E na kamaiuko man am bure ngkana ko raira nanom. E na kakabwaiako ma kainanom. E na kamaiuia tamneim ae ikoaki. Ngkana ko kaniiko ma Ngaia, ao e na kabeebetei uotam. Ngkana ko karaoi ao ni kawakin berita aika tabu n iriira Iesu Kristo, ao ko na kunea bwa e na karako ao n aki teimaan taai n rawawata inanon maium. Am kangaanga ni kabane a na “kabwautaki n kimwareirein Kristo”

Toe e na moantaai ke n oimwi iroum bwa ko na riki bwa ana reirei Iesu Kristo. Ma ko na namakina imwina taian kakabwaia ni kabane man ana Mwakuri ni Kamaiu. Ko na rang manena ibukin ikoikotan Iteraera.

Tariu ao mwaaneu aika kam tangiraki, ni bong aika imwaira, ao e na oki Iesu Kristo bwa te Mesia n te ngaa n ririki. Ma ngaia are n te bong aei I weteiko bwa ko na katabua maium nakon Iesu Kristo. I weteiko bwa ko na ibuobuoki n ikoikota Iteraera ae uamae ao ni katauraoa te aonaaba ibukin Kauaokin te Uea. I weteiko bwa ko na kaakarabakauakina Kristo, n kakoaua iroun Kristo, n onimaki iroun Kristo, ao ni kimwareirei iroun Kristo!

Kam na nakon Kristo ao “n anganna [tamneimi]” bwa ami karea Nakoina. Aio te kawai ibukin karekean te kimwareirei ni maium!

Tariu ao mwaneu aika kam tangiraki, a na bati baika a raraoi ni kaoti, ibukina bwa e na manga oki kaua ara Tia Kamaiu! A na bati baika a raraoi ni kaoti ibukina bwa e kawaekoa Ana mwakuri te Uea. A na bati baika a raraoi ni kaoti ngkana ti anga ngaira ma nanora nakon Iesu Kristo.

I kakoaua ma te nanorinano bwa Iesu Kristo bon Natin te Atua. Bon ngai Ana tia kakoaua. I kakatonga ngkai i riki bwa Ana toro. Ni Kauaokina, “e na kaotaki neboakin Iehova, ao a na bane aomata n uaia n nooria:” N te tai anne a na kaonaki n te kimwareirei aika raoiroi!

N mwaakan te king n te nakoanibonga ae tabu are e mena irou, I taekina te koaua aio nakoim ao nakon te aonaaba! N aran Iesu Kristo, amen.

Bwaai aika a na taraaki

1. Manga katabuan te Manti Utah Tembora (Beretitenti Russell M. Nelson, Eberi 21); Urdaneta Biribin Tembora (Beretitenti Dallin H. Oaks, Eberi 28); Puebla Mekitiko Tembora (Unimwaane Gerrit W. Gong, May 19); Taylorsville Utah Tembora (Unimwaane Gerrit W. Gong, Tuun 2); Coban Guatemala Tembora (Unimwaane Dale G. Renlund, Tuun 9); Salta Argentina Tembora (Unimwaane D. Todd Christofferson, Tuun 16); Layton Utah Tembora (Unimwaane David A. Bednar, Tuun 16); Pittsburgh Pennsylvania Tembora (Unimwaane Dieter F. Uchtdorf, Tebetembwa 15); Mendoza Aregentina Tembora (Unimwaane Ronald A. Rasband, Tebetembwa 22).

2. San Pedro Sula Honduras Tembora (Okitobwa 13); Salvador Brazil Tembora (Okitobwa 20); Deseret Peak Utah Tembora (Nobembwa 10); Casper Wyoming Tembora (Nobembwa 24); Tallahassee Florida Tembora (Ritembwa 8).

3. Taraa Reirei ao Berita aika Tabu 88:73.

4. Itaia 40:5; taraa naba George Frideric Handel, “And the Glory of the Lord,” man Messiah, ed. T. Tertius Noble (1912), 16–18.

5. Itaia 9:6.

6. Taraa Takaria 14:4–7; Reirei ao Berita aika Tabu 45:48–66; 133:19–21; taraa naba Mika 4:2: “Bwa e na taekinaki te tua mai Tion, ao ana taeka te Uea mai Ierutarem.”

7. Taekan te Onimaki 1:10; taraa naba Ita 13:3–10; Reirei ao Berita aika Tabu 84:2–4.

8. Kaotioti 19:16; Kaotioti 17:14.

9. Taraa Aramwa 34:32.

10. Ko na taekina are e atonga Amon, “bwa antai ae kona n tau aron kakatongana iroun te Uea? … Nooria, … I aki kona ni kabwarabwara are e uarereke are I namakinna” (Aramwa 26:16).

11. Taraa Ereman 5:12.

12. I-Biribi 4:7.

13. Reirei ao Berita aika Tabu 84:88.

14. Taraa Aramwa 7:11–12; taraa naba Ruka 4:18.

15. Taraa Aramwa 7:12.

16. Taraa Taian Areru 147:3; Iakoba 2:8.

17. Taraa Motiaea 24:14.

18. Aramwa 31:38.

19. Taraa 2 Nibwaai 25:26.

20. Ominai 1:26.